Ĩla Yesũ waĩ ĩũlũ wa nthĩ, nĩwakindĩlĩĩile mwĩao ũla waĩtye: “Taĩa au na mwenyu.” (Kuma 20:12; Mt 15:4) Vai nzika kana Yesũ aineena ndeto isu ndaĩ na wia nũndũ ‘nĩweenyivĩasya’ asyai make ĩla waĩ wa mũika. (Lk 2:51) O na e mũndũ mũima, nĩwaĩkĩĩthisye kana o na ĩtina wa kũkw’a kwake, inyia wake akaendeea na kũsũvĩwa.—Yoa 19:26, 27.

O na ũmũnthĩ, Aklĩsto ma mũika ala mew’aa asyai moo na matũmĩaa ndeto nzeo ĩla meũneena namo methĩawa maimanenga ndaĩa. Vate nzika, mwĩao ũla waĩtye tũnenge asyai maitũ ndaĩa ndwĩ mĩvaka. O na asyai maitũ makũa, nĩtwaĩle kũendeea kũmanenga ndaĩa na kũtetheka kumana na ũĩ woo. (Nth 23:22) O na ĩngĩ, nĩtwonanasya kana nĩtũnengete asyai maitũ ala akũũ ndaĩa kwa kũthĩnĩkĩaa mavata moo ma kĩ-mwĩĩ na ma ngoonĩ. (1Tim 5:8) Twĩthĩwe twĩ akũũ kana twĩ andũ ma mũika, ũndũ ũla mũnene twaĩle kwĩka twonany’e kana nĩtũnengete asyai maitũ ndaĩa nĩ kũneenaa namo na kũeaa ngewa namo kwa nzĩa ĩla yaĩle.

ĨLOELEI VITIO YA KATUNI SYA KŨSOLA YĨ NA KYONGO, NDONYA ATA KŨEA NGEWA NA ASYAI MAKWA TŨKEW’ANA? NA ĨNDĨ MŨISŨNGĨA MAKŨLYO AA MAATĨĨE:

  • Nĩkĩ ũtonya kwĩthĩwa wĩ ũndũ wĩ vinya kũneena na asyai maku?

  • Ũtonya ata kũnenga asyai maku ndaĩa ĩla ũũneena namo?

  • Tũtethekaa ata ĩla tweekĩa kĩthito tũneene na asyai maitũ? (Nth 15:22)

    Kũneena na asyai maku no kũũtetheesye kwaĩlya maũndũ maku wĩ wa mũika, o na ĩla ũkatw’ĩka mũndũ mũima