Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

Mũsyaĩĩsya (Ĩkaseti ya Kwĩmanyĩsya)  |  Mwei wa 7 2016

Tavany’a Ũvoo Mũseo wa Mumo wa Ngai

Tavany’a Ũvoo Mũseo wa Mumo wa Ngai

“Kũkũsĩĩa ũla ũvoo mũseo wa mumo wa Ngai.” —MEKO 20:24.

MBATHI: 10, 25

1, 2. Mũtũmwa Vaulo oonanisye ata kana nĩwatũngaa mũvea nũndũ wa mumo wa Ngai?

MŨTŨMWA Vaulo aisye ũũ kuma ngoonĩ: “Mũmo wake [Ngai] nanengiwe ndwaĩ wa mana.” (Soma 1 Akolintho 15:9, 10.) Nũndũ Vaulo nĩwathĩnĩtye Aklĩsto tene, nĩweesĩ nesa kana nde ũndũ wathũkũmĩĩte tei wa Ngai, o na tei ũsu wa Ngai ndwamwaĩle.

2 Vaulo akilyĩ kũkw’a aandĩkĩie Timotheo ũũ: “Nĩmũtũngĩa mũvea ũla wandonyethisye, nake nĩ Klĩsto Yesũ Mwĩaĩi waitũ, nũndũ nĩwandalile kwĩthĩwa na kĩthito akĩndw’a wa kũmũthũkũma.” (1 Tim. 1:12-14) Anengetwe ũthũkũmi wĩva? Vaulo nĩwawetie ũthũkũmi ũsu nĩ wĩva. Atavisye atumĩa ma kĩkundi kya Eveso ndeto ii: ‘Ndiũtala thayũ wakwa ta kĩndũ kwakwa, nĩ kana nĩtonye kwĩanĩsya mũendo wakwa, na ũthũkũmi ũla noosie kwa Mwĩaĩi Yesũ, kũkũsĩĩa ũla ũvoo mũseo wa mumo wa Ngai.’Meko 20:24.

3. Nĩ ũthũkũmi wĩva wa mwanya wanengetwe Vaulo? (Sisya visa ĩthangũnĩ ya 26.)

 3 Nĩ “ũvoo mũseo” wĩva Vaulo watavanasya ũla woonanasya mumo wa Yeova? Eeie Aklĩsto ma Eveso atĩĩ: “Nĩmwĩw’ĩte ũvoo wa walan’yo wa mumo wa Ngai ũla nanengiwe kwondũ wenyu.” (Aev. 3:1, 2) Vaulo anengetwe kĩanda kya kũtavya andũ ala mataĩ Ayuti ũvoo mũseo nĩ kana o namo meĩthĩwa na Klĩsto Ũsumbĩnĩ wa Masia. (Soma Aeveso 3:5-8.) Nũndũ wa kĩthito kĩla Vaulo waĩ nakyo ũthũkũminĩ wake, we nĩwatiĩe Aklĩsto ma ũmũnthĩ ngelekany’o nzeo na oonany’a kana mumo ũla woonetw’e nĩ Ngai “ndwaĩ wa mana.”

MUMO WA NGAI NŨKŨTHANGAASYA?

4, 5. Nĩkĩ tũtonya kwasya kana ‘ũvoo mũseo wa Ũsumbĩ’ now’o ũvoo mũseo wa “mumo wa Ngai”?

4 Ĩvindanĩ yĩĩ ya mũminũkĩlyo andũ ma Yeova nĩmanengetwe wĩa wa kũtavany’a “ũvoo ũũ mũseo wa ũsumbĩ . . . nthĩ yonthe wĩthĩwe ũkũsĩ kwa mbaĩ syonthe.” (Mt. 24:14) Ũvoo ũla tũtavanasya o naw’o nĩ “ũvoo mũseo wa mumo wa Ngai” nũndũ moathimo onthe ala tweteele kwĩsa kũkwata tũsumbĩkĩtwe nĩ Ũsumbĩ wa Ngai, tũkamakwata no ũndũ wa mumo wa Yeova kwĩsĩla vala ve Klĩsto. (Aev. 1:3) We nũtavanasya na kĩthito ta Vaulo nĩ kana wonany’e nũũtũnga mũvea nũndũ wa mumo wa Yeova?—Soma Alomi 1:14-16.

