Content de lai

Mungkan Ting Hta Yehowa Sakse Kade Daram Nga ai Kun?

Mungkan Ting Hta Yehowa Sakse Kade Daram Nga ai Kun?

2018 Magam Shaning * Jahpan

Mungkan Ting Na Yehowa Sakse Hti Hkum

8,579,909

Buga Hpung Ni

119,954

Yehowa Sakse Ni Hkaw Tsun Nga Ai Mungdan Hte Shara Ni

240

Hpung Shang Masha Marai Kade Nga Ai Hpe Gara Hku Hti Ai Kun?

Mungdan Kabu Gara Shiga hpe shata shagu myit rawt let, hkaw tsun nga ai ni hpe sha, Yehowa Sakse hpung shang masha hku nna jahpan la ai. (Mahte 24:14) Dai hta, hkalup hkam ngut sai Sakse Hkam Ni hte hkalup garai n hkam shi tim, hkaw tsun bungli hta shang lawm nga ai ni mung lawm ai.

Hpung Masha Langai Byin Na Matu Gumhpraw Shang Lawm Ra Ai Kun?

N ra ai. Masha langai sakse hkam byin ai, hpung hta lit lama ma lu ai, ahkaw ahkang lu ai ni gaw gumhpraw shang lawm ai hte n seng ai. (Kasa 8:18-20) Teng sha nga yang, alu gumhpraw law malawng hpe kadai bang ai pyi n chye lu ai. Sakse Hkam langai hpra gaw mungkan grup magam bungli a matu tinang a aten, n-gun atsam, arung arai ni hpe dang di lu ai daram shawang myit hte sak jaw nga ai re.​—2 Korinhtu 9:7.

Myit Rawt Let Hkaw Tsun Nga Ai Sakse Hkam Hti Hkum Hpe Gara Hku Chye Ai Kun?

Shata shagu, Sakse Hkam Ni gaw hkaw tsun jahpan hpe shanhte a buga hpung hta jaw ra ai. Dai jahpan hpe shawang myit hte lajang ai.

Buga hpung gaw jahpan ni hpe chyarang galaw nna, chyarang yawng hpe seng ang ai ginjaw garan rung de sa ya ai. Ginjaw garan rung gaw mungdan ting kaw nna sa ya ai hkaw tsun jahpan yawng hpe pawng hpawng nna, ginjaw rung de bai sa ya ai.

Magam shaning jahtum hta, * dai shaning laman, mungdan langai hpra a law htum Sakse Hkam hti hkum hpe la ai. Dai hti hkum ni yawng hpe pawng dat yang, mungkan ting kaw na Sakse Hkam hti hkum hpe chye lu ai. Mungdan langai hpra a ahkri ahkrai jahpan ni hpe anhte a website na “Mungkan Grup” ngu ai shara hta yu u. Dai zawn jahpan ni gaw shawng nnan na Hkristan ni hpe n-gun lu wa shangun ai zawn, dai ni aten hta mung n-gun lu shangun ai.​—Kasa 2:41; 4:4; 15:3.

Anhte A Nawku Hpung Hte Kanawn Mazum Nga Tim Hkaw Tsun Bungli Hta N Shang Lawm Ai Ni Hpe Hpung Masha Hku Nna Jahpan Bang Ai Kun?

Sakse Hkam hti hkum hta shanhte ni n lawm ai. Raitim, shanhte hpe buga hpung kaw na ni gaw atsawm sha hkap hkalum la ga ai. Shanhte law malawng gaw Hkristu Si Ai Myit Dum Poi hpe sa lung ma ai. Shanhte a hti hkum hpe chye mayu ai nga yang, Myit Dum Poi sa lung ai hti hkum hte Sakse Hkam hti hkum hpe shing daw mai ai. 2018 shaning hta Myit Dum Poi sa lung ai marai 20,329,317 nga ai.

Sakse hkam ni a zuphpawng hpe n sa lung ai masha law malawng mung, manu jahpu n jaw ra ai Chyum Laika hkaja ai lamang kaw nna akyu lu la ma ai. 2018 shaning laman, shata shagu Chyum ga sharin ai lam 10,079,709 galaw wa ai.

Asuya Ni Tsun Ai Sakse Hkam Hti Hkum Gaw Nanhte Tsun Ai Hti Hkum Hta Hpa Majaw Grau Law Nga Ai Kun?

Asuya gaw masha ni hpe gara hpung kaw na rai kun nga nna sha, san let hti hkum hpe la ai re. Ga shadawn, U.S Yup Tung Jahpan Dap gaw jahpan hta ai shaloi, “gara hpung re ai hpe masha langai a hkam la ai lam ntsa hkan nna sha, jahpan hta ai.” Dai majaw, shanhte tsun ai hti hkum gaw, hpung shang masha ajet hti hkum n re ai sha, masha ni hkam la ai ntsa sha madung taw nga ai. Shanhte hte n bung ai sha, Yehowa Sakse ni chyawm gaw kaga ni hpe hkaw tsun nga ai bungli hta teng sha shang lawm nga nna, jahpan jaw ai ni hpe sha jahpan hta bang ai. Tinang hkum tinang Sakse Hkam re ai ngu nna majoi tsun nga ai ni hpe jahpan hta n hti shalawm ai.

^ စာပိုဒ်၊ 2 Magam shaning ngu ai gaw, September 1 kaw nna hpang shaning August 31 du hkra re. Ga shadawn, 2015 magam shaning gaw, September 1, 2014, kaw nna August 31, 2015 du hkra re.

^ စာပိုဒ်၊ 16 Magam shaning ngu ai gaw, September 1 kaw nna hpang shaning August 31 du hkra re. Ga shadawn, 2015 magam shaning gaw, September 1, 2014, kaw nna August 31, 2015 du hkra re.