Content de lai

Secondary menu hpe lai

Malawm Ni Hpe Lai U

Yehowa Sakse Ni

Kachin

Sin Lanchyi (Hkaja Laika)  |  October 2017

Teng Man Ai Gaw ‘Ngwi Pyaw Na Lam Shangun Dat Na N Rai, Nhtu Hpe Shangun Dat Na’

Teng Man Ai Gaw ‘Ngwi Pyaw Na Lam Shangun Dat Na N Rai, Nhtu Hpe Shangun Dat Na’

“Ga ntsa de ngwi pyaw na lam shangun dat na ngai sa ring ngai, hkum myit nga myit: ngwi pyaw na lam shangun dat na ngai sa nngai n rai, nhtu hpe shangun dat na she ngai sa ring ngai.”​—⁠MAHTE 10:34.

Mahkawn: 123, 128

1, 2. (a) Ya anhte hta gara simsa lam lu nga ai kun? (b) Ya aten hta hkum tsup ai simsa lam nga na ngu hpa majaw n lu tsun ai kun? (Ndai sumhpa shawng na sumla hpe yu u.)

ANHTE yawng gaw prat hta ngwi pyaw simsa let nga mayu nna, myit tsang lam n nga mayu ga ai. Yehowa gaw anhte hpe “Karai Kasang a ngwi pyaw ai” lam jaw da ai majaw, grai chyeju dum ai. Dai ngwi pyaw ai lam gaw simsa lam rai nna, yawn hpa myit mang ai lam, yawn hpa hkamsha lam n byin hkra makawp maga ya ai. (Hpilipi 4:6, 7) Anhte gaw Yehowa hpang ap nawng da ai majaw, “Karai Kasang hte . . . sim sa ai lam lu la ga ai.” De a lachyum gaw, Yehowa hte kaja ai hku hkau lam nga ai hpe tsun ai re.​—⁠Roma 5:1, JCLB.

2 Raitim, ya gaw mungkan ntsa hta hkum tsup ai simsa lam lu shangun ai Karai Kasang a aten garai n du shi ai. Anhte gaw hpang jahtum nhtoi hta asak hkrung nga ai. Dai majaw, manghkang ni grai law nna dai gaw anhte hpe myit ru shangun ai. Anhte gaw n hkru n kaja ai masha ni a lapran nga nga ai. (2 Timohti 3:1-4) Anhte gaw Satan hte shi n-gun jaw taw nga ai sharin achyin ya ai lam hpe mung ninghkap ra ai. (2 Korinhtu 10: 4, 5) Raitim, anhte hpe grau nna myit ru shangun ai gaw, Yehowa hpe n nawku ai jinghku jingyu ni a ninghkap ai lam re. Byin chye ai lam nkau mi gaw, anhte a makam masham hpe jahpoi asawng ai (sh) dinghku hka bra hkra galaw ai ngu anhte hpe mara shagun ai lam ni re. Shanhte gaw, Yehowa hpe matut nawku yang, nta masha n mai byin sai ngu nna pyi tsun chye ai. Dai majaw, nta masha ni a ninghkap ai lam hpe gara hku mu mada ging ai kun? Dai hku byin ai shaloi, simsa lam matut nga na matu gara hku galaw na kun?

Nta Masha Ni Kaw Na Ninghkap Ai Lam Hpe Gara Hku Mu Mada Ging Ai Kun?

3, 4. (a) Yesu a sharin achyin ai lam ni gaw hpa byin shangun na kun? (b) Yesu hpang hkan na matu gara aten hta grau nna yak chye ai kun?

