Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

Mũsyaĩĩsya (Ĩkaseti ya Kwĩmanyĩsya)  |  Mwei wa 5 2017

Ũtanu Ũla Tũkwataa Nũndũ wa Kwĩkala Tũte na Syĩndũ Mbingĩ

Ũtanu Ũla Tũkwataa Nũndũ wa Kwĩkala Tũte na Syĩndũ Mbingĩ

DANIEL NA MIRIAM matwaanie Mwei wa 9, 2000, na mathi kwĩkala Barcelona, Spain. Daniel aĩtye: “Ithyĩ twoonaa tũilyĩ o ũndũ aangĩ mekalaa.” Aendeee kwasya: “Mũsaala witũ nĩwatũtonyethasya kũya mĩkaawanĩ mĩseo, kũthi kũtembea nthĩ sya mũingo, na kwĩkĩa ngũa sya thooa. O na nĩtwatavanasya tũteũtĩĩa.” Ĩndĩ maendeangĩe ve ũndũ weekĩkie.

Me ũmbanonĩ ũmwe mũnene weekiwe 2006, ve ũvoo waumiw’e wakiita Daniel mũno. Ũvoonĩ ũsu nĩvakũlilw’e ĩkũlyo yĩĩ: “Nĩtwĩkĩte kyonthe kĩla tũtonya tũvonokye ala ‘matwaĩtwe kĩkw’ũnĩ’ makwate nzĩa ĩla ĩelete thayũnĩ ũtathela?” (Nth. 24:11) Ũvoo ũsu nĩwakindĩlĩĩle ũndũ kĩla ũmwe waĩle kwĩthĩwa na kĩthito kya kũtavany’a ũvoo ũla ũtangĩĩaa thayũ. (Meko 20:26, 27) Daniel easya ũũ alilikana ĩvinda yĩu: “Neew’aa Yeova ta ũkũneena nakwa.” Ũvoo ũsu nĩwoonanisye ũndũ kwongelanga ĩvinda yĩla tũtũmĩaa ũthũkũminĩ kũtonya kwongelanga ũtanu ũla twĩ naw’o. Daniel nĩweesĩ ũsu nĩ ũndũ ũtonyeka nũndũ Miriam aĩ anambĩĩa ũvainia na akakwata moathimo maingĩ mũno.

Daniel asyokete akasya, “Kuma vau neewie naĩle kũvindũka vyũ.” Na nĩw’o weekie. Aolangile masaa ala wathũkũmaa, oosa ũvainia, na ambĩĩa kũsũanĩa ĩũlũ wa ũtanu ũla matonya kũkwata manongelanga ũthũkũmi woo na maithamĩĩa kĩsionĩ kĩ na ũnyivu wa atavany’a.

MAWETU ALA MAMBIE KŨKOMANA NAMO, NA ŨATHIMO ŨLA MAKWATIE

Twĩ Mwei wa 5, 2007, Daniel na Miriam nĩmatiie mawĩa moo na mathamĩĩa nthĩ maĩ matembeete ĩvinda yĩngĩ yĩtawa Panama. Kĩsio kĩla maendie kũtavany’a kyaĩ tũthama kauta twa Bocas del Toro Archipelago Ũkanganĩ wa Caribbea. Tũthama tũu twĩkalawa mũno mũno nĩ mbaĩ ya Guaymi. Daniel na Miriam masũanĩaa mbesa ila maĩ nasyo no imekalye myei ta nyanya kũu.

Me kũu matũmĩaa masiwa na isululu. Savalĩ ĩtakamola nĩ ĩla maendie ya mbee na isululu ya maili ta 20 (kĩlomita 32). Makinyie isululu savalĩ ĩsu yonthe maathĩtwe nĩ sua ĩvyũ na mesĩle kũndũ kũvaũũku. Daniel anoie weethĩa eĩw’a ta ũvalũka. Ĩndĩ nĩmatanie nũndũ mĩsyĩ ĩla mesĩlile nĩmathokiw’e nesa nĩ andũ ma mbaĩ ya Guaymi, na mũno mũno ĩtina wa kwĩmanyĩsya ndeto imwe sya kĩthyomo kyoo. O na vatavĩtĩte ĩvinda ĩasa maĩ na amanyĩw’a 23.

Thĩna walikile ĩla matheleilwe. Daniel aĩtye atĩĩ: “Tweew’aa kũĩa twasũanĩa kana yu twaaĩle kũsyoka Spain. Tweew’aa kyeva kingĩ twalilikana amanyĩw’a ala twesaa kũtia.” Ĩndĩ ĩtina wa mwei ũmwe nĩmakwatie ũvoo mũseo. Miriam aĩtye: “Twakwatie valũa wa kũtw’ĩka mavainia ma mwanya. Twatanie ta kĩ nũndũ yu twaĩ tũendeee na ũthũkũmi witũ kĩsionĩ kĩu!”

ŨTANU ŨLA MWINGĨ MAKWATĨTE

Twĩ mwaka wa 2015, nũndũ wa moalyũku ala meekiwe ũseũvyonĩ, Daniel na Miriam nĩmakũlilw’e masyokee ũvainia wa kĩla ĩvinda. Meekie ata? Meekĩiwe vinya nĩ ndeto ii syĩ nthĩnĩ wa Savuli 37:5: “Mwiĩe Yeova nzĩa yaku; mũĩkĩĩe we, nake akeeka.” Nĩ kana maendeee na ũvainia, nĩmamanthie wĩa ũtonya kũmatetheesya, na ũmũnthĩ me kĩkundinĩ kĩmwe kĩ kĩsionĩ kya Veraguas, Panama.

Daniel aeleetye atĩĩ: “Tũtanauma Spain tũyeesĩ nesa kana nĩtũũtonya kwĩkala tũte na syĩndũ mbingĩ. Ĩndĩ ũmũnthĩ twĩkalaa ũu na tũyonaa kĩndũ kya vata tũkosete.” Nĩ kyaũ kĩmanengae ũtanu ũla mwingĩ? Maĩtye atĩĩ: “Kũtetheesya andũ menyivĩtye mamũmanye Yeova nĩw’o ũndũ ũla ũtũeteete ũtanu ũla mwingĩ vyũ!”