Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

Mũsyaĩĩsya (Ĩkaseti ya Kwĩmanyĩsya)  |  Mwei wa 6 2016

Yeova “Nĩwe Ũmũsũvĩaa”

Yeova “Nĩwe Ũmũsũvĩaa”

NĨKĨ ũtaĩle kwĩthĩwa na nzika na ndeto isu syaweta kana Yeova nũkũsũvĩaa? Kĩtumi kĩmwe nĩ kana Mbivilia nĩyo ĩwetete ũu. Ĩandĩko ya 1 Vetelo 5:7 yaĩtye atĩĩ: ‘Mũkĩmwiĩa kwĩmakĩa kwenyu kw’onthe, nũndũ nĩwe ũmũsũvĩaa.’ Nĩ kyaũ kĩĩkĩĩthasya vyũ kana Yeova Ngai nũkũthĩnĩkĩaa?

NGAI NĨWE WĨANĨASYA MAVATA MA ANDŨ

Yeova nĩ ngelekany’o nzeo kwitũ nũndũ we, e ĩnee na nĩ mũlau

Ũndũ ũmwe nĩ kana Ngai e nguma ila mũndũ wendaa anyanyae methĩwe nasyo. Kaingĩ ala me ĩnee na ũlau nĩmatumaa ndũũ ngamu na ala angĩ mailyĩ o tamo. Na o tondũ wĩsĩ, Yeova e ĩnee na nĩ mũlau. Kĩla mũthenya andũ nĩmatethekaa nĩ nguma isu syake. Sũanĩa ngelekany’o ĩno ĩmwe: “We nũmaumĩasya syũa yake athũku na aseo, na kũmauĩsya mbua ala mekaa ũlũngalu na ala matekaa ũlũngalu.” (Mt. 5:45) Nũseo wĩva ũetawe nĩ mbua na syũa? Ve moseo maingĩ ĩndĩ ũseo ũmwe nĩ kana kĩu kĩtumaa Ngai ‘ausũĩsya andũ lĩu na ũtanu ngoonĩ syoo.’ (Meko 14:17) Vate nzika, Yeova nũĩkĩĩthasya kana nthĩ nĩyaumya ũsyao mwingĩ vyũ, na kĩndũ kĩmwe tũtanĩaa mũno nĩ kũya lĩu mũue nesa.

Ĩndĩ nĩkĩ andũ aingĩ methĩawa na yũa? Nũndũ asumbĩki ma andũ masiasya mũno kĩla kĩtonya kũtuma methĩwa me nguma maũndũnĩ ma siasa na maiseũvya mbesa vandũ va kũtethya andũ. Ĩndĩ o mĩtũkĩ Yeova nũkũmina thĩna ũsu andũ maetete nũndũ wa ĩtomo. Akavetanga silikalĩ ila syĩ kw’o na aiete Ũsumbĩ wa ĩtunĩ, ũla ũkethĩwa ũtongoew’e nĩ Mwana wake e tawe Mũsumbĩ. Ĩvinda yĩu vai mũndũ ũkakwatwa nĩ yũa. Ĩndĩ kavindanĩ kaa tũĩ Ngai nũmanthĩaa athũkũmi make aĩkĩĩku kya ũya. (Sav. 37:25) Ũndũ ũsu tyo ũũtũĩkĩĩthya kana Ngai nũtũsũvĩaa?

YEOVA NŨTŨMĨAA ĨVINDA YAKE VAMWE NAITŨ

Yeova nĩ ngelekany’o nzeo kwitũ nũndũ we, nĩwendete kũtũmĩa ĩvinda yake vamwe naitũ

Mũnyanyau ũla mũseo nũtũmĩaa ĩvinda yake vamwe naku. O na no atũmĩe masaa maingĩ naku mũineenea kĩndũ inywelĩ mwendete. Na mũnyanyau ũla mũseo nũkwĩthukĩĩasya nesa ĩla ũendeee kũmũtavya mathĩna maku. We Yeova nũtwĩthukĩĩasya ũu? Ĩĩ, nĩwĩkaa ũu. Nĩwĩthukĩĩasya mboya sitũ. Nĩkyo Mbivilia ĩtwĩkĩaa vinya ĩkatwĩa ‘nĩtwĩkale na ũlũmu mboyanĩ,’ o na nĩtwĩaa ‘tũvoyae tũtekũeka.’—Alo. 12:12; 1 Ath. 5:17.

We Yeova atonya kũtũmĩa ĩvinda yĩana ata ethukĩĩsye mboya syaku? Ve ngelekany’o yĩ Mbivilianĩ ĩkũtũtetheesya kũkwata ũsũngĩo wa ĩkũlyo yĩu. Yesũ atanamba kũnyuva atũmwa make, amanthie ĩvinda “ekala ũtukũ w’onthe akĩvoya Ngai.” (Luka 6:12) Mboyanĩ ĩsu Yesũ nũtonya kwĩthĩwa aneeneie kĩla mũmanyĩw’a e weka aimũweta na ĩsyĩtwa. No kwĩthĩwa aneeneie nguma sya kĩla ũmwe na mawonzu make, na avoya Ĩthe amũtetheesye kũmanyuva. Syũa yĩyĩsa kũtw’ĩka nĩyauma, Yesũ nĩweesĩ kana nĩwanyuva ala maaĩlĩte vyũ kũtw’ĩka atũmwa. Nũndũ Yeova nĩwe “ũla wĩw’aa mboya,” nũtanaa kwĩthukĩĩsya mboya syonthe ila andũ mavoya kuma ngoonĩ. (Sav. 65:2) O na mũndũ akamina masaa meana ata aivoya nũndũ wa ũndũ ũũmũthĩny’a mũno, Yeova ndatalaa ta waanangĩwa ĩvinda.