3 Yesu gaw masha yawng shi a sharin achyin ai lam hpe hkap la na n re ai hpe chye ai. Shi a sape ni hpe masha nkau mi ninghkap na re ai majaw, shanhte hta nden marai nga ra ai hpe mung shi chye ai. Ndai ninghkap ai lam gaw, shanhte a nta masha ni a simsa lam hpe hkra machyi chye ai. Yesu ndai hku tsun ai: “Ga ntsa de ngwi pyaw na lam shangun dat na ngai sa ring ngai, hkum myit nga myit: ngwi pyaw na lam shangun dat na ngai sa nngai n rai, nhtu hpe shangun dat na she ngai sa ring ngai. . . . Masha langai ngai gaw shi a kawa hte, shayi sha gaw shi a kanu hte, kanam gaw shi a kamoi hte bra mat shangun na, ngai sa ring ngai rai nna, tinang hpe n dawng n yawt na ni gaw, tinang a nta na ni tai wa na ma ra ai.”​—⁠Mahte 10:34-36.

4 “Ngwi pyaw na lam shangun dat na ngai sa ring ngai, hkum myit nga myit” nga nna Yesu tsun ai gaw hpa lachyum rai kun? Shi a sape byin wa yang dai zawn byin na ngu, masha ni hpe chye shangun mayu ai. Raitim, Yesu a yaw shada lam gaw, Karai Kasang hte seng ai teng man lam hpe sharin achyin ya na matu rai nna, dinghku hka bra hkra galaw na matu n re. (Yawhan 18:37) Raitim, shi hpang hkan na matu ayan n loi ai hpe shi a sape ni chye da ra ai. Grau nna, shanhte a manang ni (sh) nta masha ni gaw teng man ai lam hpe n hkap la ai shaloi hta re.

5. Yesu a sape ni hpa hkrum wa ai kun?

5 Nta masha ni kaw nna ninghkap ai lam gaw sape ni hkam sharang ra na lam langai re ngu Yesu tsun wa ai. (Mahte 10:38) Nta masha ni jahpoi asawng ai (sh) ninghkap ai shaloi, sape ni hkam sharang lu yang Yesu myit pyaw ai. Sape ni gaw sum mat ai hta grau nna bai lu la ma ai.​—⁠Marku 10:29, 30 hpe hti u. 

6. Jinghku ni anhte hpe ninghkap ai shaloi hpa hpe dum ra ai kun?

6 Yehowa hpe nawku ai majaw, jinghku ni ninghkap yang pyi, shanhte hpe anhte matut tsawra na re. Karai Kasang hte Hkristu hpe tsawra ai myit gaw kaga ni hpe tsawra ai myit hta grau ngang kang ra ai hpe dum ra ai. (Mahte 10:37) Nta masha ni hpe tsawra ai myit gaw, Yehowa hpe sadi n dung mat hkra Satan akyu jashawn chye ai ladat langai re. Yakhkak ai masa nkau mi hte gara hku hkam sharang lu na lam hpe hkaja yu ga.

Makam Masham N Bung Ai Ningrum Ningtau

7. Na a ningrum ningtau gaw Yehowa hpe n nawku ai rai yang, na a mabyin masa hpe nang gara hku mu mada ging ai kun?

7 Dinghku de ai ni gaw, “nni nkri hkrum na” (sh) manghkang ni nga na ngu Chyum Laika hta sadi jaw da ai. (1 Korinhtu 7:28) Yehowa hpe n nawku ai marai langai ngai hpe dinghku de yang, myit ru myit tsang ai lam ni grau hkrum chye ai. Raitim, mabyin masa hpe Yehowa mu mada ai hku, nang mu mada na matu ahkyak ai. Yehowa hpe n nawku ai majaw, anhte a ningrum ningtau hte garan nga ai (sh) jahka kau ai baw n mai galaw ai ngu shi tsun da ai. (1 Korinhtu 7:12-16) Na a madu wa gaw Yehowa hpe n nawku ai rai yang, teng man ai nawku daw jau lam hpe woi  awn na n re. Raitim, dinghku a baw hku nna gaw shi hpe matut nna hkungga ra ai. Na a madu jan gaw Yehowa hpe n nawku ai rai yang mung, shi hpe matut tsawra matsan dum nna lanu lahku ra ai.​—⁠Ehpesu 5:22, 23, 28, 29.

