Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

Mũsyaĩĩsya (Ĩkaseti ya Kwĩmanyĩsya)  |  Mwei wa 11 2016

“Wĩa Nĩ Mũnene”

“Wĩa Nĩ Mũnene”

ĨVINDA yĩmwe kwaĩ ũmbano wa vata mũno Yelusaleme. Mũsumbĩ Ndaviti oombanĩte na anene me mbee ũsumbĩnĩ, anene ma nyũmba ya ũsumbĩ, na ngũmbaũ syonthe. Onthe nĩmatanie mũno ĩla meewie Ndaviti aimatangaasĩa ũndũ wa mwanya mũno. Amatavisye kana Yeova nĩwanengete mwana wake, Solomoni, wĩa wa kwaka ĩkalũ ĩnene mũno kwondũ wa ũthaithi wa ũla Ngai wa w’o. Mũsumbĩ ũsu wa Isilaeli, ũla ĩvindanĩ yĩu waĩ mũkũũ, nĩwaveveewe amanya ũndũ ĩkalũ yĩu yaĩle kwakwa, na ĩndĩ amũtavya mwana wake, Solomoni. Ndaviti eeie andũ asu woombanĩte namo atĩĩ: “Wĩa nĩ mũnene; nũndũ ĩ nyũmba nene mbanakavye ti kwondũ wa mũndũ, ĩndĩ kwondũ wa Yeova Ngai.”—1 Mav. 28:1, 2, 6, 11, 12; 29:1.

Ĩtina wa ũu Ndaviti amakũlilye: “Nũũ ĩndĩ ũla ũnũkwĩnengane na ngoo ya kwenda evathan’ye ũmũnthĩ ethĩwe mũtheu kwa Yeova [kana “amũnenge Yeova mũthĩnzĩo,” NWT]?” (1 Mav. 29:5) Keka waĩ vo we wĩthĩwa weekie ata? We nĩwĩthĩwa weeyumisye na ngoo ya kwenda ũkwate kw’oko wĩa ũsu ũnenevete ũu? Aisilaeli nĩmeeyumisye matetheesye o na mateũtindĩa. O na eka ũu, “matanie, nũndũ nĩmanenganie na kwenda kwa ngoo, nũndũ nĩmamumĩsye Yeova makyenda na ngoo mbĩanĩu.”—1 Mav. 29:9.

Myaka mingĩ ĩtina wa vau, Yeova nĩwambĩĩisye mũvango ũngĩ mũseango o na kwĩ ĩkalũ yĩu. Nĩwaseũvisye ĩkalũ ĩnene ya kĩ-veva, nayo nĩ mũvango ũla wĩkĩte kwĩsĩla nthembo ĩla Yesũ waumisye nĩ kana andũ matonye kũmũthaitha. (Aevl. 9:11, 12) Yeova aendeee kũtetheesya andũ ata mew’anĩthw’e nake? Amatetheeasya kwĩsĩla wĩa witũ wa kũtw’ĩkĩthya andũ amanyĩw’a. (Mt. 28:19, 20) Nũndũ wa wĩa ũsu, kĩla mwaka andũ milioni mbingĩ nĩmatw’ĩkĩthaw’a amanyĩw’a, na ngili mbingĩ sya asu nĩmavatisawa. O na ĩngĩ kĩla mwaka ikundi maana maingĩ nĩsyambĩĩaw’a.

Nũndũ wa wongeleku ũsu, nĩvethĩĩtwe vata wa kũtumbĩthya mavuku maingangĩ maeleetye Mbivilia, vata wa kwaka na kũtũngĩĩa Nyũmba mbingangĩ sya Ũsumbĩ, na vata wa kũmantha kũndũ kwingangĩ kwa kwĩkĩa maũmbano manene. We nũkwĩtĩkĩla kana wĩa witũ wa kũtavany’a ũvoo mũseo nĩ mũnene na wĩ na mosyao maseo?—Mt. 24:14.

Kũmwenda Ngai na mũtũi na kũmanya kana wĩa wa kũtavany’a nĩwaĩle kũtethw’a na mĩtũkĩ nĩkũtumaa andũ ma Ngai ‘menengane na ngoo ya kwenda’ nĩ kana mamũnenge mũthĩnzĩo wa mĩvothi yoo. Nĩtũtanaa mũno nũndũ wa ‘kũmũtaĩa Yeova na syĩndũ sitũ.’ O na nĩtũtanaa kwona ũndũ mĩvothi ĩsu twaumya ĩtũmĩawa nesa nĩ kana ĩtetheesye wĩanĩ ũsu mũnene waatethw’a nĩ andũ!—Nth. 3:9.