Content de lai

Secondary menu hpe lai

Malawm Ni Hpe Lai U

Yehowa Sakse Ni

Kachin

Sin Lanchyi (Hkaja Laika)  |  October 2017

Zehkaria A Shingran​—⁠Nang Hpe Akyu Shabyin Lu

Zehkaria A Shingran​—⁠Nang Hpe Akyu Shabyin Lu

“Ngai hpang de wa ma rit, . . . ngai nanhte hpang de wa na.”​—⁠ZEHKARIA 1:3.

Mahkawn: 89, 86

1-3. (a) Zehkaria gaw gara aten hta shawng nnan myihtoi htoi wa ai kun? Yehowa a masha ni a masa gaw hpa byin nga ai kun? (b) Yehowa gaw shi a masha ni hpe shi hpang de bai wa na matu hpa majaw tsun wa ai kun?

PYEN yawn nga ai laika katsu langai, dawm (ka tawng) kata na num langai hte mali tau u a singkaw zawn singkaw tu nna nbung hta pyen nga ai num lahkawng. Dai ni gaw Zehkaria mu wa ai mauhpa shingran ni kaw nna nkau mi re. (Zehkaria 5:1, 7-9) Yehowa gaw shi a myihtoi hpe, hpa majaw dai mauhpa shingran ni jaw wa ai kun? Dai aten hta Israela ni a masa gaw gara hku byin nga ai kun? Dai shingran ni kaw nna anhte gara hku akyu lu mai na kun?

2 Hkristu n shangai shi ai shaning 537 hta, Yehowa a masha ni gaw grai pyaw nga ai. Shanhte gaw, Babelon hta shaning 70 bawng masha hku nga lai wa ai. Raitim, ya gaw shanhte lawt wa sai. Shanhte gaw Yerusalem de bai wa nna, nawku htingnu bai gawgap na matu hte Yehowa hpe nawku na matu myit rawt nga ma ai. Laning mi na ai hpang, Israela ni gaw nawku htingnu  hpe npawt gaw da lu sai. Shanhte grai pyaw ai majaw, “ja ja jahtau garu nga ma ai rai nna, dai ngoi wu ai nsen gaw, tsan tsan kaw nna na ma ai.” (Ezra 3:10-13) Raitim, nawku htingnu gawgap ai hpe ninghkap ai lam ni grau grau nga wa ai. Israela ni gaw grai myit daw hten wa nna, nawku htingnu gawgap ai hpe jahkring kau ai. De a malai, shanhte a nta gawgap ai hte hkai lu hkai sha ai hta myit maju jung wa ai. Shi kru ning na wa tim, Yehowa a nawku htingnu gaw n ngut kre shi ai. Karai a masha ni gaw Yehowa hpang bai wa na matu hte shanhte a matu sha myit ai lam hpe jahkring kau na matu sadi jaw lam ra nga ai. Yehowa gaw shanhte hpe sharawng awng ai myit hte nden marai rawng let shi hpe nawku shangun mayu ai.

Anhte kaja htum hpe jaw yang she, anhte a nawku dawjau lam hpe Yehowa hkap la na

3 Dai majaw B.C. 520 hta, Yehowa gaw Israela ni hpe Babelon kaw nna hpa majaw shalawt ya ai hpe dum na matu myihtoi Zehkaria hpe shangun dat ai. Zehkaria ngu ai lachyum gaw “Yehowa Myit Dum Sai” ngu ai re. Israela ni gaw Yehowa galaw ya wa ai lam ni hpe malap kau tim, shi gaw shanhte hpe matut nna myit dum nga ai. (Zehkaria 1:3, 4 hpe hti u.) Yehowa gaw chyoi pra ai nawku dawjau lam hpe bai gawgap na matu, shanhte hpe karum ya na ngu ga sadi jaw da ai. Raitim, shanhte gaw shi hpe kaja htum jaw yang she, shanhte a nawku dawjau lam hpe hkap la na ngu nna mung sadi jaw ai. Zehkaria a kru lang hte sanit lang na shingran hpe hkaja yu ga. Israela ni hpe Yehowa gara hku shadut ya ai lam hte dai shingran lahkawng gaw, anhte hpe gara hku karum ya lu ai lam hpe anhte hkaja lu na re.

Lagu Ai Ni Hpe Karai Kasang Tara Jeyang Na

4. Zehkaria gaw shi a kru lang na shingran hta hpa mu wa ai kun? Laika katsu hta hpa majaw lahkawng maga ka da ai kun? (Ndai sumhpa shawng na nambat 1 sumla hpe yu u.)

