Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

Mũsyaĩĩsya  |  Na. 5 2016

 MBIVILIA NĨALYŨLAA ANDŨ

Nĩneew’aa Woo Mwingĩ Ngoonĩ na Naĩ Mũng’endu

Nĩneew’aa Woo Mwingĩ Ngoonĩ na Naĩ Mũng’endu
  • ASYAIWE MWAKA WA: 1974

  • NTHĨ ĨLA WUMĨTE: MEXICO

  • ĨVINDA ĨVĨTU: E WA MŨIKA, AĨ MŨNG’ENDU NA NĨWENDETE KŨKITA

KWĨANA KWAKWA:

Nasyaĩwe kĩsionĩ kyanake kĩtawa Ciudad Mante, kĩla kĩ mũsyĩnĩ wa Tamaulipas, Mexico. Andũ aingĩ ma kĩsio kĩu methĩawa me alau na me aseo. Ĩndĩ ũndũ wa kũmakya nĩ kana kĩsio kĩu kyaĩ na ikundi sya ing’endilĩ, na ũndũ ũsu nĩwatumaa kĩthĩwa kĩ kĩsio kĩthũku mũno.

Tũsyaĩtwe twĩ imwana inyia na ninyie wa kelĩ. Asyai makwa nĩmandwaie ngavatisĩwe Katholeki, na ĩtina wa ĩvinda nĩnalikile kwayanĩ ya makanisa ma Katholeki ala maĩ kĩsionĩ kĩu. Nĩnendaa mũno kũmwendeesya Ngai nũndũ nĩnakĩaa kwĩsa kũsilĩlwa na ndivĩvw’a ĩianĩ ya mwaki.

Nĩ na myaka ĩtano, ĩthe witũ nĩwatolokile mũsyĩ atũtia. Ũndũ ũsu nĩwanũmĩisye mũno na neethĩwa nde na wĩkwatyo. O na kau nĩtwamwendete mũno, ndyaaelewa kĩla kyatumie atoloka mũsyĩ. Ĩthe wakwa amina kũtoloka, inyia wakwa nĩwaendaa kũthũkũma vaasa na mũsyĩ masaa maingĩ mũno nĩ kana atũmanthĩe lĩu twĩ ana.

Nũndũ wa ũu, nĩnatolokaa sukulu nĩ kana ngatindany’e na syana ila syaĩ ngũũ mbee wakwa. Syana isu nĩsyamanyĩisye kũumana, kũnyw’a sikala, kũya, na kũkita. Na nũndũ nĩnendete kwĩthĩwa nĩ ĩũlũ wa andũ ala angĩ na nĩmasumbĩkĩte, nĩnaendie kwĩmanyĩsya kaũ wa mĩthemba yonthe vamwe na kũtũmĩa mĩio ya kaũ. Nĩneethĩiwe nĩ mũng’endu mũno nĩ wa mũika. Mavinda kwa mavinda nĩtwokitaa na mavuti, o na ve mavinda amwe naũmĩaa mũno vyũ nginya ngatiwa nĩ vakuvĩ kũkw’a. Inyia wakwa nĩwaũmĩaa ngoo mũno ambĩthĩa nĩvalũkĩte vau nĩmũũmĩu na aimbosa ainzembya sivitalĩ!

Nĩ na myaka 16, kĩmwana kĩmwe twaĩ ndũũ twĩ anini kĩtawa Jorge nĩkyookie mũsyĩ. Atwĩie kana nĩ Ngũsĩ ya Yeova na eenda kũtũtavya ũvoo wa vata. Nĩwambĩĩie kũtũtavya maũndũ ala ũĩkĩĩaa, na atũmĩaa Mbivilia. Ndyaĩ naasoma Mbivilia, na nĩnatanie mũno kũmanya syĩtwa ya Ngai na kĩeleelo kyake kwondũ wa nthĩ. Jorge nĩweeyumisye atũmanyĩasye Mbivilia na tweetĩkĩla.

