Content de lai

Secondary menu hpe lai

Malawm Ni Hpe Lai U

Yehowa Sakse Ni

Kachin

Sin Lanchyi (Hkaja Laika)  |  September 2017

Yehowa A Matsan Dum Myit Hpe Kasi La U

Yehowa A Matsan Dum Myit Hpe Kasi La U

“Yehowa, Yehowa, . . . n-gaw nwai re ai, matsan dum ai.” ​—⁠Pru Mat 34:6.

Mahkawn: 57, 147

1. Yehowa gaw, tinang a lam Mawshe hpe gara hku tsun dan wa ai kun? Hpa majaw dai gaw ahkyak ai kun?

KALANG mi hta, Karai Kasang gaw Mawshe hpe shi a amying hte atsam ningja nkau mi hpe shi nan tsun dan wa ai. Yehowa gaw shi a arawng sadang hte hpaji byeng ya hpe shawng tsun na malai, n-gaw nwai myit hte matsan dum myit hpe tsun dan wa ai. (Pru Mat 34:5-7 hpe hti u.) Yehowa gaw Mawshe hpe madi shadaw ya na hpe, Mawshe chye ra ai. Dai majaw, Yehowa gaw shi a mayam ni hpe teng sha karum ya mayu ai lam madun na matu, shi a atsam ningja ni hpe ahkyak shatai tsun wa ai. (Pru Mat 33:13) Yehowa gaw anhte hpe grai lanu lahku ai lam chye ai shaloi, nang gara hku hkamsha ai kun? Kaga ni tsin-yam hkrum ai hpe myit tau ya nna shanhte hpe karum ya mayu ai matsan dum myit hpe ndai sumhpa hta hkaja mat na re.

2, 3. (a) Masha yawng hta matsan dum myit nga ai gaw hpa majaw kun? (b) Matsan dum myit hte seng nna Chyum Laika hta tsun da ai lam hpe hpa majaw anhte ni myit lawm ra a ta?

2 Yehowa gaw matsan dum chye nna, masha hpe shi a hkrang sumla hte maren hpan da ai. Dai majaw, masha yawng hta kaga ni hpe karum ya mayu ai myit nga ai re. Yehowa hpe n chye ai ni pyi, matsan dum myit madun ma ai. (Ningpawt 1:27) Chyum  Laika hta, matsan dum myit madun wa ai ni a lam grai law hkra lawm ai. Ga shadawn, Shawlumon gaw num lahkawng hta na kadai gaw ma kanu majing re ai hpe chye na matu, ma hpe kaang brang di kau u ngu tsun nna chyam wa ai. Dai shaloi, kanu majing gaw shi a ma hpe tsawra matsan dum ai majaw, kaga num hpe sha jaw kau nu ngu nna hkawhkam wa hpe hpyi nem ai. (1 Hkawhkam 3:23-27) Matsan dum ai lam madun ai kaga langai gaw Hpara-u a shayi sha re. Ma chyangai Mawshe hpe mu ai shaloi, ma ndai gaw Hebre ma re ai majaw sat kau ra na hpe shi chye ai. Raitim, “dai ma hpe . . . shi matsan dum” ai majaw shi a ma majing hku bau la na ngu dawdan kau ai.​—⁠Pru Mat 2:5, 6.

3 Matsan dum myit hte seng nna anhte hpa majaw grau hkaja ging a ta? Yehowa gaw shi hpe kasi la shangun mayu ai majaw re. (Ehpesu 5:1) Anhte gaw matsan dum myit rawng hkra hpan da hkrum tim, n hkum tsup ai ni re ai majaw, tingkyeng myit nga ai. Kalang lang, masha ni hpe karum na kun? Tinang a matu sha myit na kun? ngu ai hpe dawdan na matu yak chye ai. Masha ni hpe myit lawm ai lam grau nna madun na matu hpa gaw karum ya na kun? Langai, Yehowa hte kaga masha ni matsan dum myit gara hku madun wa ai hpe myit yu ga. Lahkawng, Karai Kasang a matsan dum myit hpe gara hku kasi la na hte dai hku kasi la ai gaw hpa majaw kaja ai hpe yu yu ga.

Yehowa Gaw Matsan Dum Myit Madun Ai Hta Kasi Kaja Htum Re

4. (a) Sodom de sa na matu lamu kasa yan hpe Yehowa hpa majaw shangun dat ai kun? (b) Lawt dinghku a mabyin masa kaw na anhte hpa sharin la lu ai kun?