8. Na a ningrum ningtau gaw, nawku daw jau ai lam hpe shadawn sharam sha galaw shangun mayu yang, na hkum nang hpa ga san ni san mai ai kun?

8 Na a ningrum ningtau gaw, nawku daw jau ai lam hpe shadawn sharam sha galaw shangun mayu yang, nang hpa galaw ging ai kun? Nauna langai a madu wa gaw, shi masat da ai nhtoi ni hta sha hkaw tsun sa mai ai lam nauna hpe tsun ai. Nang mung dai zawn masa hte hkrum nga yang, na hkum nang ndai hku san yu u: ‘Nye a ningrum ningtau gaw, Yehowa hpe tsep kawp n nawku na matu pat shingdang ai kun? Dai hku n rai yang, nye a ningrum ningtau hpyi shawn ai hpe galaw ya lu na kun?’ Nang hta rap ra ai ningmu nga yang, dinghku hta manghkang ni yawm na re.​—⁠Hpilipi 4:5.

9. Makam masham n bung ai kanu kawa ni hpe hkungga na matu ma ni hpe Hkristan kanu kawa ni gara hku sharin ya mai ai kun?

9 Na a ningrum ningtau gaw Yehowa hpe n nawku yang, ma ni hpe sharin achyin ai lam hta yak chye ai. Ga shadawn, na a ma ni hpe “na nnu yan nwa hpe hkungga lara di mu” ngu ai Chyum Laika matsun maroi ga hpe hkan sa na matu sharin ya ra ai. (Ehpesu 6:1-3) Raitim, ningrum ningtau gaw Chyum Laika tsang madang ni hpe n hkan sa ai nga yang, nang hpa galaw ging ai kun? Na a ningrum ningtau hpe hkungga ai hku nna, ma ni hpe kasi kaja madun mai ai. Ningrum ningtau a kaja ai atsam ningja ni hpe myit yu nna, shi galaw ai kaja ai lam yawng a matu chyeju dum ai lam tsun dan u. Ningrum ningtau a n kaja ai lam ni hpe ma ni a man hta hkum tsun. De a malai, Yehowa hpe nawku na, n nawku na hpe langai hpra gaw lata mai ai lam tsun dan u. Makam masham n bung ai kanu kawa ni hpe hkungga na matu, na a ma ni hpe nang sharin ya yang, ma ni a kaja ai kasi gaw na a ningrum ningtau, Yehowa a lam sharin mayu wa hkra karum ya lu ai.

Na a ma ni hpe Chyum Laika hte seng ai lam ni hpe mai byin ai daram sharin ya u (Laika pang 10 hpe yu u)

10. Yehowa hpe tsawra na matu ma ni hpe Hkristan kanu kawa ni gara hku sharin ya mai ai kun?

10 Makam masham n bung ai ningrum ningtau ni gaw, ma ni hpe shut shai ai poi galaw na matu (sh) shut ai nawku htung lam ni  sharin ya na matu ra sharawng na re. Madu wa nkau gaw, ma ni hpe Chyum Laika n sharin na matu Hkristan madu jan hpe pat shingdang chye ai. Raitim, dai zawn masa rai yang pyi, madu jan gaw ma ni hpe dang lu ai daram teng man ai lam sharin ya na re. (Kasa 16:1; 2 Timohti 3:14, 15) Ga shadawn, makam masham n bung ai madu wa gaw, ma ni hpe ayan na Chyum Laika sharin ai (sh) zuphpawng ni shaga sa ai hpe n galaw shangun chye ai. Madu wa a dawdan lam hpe shi hkungga ai raitim, ma ni hpe shi a makam masham hte seng nna, dang lu ai daram matut tsun dan mai ai. Dai hku nna, Yehowa a lam hte shi a jaw ai, shut ai hte seng ai tsang madang ni hpe shanhte sharin la lu na re. (Kasa 4:19, 20) Hpang jahtum hta ma ni gaw, Yehowa hpe nawku na, n nawku na hpe dawdan lu na re. *​—⁠Tara Jahprang 30:19, 20.

