Content de lai

Secondary menu hpe lai

Malawm Ni Hpe Lai U

Yehowa Sakse Ni

Kachin

Sin Lanchyi (Hkaja Laika)  |  November 2017

Yehowa Kaw Nang Shingbyi Na Kun?

Yehowa Kaw Nang Shingbyi Na Kun?

“Yehowa gaw shi a ali ama ni a myit masin hpe hkrang la ya mu ai. Shi hta shingbyi ai ni nlang hte gaw mara n kap na ma ra ai.”​—⁠SHAKAWN 34:22.

Mahkawn: 8, 54

1. Yubak mara a majaw, Karai a sadi dung ai mayam law law gaw gara hku hkamsha nga ai kun?

“CHYUM sha hkrum ai ngai wa e” nga nna kasa Pawlu ka wa ai. (Roma 7:24) Dai ni na aten, Karai a sadi dung ai mayam law law mung, Pawlu zawn myit daw myit hten ai hte yawn hkyen ai lam ni hkamsha nga ai. Hpa majaw ta? Anhte yawng gaw Yehowa myit ra ai hte maren galaw mayu tim, yubak mara hpe sali wunli lu da nna n hkum tsup ai majaw re. Dai majaw, Yehowa myit ra ai hpe galaw na matu hkrat sum ai shaloi, myit daw myit hten chye ai. Mara kaba galaw hkrup ai Hkristan nkau gaw Yehowa shanhte a mara hpe galoi mung raw ya na n re ngu hkamsha chye ai.

2. (a) Karai a mayam ni gaw mara nga ai ngu hkamsha lam n nga ra ai hpe Shakawn Kungdawn 34:22 hta gara hku tsun da ai kun? (b) Ndai sumhpa hta hpa lam chye lu na kun? (“ Sharin La Lu Ai Lam Ni Kun? (sh) Ga Shadawn Lachyum Ni Kun?” ngu ai ga baw hpe yu u.)

2 Anhte gaw Yehowa kaw shingbyi yang, mara nga ai ngu hkamsha lam nga sana n re ai hpe ndai Chyum daw gaw anhte hpe kam shangun ai. (Shakawn 34:22 hpe hti u.) Rai yang, Yehowa kaw shingbyi ai lachyum gaw hpa rai ta? Yehowa a matsan dum ai hte mara raw ya ai hpe anhte lu mayu yang, hpa galaw ra na kun? Moi prat na Israela ni a matu shingbyi na mare ni lajang da ya ai hpe hkaja ai kaw nna, ndai ga san ni a mahtai hpe chye lu na re. Ndai  lajang da ya ai lam gaw, Tara ga shaka npu hta nga nna, dai hpe A.D. 33 Pentekoti shani hta kaga lam hte galai kau sai. Raitim, ndai Tara gaw Yehowa kaw nna sa ai re. Dai majaw, shingbyi na mare ni lajang da ya ai kaw nna, mara, mara galaw ai wa hte myit malai lu ai ni hpe Yehowa gara hku mu mada ai lam chye lu na re. Shawng nnan, Israela mung hta hpa majaw shingbyi na mare nga nna dai hpe gara hku lajang da ai lam yu yu ga.

“Hprawng Shingbyi Lu Na Mare Ni Lata San Da Mu”

3. Israela ni gaw masha sat ai wa hpe hpa galaw mai a ta?

3 Yehowa gaw marai langai ngai sat hkrum yang, dai hpe grai ahkyak ai lam hku mu mada ai. Lama na Israela masha langai gaw marai langai hpe sat yang, si mat ai wa a jinghku majing ngu na “matai htang ai wa” gaw sat ai wa hpe bai sat kau mai ai. (Bu Hkawm 35:19) Dai hku nna, mara n nga ai wa a asak hpe sat ai majaw, shi a asak hpe bai jaw ra ai. Lama na masha sat ai wa hpe lawan bai n sat kau yang, Ga Sadi Tawn Da Ai Mungdan gaw awu asin byin wa na (sh) chyoi pra na n re. Marai langai ngai hpe sat nna, sai pru sai hkaw hkra galaw nna, mungdan hpe awu asin n galaw na matu mung Yehowa tsun da ai.​—⁠Bu Hkawm 35:33, 34.

4. Israela masha langai gaw ndum shami masha sat hkrup yang gara hku hparan ai kun?

4 Raitim, Israela masha langai ndum shami masha sat hkrup yang gaw gara hku kun? Ndum shami masha sat hkrup tim, mara n nga ai wa hpe sat ai majaw shi hta mara nga nga na re. (Ningpawt 9:5) Ndai zawn masa hta rai yang gaw, matsan dum ai lam madun ra ai ngu Yehowa tsun ai. Ndum shami masha sat hkrup ai wa gaw, matai htang na wa a lata kaw nna lawt na matu, shingbyi mare kru kaw nna langai ngai de hprawng ra na re. Dai mare hta shi nga nga yang gaw, makawp maga lam lu na re. Raitim, hkinjawng agyi n si dingsa shingbyi mare kaw shi nga ra ai.​—⁠Bu Hkawm 35:15, 28.

5. Shingbyi na mare ni lajang da ya ai hte seng nna Yehowa a lam hpa sharin ya ai kun?

5 Shingbyi na mare ni gaw, masha ni a myit mang ai lam hte lajang da ai n re. Yehowa lajang da ya ai re. Yawshu hpe Yehowa gaw: “Israela kashu kasha ni hpe ning ngu tsun u: . . . hprawng shingbyi lu na mare ni lata san da  mu” ngu tsun wa ai. Dai mare ni gaw, chyoi pra ai ngu nna “san da” hkrum ai. (Yawshu 20:1, 2, 7, 8) Dai mare ni hpe lak san garan da na matu Yehowa dawdan wa ai. Dai majaw, ndai lajang da ya ai lam kaw nna, Yehowa a lam anhte sharin la lu ai. Ga shadawn, Yehowa a matsan dum ai lam hte seng nna, grau chye na hkra anhte hpe karum ya ai. Dai ni na aten hta, Yehowa kaw gara hku shingbyi mai na hpe dai lam gaw anhte hpe sharin ya ai.

