“Ngai ekaa nesa mavinda onthe. . . . Eka . . . kũĩa.”

Mũndũ mũka ũmwe wĩtawa Bebe nĩwe wataviw’e ndeto isu na kĩwe e mathikonĩ ma ĩthe wake ũla wakwie kumana na mũisyo wa lelũnĩ.

Bebe nĩwendete ĩthe wake mũno. Ataviw’e ndeto isu nĩ mũndũ maĩ ndũũ, ĩndĩ ndeto isu syeekie kũmũũmĩsya vandũ va kũmũkiakisya. Atindĩaa kwasya ũũ ngoonĩ yake, “Ĩthe wakwa ndanaaĩle kũkw’a.” Ĩtina wa myaka yĩana ũndũ mũna, Bebe nĩwaeleisye ũndũ ũsu ĩvukunĩ, na maelesyo make moonany’a kana aĩ o na kyeva.

O tondũ Bebe wesie kũmanya, mũndũ nũkuaa ĩvinda yĩasa e na kyeva, na mũno mũno ethĩwa ũla ũkw’ĩĩwe nũnendete ũla ũnakwie. Mbivilia nĩeleetye nesa kana kĩkw’ũ nĩkyo “mũmaitha wa mũminũkĩlyo.” (1 Akolintho 15:26) Kĩkw’ũ kyũkaa tũtataĩĩe na vai mũndũ wĩsa kũkĩsiĩĩa, nĩkĩminaa andũ ala twendete. Vai mũndũ ũtonya kwĩsianĩa na kyeva kĩla kĩkwataa mũndũ ĩtina wa kũkw’ĩĩwa. Kwoou, ti ũsengy’o kwĩthĩwa na kyeva kingĩ ĩla wakw’ĩĩwa.

No wĩthĩwe wĩkũlasya: ‘Mũndũ akw’ĩĩwa atonya kwĩthĩwa na kyeva ĩvinda yĩana ata? Mũndũ atonya ata kũmĩanĩsya na kyeva? Ndonya ata kũmakiakisya ala makw’ĩĩwe? Ve wĩkwatyo kwa andũ ala makwie?’