Teng Man Ai Lam Hpe Ninghkap Ai Jinghku Ni

11. Yehowa hpe n nawku ai jinghku ni hte hpa a majaw manghkang byin chye ai kun?

11 Yehowa Sakse ni hte Chyum Laika shawng nnan sharin ai shaloi, anhte a nta masha ni hpe tsun dan yang she tsun dan da na re. Raitim, makam masham rawt jat wa ai hte maren, Yehowa hpe nawku daw jau mayu ai lam shanhte hpe anhte tsun dan ra na re. (Marku 8:38) Karai Kasang hpe sadi dung ai majaw, nang hte na a nta masha ni a lapran, manghkang byin wa chye ai. Yehowa hpe matut sadi dung lu na matu hte simsa lam matut nga hkra nang galaw lu ai lam nkau mi hpe hkaja yu ga.

Anhte gaw nta masha ni a hkamsha lam hpe chye na hkra shakut yang, shanhte hpe teng man ai lam gara hku sharin ya na hpe chye wa na

12. Jinghku ni anhte hpe hpa majaw ninghkap chye ai kun? Shanhte a hkamsha lam ni hpe anhte chye na ya ai lam gara hku madun na kun?

12 Makam masham n bung ai jinghku ni gara hku hkamsha ai lam chye na hkra shakut u. Chyum Laika kaw nna teng man ai lam hpe chye wa ai shaloi anhte grai pyaw ai. Raitim, jinghku ni gaw anhte hkalem hkrum mat sai (sh) kaga nawku htung de shang mat sai ngu hkamsha ai mung byin chye ai. Shanhte hte rau shut shai ai poi ni n galaw mat sai majaw, shanhte hpe anhte n tsawra mat sai ngu shadu chye ai. Anhte si mat ai hpang, Karai Kasang anhte hpe ari jaw sana ngu shadu nna pyi hkrit tsang ya chye ai. Anhte hpe hpa majaw myit tsang ai lam chye lu hkra, shanhte tsun ai hpe atsawm madat ya nna, gara hku hkamsha ai hpe chye na hkra shakut ra ai. (Ga Shagawp 20:5) Kasa Pawlu gaw, “masha yawng mayawng” a lam chye na hkra shakut ai majaw, shanhte hpe kabu gara shiga hkaw tsun lu ai. Anhte gaw nta masha ni a lam hpe chye na hkra shakut yang, shanhte hpe teng man ai lam gara hku sharin ya na hpe chye wa na re.​—⁠1 Korinhtu 9:19-23.

13. Makam masham n bung ai jinghku ni hte anhte gara hku tsun shaga ging ai kun?

13 Si mani ai hku tsun shaga u. “Nanhte a ga hta galoi mung chyeju lawm” nga mu nga nna Chyum Laika hta tsun da ai. (Kolose 4:6) Dai hku galaw na matu, loi na gaw n re. Jinghku ni hpe si mani ai hte atsawm tsun  shaga lu hkra, chyoi pra ai wenyi karum ya na matu, Yehowa hpang anhte akyu hpyi mai ai. Shanhte a shut shai ai makam masham lam hte seng nna dang rang hkat ai baw n galaw na matu sadi ra ai. Shanhte tsun shaga ai (sh) galaw ai lam lama ma a majaw, hkra machyi yang, kasa ni hpe anhte kasi la mai ai. Pawlu ndai hku tsun ai: “Arip aroi hkrum yang anhte shaman ga ai; zingri zingrat hkrum yang anhte shakut sharang ga ai; shatan nhkan hkrum yang anhte ga ngwi ga pyaw tsun ga ai.”​—⁠1 Korinhtu 4:12, 13.