4 Chyum Laika hta matsan dum myit hte seng nna Yehowa madun wa ai kasi law law hpe mu lu ai. Ga shadawn, Lawt hte seng nna shi hpa galaw wa ai hpe myit yu ga. Lawt gaw dinghpring ai wa rai nna Sodom hte Gomora na akyang hten ai masha ni a majaw “myit tsang hkrum” nga ai. Dai masha ni gaw Karai Kasang hpe n hkungga ai majaw, Yehowa gaw shanhte hpe jahten kau na matu dawdan wa ai. (2 Petru 2:7, 8) Sodom hte Gomora mare gaw jahten hkrum sana re majaw, hprawng ra na ngu tsun na matu Yehowa gaw Lawt hpang de, lamu kasa lahkawng hpe shangun dat ai. Chyum Laika hta ndai hku tsun ai: “Shi chyawm gaw a ganyi nga ai, rai ti mung Yehowa shi hpe matsan dum nga ai majaw, dai lamu kasa yan gaw shi hte shi a madu jan hpe mung, shi a shayi sha yan hpe mung lata hta dun nna shapraw nhtawm, dai mare shinggan e woi tawn mu ai.” (Ningpawt 19:16) Lawt a masa hpe Yehowa chye na ya ai zawn, anhte hkrum nga ai mayak mahkak ni hpe mung shi chye na ya ai hpe anhte kam mai ai.​—⁠Esaia 63:7-9; Yaku 5:11; 2 Petru 2:9.

Anhte hkrum ai yakhkak jamjau ai lam ni hpe Yehowa tsep kawp chye na ya ai

5. Matsan dum myit madun ai hte seng nna Chyum Laika hta anhte hpe gara hku sharin ya ai kun?

5 Yehowa gaw shi a masha ni matsan dum myit madun na matu mung sharin ya wa ai. Israela amyu masha ni hpe jaw da ai tara langai hpe myit yu u. Marai langai ngai gaw gumhpraw hkoi na nga yang, ga shaka hku nna shi a hpajawng hpe gumhpraw hkoi ya ai wa hpe jaw da ra ai. (Pru Mat 22:26, 27 hpe hti u.) Raitim, hkoi ya ai wa gaw, jan n du shi yang, hpajawng hpe bai jaw ra ai. Rai yang she, shana ting lum lum yup lu na re. Marai langai ngai gaw, matsan dum myit n nga ai  majaw hpajawng hpe bai n jaw mayu tim, Yehowa gaw shi a masha ni hpe matsan dum myit nga na matu sharin ya ai. Ndai hkang da ai tara a hpang hta nga ai n pawt tara gaw anhte hpe hpa sharin ya ai kun? Hpunau nauna ni a ra kadawn ai hpe n chye masu su n mai di ai. Yakhkak hkrum ai hpunau, nauna langai ngai nga yang anhte karum ya na re.​—⁠Kolose 3:12; Yaku 2:15, 16; 1 Yawhan 3:17 hpe hti u.

6. Yubak grai law ai Israela ni hpe Yehowa matsan dum myit madun ai kaw nna anhte hpa sharin la lu a ta?

6 Israela ni gaw Yehowa hpe ninghkap nna yubak galaw tim, shi gaw matut nna matsan dum myit madun ai. Ndai hku hti lu ai: ‘Shanhte a kaji kawa ni a Karai Kasang Yehowa gaw, shi a amyu hpe mung, shi shanu nga ai shara hpe mung matsan dum nga ai majaw, jau jau rawt nna, lang mi hte lang mi shi a kasa ni hpe shanhte hpang de shangun dat ai.’ (2 Hkawhkam Labau 36:15) Dai hte maren, Yehowa hpe n chye shi ai raitim myit malai lu nna Yehowa a jinghku byin wa mai ai ni hpe mung matsan dum myit madun ging ai. Kade nna yang du wa na tara dawdan ai nhtoi hta, Yehowa gaw kadai hpe mung n htenza shangun mayu ai. (2 Petru 3:9) Dai majaw, ya aten naw nga ai laman, Karai a matsan dum myit kaw nna masha law law akyu lu na matu shi a sadi jaw ai shiga hpe anhte tsun dan mayu ga ai.

7, 8. Dinghku langai gaw Yehowa shanhte hpe matsan dum myit madun wa ai lam hpa majaw kam wa ai kun?