5 Ĩsomo ĩvĩtu nĩyĩtũtetheesye kũmanya ũndũ ithyĩ ta twĩ eki ma naĩ tũtethekaa kwa nzĩa syĩ kĩvathũkany’o nũndũ wa mumo wa Yeova. Nũndũ wa kĩtumi kyu, twĩ na kĩanda kya kwĩkĩa kĩthito ũndũ tũtonya nĩ kana tũtavye andũ ala angĩ ĩũlũ wa wendo wa Yeova na kũmony’a ũndũ matonya kũtetheka nĩw’o. Nĩ maũndũ amwe meva makonetye mumo wa Ngai ala twaĩle kũtetheesya angĩ matũngae mũvea kwondũ wamo?

TAVANY’A ŨVOO MŨSEO ĨŨLŨ WA NTHEMBO YA WOVOSYO

6, 7. Nĩkĩ tũtonya kwasya kana ĩla tũũtavya angĩ ĩũlũ wa wovosyo twĩthĩawa tũitavany’a ũla ũvoo mũseo wa mumo wa Ngai?

6 Andũ aingĩ ala mekalĩte nthĩ ĩno mekaa ũndũ mekwenda na kwoou mayonaa kwĩka naĩ ta ũndũ, na nũndũ wa ũu mayĩsĩ vata wa wovosyo. Ĩndĩ kwĩ angĩ aingĩ mesĩte kũmanya kana kwĩka o ũndũ mo mekwenda kũyĩsa kũmaetee ũtanu wa w’o. Mesa kũneena na Ngũsĩ sya Yeova now’o mamanyaa naĩ nĩ kyaũ, ĩtumĩte tũkwatwa nĩ mathĩna meva, na tũtonya kwĩka ata tume ũkombonĩ wa naĩ. Ala me na ngoo nthalĩku nĩmew’aa mũyo ĩla mamanya kana nũndũ Yeova nũtwendete mũno na e mumo mwingĩ, nĩwatũmie Mwana wake kũũ nthĩ atwovosye kuma ũkombonĩ wa naĩ na kĩkw’ũ.—1 Yoa. 4:9, 10.

7 Vaulo aandĩkie ũũ aiweta Mwana mwendwa wa Yeova: “Nthĩnĩ wake [Yesũ] twĩ na wovosyo witũ kwondũ wa nthakame yake, ũekeo wa mavĩtyo maitũ, kwĩanana na ũthwii wa mumo wake [Yeova].” (Aev. 1:7) Nthembo ya Klĩsto ya wovosyo nĩw’o ũĩkĩĩthyo ũla mũnene vyũ wa kana Ngai nũtwendete, na nĩ wonany’o mũseo wa ũndũ wĩ mumo wingĩvĩte. Nĩ ũndũ wa kũkiakisya kũmanya kana tweethĩwa na mũĩkĩĩo nthĩnĩ wa nthakame ya Yesũ ĩla yetĩkiw’e, naĩ sitũ ikaekewa na wasya witũ wa ngoo ũkathew’a! (Aevl. 9:14) We ndũkwona  ũsu nĩ ũvoo mũseo twaĩle kũũtavya angĩ?

TETHEESYA ANDŨ METHĨWE NA NGWATANĨO NZEO NA NGAI

8. Nĩkĩ andũ maĩle kwĩw’anĩthw’a na Ngai?

8 Twĩ na kĩanda kya kũtetheesya andũ ala angĩ mamanye kana no methĩwe na ngwatanĩo nzeo na Mũmbi woo. Andũ matanamba kwĩthĩwa na mũĩkĩĩo nthĩnĩ wa nthembo ya Yesũ, Ngai amosaa ta amaitha make. Mũtũmwa Yoana aandĩkie atĩĩ: “Ũla wĩtĩkĩlaa [kana, ũmũĩkĩĩaa] ũ Mwana e na thayũ ũtathela; ĩndĩ ũla ũtamwĩtĩkĩlaa Mwana ndakona thayũ, ĩndĩ ũthatu wa Ngai wĩkalaa ĩũlũ wake.” (Yoa. 3:36) Ĩndĩ ũndũ wa kwendeesya nĩ kana nthembo ya Klĩsto nĩtumaa twĩw’anĩthw’a na Ngai. Vaulo aisye atĩĩ: “Inyw’ĩ, mwekalĩte ĩvinda ya tene mũte na wĩw’ano na mwĩ amaitha ilĩkonĩ syenyu na mĩkĩlenĩ yenyu mĩthũku, ĩndĩ yu nũmwĩw’ĩthanĩtye na mwĩĩ wake [Yesũ] wa nyama kwondũ wa kũkw’a.”—Ako. 1:21, 22.

