Content de lai

Yehowa Sakse Ni A Magam Bungli Hpe Gara Kaw Na Gumhpraw Hte Galaw Nga Ai Kun?

Yehowa Sakse Ni A Magam Bungli Hpe Gara Kaw Na Gumhpraw Hte Galaw Nga Ai Kun?

Anhte a hkaw tsun magam bungli gaw madung hku nna, Yehowa Sakse ni a shawang myit hte bang ai alu gumhpraw ni hte galaw nga ai. Hpung masha ni hpe, htam shi alu bang na matu hpyi shawn ai lam n nga ai. Nawku zuphpawng ni galaw nga ai shaloi, alu hta ai mung n nga ai. (Mahte 10:7, 8) De a malai, shawang myit hte alu bang mayu ai ni a matu, zuphpawng galaw ai shara hta alu sut dek ni tawn da ya ai. Alu bang ai ni a amying jahpan hpe mung n shana ya ai.

Anhte hta shabrai sha ai hpung sara n nga ai majaw, gumhpraw hpe atsawm hparan lajang nna jailang lu ai re. Dai sha n-ga, nta langai hpang langai sa hkaw na matu mung, Yehowa Sakse ni hpe shabrai n jaw ra ai. Anhte a nawku ai shara ni hpe mung, asan sha gap da ai.

Lu wa ai alu ni yawng hpe, Yehowa Sakse ni a ginjaw garan rung de sa ya ai. Ginjaw garan rung gaw dai alu ni hpe shingra tara a tsin yam hkrum ai ni hpe karum na matu, sasana magam gun ai ni hte hpung kawan ni hpe madi shadaw na matu, ya she rawt jat wa ai mungdan ni kaw nawku htingnu gawgap na matu, Chyum Laika hte kaga Hkristan laili laika ni dip shapraw nna sa ya na matu, dai gumhpraw ni hpe jailang ai.

Masha langai hpra gaw, buga hpung hta ra ai lam ni hta lang na matu, mungkan grup hkaw tsun magam hta lang na matu, shing nrai lahkawng yan hta lang na matu, tinang ra ai hku dawdan nna, alu gumhpraw shang lawm mai ai. Nawku hpung shagu hta mung, shata shagu lang ai gumhpraw jahpan hpe hpung masha ni chye hkra shana ya ai.