7 Dai ni aten na Yehowa a mayam ni gaw, shi a matsan dum myit hpe hkamsha nga ai. Ga shadawn, 1990 ning jan shaning ni laman Bosnia hta, masha amyu bawsang ni gaw langai hte langai gasat hkat, sat hkat ma ai. Milan ngu ai asak 12 ning lasha nga ai dinghku langai gaw dai hta shanu nga ai. Milan, shi a kanau, shi a kanu kawa ni hte kaga Sakse hkam ni gaw Bosnia kaw na Serbia de mawdaw hte bu hkawm sa ma ai. Shanhte ginwang zuphpawng de sa nga ai re. Dai hta Milan na kanu kawa ni gaw hkalup hkam na matu lajang da ai. Lamu ga jarit hta, hpyen la nkau mi gaw kaga amyu bawsang re ai Milan a dinghku lawm wa ai hpe sadi hkrup ai. Dai majaw, mawdaw kaw nna shanhte hpe yu shangun dat ai. Mawdaw ntsa na ngam ai hpunau ni hpe gaw, matut nna sa shangun dat ai. Hpyen la ni gaw Milan a dinghku hpe lahkawng ya tup dai kaw sha nga shangun da ai. Hpang jahtum hta, lit hkam du gaw lahta na du kaba hpe shanhte hpe hpa galaw ging ai lam nsen jak hte san dat ai. Lit hkam du gaw, Milan ni a shawng hta sha tsap nna shaga taw ai majaw, “shanhte hpe shinggan de shaga sa nna gap sat kau u” ngu nna du kaba matsun dat ai hpe shanhte na dat ai.

8 Lit hkam du gaw shi a hpyen ma ni hpe matsun nga ai shaloi, masha tsasam lahkawng gaw Milan ni hpang de sa wa ai. Shanhte mung Sakse hkam ni rai nna, mawdaw ntsa na hpunau ni gaw, hpa byin wa ai lam shanhte hpe sa tsun dan ai ngu kahte tsun ai. Hpyen la ni gaw ma ni hpe n jep ai majaw, lamu ga jarit hpe lai na matu Sakse hkam lahkawng gaw Milan hte shi a kanau hpe shanhte a mawdaw ntsa lung shangun ai. Raitim, kanu yan kawa hpe gaw dai shara a maga mi hku nna lamu ga jarit hpe lam hkawm nna lai na matu tsun ai. Milan gaw grai hkrit nna hpa galaw na pyi n chye mat ai. Shi a kanu yan kawa gaw ndai hku san ai: “Anhte lam hkawm sa yang lawt na kun?” Raitim, shanhte lam hkawm sa wa ai shaloi, hpyen la ni gaw shanhte hpe n mu dat ai. Milan hte kanau gaw kanu yan kawa hte lamu ga jarit a kaga maga mi hta, bai lu hkrum nna ginwang zuphpawng de sa lu lung ai. Shanhte a akyu hpyi ga hpe Yehowa mahtai jaw ai hpe shanhte kam ai. Yehowa gaw shi a mayam ni hpe dai zawn lam hte galoi mung ading tawk n makawp maga ya ai lam Chyum  Laika kaw nna anhte chye lu ai. (Kasa 7:58-60) Raitim ndai mabyin hta, Milan ndai hku tsun ai: “Lamu kasa ni gaw hpyen la ni hpe myi shamak kau ya nna Yehowa anhte hpe hkye la wa ai.”​—⁠Shakawn 97:10.

Yesu zawn, masha ni hpe karum ya na matu hte Yehowa a lam sharin ya mayu ai myit nang hta nga ai kun?

9. Shi hpang hkan ai masha hpawng hpe mu ai shaloi Yesu gara hku hkamsha ai kun? (Ndai sumhpa shawng na sumla hpe yu u.)

9 Matsan dum ai lam hpe kaja htum kasi hku nna Yesu mung madun wa ai. Shi matsan dum ai majaw ndai hku tsun ai: “Shanhte gaw, sagu rem ai wa n nga ai majaw, ru tsang hkrum ai hte bra mat wa ai sagu hte bung nga ma ai.” Dai majaw shi hpa galaw ya a ta? “Law law wa sharin shaga ya ai.” (Mahte 9:36; Marku 6:34 hpe hti u.) Raitim, Hparishe ni chyawm gaw matsan dum myit n nga ai majaw, kaga masha ni hpe n kam karum ya ai. (Mahte 12:9-14; 23:4; Yawhan 7:49) Yesu zawn, kaga masha ni hpe karum ya na hte Yehowa a lam sharin achyin ya na matu, nang ra sharawng ai kun?