9, 10. (a) Klĩsto anengie ana-a-asa make etĩkĩw’a mauta kĩanda kĩva? (b) Ala “malondu angĩ” matetheeasya ana-a-asa moo etĩkĩw’a mauta ata?

9 Klĩsto nũnengete ana-a-asa make etĩkĩw’a mauta ala me vaa ĩũlũ wa nthĩ kĩla Vaulo wĩtĩte “ũthũkũmi wa wĩw’anĩthyo.” Vaulo nĩwaeleisye kyu nĩ kyaũ ĩla waandĩkĩe Aklĩsto etĩkĩw’a mauta ma ĩvinda ya atũmwa ndeto ii: “Ĩndĩ maũndũ onthe nĩ ma Ngai, ũla watwĩw’anĩthye nake mwene kwondũ wa Klisto, na watũnengie ũthũkũmi wa wĩw’anĩthyo; naw’o nĩ ũũ, Ngai aĩ nthĩnĩ wa Klĩsto, aimĩw’anĩthya nthĩ nake Klĩsto, aimĩw’anĩthya nthĩ nake mwene, ateũmatalĩla andũ mavĩtyo moo, na nũtwĩkĩĩte nthĩnĩ waitũ ĩla ndeto ya kwĩw’anĩthya. Na ĩndĩno twĩ atũmwa kwondũ wa Klĩsto, o ta Ngai ũnũkwĩsũvanĩla kwitũ: Nĩtũũmwĩsũva kwondũ wa Klisto, mwĩw’anĩthw’e na Ngai.”—2 Ako. 5:18-20.

10 Ala “malondu angĩ” monaa ne kĩanda kya mwanya kũtetheesya ana-a-asa moo etĩkĩw’a mauta wĩanĩ wa kũtavany’a. (Yoa. 10:16) Na nũndũ no twasye nĩmathũkũmaa ta atũmwa kwondũ wa Klĩsto, nĩmo matethasya wĩa ũla mwingĩ nthĩnĩ wa kũmanyĩsya andũ ũw’o na kũmatetheesya methĩwe na ngwatanĩo nzeo na Yeova. Kĩu nĩ kĩlungu kya vata wĩanĩ wa kumya ũkũsĩ ĩũlũ wa ũvoo mũseo wa mumo wa Ngai.

TAVANY’A ŨVOO MŨSEO WA KANA NGAI NĨWĨTHUKĨĨASYA MBOYA

11, 12. Nĩkĩ tũtonya kwasya nĩ ũvoo mũseo kũmanyĩsya andũ kana no mamũvoye Yeova?

11 Andũ aingĩ mavoyaa nũndũ mavoya nĩmew’aa mausya, ĩndĩ maiĩkĩĩaa kana Ngai nĩwĩw’aa mboya syoo. Nĩmaĩlĩte kũmanya kana Yeova nĩwe “ũla wĩw’aa mboya.” Mũandĩki wa Savuli, Ndaviti, aandĩkie: “We ũla wĩw’aa mboya, mĩĩ yonthe ĩkooka kwaku. Mothũku nĩmangĩlasya vinya: ũkaekea mavĩtyo maitũ.”—Sav. 65:2, 3.

12 Yesũ atavisye amanyĩw’a make ũũ: “Ethĩwa mũkavoya ũndũ o na wĩva syĩtwanĩ yakwa, ngawĩka.” (Yoa. 14:14) Vate nzika, “ũndũ o na wĩva” ũla ũwetetwe vau nĩ ũndũ w’onthe ũla wosanĩte na kwenda kwa Yeova. Yoana aeleetye ũũ: “Ũũ nĩw’o ũnyiau ũla twĩ naw’o vala ũĩ, ethĩwa tũkavoya ũndũ kwĩanana na kwenda kwake, nũtwĩw’aa.” (1 Yoa. 5:14) Nĩ ũndũ mũseo mũno kũmanyĩsya andũ kana mboya ti kĩndũ kya kũtuma kĩlĩko kĩusya, ĩndĩ nĩ nzĩa ya mwanya ya  kũthengeea Yeova ‘kĩvĩlanĩ kyake kya ũsumbĩ kya mumo’! (Aevl. 4:16) Twamamanyĩsya kũvoya ũndũ vaĩle, kũvoya ũla waĩlĩte, na kũvoya kĩla kyaĩlĩte, tũkeethĩawa tũimatetheesya mamũthengeee Yeova na maikwata ũkiakisyo ĩvindanĩ ya thĩna.—Sav. 4:1; 145:18.

