Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Nyuva kĩthyomo Kikamba

“Ũla wĩ na Itho Ĩlau Akaathimwa”

“Ũla wĩ na Itho Ĩlau Akaathimwa”

KUMA tene kumya nthembo kwĩthĩĩtwe kwĩ kwa vata ũthaithinĩ wa w’o. Aisilaeli maumasya nthembo sya nyamũ, namo Aklĩsto mesĩkĩe nesa na “nthembo ya ndaĩa.” Ĩndĩ ve o nthembo ingĩ imũtanĩthasya Ngai mũno. (Aevl. 13:15, 16) Ngai nũtũathimaa na tũkekala twĩ atanu ĩla twaumya nthembo ta isu. Kwasũanĩa ngelekany’o ii iatĩĩe.

Aana aĩ mũthũkũmi mũĩkĩĩku wa Ngai na nĩwendaa mũno kũkwata kavĩsĩ, ĩndĩ ndaĩ atonya kũsyaa. Na kwoou nĩwamũvoyie Yeova amwĩa kana amũtetheesya asyae kavĩsĩ, ‘akakanengane kwa Yeova mĩthenya yonthe ya thayũ wako.’ (1 Sam. 1:10, 11) Aana nĩwesie kũitava na asyaa kavĩsĩ waketie Samueli. Aaĩsya Samueli nĩwamũtwaie ĩeemanĩ ya kũmbanĩa nĩ kana eanĩsye wĩvĩto wake. Yeova nĩwaathimie Aana nũndũ wa ũlau wake. Nĩwesie kũsyaa syana ingĩ itano na mwana wake, Samueli, nĩwatw’ĩkie mwathani na ũmwe wa ala maandĩkie Mbivilia.—1 Sam. 2:21.

O ta Aana na Samueli, ũmũnthĩ Aklĩsto me na mwanya wa kwĩyumya vyũ mamũthũkũme Mũmbi woo. Yesũ nĩwathanie kana kyonthe kĩla tweeyĩima nĩ kana tũmũthaithe Yeova kĩkaathimwa mũno.—Mko. 10:28-30.

Ĩvindanĩ ya atũmwa, kwaĩ mũndũ mũka Mũklĩsto weetawa Ndolokasi weeyĩimaa maũndũ nĩ kana atetheesye ala angĩ. Eesĩkĩe nesa na “meko maseo ala wekaa vamwe na kumya motethyo.” Ĩndĩ ũndũ wa kũmakya nĩ kana avikie vandũ “akwatwa nĩ ũwau, na akw’a,” na kĩu nĩkyatumie kĩkundi kĩmeta mũno. Ĩla amanyĩw’a mamanyie kana Vetelo e kĩsionĩ, nĩmamũkũlilye oke na ndakekale. Kwasũanĩa mũyo ũla meewie Vetelo avika na athayũũkya Ndolokasi! Ndolokasi nĩwe wa mbee kũwetwa Mbivilianĩ aithayũũkw’a nĩ mũtũmwa. (Meko 9:36-41) Ngai ndoolĩtwe nĩ maũndũ ala Ndolokasi weekĩte. (Aevl. 6:10) O na maũndũ ala weekie nĩmaandĩkiwe Ndetonĩ ya Ngai nĩ kana matũtetheesye kwĩyĩelekany’a nake.

O nake mũtũmwa Vaulo aĩ ngelekany’o nzeo mũno nũndũ nĩwatũmĩaa ĩvinda yake kũtetheesya angĩ na kũmethukĩĩsya. Aandĩkĩie ana-a-asa ala maĩ Kolintho amea atĩĩ: “Nyie nganengane na ũtanu mwingĩ na kwĩnengane vyũ kwondũ wenyu.” (2 Ako. 12:15) Vaulo nĩweeyoneie kana kwĩyumya ũtethye angĩ nĩkũtumaa wĩkala wĩ mwĩanĩe, ĩndĩ ũndũ ũla wa vata nĩ kana kũtumaa Yeova akũathima na aikwenda mũno.—Meko 20:24, 35.

Kwoou no twasye tũte na nzika kana Yeova nũtanaa ĩla twatũmĩa ĩvinda yitũ na vinya witũ nĩ kana tũtetheesye ana-a-asa na tũitetheesya wĩanĩ wa Ũsumbĩ. Ĩndĩ vo ve ũndũ ũngĩ tũtonya kwĩka tũkakwata kw’oko wĩa wa kũtavany’a ĩũlũ wa Ũsumbĩ? Ĩĩ! O na kau nĩtũmũtaĩaa Ngai twatũmĩa ĩvinda yitũ na vinya witũ, o nayo mĩvothi ĩla tumasya nĩmũtaĩaa. Mĩvothi ĩsu nĩtumaa wĩa wa nthĩ yonthe wa kũtavany’a ũsonga na mbee. Kwa ngelekany’o, nĩtũmĩawa kũtetheesya amisonalĩ na athũkũmi ala angĩ ma ĩvinda yonthe ma mwanya. Na eka ũu, mĩvothi ĩla tumasya nĩyo ĩtetheeasya wĩanĩ wa kũseũvya na kũalyũla mavuku na vitio, nĩyo ĩtetheeasya ĩvinda ya mĩisyo, na ĩla kũkwakwa Nyũmba sya Ũsumbĩ. Nĩtwĩkalei twĩsĩ kana “ũla wĩ na itho ĩlau akaathimwa.” Ũndũ ũngĩ nĩ kana ĩla twanenga Yeova syĩndũ sitũ ila sya vata nĩtũtumaa ataĩwa.—Nth. 3:9; 22:9.