4 Zehkaria daw kaba 5 hta mauhpa shingran langai hte nnan hpang da ai. (Zehkaria 5:1, 2 hpe hti u.) Zehkaria gaw nbung hta laika katsu langai pyen nga ai hpe mu wa ai. Dai laika katsu gaw, galu de pe 30 (9 m) hte nda de pe 15 (4.5 m) daram rai nga ai. Laika katsu gaw hpaw nga nna dai hta shiga langai ka da ai. (Zehkaria 5:3) Dai gaw grai ahkyak ai tara jeyang na shiga re. Moi aten hta, masha ni gaw laika katsu a maga mi hta sha laika ka ma ai. Raitim, dai shiga gaw grai ahkyak ai majaw, laika katsu a lahkawng maga hta ka da ai.

Hkristan ni gaw lagu ai lam yawng hpe koi ra ai (Laika pang 5-7 hpe yu u)

5, 6. Lagu ai lam yawng hpe Yehowa gara hku mu mada ai kun?

5 Zehkaria 5:3, 4 hpe hti u. Masha yawng gaw tinang galaw ai hte maren Karai Kasang a man hta lit la ra ai. Dai gaw Yehowa a masha ni a matu grau teng nga ai. Shanhte gaw Karai a amying hkam la da ai majaw re. Shanhte gaw shi hpe tsawra ai majaw, lagu ai gaw shi a amying hpe kaya jahkrum ai re ngu chye da ai. (Ga Shagawp 30: 8, 9) Masha nkau mi gaw yaw shada lam kaja ai hte lagu yang, n shut ai ngu shadu chye ai. Kaja ai yaw shada lam nga tim, lagu ai nga yang, shi a lawhpa ai myit gaw Yehowa, Yehowa a amying hte Yehowa a tara ni hta grau ahkyak ai ngu madun ai re.

6 Zehkaria 5:3, 4 hta, ari jaw ai lam gaw “lagu lagut wa a nta” de shang nna “nta kaang e nga nga let, . . . dai nta hpe shamyit  kau na” hpe nang sadi hkrup ai kun? Dai majaw, Yehowa gaw shi a masha ni a lapran hta nga ai shut shai ai lam yawng hpe tara jeyang lu ai, shapraw dan lu ai. Marai langai gaw shi lagu ai lam hpe balik, bungli madu ni, myitsu salang ni (sh) kanu kawa ni hpe ip da lu tim, Yehowa hpe gaw n mai ai. Karai Kasang gaw lagu ai lam yawng hpe teng sha shapraw dan na re. (Hebre 4:13) “Lam shagu hta” dingman ai hku galaw ai masha ni a lapran hta nga lu ai majaw anhte grai kabu ga ai.​—⁠Hebre 13:18.

7. Pyen yawn nga ai laika katsu a ari jaw ai kaw nna gara hku lawt lu na kun?

7 Lagu ai lam yawng gaw Yehowa hpe shut hpyit ai re. Jaw ai, shut ai hte seng nna Yehowa a tara ni hte maren hkan sa nna shi a amying hpe kaya n jahkrum ai hku asak hkrung ai gaw anhte a matu arawng la hpa re. Dai zawn galaw nna, Yehowa a ga n madat ai ni hpe tara jeyang ai shaloi lawt lu na re.

Na A Mungga Hpe “Shani Shagu” Hkan Sa Na

8-10. (a) Dagam ai ngu ai gaw hpa rai a ta? (b) Hkawhkam Zedekia gaw gara ga sadi hpe n dung wa ai kun?

8 Bai nna, pyen yawn nga ai laika katsu gaw, Karai Kasang a amying hta “masu lam dagam ai” ni hpe sadi jaw ai shiga shana ya ai. (Zehkaria 5:4) Dagam ai ngu ai gaw, lama ma hpe teng ai ngu tsun mayu ai shaloi (sh) ahkyak ai lama ma hpe galaw na (sh) n galaw na ngu ga sadi jaw ai re.

9 Yehowa a amying hte dagam ai gaw, grai ahkyak ai lam re. Yerusalem hpe hpang jahtum uphkang wa ai hkawhkam Zedekia byin wa ai lam kaw nna anhte sharin la lu ai. Zedekia gaw Babelon hkawhkam hpe madat mara na ngu, Yehowa a amying gang nna dagam wa ai. Raitim, Zedekia gaw ga sadi n  dung wa ai. Dai majaw, Yehowa gaw Zedekia hpe ndai hku tsun wa ai: “Gaja wa, shi hpe hkawhkam aya hta dang da ai wa a ga shaka hpe run kau nna, dagam da ai ga hpe n gawn n sawn di kau ai majaw, shi gaw dai hkawhkam wa a shara, Babelon mare kaang e, shi a man e si na ra ai.”​—⁠Ezekela 17:16.