MUMO WA NGAI ĨVINDANĨ YA NTHĨ NZAŨ

13, 14. (a) Etĩkĩw’a mauta makakwata ndaĩa yĩva ya mwanya ĩvinda yũkĩte? (b) Etĩkĩw’a mauta makathũkũma andũ wĩa wĩva wa ũsengy’o?

13 Mumo wa Yeova wĩendeea kwĩthĩwa kw’o o na ĩtina wa nthĩ ĩno nthũku kwanangwa. Vaulo nĩwawetie ndaĩa ya mwanya ĩla Ngai ũnengete ala 144,000 manyuvĩtwe makasumbĩke na Klĩsto ĩtunĩ Ũsumbĩnĩ wake. Aandĩkie ũũ: “Ngai, nĩkwĩthĩwa aĩ na tei mwingĩ, nũndũ wa wendo wake mũnene ũla watwendie naw’o, o na yĩla twaĩ akw’ũ kwondũ wa mavĩtyo maitũ, atũnengie thayũ vamwe na Klĩsto (nĩmũtangĩĩĩtwe nĩ mumo), naitũ nthĩnĩ wa Klĩsto Yesũ nĩwatũthayũũkisye vamwe nake, na kũtwĩkalya nthĩ vamwe nake ĩtunĩ: nĩ kana mavinda ala mokĩte atonye kwonan’ya ũthwii mwingĩ wa mumo wake kwondũ wa ũseo wake kwitũ nthĩnĩ wa Klĩsto Yesũ.”—Aev. 2:4-7.

14 Ti laisi kũsũanĩa maũndũ ma ũsengy’o ala Yeova wiĩe Aklĩsto etĩkĩw’a mauta ĩla makethĩwa masumbĩkĩte na Klĩsto ĩtunĩ. (Luka 22:28-30; Avi. 3:20, 21; 1 Yoa. 3:2) Aklĩsto asu nĩmo mũno mũno makonw’a nĩ Yeova “ũthwii mwingĩ wa mumo wake.” Nĩmo makethĩwa “Yelusaleme mweũ,” mũtwawa wa Klĩsto. (Ũvu. 3:12; 17:14; 21:2, 9, 10) Makatetheanĩsya na Yesũ wĩanĩ wa “kũvosya mbaĩ” ĩla makethĩwa mayoneleelya ala ewi kĩla kĩtonya kũmathũmũsya mũio wa naĩ na kĩkw’ũ nĩ kana mekale mate na naĩ.—Soma Ũvuan’yo 22:1, 2, 17.

15, 16. Ĩvindanĩ yũkĩte Yeova akoony’a ata “malondu angĩ” mumo wake?

15 Ĩandĩko ya Aeveso 2:7 yaĩtye kana Ngai nũkonany’a mumo wake “mavinda ala mokĩte,” kana kwa ndeto ingĩ, nthĩ nzaũ. Vate nzika, nthĩ nzaũ kũkeethĩwa “ũthwii mwingĩ wa mumo” wa Yeova. (Luka 18:29, 30) Ũndũ ũmwe mũnene Yeova ũkeka vaa ĩũlũ wa nthĩ onany’e kana e ũseo mwingĩ nĩ kũthayũũkya andũ kuma “Seoli.” (Yovu 14:13-15; Yoa. 5:28, 29) Andũ aĩkĩĩku ma tene ala makwie Klĩsto ataumĩtye nthembo yake, vamwe na “malondu angĩ” ala makw’a me aĩkĩĩku ĩvindanĩ yĩĩ ya mũminũkĩlyo, makathayũũkw’a maendeee kũmũthaitha Yeova.