14. Kaja ai arawn alai a akyu ni gaw hpa ni rai kun?

14 Kaja ai arawn alai hpe matut nga shangun u. Dai gaw hpa majaw ahkyak ai kun? Jinghku ni hte matut nna simsa lam lu na matu, si mani ai hku tsun shaga ai gaw karum ya lu ai sha n-ga, anhte a kaja ai arawn alai gaw grau nna pyi atsam nga ai. (1 Petru 3:1, 2, 16 hpe hti u.) Yehowa Sakse ni gaw dinghku ngwi pyaw ai, shanhte a ma ni hpe atsawm lanu lahku ai, Chyum Laika lam matsun hte maren hkan sa ai majaw ngwi pyaw ai prat lu la nga ai hpe nanhte a jinghku ni mu hkra nanhte a kasi ningli hte madun dan u. Jinghku ni gaw teng man ai lam hpe galoi mung n hkap la yang pyi, anhte a kaja ai arawn alai gaw Yehowa hpe myit pyaw shangun ai lam chye lu ai gaw kabu hpa re.

15. Jinghku ni hte dang rang hkat ai hpe koi lu na matu gara hku tau hkrau lajang da mai ai kun?

15 Tau Hkrau Shajin Da U. Jinghku ni hte dang rang hkat ai baw byin chye ai masa ni hpe myit da u. Hpa galaw na hpe dawdan da u. (Ga Shagawp 12:16, 23) Australia kaw na nauna langai dai hku galaw wa ai. Shi a kagu gaw teng man ai lam hpe grai ninghkap nna, kalang lang masin pyi pawt wa ai. Dai majaw, kagu hte hpone n shaga shi yang, shan la gaw shi hpe masin n pawt ai sha tsun shaga lu na matu, Yehowa hpang karum hpyi ai. Atsawm tsun shaga lu na lam ni hpe mung shanhte myit ma ai. Makam masham hte seng nna dang rang hkat ai baw byin chye ai lam hpe koi lu hkra, grai na hkra hpone n shaga na matu shanhte aten hpe masat da ma ai.

Yehowa hpe sadi dung ai lam gaw, nta masha ni hpe tsawra ai hta, grau ngang kang ra

16. Jinghku ni hte seng nna mara nga ai ngu hkamsha ai hpe gara hku awng dang lu na kun?

16 Makam masham n bung ai jinghku ni hte myit n hkrum ai lam yawng hpe gaw nang koi lu na n re. Dai majaw, myit n hkrum ai lam nga wa ai shaloi, jinghku ni hpe tsawra nna shanhte hpe myit pyaw shangun mayu ai majaw, mara nga ai ngu nna pyi nang hkamsha chye ai. Raitim, Yehowa hpe sadi dung ai lam gaw, nta masha ni hpe tsawra ai hta, grau ngang kang ra ai hpe dum ra ai. Dai hpe jinghku ni chye yang, Yehowa hpe nawku ai gaw kade daram ahkyak ai hpe shanhte chye wa na re. Teng man ai hpe hkap la wa hkra kadai hpe mung atik anang n mai galaw ai. Raitim, Yehowa matsun da ai lam ni gaw nang hpe gara hku karum ya nga ai hpe, kaga ni mu wa hkra nang galaw lu ai. Yehowa gaw, shi hpe nawku na matu anhte hpe saw shaga ai zawn, shanhte hpe mung saw shaga nga ai.​—⁠Esaia 48:17, 18.

Nta Masha Langai Yehowa Hpe Kau Da Yang

17, 18. Nta masha langai Yehowa hpe kau da mat yang nang hpe hpa gaw karum ya na kun?

17 Nta masha langai hpung kaw nna shapraw hkrum ai (sh) nawku hpung hpe tinang hkrai kanawn mazum jahkring kau ai shaloi  dai gaw manu mana yak na re. Grai yawn hkyen nna, nhkyi hte galun hkrum ai zawn hkamsha chye ai. Dai zawn hkamsha lam hpe gara hku hkam sharang lu na kun?