10 Hkawhkam Zedekia gaw, Karai Kasang a amying hte dagam ai ga grin na matu Yehowa myit mada ai. (2 Hkawhkam Labau 36:13) Raitim, Zedekia gaw ga sadi n dung wa ai. Babelon kaw nna lawt na matu Egutu ni hpe karum hpyi wa ai. Raitim, Egutu ni gaw shi hpe n karum wa ai.​—⁠Ezekela 17:11-15, 17, 18.

11, 12. (a) Anhte a ga sadi ni hta gara gaw ahkyak htum rai a ta? (b) Apnawng ai lam gaw prat hkrun lam hta gara hku byin ging ai kun?

11 Anhte ga sadi tawn ai hpe, Yehowa madat ai lam Zedekia a mabyin kaw nna chye lu ai. Shi myit pyaw hkra, anhte ga sadi dung ra ai. (Shakawn 76:11) Ahkyak htum ai ga sadi gaw, Yehowa hpang anhte apnawng ai ga sadi re. Anhte hkum anhte apnawng ai shaloi, anhte a prat hta hpa mi byin wa tim, shi hpe sha nawku dawjau na ngu ga sadi jaw wa ai.

12 Yehowa hpe anhte gara hku ga sadi dung lu na kun? “Shani shagu” anhte gaw chyam dinglik lam kaji, kaba ni hkrum nga ai. Dai chyam dinglik ai lam ni hpe anhte hparan ai lam hku nna, Yehowa hte anhte a matut mahkai lam ngang kang ai hpe madun mai ai. (Shakawn 61:8) Ga shadawn, marai langai ngai gaw nang hpe jawng hta, bungli hta sawse lawklek wa yang gara hku galaw na kun? Dai hpe nang nyet kau nna, Yehowa a ga madat mayu ai lam madun na kun? (Ga Shagawp 23:26) Shing nrai, na a dinghku hta nang langai sha Yehowa hpe nawku ai nga yang gaw gara hku kun? Hkristan arawn alai hte maren matut hkawm sa lu hkra Yehowa hpang nang karum hpyi ai kun? Nang hta gara masa mi nga tim, Yehowa a tsawra myit hte lam matsun a matu shani shagu chyeju dum ai kun? Shani shagu Chyum Laika hti na matu aten san da ai kun? Yehowa hpang anhte a prat hpe apnawng ai shaloi, dai lam ni galaw na ngu ga sadi jaw wa ai. Yehowa a ga madat nna kaja htum hpe jaw yang, anhte shi hpe tsawra nna shi anhte hpe madu ai ngu hkam la ai re. Anhte a nawku dawjau ai lam gaw prat hkrun lam langai re. Yehowa hpe anhte sadi dung yang, grai kaja ai htawm hpang hpe jaw na ngu ga sadi jaw da ai.​—⁠Tara Jahprang 10:12, 13.

Yehowa gaw shi a kasi ningli hku nna, anhte ga sadi dung ra ai lam sharin ya ai

13. Zehkaria a kru lang na shingran hta anhte hpa lam sharin la lu ai kun?

13 Yehowa hpe anhte tsawra yang, lagu ai (sh) ga sadi n dung ai lam ni n galaw na matu, Zehkaria a kru lang na shingran gaw anhte hpe karum ya ai. Israela ni gaw mara grai law tim, Yehowa gaw ga sadi dung nna shi a masha ni hpe n kau da ai lam mung anhte sharin la lu ai. Shanhte gaw hpyen ni a lapran hta rai nna grai yak ai masa hta rai nga ai hpe Yehowa chye na ai. Yehowa gaw shi a kasi ningli hku nna, anhte ga sadi dung ra ai lam sharin ya ai. Anhte dai hku galaw lu hkra, shi karum ya na hpe anhte kam mai ai. Htawm hpang hte seng ai myit mada lam jaw ai hku nna, Yehowa anhte hpe karum ya ai. Kade n na yang, mungkan hta nga ai n hkru ai lam yawng hpe shi yeng seng kau ya na re.  Dai hte seng nna Zehkaria a sanit lang na shingran hta anhte hti lu na re.

N Hkru Ai Lam Hpe Yehowa Yeng Seng Na

14, 15. (a) Zehkaria a sanit lang na shingran hta shi hpa mu wa ai kun? (Ndai sumhpa shawng na nambat 2 sumla hpe yu u.) (b) Ka tawng kata na num gaw kadai rai a ta? Lamu kasa gaw ka tawng hpe hpa majaw magap kau ai kun?

