Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

Mũsyaĩĩsya (Ĩkaseti ya Kwĩmanyĩsya)  |  MWEI WA 7 2017

Alisa

Nĩmeeyumisye Mo Ene na Ngenda—Turkey

Nĩmeeyumisye Mo Ene na Ngenda—Turkey

AKLĨSTO ma ĩvinda ya atũmwa nĩmeekĩie kĩthito kingĩ matavye andũ aingĩ ũndũ vatonyeka ‘ũvoo mũseo wa Ũsumbĩ.’ (Mt. 24:14) O na angĩ nĩmaendie kũtavany’a nthĩ ingĩ. Kwa ngelekany’o, mũtũmwa Vaulo nĩwatavanisye mũno kĩsionĩ kĩmwe kĩla ũmũnthĩ kĩtawa Turkey. Ĩvinda yĩu aĩ kyalonĩ kyake kya ũmisonalĩ. * Twĩ mwakanĩ wa 2014, myaka ta 2,000 kuma ĩvinda yĩu ya Vaulo, ve kambeini ya mwanya ya kũtavany’a yeekiwe nthĩ ya Turkey. Nĩkĩ yeekiwe? Naaũ maĩ kambeininĩ ĩsu?

“NĨ KYAŨ KĨENDEEE?”

Nthĩ ya Turkey yĩ andũ milioni 79, namo atavany’a nĩ mbee wa 2,800. Kwoou katĩ wa andũ 28,000 mũtavany’a no ta 1. Kĩu kĩonany’a no andũ avũthũ ala matavĩtw’e ũvoo mũseo nthĩ ĩsu. Kĩla kyatumie kambeini ĩsu ĩvangwa nĩ kana ana-a-asa mendaa andũ aingĩ ũndũ vatonyeka matavw’e ũvoo kwa kavinda kakuvĩ. Ana-a-asa na eĩtu-a-asa ta 550 maneenaa kĩthyomo kya Turkish nĩmaumie nthĩ ingĩ mathi Turkey nĩ kana matavany’e vamwe na atavany’a ma kũu ĩvinda ya kambeini ĩsu. Kwaendie ata?

Ũkũsĩ nĩwaumiw’e kĩsionĩ kĩnene. Kĩkundi kĩmwe kĩ Istanbul kyaandĩkie ũũ: “Andũ matwona makũlasya, ‘Ko kwĩ na ũmbano wa mwanya? Kĩla vandũ wasisya no Ngũsĩ sya Yeova!’” Nakyo kĩkundi kĩ taoninĩ ya Izmir kyaandĩkie: “Mũndũ ũmwe wathũkũmaa kwa taxi atumũisye mũtumĩa ũmwe wa kĩkundi wa kũũ amũkũlya, ‘Nĩ kyaũ kĩendeee? Mbona mwĩ na kĩthito kingĩ mũtanaĩ nakyo?’” Ũndũ ũsu wĩonany’a kana kĩla mũndũ nĩwamanyie ve kambeini ĩendeee.

Steffen

Atavany’a ala maumĩte nthĩ ingĩ nĩmatanĩie mũno kũtavany’a. Steffen aumĩte Denmark, na aisye: “Kĩla mũthenya nĩnakomanaa na andũ mataaĩw’a ĩũlũ wa Yeova. Kĩu kyatumie nĩw’a kana nĩnatatĩte vyũ kũmanyĩthya andũ ĩsyĩtwa ya Yeova.” Nake Jean-David, kuma France, aandĩkie: “Nĩngũlilikana ũndũ twaminie masaa maingĩ kasĩlanĩ kamwe tũitavany’a. Twatanĩie ta kĩ! Andũ aingĩ mayeesĩ Ngũsĩ sya Yeova. Vakuvĩ kĩla nyũmba nĩtwakitasya mũndũ tũtonya kũneena nake, tũkamwony’a vitio, na tũkamũtiĩa ĩvuku.”

Jean-David (katĩ)

Atavany’a asu 550 manenganie mavuku vakuvĩ 60,000 kwa ĩvinda ya syumwa ilĩ tũ! Vate nzika, ũkũsĩ nĩwaumiw’e kĩsionĩ kĩnene.

 Atavany’a nĩmathangaaie mũnango. Kambeini ĩsu nĩyathangaaisye ana-a-asa ma Turkey. Aingĩ nĩmambĩĩie kwenda ũthũkũmi wa ĩvinda yonthe. O na kwa ĩvinda ya myei 12 ĩtina wa kambeini ĩsu, nĩkwongelekile mavainia ma kĩla ĩvinda 82.