NGAI NĨWĨYŨMBANĨTYE KŨEKEA

Yeova nĩ ngelekany’o nzeo kwitũ nũndũ we, nĩwĩyũmbanĩtye kũekea

Mavinda amwe o na andũ me ndũũ nĩmew’aa ve vinya kũekeanĩa. O na ĩmwe andũ nĩmooaa ndũũ matumĩte kwa ĩvinda ĩasa nũndũ wa kũemwa vyũ nĩ kũekeanĩa. Yeova we ndailyĩ ũu. Mbivilia nĩthoketye mũndũ w’onthe ũla wĩ na ngoo nzeo amwĩtye ũekeo “nũndũ akamũekea vyũ.” (Isa. 55:6, 7) Nĩ kyaũ kĩtumaa Ngai aekea nesa wĩana ũu?

Kĩla kĩtumaa Ngai eka ũu nĩ kana we e wendo ũte maela. Nĩwendete nthĩ mũno na nũndũ wa ũu nĩwanenganie Mwana wake, Yesũ, nĩ kana atangĩĩe andũ kuma ũkombonĩ wa naĩ na thĩna ũla makwatĩte nũndũ wa ĩ naĩ. (Yoa. 3:16) Na ti ũu wĩ w’oka. Nũndũ wa nthembo ĩsu Klĩsto waumisye,  Ngai nũekeaa na ngenda onthe ala ũmendete. Mũtũmwa Yoana aandĩkie atĩĩ: “Ethĩwa nĩtũkumbũla naĩ sitũ, we e kĩthito, na nĩ mũlũngalu wa utũekea naĩ sitũ.” (1 Yoa. 1:9) Nũndũ Yeova nũekeaa andũ, nĩmatonya kũendeea kũtanĩa ngwatanĩo nzeo nake. Na nũndũ Ngai nũtũthĩnĩkĩaa na nzĩa ĩsu, ũsu nĩ ũndũ ũtwĩkĩaa vinya mũno.

NŨKŨTETHASYA ĨLA WĨ NA THĨNA

Yeova nĩ ngelekany’o nzeo kwitũ nũndũ we, nũtũtethasya ĩla twĩ na thĩna

Mũndũ wendete ũngĩ kuma ngoonĩ nũmũtethasya ĩla wĩ na vata. We Yeova nĩwĩkaa ũu? Ndeto yake ĩtwĩĩte atĩĩ: “O na [mũthũkũmi wa Ngai] avalũka, ndakavika nthĩ vyu; nĩkwĩthĩwa Yeova nĩwe ũnũũmũkwata na kw’oko.” (Sav. 37:24) Yeova ‘akwataa athũkũmi make kw’oko’ na nzĩa syĩ kĩvathũkany’o. Kwaeka wone ũndũ kyu kyonanĩtw’e nesa nĩ ngewa ĩmwe yumĩte kĩthamanĩ kya Caribbean kĩtawa St. Croix.

Ve kamwĩlĩtu kamwe kaleile kũkũnĩa kĩvendela saluti nũndũ wa mũĩkĩĩo wako, na kyu kyatuma kathĩnw’a nĩ syana ila kasomaa nasyo. Nĩkavoyie Yeova akatetheesye na katw’a kana kaiekela ngewa ĩsu vau. Ĩla ĩvinda yako yavikie ya kumĩsya kĩlasi ũvoo, katũmĩie mwanya ũsu kũelesya ĩũlũ wa kũkũnĩa kĩvendela saluti. Katũmĩie Ĩvuku Yakwa ya Ngewa sya Mbivilia kũelesya ũndũ ĩla ngewa ya Satalaki, Mesaki, na Aveti-neko yakatetheeisye kwĩka ũtwi ũla keekie. Katavisye kĩlasi kĩu atĩĩ: “Yeova nĩwasũvĩie Aevelania asu atatũ nũndũ mayaaĩtĩkĩla kũthaitha mũvw’anano.” Na ĩndĩ keea syana syonthe ila syaĩ vau kana syenda no kainenge ĩvuku yĩu. Syana ĩkũmi na kamwe nĩsyendie kũkwata ĩvuku yĩu. Kamwĩlĩtu kau nĩkamanyie kana Yeova nĩwe wakanengie ũkũmbaũ na ũĩ wa kumya ũkũsĩ ĩũlũ wa ũndũ ta ũsu wĩany’a vinya ũu, na kĩu nĩkyatumie katana mũno.

Ũkesa kũya nzika kana Yeova nũkũsũvĩaa, vindĩĩsya mĩsoa ta ĩno ya Mbivilia: Savuli 34:17-19; 55:22; na 145:18, 19. Kũlya ala methĩĩtwe me Ngũsĩ ĩvinda ĩasa ũndũ Yeova wĩthĩĩtwe aimasũvĩa. Na wesa kũkwatwa nĩ vata, voya Ngai ũmũtavye vata waku. Weeka ũu, ndwĩema kwĩthĩa kaĩ Yeova ‘nĩwe ũkũsũvĩaa’!