14 Pyen yawn nga ai laika katsu hpe Zehkaria mu ai shaloi, lamu kasa langai gaw: “Mada yu u” ngu tsun ai. Zehkaria gaw ka tawng hpe mu ai. (Zehkaria 5:5-8 hpe hti u.) Ka tawng hta machyu hte galaw da ai magap nga ai. Ka tawng magap hpaw nga ai shaloi, “kata e num langai mi dung nga ai” hpe Zehkaria mu ai. Ka tawng kata na num gaw, “yubak mara” re ai lam Zehkaria hpe lamu kasa tsun dan ai. Dai num gaw shinggan de pru na matu shakut nga ai hpe Zehkaria mu ai shaloi, shi grai hkrit mat ai hpe shingran yu u. Raitim, lamu kasa gaw dai num hpe kata de lawan wan bai kabai bang kau nna ka tawng hpe grai li ai magap hte magap dat ai. Dai gaw hpa lachyum rai a ta?

15 Yehowa gaw shi a masha ni a lapran hta, n hkru ai lam ni nga na ahkang n jaw na hpe ndai shingran gaw anhte hpe kam shangun ai. Yehowa gaw n kaja ai lama ma hpe mu yang, dai hpe alawan yeng seng kau na re. (1 Korinhtu 5:13) Lamu kasa gaw, ka tawng ntsa grai li ai magap hte kalang ta magap kau ai gaw dai hpe madun dan ai.

Yehowa gaw shi a nawku dawjau lam san seng na hpe ga sadi jaw (Laika pang 16-18 hpe yu u)

16. (a) Ka tawng gaw hpa byin wa ai kun? (Ndai sumhpa shawng na nambat 3 sumla hpe yu u.) (b) Singkaw tu ai num ni gaw ka tawng hpe gara de hpai mat wa ai kun?

16 Bai nna, Zehkaria gaw n-gun ja ai mali tau u a singkaw tu ai num lahkawng hpe mu wa ai. (Zehkaria 5:9-11 hpe hti u.) Dai num ni gaw, ka tawng kata na n hkru ai num hte grai shai ai. Shanhte a n-gun ja ai singkaw  ni hte “yubak mara” lawm ai ka tawng hpe hpai nna, pyen mat wa ai. Dai num hpe shanhte gara de hpai mat wa ai kun? Babelon mare na “Shina mung” de hpai mat wa ai. Shanhte gaw shi hpe dai de hpa majaw hpai mat wa ai kun?

17, 18. (a) Babelon gaw “yubak mara” a matu hpa majaw jaw ai shara re ai kun? (b) Nang hpa galaw na matu dawdan da ai kun?

17 Zehkaria aten hta nga ai Israela ni gaw, Babelon mare gaw hpa majaw, “yubak mara” a matu jaw ai shara re ai hpe chye na ma ai. Dai shara hta akyang hten za ai hte shut shai ai nawku htung ni hte hpring nga ai hpe shanhte chye ma ai. Dai hta shanu nga ai Zehkaria hte Yuda masha ni gaw, shut ai nawku htung a shingkang ka-up ai hpe ninghkap na matu shani shagu grai shakut ra ai. Dai majaw, Yehowa gaw nawku dawjau ai lam hpe san seng hkra galaw na hpe ndai shingran gaw hkrak chye shangun ai.

18 Yuda masha ni mung shanhte a nawku dawjau lam san seng na matu lit nga ai hpe dai shingran gaw sadi jaw ai. Yubak mara gaw, Karai Kasang a masha ni lapran n mai nga nna, nga na ahkang mung jaw na n re. Dai ni aten hta, Yehowa gaw san seng ai uhpung de anhte hpe shaga da ai majaw, shi a tsawra myit hte makawp maga lam hpe anhte hkamsha lu nga ai. Matut nna san seng hkra galaw na matu, anhte langai hpra hta lit nga ai. Yubak mara gaw, Yehowa a masha ni lapran hta n mai nga ai.

San Seng Ai Masha Ni Yehowa Hpe Shagrau

19. Zehkaria a mauhpa shingran ni gaw anhte a matu hpa lachyum nga ai kun?

19 Zehkaria a kru lang hte sanit lang na shingran ni gaw, n kaja ai amu galaw ai ni a matu grai ahkyak ai sadi jaw lam re. Yehowa gaw n hkru ai lam ni matut nna nga na matu ahkang jaw na n re. Shi a mayam ni hku nna, anhte gaw n hkru ai lam ni hpe n ju n dawng ra ai. Ndai shingran ni gaw, Yehowa myit pyaw hkra galaw yang, shi anhte hpe ari n jaw ai sha, makawp maga nna shaman chyeju jaw na hpe kam shangun ai. Ndai n hkru ai mungkan hta matut nna san seng lam nga na matu yak tim, Yehowa a karum shingtau lam hte awng dang lu ai. Teng man ai nawku dawjau lam matut nna ngam nga na hpe anhte gara hku kam mai na kun? Ru tsang kaba ni wa sai hte maren, Yehowa gaw shi a uhpung uhpawng hpe makawp maga na lam anhte gara hku kam mai ai kun? Dai ga san ni hpe hpang na sumhpa hta anhte hkaja lu na re.