Waaĩsa kwĩw’a ũtavany’a wĩ vinya? Aingĩ maitũ tũkakũlw’a ũu twasya ĩĩ. Nĩkĩ? No kwĩthĩwa twĩthĩaa andũ matekwendeew’a nĩ ũvoo witũ, kana matũmenete. O na no kwĩthĩwa tũkĩaa kũneena na andũ tũtamesĩ. Vate nzika maũndũ ta asu no matume ũtanu witũ ũoleka. Ĩndĩ o na vailyĩ ũu, ithyĩ tũthaithaa ũla “Ngai mũtanu” na endaa tũmũthũkũme twĩ atanu. (1Tim 1:11, NWT; Sav 100:2) Twĩ na itumi syĩva itatũ sya kũtanĩa ũtavany’a?

Mbee vyũ, tũtavanasya ũvoo ũnengae andũ wĩkwatyo. O na kũtw’ĩka andũ aingĩ ũmũnthĩ nĩmaendeee kwasya wĩkwatyo, no tusũsye ngoo syoo na “ũvoo mũseo wa maũndũ maseo.” (Isa 52:7) Ĩndĩ ũvoo mũseo wa Ũsumbĩ wa Ngai no ũtũnenge ũtanu o naitũ. Kwoou ũtanamba kumaala ũkatavany’e, sũanĩa moathimo ala Ũsumbĩ wa Ngai ũkaete kũũ nthĩ.

Kelĩ, ũvoo ũla tũtavanasya nũtumaa andũ maendeea nesa kĩ-mwĩĩ na kĩ-veva. Nĩmemanyĩasya kũekana na imanyĩo ite nzeo, na mayĩthĩwa na wĩkwatyo wa thayũ ũtathela. (Isa 48:17, 18; Alo 1:16) Kwa tũsũanĩe tũnengetwe wĩa wa kũmantha andũ maũmĩĩte mũisyonĩ na kũmatetheesya. O na kau nĩvatonya kwĩthĩwa ve amwe matekwenda kũtetheew’a, tũieka kũmantha ala mekwenda kũtetheew’a.—Mt 10:11-14.

Ũndũ wa katatũ, ũla nĩw’o wa vata vyũ, nĩ kana wĩa witũ wa kũtavany’a nũmũtaĩaa Yeova. Onaa wĩa ũsu tũtethasya wĩ wa vata mũno. (Isa 43:10; Aevl 6:10) O na nũtũnengae veva wake mũtheu nĩ kana twĩanĩsye wĩa ũsu. Kwoou mũvoye Yeova aũnenge ũtanu, ũla nĩ kĩlungu kĩmwe kya ũsyao wa veva mũtheu. (Aka 5:22) No tũmĩanĩsye na mathĩna ala matũkwataa twĩ ũtavany’a na tũitavany’a na ũkũmbaũ. (Meko 4:31) Na ĩndĩ tweeka ũu tũkatanĩaa vyũ wĩa witũ wa kũtavany’a o na andũ matwosa ata.—Esek 3:3.

We wĩenda kwĩthĩawa na woni wĩva ĩũlũ wa ũtavany’a?

SISYAI VITIO, KŨSOMA NA KŨVINDĨĨSYA KĨLA WASOMA NO KŨTŨNGE ŨTANU ŨLA WAĨ NAW’O, NA ĨNDĨ MŨISŨNGĨA MAKŨLYO AA MAATĨĨE:

  • Nĩkĩ twaĩle kwĩmanyĩasya nesa kĩla ĩvinda o na ethĩwa tũtũmĩaa masaa maingĩ ũtavany’a kĩla mwei?

  • Tũtonya kũatĩĩa ngelekany’o ya Mary ata?

  • We wosaa ĩvinda ya kũvindĩĩsya Ndeto ya Ngai ĩndĩĩ?

  • Nĩ kyaũ kĩũtanĩthasya ĩla ũũtavany’a ũvoo mũseo?