ŨNDŨ MBIVILIA YAALYŨLILE MWĨKALĨLE WAKWA:

Neewie ta nathyũmũw’a ĩla namanyie ũmanyĩsyo wa kana andũ makavĩvwa ĩianĩ ya mwaki ndwĩ Mbivilianĩ. (Savuli 146:4; Mũtavan’ya 9:5) Ĩla namanyie ũu, nĩnaekie kwĩthĩwa na wia ĩũlũ wa Ngai.  Vandũ va ũu, nĩnambĩĩie kwona Ngai e Ĩthe wĩ wendo ũla wendeaa syana syake moseo.

O ũndũ naendeeie kwĩmanyĩsya Mbivilia, now’o noonaa naĩle kũalyũla mwĩkalĩle wakwa. Nĩnendaa kwĩthĩwa na wĩnyivyo na ndiekana na ũng’endu. Ũtao ũla wĩ ĩandĩkonĩ ya 1 Akolintho 15:33 nĩwandetheeisye mũno. Ũtao ũsu wonanĩtye kana itindo nthũku “nĩsyanangaa mwĩkalĩle mũseo.” Nĩnamanyie kana nĩ kenda nĩekane vyũ na mwĩkalĩle mũthũku, naaĩle kũekana na itindo nthũku. Kwoou nĩnaekie kũtindany’a na andũ ala maĩ anyanyawa tene, na namantha kĩtindo kĩseo nthĩnĩ wa kĩkundi kya Kĩklĩsto nũndũ nĩkyo kĩthĩawa na andũ maminaa mathĩna moo matũmĩĩte myolooto ya Mbivilia, vandũ va kũkita.

Ĩandĩko yĩngĩ yandetheeisye mũno kũalyũla mwĩkalĩle wakwa nĩ Alomi 12:17-19. Ĩandĩko yĩu yaĩtye atĩĩ: “Mũikekũle kwa mũndũ o na wĩva. . . . Ethĩwa nũtonyeka, kwa ngalĩ ĩla yenyu, mwĩthĩwe na mũuo na andũ onthe. Mũikeĩvanĩsye, . . . nũndũ nĩkũandĩkĩtwe, Ũĩvanĩsyo nĩ wakwa; ngaĩvanĩsya, easya ũu Ngai.” Nĩnesie kwĩtĩkĩla kana Yeova nĩwe ũkavetanga ũsili ũte wa katĩ ĩvindanĩ yake na kwa nzĩa yake. O kavola kwa kavola, nĩnaekie kwĩthĩwa nĩ mũng’endu.

Ndikolwa nĩ ũndũ ũmwe weekĩkie nĩnũkĩte ĩa-mawĩoo. Kĩkundi kĩmwe kya imwana ila tweethĩawa ĩmwe maũndũnĩ ma ũng’endilĩ nĩkyambũie, na mũtongoi wamo angũna mũongo na ambĩa, “Ethĩwa wĩ mũndũũme ĩtetee!” Saanĩ ũsu nĩnavoyie o mboya nguvĩ, na namũkũlya Yeova anenge vinya nĩyũmĩĩsye. O na kau neew’aa ndyenda kwĩyĩĩvanĩsya, naumie vau ndeka ũndũ mũthũku. Mũthenya ũla waatĩĩe, nĩnakomanie na mũtongoi wa kĩkundi kĩu kya imwana isu e weka. Nĩnathatie mũno ĩla namwonie na neew’a naĩle kwĩyĩĩvanĩsya, ĩndĩ nĩnamũvoyie Yeova ĩngĩ andetheesye ndikaĩvanĩsye. Ũndũ ũla wanzeng’isye nĩ kana kĩmwana kĩu kyookie vala nĩĩ na kyambĩa atĩĩ: “Mwa ndekea nũndũ wa maũndũ ala mekĩkie ĩyoo wĩoo. No nende ngethĩwa nĩilyĩ taku. Nĩenda kwĩmanyĩsya Mbivilia.” Natanie mũno nũndũ nĩnesiĩĩie ndikeke ũndũ ũtaĩle! Na nũndũ wa ũu, nĩtwambĩĩie kwĩmanyĩsya Mbivilia nĩ na mwanake ũsu.

