Content de lai

Yehowa Sakse Ni Gaw Makam Masham Kayau Ai Kun?

Yehowa Sakse Ni Gaw Makam Masham Kayau Ai Kun?

Yehowa Sakse ni gaw makam masham amyu myu nga ai masha ni hte makam masham hte seng ai lam bawng ban mayu ga ai. Raitim, makam masham kayau nna, arau nawku ai baw gaw n galaw ga ai. Hkristan ajet ni gaw “myit hkrum mang hkrum langai sha” nga ai ngu nna Chyum Laika hta tsun da ai. Dai gaw, makam masham hta langai sha re ai majaw re. (Ehpesu 4:16; 1 Korinhtu 1:10; Hpilipi 2:2) Dai gaw, tsawra myit, matsan dum myit hte mara raw ya chye ai myit ni nga ai majaw sha n re. Anhte a makam masham gaw tup hkrak jaw ai Chyum Laika machye machyang hta madung da ai. Dai hku n rai yang, anhte a makam masham gaw kaman li la sha rai mat na.​—Roma 10:2, 3.

Chyum Laika hta, makam masham n bung ai ni hte arau, nawku daw jau ai hpe nhtan shai ai kandang hpai ai hte shingdaw da ai. Dai majaw, kayau kaya arau nawku daw jau yang, Hkristan makam masham hpe pyi hkra machyi wa shangun chye ai. (2 Korinhtu 6:14-17) Dai majaw, Yesu gaw shi a sape ni hpe makam masham hta kayau ai lam galaw na matu ahkang n jaw ai. (Mahte 12:30; Yawhan 14:6) Dai zawn sha, Mawshe hku nna Karai Kasang jaw ai Tara hta mung, moi Israela masha ni hpe makam masham n bung ai ni a nawku daw jau ai lam hta shang lawm na ahkang n jaw ai. (Pru Mat 34:11-14) Dai majaw, makam masham n bung ai ni gaw nawku daw jau ai lam hte seng ai bungli ni hpe sa karum ya mayu ai nga nna sa tsun ai shaloi, sadi dung ai Israela ni gaw ningdang kau ma ai.​—Ezra 4:1-3.

Yehowa Sakse Ni Gaw Makam Masham N Bung Ai Ni Hte Makam Masham Lam Tsun Shaga Ai Kun?

Tsun ai. 2018 ning laman, makam masham n bung ai kaga ni hpe ahkying hti hkum 2,074,655,497 hkaw tsun wa ai. Anhte ni mung kasa Pawlu zawn, masha law law a myit mang ai lam hte hkap la kamsham ai lam ni hpe chye na mayu ga ai. (1 Korinhtu 9:19-22) Makam masham n bung ai ni hpe ga shaga ai shaloi, Chyum Laika lam matsun hte maren hkungga let lu tsun hkra shakut ga ai.​—1 Petru 3:15.