16 O na andũ milioni mbingĩ ala makwie matamwĩsĩ Ngai makathayũũkw’a. Makanengwa mwanya wa kwĩnyivĩsya ũsumbĩki mũnene wa Yeova. Yoana aandĩkie ũũ: “Na noona akw’ũ, anene na anini, maũngeme mbee wa kĩvĩla kyu kyeũ; na mavuku mavuanw’a: na ĩvuku yĩngĩ yavuanw’a, nayo nĩ ĩvuku ya thayũ: na ala akw’ũ masilĩlwa na maũndũ ala maandĩkĩtwe mavukunĩ asu, kwĩanana na meko moo. Na ũkanga waumya akw’ũ ala maĩ nthĩnĩ waw’o; na kĩkw’ũ na [Mbũa] syaumya akw’ũ ala maĩ nthĩnĩ wasyo: na masilĩlwe kĩla mũndũ kwĩanana na meko make.” (Ũvu. 20:12, 13) Vate nzika, ala makathayũũkw’a makeethĩwa mayendeka mamanye ũndũ maĩle kũatĩĩa myolooto ya Ngai ĩla yĩ Mbivilianĩ. O na eka ũu, makeethĩwa no nginya maatĩĩe motao meũ ala me ala “mavukunĩ.” Mavuku asu makethĩwa maeleetye ũndũ Yeova ũkwenda andũ  mekale me nthĩnĩ wa nthĩ nzaũ. Kũvuanw’a kwa maũndũ ala me mavukunĩ asu kũkeethĩwa kwĩ wonany’o ũngĩ wa mumo wa Yeova.

ENDEEA KŨTAVANY’A ŨVOO MŨSEO

17. Nĩ kyaũ twaĩle kwĩkalaa tũlilikene ĩla tũũtavany’a?

17 O ũndũ mũminũkĩlyo ũthengeee, now’o twĩ na vata mũnene wa kũtavany’a ũvoo mũseo wa Ũsumbĩ! (Mko. 13:10) Vate nzika, ũvoo mũseo wonanasya kana Yeova e mumo. Twaĩle kũlilikanaa kyu ĩla tũũtavany’a. Kĩeleelo kitũ ĩla tũũtavany’a nĩ kũmũtaĩa Yeova. No twĩke ũu kwa kũtavya andũ kana mawatho ala twathĩtwe ĩla twĩlika nthĩ nzaũ nĩ wonany’o wa ũseo wa Yeova.

Thũkũmai na kĩthito ta “asuvĩi aseo ma mumo wa Ngai.” —1 Vet. 4:10 (Sisya kalungu ka 17-19)

18, 19. Tũkumasya mumo ũla Yeova wĩ naw’o ata?

18 Ĩla tũũtavya angĩ ũvoo no tũmaelesye kana ungu wa Ũsumbĩ wa Klĩsto, andũ makakwata moathimo onthe ala maetawe nĩ nthembo ya wovosyo na kana makavetewa naĩ kavola kwa kavola. Mbivilia yaĩtye atĩĩ: “Syũmbe nasyo ikathaw’a kuma ũkombonĩ wa wanangĩko, kũlika ũthasyonĩ wa ũtaĩo wa syana sya Ngai.” (Alo. 8:21) Keka ti ũseo wa Yeova ũndũ ũsu ndũtonyeka.

19 Twĩ na kĩanda kya mwanya kya kũtavya andũ onthe ala matonya kwĩthukĩĩsya watho ũũ mũseo ki wĩ ĩandĩkonĩ ya Ũvuan’yo 21:4, 5: “[Ngai] akavyaĩa methoi onthe methonĩ moo; na kĩkw’ũ kĩikethĩwa vo ĩngĩ; o na kũikethĩwa ĩngĩ kũmeta, kana kũĩa, kana woo: maũndũ ma mbee nĩ mavĩtu.” Na Yeova, ũla wĩkalĩte kĩvĩlanĩ kya ũsumbĩ, aĩtye, “Sisya, nĩngũtw’a maũndũ onthe meũ.” Ongelete kwasya, “Andĩka: nĩkwĩthĩwa ndeto ii nĩ sya kĩthito na nĩ sya w’o.” Ĩla twatavya angĩ ũvoo mũseo na kĩthito, twĩthĩawa tũikumya mumo ũla Yeova wĩ naw’o!