Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

Mũsyaĩĩsya (Ĩkaseti ya Kwĩmanyĩsya)  |  Mwei wa 8 2016

Mantha Kĩndũ Kĩseango kwĩ Thaavu

Mantha Kĩndũ Kĩseango kwĩ Thaavu

We waaona kavila ka thaavu? Nĩ avũthũ maamantha thaavu na makawona. Ĩndĩ ve angĩ milioni mbingĩ monete kĩndũ kĩseo vyũ o na kwĩ thaavu. Kĩndũ kyu nĩ ũĩ wa Ngai, naw’o “ndũtonya kũthoowa na thaavu.”—Yovu 28:12, 15.

NO TŨELEKANY’E ala mekwĩmanyĩsya Mbivilia na andũ meũmantha thaavu. Andũ ta asu me na ngoo nzeo maĩlĩte kwĩkĩa kĩthito na maiendeea kwĩmanyĩsya Maandĩko nĩ kana makwate ũĩ ũla wĩ vau ũtesa kwoneka vangĩ. Kwoou ekai twone maũndũ atatũ mũndũ wĩkaa nĩ kana akwate thaavu. Maũndũ asu matonya kũtũmanyĩsya kyaũ?

KŨKWATA KAVILA KA THAAVU!

Twasye ũtembeele ũtee wa ũsĩ nĩwoona kaindo kailyĩ kavila keũkengakenga. Na wakumana wakosa ũyĩthĩa kaĩ nĩ kavila ka thaavu! Nĩ kanini vyũ o na kwĩ kongo ka mũsyĩ wa kĩlĩvĩtĩ, na ke mũo o na kwĩ kavila kala kaseo vyũ ka diamond. Ũnamina kũkwata kavila ku ka thaavu, ndũlea kũmanthanga vau ũtee wone kana nũkwona tũngĩ.

O ta ũu, no kwĩthĩwa ũlilikanaa mũthenya wa mbee ũla Ngũsĩ sya Yeova syavikie kwaku na syakũelesya wĩkwatyo ũla Mbivilia ĩtũnengete. O na no kwĩthĩwa ũlilikanaa nesa vyũ mũthenya waku wa mbee kũelewa ũw’o ũmwe wa vata. Nĩvatonyeka ũkethĩa ũsu no ũla mũthenya woonie ya mbee Mbivilianĩ ĩsyĩtwa ya Ngai, Yeova. (Sav. 83:18) O na no kwĩthĩwa no ĩla wamanyie kana no ũtw’ĩke mũnyanyae wa Yeova. (Yak. 2:23) Ĩla wakwatie ũmanyi ũsu nĩwamanyie wakwata kĩndũ kĩseango o na kwĩ thaavu! Ĩtina wa ũu nĩ laisi ũkethĩwa wendie mũno kũendeea kũmantha ũmanyi mwingangĩ.

KŨKWATA TŨVILA TWINGANGĨ TWA THAAVU!

Mavinda amwe tũvila twa thaavu twĩyũmbĩlĩĩlaa mbũsĩnĩ, kana o kũndũ kũngĩ ta ku. Ethĩwa ala mekũmantha thaavu me na kĩthito, myei mĩvũthũ ĩithela no makwate thaavu wĩ na kĩlo iana ũna. Kĩlo isu syĩ na makili ma ndola.

Ĩla wambĩĩe kũmanyĩw’a Mbivilia nĩ Ngũsĩ sya Yeova, no kwĩthĩwa weewie ũndũ mũndũ wĩw’aa ĩla weekĩa kĩw’ũ mũthanganĩ wĩ na tũvila twa thaavu na oona tũvila tũu tweekela. Ĩla woosie ĩvinda wavindĩĩsya mũsoa ũmwe ĩtina wa ũngĩ, ũmanyi waku nĩwongelekile na kĩu kyalũlũmĩlya ngwatanĩo yaku na Yeova. O ũndũ waendeeie kũmantha na kĩthito ũmanyi ũla wĩ Mbivilianĩ, nĩwoonie ũndũ ũtonya kũmũthengeea Yeova na ũndũ ũtonya kwĩka nĩ kana aendeee kũkwenda na ayũka kũkũnenga thayũ ũtathela.—Yak. 4:8; Yuta 20, 21.

We nĩwĩkĩaa kĩthito ũmanthe maũndũ ma vata Mbivilianĩ o tondũ mũndũ ũla ũmanthaa thaavu wĩkaa?

