Viktor Stashevskiy ethĩĩtwe e mwove yela nthĩ ya Crimea kuma Mwei wa 3, 2021

Ngũsĩ sya Yeova Ila Syovetwe Nũndũ wa Mũĩkĩĩo Wasyo—Kwosana na Kĩsio

THAŨKA

Ngũsĩ sya Yeova ila syovetwe nũndũ wa mũĩkĩĩo wasyo ĩũlũ wa nthĩ yonthe tũivika Mwei wa 4, 2026, nĩ mbee wa 279.

Ũthasyo wa kũsũanĩa, wa kũatĩĩa wasya wa ngoo, na wa ũthaithi, nĩ wa vata mũno andũnĩ kwosana na kĩlungu kya 18 kya International Covenant on Civil and Political Rights. Ĩndĩ nthĩ imwe, Ngũsĩ sya Yeova nivenetwe ũthasyo ũsu na ikovwa kana kũthĩnwʼa mũno ite mavĩtyo nũndũ wa kũatĩĩa mũĩkĩĩo woo, kana nũndũ wa kũlea kũlika ũthũkũminĩ wa ita nũndũ wa wasya woo wa ngoo.

Russia

Twĩ Mwei wa 4, 2017, Koti Ũla Mũnene Vyũ wa Russia nĩwavenie Ngũsĩ sya Yeova ũthasyo wa ũthaithi, na woosa syĩndũ syoo nũndũ maasya kana Ngũsĩ sya Yeova nĩ kĩkundi kya andũ maleanaa na silikalĩ. Kĩu nĩkyatumie koti ũsu ũũngamya kũtũmĩwa kwa nyũmba sya ũthaithi na woosa imwe, o vamwe na kũkũna maluvuku mavuku moo. Silikalĩ nĩyambĩĩie kũthĩnyʼa Ngũsĩ syĩ mũndũ ũmwe ũmwe nũndũ yoonaa maũndũ ala andũ asu mekwĩka makonetye ũthaithi ta matũlĩte mĩao ya silikalĩ. Mavinda maingĩ asikalĩ nĩmaendaa mĩsyĩnĩ ya Ngũsĩ kũmathĩnyʼa, makamakua naĩ, makamakũlya makũlyo me angʼendu, na o na maimakwata. Yu tũĩ, Ngũsĩ sya Yeova ta 172 nikwatĩtwe na ikasiĩĩwa, amwe meteele kũsilĩlwa kotinĩ, angĩ maendeee kũthũkũma kyovo kya wĩa mũmũ, na angĩ movetwe yela.

Tina vaa nĩ kana umye masyĩtwa ma Ngũsĩ sya Yeova ila syovetwe yu tũĩ nũndũ wa mũĩkĩĩo wasyo nthĩ ya Russia.

Singapore

Kwosana na mĩao ya nthĩ ya Singapore, aũme onthe methĩawa maĩlĩte kũlika itanĩ sya kaũ sya nthĩ ĩsu na silikalĩ ndĩtĩkĩlaa kĩtumi o na kĩmwe kya kũlea kũlika itanĩ kĩkonanĩtye na wasya wa ngoo, na ala malea kũlika methĩawa maĩlĩte kwovwa yela kwa ĩvinda ya myei 30. O na kau Ngwatanĩo ya Nthĩ nĩyakũlilye kwa myaka mingĩ nthĩ ya ya Singapore ĩnenge andũ ũthasyo wa kwĩtwʼĩĩa nĩmeũlika itanĩ sya kaũ kana mailika, nthĩ ĩsu ndyaaĩsa kwĩtĩkĩlana na myolooto ĩla yumĩtwʼe ĩũlũ wa nthĩ yonthe ĩla ĩteteaa ũthasyo wa andũ maũndũnĩ ta ita sya kaũ. Yu tũĩ, Ngũsĩ sya Yeova kenda sya mũika nĩsyovetwe yela nũndũ wasya wa ngoo ndũũsyĩtĩkĩlya kũlika itanĩ sya kaũ, na atatũ katĩ wa asu nĩ ĩvinda yoo ya kelĩ kwovwa yela.