Şirin

Atavany’a ala maumĩte nthĩ ingĩ nĩmawetie ũndũ kambeini ĩsu yatumie menda ũtavany’a mũno o na ĩtina wa kũsyoka kwoo. Mwĩĩtu-a-asa wĩtawa Şirin wa kuma Germany aĩtye: “Ana-a-asa ma Turkey maikĩaa kũtavany’a ĩla me maũndũnĩ moo. Nyie nĩw’aa nthoni mũno kũtavany’a ĩla nĩ maũndũnĩ makwa. Ĩndĩ nũndũ wa kambeini ĩsu, kwona ngelekany’o nzeo ya ana-a-asa ma Turkey, na kũvoya na kĩthito, nĩnakwatie ũkũmbaũ wa kũtavany’a ĩla nĩ maũndũnĩ makwa. O na nĩnatavanisye vandũ vaũngamaa ngalĩ sya mwaki na nanengane tulakiti mbingĩ! Yu ndi na nthoni ila naĩ nasyo.”

Johannes

Mwĩĩtu-a-asa wĩtawa Johannes, kuma Germany, aisye: “Nĩneemanyĩisye maũndũ ndonya kwĩka ĩla ngũtavany’a. Ana-a-asa ma Turkey nĩmendete mũno kũtavya andũ aingĩ ũndũ vatonyeka ũla w’o. Maileaa kũtavany’a kĩla ĩvinda vaumĩla mwanya. Nakwa nĩnatwie kwĩka oou nasyoka Germany. Nũndũ wa ũu, yu nĩtavasya andũ aingĩ ũvoo kwĩ ũndũ neekaa.”

Zeynep

Nake Zeynep, kuma France, aisye: “Kambeini ĩsu yandethisye mũno naaĩlangya ũtavany’a wakwa. O na nĩyandetheeisye neethĩwa na ũkũmbaũ mwingangĩ na namwĩkwatya Yeova mũnango.”

Atavany’a nĩmendanie mũnango. Ngwatanĩo ĩla yaĩ vo katĩ wa ana-a-asa na wendo ũla maĩ naw’o o na kau maĩ ma nthĩ syĩ kĩvathũkany’o, nĩ maũndũ matamba kũla. Jean-David, ũla wawetwa, aisye: “Nĩtweeyĩw’ĩie ũndũ wendo wa ana-a-asa ‘ũsamaa.’” O na aisye: “Matwosie ta anyanya vyũ na ta andũ moo ma mũsyĩ. Nĩmatũthokisye kwoo. Nĩneesĩ nĩtwendanĩte o na ethĩwa twĩ ma nthĩ yĩva, nĩkwĩthĩwa nĩnasomete kĩu mavinda maingĩ mavukunĩ maitũ. Ĩndĩ ĩvinda yĩu nĩneeyoneie ũndũ ũsu na metho makwa. Kuma ĩvinda yĩu nĩw’aa ne ndaĩa nene vyũ kwĩthĩwa nĩ ũmwe wa andũ ma Yeova, na nĩnĩmũtũngĩaa mũvea nũndũ wa ndaĩa ĩsu.”

Claire (katĩ)

O nake Claire, kuma France, aisye ũũ: “Twĩthĩwe twaĩ ma Denmark, France, Germany, kana Turkey,  ithyonthe twailyĩ andũ ma mũsyĩ ũmwe. No nasye Ngai nĩ ta woosete kĩvuti akavuta mĩvaka yonthe ĩla ĩsoletwe ya kũaany’a nthĩ isu.”

Stéphanie (katĩ)

Na ĩndĩ ve Stéphanie, kuma France, ũla waisye atĩĩ: “Kambeini ĩsu ya mwanya yatũmanyĩisye kana ngwatanĩo yitũ yĩ vo nũndũ ithyonthe nĩtũmwendete Yeova, ĩndĩ ti ũndũ wa syĩthĩo kana ithyomo sitũ.”

IKUNDI NITETHEKETE MŨNO KŨVIKA O NA ŨMŨNTHĨ

Aingĩ ala maĩ kambeninĩ ĩsu nĩmambĩĩe kũsũanĩa kũthamĩĩa Turkey nĩ kenda matetheesye kũtavany’a nũndũ nthĩ ĩsu yĩ na vata mũnene wa atavany’a. Aingĩ moo nĩmosete ĩtambya yĩu. Ana-a-asa nĩmew’aa mũyo mũno nũndũ wa atavany’a asu metũmĩte kĩsionĩ kĩu.

Kwasũanĩa ĩũlũ wa kakundi kamwe ke koka vandũ kala kaĩ na atavany’a 25. Kakundi kau kaminĩte myaka ke na mũtumĩa o ũmwe wa kĩkundi. We wĩona atavany’a asu ta meewie mũyo wĩana ata ĩla mwakanĩ wa 2015, atavany’a thanthatũ kuma Germany na Netherlands mathamĩĩie kũu mamatetheesye?