10, 11. Matsan dum myit hpe ayan madun ra ai kun? Sang lang dan u.

10 Matsan dum myit hpe ayan madun ra ai ngu tsun mayu ai gaw n re. Ga shadawn, Hkawhkam Shawlu gaw Karai Kasang a hpyen re ai Amalek hkawhkam Agag hpe n sat ai gaw matsan dum myit madun ai ngu shadu wa ai. Shawlu gaw Amalek ni a sagu dumsu ni hpe mung n sat ai. Raitim, Yehowa gaw Amalek masha yawng hte dusat yawng hpe sat kau na matu tsun da ai. Shawlu gaw madat mara lam n nga ai majaw, Yehowa gaw hkawhkam aya kaw na nyet kau ai. (1 Samuela 15:3, 9, 15) Yehowa gaw dingman ai Tara Agyi re. Shi gaw masha ni a myit masin hpe chye lu nna matsan dum myit n madun ra ai ni hpe mung chye ai. (Sharung 2:17; Ezekela 5:11) Kade nna yang mung, shi a ga n madat ai ni yawng hpe tara dawdan sana re. (2 Htesaloni 1:6-10) Dai aten hta n hkru n shawp ai ni hpe Yehowa gaw matsan dum sana n re. Shanhte hpe jahten kau ai hku nna, dinghpring ai ni hpe matsan dum myit madun nna hkye hkrang la na re.

11 Dai majaw, kadai gaw si ging ai, kadai gaw asak lu ging ai ngu ai gaw anhte hte n seng ai. De a malai, ya aten hta anhte dang lu ai daram kaga masha ni hpe karum ya ra ai. Kaga masha ni hpe matsan dum myit tatut madun mai ai lam nkau mi gaw hpa ni rai a ta? Lam nkau hpe yu yu ga.

Matsan Dum Myit Hpe Gara Hku Madun Mai

12. Kaga masha ni hte kanawn mazum ai aten ni hta matsan dum myit hpe anhte gara hku madun mai ai kun?

12 Shani shagu kaga masha ni hpe karum ya ai lam. Hkristan ni gaw, nta htingbu ni hte hpunau nauna ni hpe matsan dum myit madun ra ai ngu nna Yehowa hpyi shawn da ai. (Yawhan 13:34, 35; 1 Petru 3:8) Matsan dum myit ngu ai lachyum langai gaw “rau nni nkri hkrum” ai re. Jamjau hkrum nga ai ni hpe shakut nna karum ya ai ni gaw matsan dum myit madun nga ai ni re. Dai majaw, anhte maga hku nna kaga masha ni hpe karum ya na matu, ahkaw ahkang tam ra ai. Shanhte ra nga ai nta bungli ni galaw ya ai rai yang rai na re.​—⁠Mahte 7:12.

Kaga ni hpe tatut re ai lam hte karum ya ai hku nna matsan dum myit madun u (Laika pang 12 hpe yu u)

13. Shingra tara a majaw jamjau hkrum yang Karai a masha ni gaw hpa galaw ya a ta?

13 Hkye mawai bungli hta karum ya ai  lam. Tsin-yam tsin dam a majaw masha ni jamjau hkrum ai hpe anhte mu yang, matsan dum myit hpe anhte madun mayu ai. Yehowa a masha ni gaw dai zawn aten ni hta grai karum ya ai ngu amying kaba ai. (1 Petru 2:17) Ga shadawn, 2011 hta nnang nawn hte tsunami byin ai majaw, Japan nauna langai nga ai shara kaw grai law hkra htenza mat ai. Japan mung hte kaga mungdan ni kaw na karum ya ai ni gaw, Nawku Htingnu ni hte dum nta ni hpe bai gram lajang ya ai hpe mu ai shaloi, “myit shalan shabran nna grai mung n-gun lu ai” ngu dai nauna tsun dan ai. Shi ndai hku mung tsun ai: “Ndai mahkrum madup a majaw Yehowa ngai hpe lanu lahku ai hpe chye wa ai. Hpunau nauna ni gaw langai hte langai karum ya ai. Mungkan ting hta nga ai hpunau nauna ni mung anhte a matu akyu hpyi ya ma ai.”