Tina vaa nĩ kana umye masyĩtwa ma Ngũsĩ sya Yeova ila syovetwe yu tũĩ nũndũ wa mũĩkĩĩo wasyo nthĩ ya Singapore.

South Korea

Twĩ Matukũ 26, Mwei wa 10, 2020, nthĩ ya South Korea nĩyaetie mũvango ũngĩ wa mawĩa angĩ matonya kũthũkũmwa nĩ andũ ala wasya woo wa ngoo ũteũmetĩkĩlya kũlika itanĩ sya kaũ. Ĩndĩ, andũ amwe maasya kana mawĩa asu methĩawa me momũ na ma kũthĩnyʼa nũndũ makuaa ĩvinda ya myei 36, nawʼo wĩa wa ita sya kaũ ũkuaa myei 18. O na kau ũndũ ũsu nĩwaneeneiwe kotinĩ twĩ mwaka wa 2024, koti mũnene wĩtawa South Korean Constitutional Court nĩwatwie kana mũvango wa kũthũkũmĩthya andũ mawĩa momũ nĩwosanĩte na mĩao na nũkũendeea. Ngũsĩ sya Yeova mbingĩ itwʼĩte kũthũkũma mawĩa asu angĩ o na kau methĩawa me momũ mũno. Ĩndĩ o na vailye ũu, ana-a-asa ma mũika 15 nĩmatwʼĩte kũlea kũthũkũma mawĩa asu momũ. Ũmwe katĩ wa asu nĩwovetwe yela, na angĩ nĩmasiĩĩwe meteele kũsilĩlwa kotinĩ na nĩmatonya kwovwa.

Tina vaa nĩ kana umye masyĩtwa ma Ngũsĩ sya Yeova ila syovetwe yu tũĩ nũndũ wa mũĩkĩĩo wasyo nthĩ ya South Korea.

Ukraine

Kwa ĩvinda ya myaka vakuvĩ 30, Ngũsĩ sya Yeova nthĩ ya Ukraine nitethekete nĩ mwĩao ũla wĩtĩkĩlĩtye ala wasya woo wa ngoo ũteũmetĩkĩlya kũlika itanĩ sya kaũ kũthũkũma mawĩa angĩ. Ĩndĩ yĩla kaũ wambĩĩie Ukraine Matukũ 24, Mwei wa 2, 2022, andũ onthe nĩmeeiwe malike kaũnĩ ũsu. Na nũndũ vayaĩ na mwĩao wĩ ũtheinĩ wa mũndũ kwĩnyuvĩa kũthũkũma wĩa ũngĩ ethĩwa ndeũlika itanĩ, andũ aingĩ ala maleile kũlika itanĩ matwaiwe kotinĩ na ĩtina mekwʼa yela. Yu tũĩ, Ngũsĩ kenda nĩsyovetwe yela na ingĩ kenda nĩsyeteele kũsilĩlwa kotinĩ. Andũ atatũ ala mateteaa ũthasyo wa andũ na matũmĩtwe nĩ Ngwatanĩo ya Nthĩ nĩmakũlilye nthĩ ya Ukraine yumye mwĩao wĩ ũtheinĩ ũla andũ ala wasya woo wa ngoo ũteũmetĩkĩlya kũlika itanĩ ĩvinda ya kaũ matonya kũatĩĩa.

Tina vaa nĩ kana umye masyĩtwa ma Ngũsĩ sya Yeova ila syovetwe yu tũĩ nũndũ wa mũĩkĩĩo wasyo nthĩ ya Ukraine.

“Endeeai kũmalilikana ala me yela, ta mwovetwe vamwe namo.”—Aevelania 13:3.

O na Ĩngĩ Sisya

MAKŨLYO MAKŨLAWʼA MAVINDA MAINGĨ

https://cms-imgp.jw-cdn.org/img/p/1014757/univ/art/1014757_univ_sqr_xl.jpg