Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

Mũsyaĩĩsya  |  Na. 4 2016

 KYONGO KYA ĨTHANGŨ YA MBEE | MBIVILIA YUMĨTE VAASA!

Mbivilia Ndyaanangĩka O na Kau Yaĩ Ĩtonya Kwoa

Mbivilia Ndyaanangĩka O na Kau Yaĩ Ĩtonya Kwoa

MŨISYO ŨLA WAĨ VO: Makangaa na kĩthuma nĩsyo syatũmĩawa mũno nĩ aandĩki ma Mbivilia na ala mesie kũmyumĩĩsya. * (2 Timotheo 4:13) Syĩndũ isu syatũmĩawa kũandĩka Mbivilia syatumie ata yĩthĩwa yĩ mũisyonĩ mũnene wa kwanangĩka?

Makangaa nĩmakũaa laisi, nĩmanangĩkaa mĩtũkĩ na maithela langi. Asomi metawa Richard Parkinson na Stephen Quirke maisye atĩĩ: “Ĩkangaa yoaa mĩtũkĩ na yĩitw’ĩka ndii na yĩyambĩĩa kwĩtĩka ta mũtutu.” Mongeleeile kwasya: “Ĩla ĩvuku yĩseũvĩtw’e na makangaa yaiwa yĩ ĩkũnze no yĩmesye mbuka, yĩkoa kana yĩkaĩwa nĩ tũsamũ ta mũthwa.” Mavuku amwe ma makangaa mamina kwoneka, malekeilwe sua kana ũthithu na ũndũ ũsu nĩwatumie manangĩka na mĩtũkĩ.

Kĩthuma nĩkyo kĩkalaa ĩvinda ĩasa kwĩ ĩkangaa ĩndĩ o nakyo nĩkyanangĩkaa na mĩtũkĩ kyalekelw’a sua, kana ũthithu. * O na nĩkĩĩsawa nĩ tũsamũ. Ĩvuku yĩtawa Everyday Writing in the Graeco-Roman East, ĩyĩelesya ĩũlũ wa mavuku ala maandĩkiwe tene yaĩtye kana “ndyaĩ laisi kwa mavuku ala maandĩkawa tene kwĩkala ĩvinda ĩasa.” Kwoou keka mavuku asu nĩmaanangĩkie, tũyĩsa kũkwata ũvoo ũla wĩ Mbivilianĩ.

KĨLA KYATUMIE MBIVILIA ĨTATHELA: Mĩao ya Ayuti yaĩtye kana Asumbĩ onthe maaĩle ‘kwĩyumĩĩsya ũandĩko wa mĩao ĩvukunĩ.’ Mĩao ĩsu yaĩ ala mavuku atano ma mbee ma Mbivilia. (Kũtũngĩlĩlwa Kwa Mĩao 17:18) O na aandĩki me na ũtũĩka nĩmaumĩĩisye mavuku maingĩ mũno ma Maandĩko ala maĩ mavukunĩ ma tene, nginya tũivika myakanĩ ya mbee 100 Klĩsto aminĩte kũsyawa weethĩa Maandĩko no makwatĩkane masinakokenĩ onthe ala maĩ Isilaeli na masinakokenĩ ala maĩ Masetonia. (Luka 4:16, 17; Meko ma Atũmwa 17:11) Veethĩiwe ata nginya weethĩa ũmũnthĩ no tũkwate mavuku amwe ma tene ala matũmĩawa kũalyũla Mbivilia?

Mavuku ma tene ala matũmĩawa kũalyũla Mbivilia metawa Mavuku ma Ũkanga wa Mũnyũ maĩ na myaka mingĩ na meethĩiwe maiĩtwe mĩtũnginĩ ya yũmba na ĩkaiwa ngunganĩ nũmũ vyũ

Mũsomi ũmwe wa Maandĩko ma Kĩkiliki wĩtawa Philip W. Comfort aĩtye atĩĩ: “Ayuti nĩmeekĩaa mavuku ma kũkũnzwa mĩtũnginĩ ĩseũvĩtw’e na yũmba nĩ kana mavuku asu masũvĩĩke.” Nĩvatonyeka o namo Aklĩsto makethĩwa maatĩĩie nzĩa ĩsu ya kwia mavuku. Na nũndũ wa ũu, mavuku amwe ma tene ala matũmĩkaa kũalyũla Mbivilia nĩmeethĩawa mĩtũnginĩ ĩseũvĩtw’e na yũmba kana mavingĩwe masandũkũnĩ kana makethĩwa ngunganĩ na kũndũ kwaĩ kũmũ vyũ.

ŨNDŨ ŨSU ŨTETHETYE ATA?: Mavuku maingĩ ma tene ala matũmĩawa kũandĩka Mbivilia mevo o na ũmũnthĩ. Amwe ma mavuku asu me na ũkũũ wa myaka mbee wa 2,000. Vai ĩvuku yĩngĩ ya tene yĩ mavuku matonya kũtũmĩwa kũyĩalyũla na makũũ ta asu ma Mbivilia.

^ kal. 3 Makangaa ala maandĩkawa maseũvaw’a kuma makangaanĩ ala mameaa kĩw’ũnĩ. Nakyo kĩthuma kyeethĩawa kyumĩte nyamũnĩ.

^ kal. 5 Kwa ngelekany’o, ũandĩko ũla weekĩiwe saii ĩla Amelika yakwatie wĩyathi (U.S. Declaration of Independence) waandĩkĩtwe kĩthumanĩ. Ĩndĩ yu nĩvathelete myaka ta 250 kuma ũandĩko ũsu waandĩkwa, na ndeto ila syĩ vo iendeee ivutĩkĩte ũkethĩa iyĩsa kũsomeka nesa.