Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

Mũsyaĩĩsya  |  Na. 5 2017

 KYONGO KYA ĨTHANGŨ YA MBEE | ALAĨKA ME KW’O? NA MATŨTETHASYA ATA?

Kwĩ Alaĩka Athũku?

Kwĩ Alaĩka Athũku?

Ĩĩ, me kw’o. Maumie va? Lilikana kana Ngai oombie alaĩka me na ũthasyo wa kwĩnyuvĩa. Ĩvinda ĩnini kuma Atamu na Eva moombwa, ve mũlaĩka watũmĩie naĩ ũthasyo wake wa kwĩnyuvĩa na ambĩĩsya ũlei vaa nthĩ. Mũvango wa mũlaĩka ũsu nĩweanĩie nũndũ nĩwatumie Atamu na Eva maleana na Ngai. (Mwambĩlĩlyo 3:1-7; Ũvuan’yo 12:9) Mbivilia ndĩwetete nesa vyũ ĩsyĩtwa na kĩanda kya mũlaĩka ũsu e ĩtunĩ atanamba kũleana na Ngai. Ĩndĩ mũlaĩka ũsu amina kũleana na Ngai, eetiwe Satani, kwonany’a “Mũvinganĩsya,” na Ndevili, kwonany’a “Mũsukani.”—Mathayo 4:8-11.

Ũndũ wa kũmakya nĩ kana ũlei ũsu nĩwaendeeie. Ĩvindanĩ ya Noa, ve alaĩka matawetetwe ũtalo woo ala “matiie ũtũo woo ũla wamaĩle” ĩtunĩ, vala Ngai wĩkalaa. Alaĩka asu nĩmookie kũũ nthĩ na meeyosea mĩĩ ya nyama nĩ kana meke ũlaalai, kĩvathũkany’o na ũndũ Ngai wavangĩte kwondũ woo.—Yuta 6; Mwambĩlĩlyo 6:1-4; 1 Vetelo 3:19, 20.

Nĩ kyaũ kyakwatie alaĩka asu athũku? Ĩla Ngai waetie mbua nene nĩ kana athesye nthĩ, alaĩka asu nĩmatiie mĩĩ ya nyama ĩla maĩ nayo na masyoka ĩtunĩ. Ĩndĩ Ngai ndaaĩtĩkĩlya alaĩka asu mataĩ aĩkĩĩku masyokee “ũnene woo ene.” Vandũ va ũu, amalikilye “kĩvindunĩ” kingĩ kya kĩ-veva kĩla Mbivilia yĩtaa Talitalo. (Yuta 6; 2 Vetelo 2:4, NWT) Alaĩka asu athũku nĩmanyuvie kũtongoew’a nĩ Satani ũla Ndevili, “mũnene wa ndaimoni,” ũla ‘wĩyĩalyũlaa mwene ethĩwe ta mũlaĩka wa kyeni.’—Mathayo 12:24; 2 Akolintho 11:14.

Mbivilia ĩmanyĩasya kana Ũsumbĩ wa Masia wa Ngai nĩ silikalĩ ya ĩtunĩ yambĩĩe kũsumbĩka mwaka wa 1914. * Ũsumbĩ ũsu wambĩĩa kũsumbĩka, Satani na ndaimoni syake nĩmalũngilw’e ĩtunĩ na mekw’a kũũ nthĩ. Maũndũ mathũku ala maendeee ĩũlũ wa nthĩ vamwe na ũndũ andũ mendete kwĩka ũlaalai meĩkĩĩthya kana Satani na ndaimoni syake me na ũthilĩku mwingĩ na nĩmaendeee kũtongoesya andũ naĩ vyũ.—Ũvuan’yo 12:9-12.

Ĩndĩ ũthũku mwingĩ ũla ũendeee kwongeleka ĩũlũ wa nthĩ wĩonany’a kana ũtongoi mũthũku wa Satani na ndaimoni syake wĩ vakuvĩ kũthela. O mĩtũkĩ syũmbe isu nthũku sya veva ikaanangwa. Ĩla Ũsumbĩ wa Ngai ũkamina kũsumbĩka ĩũlũ wa nthĩ nzaũ kwa myaka 1,000, syũmbe isu nthũku sya veva ikeethĩwa na kamwanya kanini ka kũtata andũ ya mũthya. Ĩtina wa ũu, alaĩka asu athũku makaanangwa tene na tene.—Mathayo 25:41; Ũvuan’yo 20:1-3, 7-10.

^ kal. 6 Nĩ kana ũkwate ũvoo mwingangĩ ĩũlũ wa Ũsumbĩ wa Ngai, sisya kĩlungu kya 8 kya ĩvuku Mbivilia Yo Ĩmanyĩasya Ata?, yĩla yumĩthĩtw’e nĩ Ngũsĩ sya Yeova. O na no ũyĩkwate Kĩsesenĩ kya www.jw.org/kam.