18 Yehowa hpe nawku dawjau ai hta matut nna myit maju jung u. Nang dai zawn hkamsha nga yang, na a makam masham ngang kang hkra galaw ra ai. Chyum Laika ayan hti u, zuphpawng a matu hkyen lajang nna sa u, matut nna hkaw tsun u, hkam sharang lu hkra makam masham ngang kang na matu Yehowa hpang akyu hpyi u. (Yuda 20, 21) Dai lam ni yawng hpe galaw tim, matut nna yawn nga yang gara hku di na? Asum hkum jaw. Yehowa hpe nawku dawjau ai lam hta matut myit maju jung u. Aten du jang, dai hku myit maju jung ai gaw na a hkamsha lam hte myit mang ai lam ni hpe hkang lu hkra karum ya na re. Shakawn Kungdawn 73 hpe ka ai wa mung dai zawn byin wa ai. Shi a prat hta, myit mang ai lam ni hte hkamsha lam ni hpe hkang na matu yak ai aten ni nga wa ai. Raitim, Yehowa hpe nawku dawjau ai lam gaw, masa lam ni hpe jaw ai hku mu mada na matu karum ya wa ai. (Shakawn 73:16, 17) Nang mung dai zawn byin lu ai.

19. Yehowa shi a masha ni hpe sharin shaga ai lam hpe hkungga ai lam gara hku madun na kun?

19 Yehowa a tara hpe hkungga u. Karai a tara ni gaw shapraw da hkrum ai ni hte hpawn, yawng mayawng a matu akyu nga ai hpe Karai Kasang chye ai. Anhte tsawra ai marai langai ngai sharin shaga hkrum yang, anhte myit grai hkra machyi tim, dai gaw htawm hpang hta Yehowa hpang de bai kayin wa na matu shi hpe karum ya lu ai. (Hebre 12:11 hpe hti u.) Bai n hkap la shi ai aten du hkra, shapraw da hkrum ai ni hte “n kanawn lu ai” ngu ai Yehowa a tara hpe anhte hkan sa ra ai. (1 Korinhtu 5:11-13) Dai majaw, shanhte hte phone, message, laika ka ai, e-mail (sh) social media hte matut mahkai ai baw galaw ai lam hpe koi nan koi ra ai. Dai hku galaw na matu gaw loi na n re.

Anhte tsawra ai marai langai ngai, Yehowa hpang bai kayin wa na re ngu matut myit mada nga

20. Myit mada lam matut nga na matu anhte hpa galaw ra ai kun?

20 Matut nna myit mada nga u. Tsawra ai myit gaw “yawng mayawng hpe myit mada nga ai.” Dai majaw, anhte tsawra ai marai langai ngai, Yehowa hpang bai kayin wa na re ngu matut myit mada nga ga ai. (1 Korinhtu 13:7) Shapraw da hkrum ai nta masha langai shi a myit galai shai wa ai hpe nang mu yang, Chyum Laika kaw nna n-gun lu la nna, “ngai hpang de wa rit” ngu Yehowa saw shaga nga ai hpe hkap la hkra shi a matu akyu hpyi ya lu ai.​—⁠Esaia 44:22.

21. Yesu hpang hkan ai majaw, nta masha ni ninghkap yang nang hpa galaw na kun?

21 Masha yawng hta na shi hpe grau tsawra na matu Yesu tsun wa ai. Shi a sape ni gaw, nta masha ni shanhte hpe ninghkap tim, shi hpe matut nna sadi dung na matu nden marai nga na ngu kam wa ai. Dai majaw, nang Yesu hpang hkan ai majaw nta masha ni nang hpe ninghkap yang, Yehowa hpe kam hpa u. Hkam sharang lu na matu Yehowa hpang karum hpyi u. (Esaia 41:10, 13) Yehowa hte Yesu gaw nang hpe ra sharawng ai lam nang chye ai majaw ngwi pyaw simsa lam lu na re. Nang sadi dung ai majaw shanhte gaw nang hpe shaman chyeju jaw na re.

^ စာပိုဒ်၊ 10 Yehowa hpe kanu kawa ni kaw nna langai sha nawku ai nga yang, ma ni hpe gara hku sharin ya mai ai lam chye lu hkra, Sin Langchyi (BU) August 15, 2002 hta na “Laika Hti Ai Ni Hpang De Na Ga San” hpe yu u.