O ta mũndũ ũkũmantha na kĩthito tũvila twa thaavu, no kwĩthĩwa waĩ na kĩthito kingĩ kya kũmantha ũthwii wa kĩ-veva. Wamina kwĩmanyĩsya momanyĩsyo ala ma mũsingi ma Mbivilia, nĩweewie  wakwata vinya wa kwosa ĩtambya ya kwĩyumya ũmũthũkũme Yeova na ũivatiswa.—Mt. 28:19, 20.

ENDEEA KŨMANTHA!

Mavinda amwe mũndũ ũkũmantha tũvila twa thaavu no atwĩthĩe mavianĩ ma mũthemba mũna (igneous rocks). Mavinda angĩ mavia amwe ta asu methĩawa makuĩte thaavu mwingĩ mũno ũkethĩa no menzawa na maitumbangwa nĩ kana ũ thaavu umw’e nesa. Ĩndĩ ũsyaĩtye ya mbee nũtonya kũema kwona thaavu ĩvianĩ yĩu. Nĩkĩ? Nũndũ tani ũmwe wa ĩvia yĩla ĩseo vyũ nũtonya kwĩthĩwa na o ngulamu 10 sya thaavu (10 grams)! Ĩndĩ o na vailyĩ ũu, mũndũ ũsu ũkũmantha thaavu nĩwonaa ve vaita wa kwĩkĩa kĩthito aumye thaavu ũla weethĩa.

O ta ũu, no nginya mũndũ aendeee kwĩkĩa kĩthito o na aminĩte kũelewa nesa ‘momanyĩsyo o ala wamanyĩiw’e ma mbee ĩũlũ wa Klĩsto.’ (Aevl. 6: 1, 2, The Holy Bible in Current Kikamba Language) Nĩwaĩle kwĩkĩa kĩthito ĩla ũkwĩmanyĩsya Mbivilia nĩ kana ũmanye maũndũ meũ na maũndũ ũtonya kũtũmĩa thayũnĩ waku. Kwoou o na kau nũtonya kwĩthĩwa wambĩĩe kwĩmanyĩsya Maandĩko myaka mingĩ mĩvĩtu, ũtonya kwĩka ata nĩ kana mũvango waku wa kwĩmanyĩsya Mbivilia ũkũtethye?

Mavinda onthe ĩthĩawa na wendi wa kwĩmanyĩsya. Tata ndũkavĩtwe nĩ tũmaũndũ o na tũla tũnini. Endeea kwĩkĩa kĩthito na nũũkwata ũĩ wa vata mũno kuma kwa Ngai, na we mwene ndakaema kũũtongoesya. (Alo. 11:33) Nĩ kana wĩthĩwe na ũmanyi mwingangĩ wa Maandĩko, tũmĩa nesa syĩndũ sya kwĩka ũkunĩkĩli ila ũtonya kũkwata kĩthyomonĩ kyaku. Ethĩwa ve makũlyo wĩ namo kana ve ũtao ũũmantha, mantha wĩ na wũmĩĩsyo. Kũlya angĩ nĩ maandĩko meva, kana nĩ ũvoo wĩva wĩ mavukunĩ maitũ monete ũtonya kũmatethya na kũmekĩa vinya. Na ĩndĩ tavya angĩ tũmaũndũ tũseo tũla ũmanyĩte ĩla ũkwĩmanyĩsya Ndeto ya Ngai.

Vate nzika, kĩeleelo kyaku kĩyaĩle kwĩthĩwa o kũkwata ũmanyi mwingĩ. O na mũtũmwa Vaulo nĩwakanisye Aklĩsto amea atĩĩ: “Ũmanyi ũetae ngathĩĩo.” (1 Ako. 8:1) Kwoou tata mũno wĩthĩawe wĩnyivĩtye na wĩ na mũĩkĩĩo mũlũmu. Kwĩthĩwa na ũthaithi wa mũsyĩ mũteũtĩĩa na kwĩmanyĩsya Mbivilia ũteũtĩĩa nĩ maũndũ matonya kũũtethya wĩkale ũndũ Yeova wendaa, na makakwĩkĩa vinya ũtethye angĩ. Na ĩndĩ ũndũ ũla wa vata vyũ nĩ kana ũkekalaa wĩ mũtanu nũndũ nũkwatĩte kĩndũ kĩseango kwĩ thaavu.—Nth. 3:13, 14.