Ĩndĩ ũndũ wa kũmakya nĩ kana ĩvindanĩ yĩu tweemanyĩasya, andũ ala angĩ ma mũsyĩ nĩmaemiwe nĩ kũendeea kwĩmanyĩsya Mbivilia. Ĩndĩ nĩnavangie kana ndiĩtĩkĩla kĩndũ o na kĩmwe kĩnziĩĩe kwĩmanyĩsya Mbivilia. Nĩneesĩ kana naendeea kwĩthĩwa na ngwatanĩo na andũ ma Ngai, ngeethĩwa nĩ mũtanu na ndyĩthĩwa na ana-a-asa na eĩtu-a-asa manthĩnĩkĩaa. Nĩnaendeeie kwĩka maendeeo ma kĩ-veva, na mwakanĩ wa 1991, navatiswa na neethĩwa nĩ Ngũsĩ ya Yeova.

MOATHIMO ALA NĨKWATĨTE:

Mbeenĩ, nĩnew’aa woo, nĩnendete kũsumbĩka andũ, na naĩ mũng’endu. Ĩndĩ ndeto ya Ngai nĩalyũlĩte mwĩkalĩle wakwa vyũ. Yu nĩnĩtavasya andũ ala mekwendeew’a ũvoo mũseo wa mũuo ũla wĩ Mbivilianĩ. O na nĩnĩthĩĩtwe ũthũkũminĩ wa ĩvinda yonthe kwa myaka 23 mĩvĩtu.

Ve ĩvinda neeyumisye ngatetheesye wĩa ovisinĩ wa ũvonge wa Ngũsĩ sya Yeova ũla wĩ Mexico. Nĩ ovisinĩ ũsu, nĩnakomanie na mũndũ mũka mwanake wĩtawa Claudia, na twatwaana mwaka wa 1999. Nĩnĩmũtũngĩaa Yeova mũvea nũndũ wa kũngathima na kĩveti kĩseo na kĩĩkĩĩku!

Nĩtwaendie kĩkundinĩ kya kĩthyomo kya ala matew’aa kya nthĩ ya Mexico kũtetheesya andũ memanyĩsye ĩũlũ wa Yeova. Ĩtina wa ĩvinda nĩtweeiwe tũthamĩĩe nthĩ ya Belize tũkamanyĩsye andũ Mbivilia. O na kau tũyĩthĩawa na syĩndũ mbingĩ sya kĩ-mwĩĩ, nĩtwĩthĩawa na kyonthe kĩla twendaa nĩ kana twĩthĩwe twĩ atanu. Vai kĩndũ kĩtonya kũtuma tũeka kũmũthũkũma Yeova.

Inyia wakwa nĩwesie kwambĩĩa kwĩmanyĩsya Mbivilia ĩngĩ na avatiswa. O na mũkũũa na kĩveti kyake na syana syoo yu nĩ Ngũsĩ sya Yeova. O na ve anyanyawa amwe natavasya ũvoo mũseo matw’ĩkie athũkũmi ma Yeova.

Ũndũ wa kũmakya nĩ kana, andũ amwe ma mũsyĩ nĩmakwie nũndũ mayaaĩtĩkĩla kũalyũla mwĩkalĩle woo mũthũku. O nakwa keka nĩnaendeeie kwĩthĩwa na mwĩkalĩle ũsu mũthũku, nĩvatonyeka ngethĩwa nakwie. Nĩnĩmũtũngĩaa Yeova mũvea mũno nũndũ nĩwangusisye kwake. O na nĩnĩmũtũngĩaa mũvea nũndũ nĩwangusisye kwa athaithi make ala mamanyĩisye me na wũmĩĩsyo kũtũmĩa myolooto ya Mbivilia thayũnĩ wakwa.