14. Asak kaba ai ni hte machyi makaw hkrum nga ai ni hpe nang gara hku karum mai na kun?

14 Machyi makaw hkrum nga ai ni hte asak kaba ai ni hpe karum ya ai lam. Asak kaba ai ni hte machyi makaw hkrum nga ai ni hpe mu yang, anhte ni matsan dum ai. Dai zawn manghkang ni htum na hpe anhte mu mayu ai majaw, Karai a Mungdan du wa u ga ngu akyu hpyi ai. Ya aten hta, asak kaba ai ni hte machyi makaw hkrum nga ai ni hpe danglu ai daram anhte karum ya nga ai. Asak kaba ai kanu nga ai laika ka sara langai shi kanu a lam ka wa ai hpe yu yu ga. Shi kanu gaw Ezaima ana (Alzheimer’s disease) hkam sha nga ai. Namdum lung yak nna shi a bu hpun palawng n san n seng byin mat ai. Shi shakut nna san seng taw nga ai shaloi, masha shaga ai nsen na dat ai. Shi kaw ayan sa chyai ai Sakse hkam nauna yan rai nga ai. Nauna yan  gaw karum ya mai na i? ngu san ai. Shi gaw kaya tim “karum ya rit yaw” ngu tsun ai. Nauna yan gaw shi hpe karum nna san seng ya ai. Ngut ai hpang shi hpe hpalap kayau ya nna shi hte ga shaga chyai ma ai. Kasha gaw grai chyeju dum ai. Sakse hkam ni gaw, “hkaw tsun ai hte maren tatut galaw ai ni re” nga nna shi ka wa ai. Nang mung asak kaba ai ni hte machyi makaw hkrum nga ai ni hpe matsan dum myit hte danglu ai daram karum ya mai na kun?​—⁠Hpilipi 2:3, 4.

15. Hkaw tsun bungli gaw kaga ni hpe gara hku karum ya ai kun?

15 Kaga masha ni Yehowa hpe chye wa hkra karum ya ai lam. Kaga masha ni hpe karum ya na matu kaja htum lam langai gaw, Karai a lam hte shi a mungdan lam sharin ya ai re. Bai nna, Yehowa a tsang madang ni gaw shanhte a matu kaja ai hpe shanhte chye wa hkra mung karum ya mai ai. (Esaia 48:17, 18) Hkaw tsun bungli gaw Yehowa hpe shagrau na matu hte kaga ni hpe matsan dum myit madun na matu kaja htum lam re. Hkaw tsun bungli hta grau nna shang lawm lu na kun?​—⁠1 Timohti 2:3, 4.

Matsan Dum Myit Gaw Na A Matu Mung Kaja

16. Anhte matsan dum myit madun yang hpa akyu lu na kun?

16 Matsan dum myit madun ai gaw anhte a hkam kaja lam hte kaga ni hte kanawn mazum ai lam kaja shangun ai ngu myit hte seng ai hpaji du ni tsun ai. Tsin-yam hkrum nga ai ni hpe karum ya yang, nang grau pyaw wa na, myit mada lam grau nga wa na, garen gari lam yawm wa na, n kaja ai hku mu mada ai lam ni yawm wa na re. Matsan dum myit madun ai gaw na a matu kaja ai. (Ehpesu 4:31, 32) Kaga ni hpe tsawra myit hte karum ya ai shaloi, anhte hta kaja ai myit nsam nga wa ai. Hpa majaw nga yang, Yehowa galaw shangun mayu ai hpe anhte galaw nga ai hpe chye ai majaw re. Matsan dum myit gaw grau kaja ai kanu kawa, dinghku num, la hte manang kaja byin na matu anhte hpe karum ya lu ai. Dai hta n-ga, kaga masha ni hpe matsan dum myit madun ai ni gaw, shanhte ra kadawn nga ai aten hta, karum shingtau lam bai lu ai.​—⁠Mahte 5:7 hte Luka 6:38 hpe hti u.

17. Matsan dum myit hpe hpa majaw madun mayu ai kun?

17 Matsan dum myit madun ai gaw anhte a matu kaja ai. Raitim, dai hku galaw ai a madung lam gaw Yehowa hpe kasi la mayu nna shi hpe shagrau mayu ai majaw re. Shi gaw tsawra myit hte matsan dum myit a Npawt re. (Ga Shagawp 14:31) Shi gaw anhte a matu hkum tsup ai kasi ningli hpe madun da ai. Dai majaw, matsan dum myit madun nna, Karai Kasang hpe kasi la lu na matu dang lu ai lam yawng hpe galaw ga. Dai hku galaw yang, hpunau nauna ni hte grau nihtep wa nna makau grupyin hta nga ai ni hte kanawn mazum ai lam mung grau kaja wa na re.​—⁠Galati 6:10; 1 Yawhan 4:16.