KŨTETHEESYA VALA VE NA VATA MŨNENE WA ATAVANY’A

Ala metũmĩte Turkey maasya ata masũanĩa ĩvinda yĩla mekalĩte kũu? Nĩ w’o kana mavinda amwe maũndũ methĩawa me metu, ĩndĩ nĩmakwatĩte moathimo maingĩ me kĩsionĩ kĩu kĩ na vata mũnene wa atavany’a. Kwasisya ũndũ amwe maĩtye:

Federico

Mwana-a-asa ũtwaanĩte na wĩ na myaka 40 na kĩndũ wĩtawa Federico, ũla waumie Spain athi Turkey, aisye: “Nĩw’aa kwĩkala nde na syĩndũ mbingĩ sya kĩ-mwĩĩ kũinenga nzeve na nĩkũtumaa nĩtũngĩanĩa kĩlĩko kyakwa maũndũnĩ ala ma vata vyũ.” We no ekĩe angĩ vinya meke o take? Easya: “Ĩĩ, vyũ! Ĩla wathamĩĩa nthĩ ĩngĩ nĩ kana ũtetheesye andũ mamũmanye Yeova, wĩthĩawa weenengane mokonĩ make. Ũkwataa mwanya mũseo vyũ wa kwona Yeova aikũsũvĩa.”

Rudy

Mwana-a-asa ũtwaanĩte wĩtawa Rudy, kuma Netherlands, ũla wangĩe myaka 60, aĩtye ũũ:  “Kũtavany’a kũla kwĩ na vata mũnene wa atavany’a na kũtavya ũw’o andũ aingĩ vyũ mataaĩsa kũwĩw’a o na ĩndĩĩ, kũtumaa twĩw’a twĩ eanĩe vyũ. Tũtanaa mũno ĩla twoona ũndũ andũ mekwĩw’a mũyo nũndũ wa kũmanya ũla w’o.”

Sascha

Mwana-a-asa ũtwaanĩte wĩtawa Sascha, kuma Germany, ũla wĩ na myaka 40 na kĩndũ, aĩtye ũũ: “Kĩla ĩvinda nathi kũtavany’a nĩkomanaa na andũ mataaĩw’a ũla w’o. Kũtavya andũ ta asu ĩũlũ wa Yeova kũndeteae ũtanu mwingĩ mũno.”

Atsuko

Mwĩĩtu-a-asa mũtwae wĩtawa Atsuko, kuma Japan, ũla wĩ na myaka 30 na kĩndũ, aĩtye ũũ: “Navu ĩtina nĩneekũlasya Ali–Maketoni ĩkavika ĩndĩĩ. Ĩndĩ kuma ĩla nookie Turkey, nĩmũtũngĩaa Yeova mũvea nũndũ nũekete ĩvinda yĩvĩte atanamba kũete mũminũkĩlyo. Kĩla ĩvinda noona ũndũ Yeova ũtongoesye maũndũ wĩanĩ wa kũtavany’a nthĩ yonthe, nĩw’aa namwenda mũno.”

Mwĩĩtu-a-asa wĩtawa Alisa, kuma Russia, ũla wĩ na myaka 30 na kĩndũ, easya: “Kũmũthũkũma Yeova nĩ ũthũkũminĩ ũũ kũtumĩte nĩsama ngona we nĩ mũseo ki.” (Sav. 34:8) Aendeee na kwasya: “Yeova nĩ Asa wakwa, na nĩ Mũnyanyawa mũnene. Kũka kũũ nĩkũtumĩte nĩmũmanya nesanga. Nĩyoneete maũndũ maingĩ mũno maseo na ma kũtanĩthya, na nĩnĩkwatĩte moathimo maingĩ!”

‘SISYAI MĨŨNDA’

Andũ aingĩ nthĩ ya Turkey nĩmavikĩĩtwe nĩ ũvoo mũseo nũndũ wa kambeini ĩla yeekiwe kũu. Ĩndĩ o na ũu wĩ o vo, ve kĩsio kĩnene kĩtatavanĩtw’e. Kĩla mũthenya, atavany’a ala mathamĩĩe Turkey makomanaa na andũ mataaĩw’a ĩũlũ wa Yeova. We no wende kũthamĩĩa vandũ ve na vata mũnene wa atavany’a? Inyw’onthe ala mwĩ na wendi ũsu twĩmwĩa atĩĩ: “Ũngalalyai metho menyu, mũsisye mĩũnda, kana nĩ mĩathĩku kũvika ũkethwa o na yu.” (Yoa. 4:35) No wende kũthi kũtavany’a kĩsionĩ kĩmwe katĩ wa ila siilyĩ ta ‘mĩũnda mĩathĩku’? Ethĩwa no wende, ambĩĩa kwosa ĩtambya oyu. Weeka ũu, manya atĩĩ: Kwongelanga kĩthito kyaku kya kũtavany’a ũvoo mũseo “kũvika itulu sya nthĩ,” kũkatuma ũkwata moathimo maingĩ ũtamaelekany’a na kĩndũ o na kĩva!—Meko 1:8.

^ kal. 2 Sisya mbulosua ‘Ona Nchi Nzuri,’ ĩth. 32-33.