Myitsu Salang Ni Hpe “Shi A Lam Tsun Dan” Ra

6, 7. (a) Ndum shami masha sat hkrup ai wa hpe salang ni tara dawdan ai tsang hte tsang hpe sanglang dan u. (Ndai sumhpa shawng na sumla hpe yu u.) (b) Salang ni hpe tsun dan ai gaw hprawng hkawm ai wa a matu hpa majaw hpaji rawng ai lam rai kun?

6 Israela masha langai gaw ndum shami masha sat hkrup yang, shingbyi na mare de hprawng nna, mare chyinghka hta nga ai salang ni hpe “shi a lam tsun dan” ra ai. Salang ni gaw shi hpe hkap tau la na re. (Yawshu 20:4) Dai hpang kade nna yang, shi a lam hpe tara dawdan na matu, manghkang byin wa ai mare de shi hpe sa ya na re. (Bu Hkawm 35:24, 25 hpe hti u.) Ndum shami masha sat hkrup ai re ngu dai salang ni dawdan yang, hprawng hkawm ai masha hpe shingbyi na mare de shanhte bai sa ya na re.

7 Hprawng hkawm ai masha gaw hpa majaw salang ni hte ga shaga ra ai kun? Salang ni gaw, Israela shawa hpung hta san seng ai lam nga na matu hte ndum shami masha sat hkrup ai wa mung, Yehowa a matsan dum ai lam kaw nna akyu hkamsha lu hkra galaw ya mayu ai majaw re. Lama na hprawng hkawm ai wa gaw, salang ni hpang de n sa yang, shi sat hkrum na re ngu Chyum Laika hpaji ninghkrin langai ka wa ai. Karai a tara hpe shi n hkan sa ai majaw, shi sat hkrum ai gaw shi hta sha lit nga ai ngu nna mung shi ka wa ai. Ndum shami masha sat hkrup ai wa gaw, shi hpe karum na matu hpyi shawn ra nna, asak hkrung na matu lam matsun ni hpe mung hkap la ra ai. Lama na, shingbyi na mare langai ngai de shi n sa yang, sat hkrum ai wa a jinghku gaw shi hpe bai sat kau tim mara nga na n re.

8, 9. Mara kaba galaw da ai Hkristan ni gaw hpa majaw myitsu salang ni hte ga shaga ra ai kun?

8 Dai ni na aten hta, mara kaba tawt lai da ai Hkristan langai gaw, Yehowa hte kaja ai hku hkau lam bai lu la hkra, myitsu salang ni hpang de sa ra ai. Dai gaw hpa majaw grai ahkyak a ta? Langai, mara kaba ni hpe hparan na matu myitsu salang ni hpe Yehowa lit jaw da ai majaw re. (Yaku 5:14-16) Lahkawng, myit malai lu ai ni gaw Karai a ra sharawng ai lam bai lu hkra hte shanhte a mara hpe bai n galaw na matu, myitsu salang ni gaw karum ya lu ai. (Galati 6:1; Hebre 12:11) Masum, gaja wa myit malai bai lu hkra, shanhte a yawn ai myit hte mara nga ai ngu hkam sha ai lam hpe malap kau lu hkra karum ya na matu, myitsu salang ni gaw ahkaw ahkang nga nna, shaman da hkrum ai. Dai zawn myitsu salang ni hpe “laru marang shingbyi shara” ngu Yehowa tsun ai. (Esaia 32:1, 2.) Ndai lajang da ya ai lam gaw, anhte hpe Karai Kasang matsan dum ai lam ni kaw nna langai re.

9 Karai a mayam law law gaw myitsu salang ni hte ga shaga nna, shanhte a karum shingtau ai lam hpe hkap la ai majaw myit shalan shabran lu la ma ai. Ga shadawn, mara kaba galaw wa ai hpunau Daniel gaw, shata law law na hkra myitsu salang ni hpang de n sa ai. Shi ndai hku tsun ai: “Myitsu salang ni gaw ngai hpe hpa mung galaw ya lu na n re ngu myit nna, aten mung grai lai mat wa ai.” Raitim, shi galaw wa ai mara hpe marai langai ngai chye mat na hpe ayan na hkrit nga ai. Dai majaw, akyu hpyi shagu hpyi nem ai ga hte hpang ra ai ngu hkamsha wa ai. Hpang jahtum hta, myitsu salang ni hpe karum hpyi wa ai. Shi a lam  hpe bai myit yu nna ndai hku tsun ai: “Gaja wa, shanhte hte ga shaga na matu ngai grai hkrit tsang ai. Raitim, hpang e gaw nye a lahpa hta mara nga ai grai li ai lit hpe marai langai ngai la kau ya ai hte bung ai.” Daniel gaw Yehowa hte wanglu wanglang bai shaga lu sai. Ya shi hta san seng ai myit nsam bai nga wa nna, kade nna shi ai aten hta hpung magam tau langai mung byin wa sai.

‘Dai Wa Gaw Mare Langai Ngai De Hprawng Ra’

10. Ndum shami masha sat hkrup ai wa mara raw kau hkrum na matu hpa galaw ra a ta?

10 Mara raw kau hkrum na matu, ndum shami masha sat hkrup ai wa gaw, ni htum shingbyi mare de alawan hprawng ra ai. (Yawshu 20:4 hpe hti u.) Shi asak lawt na matu gaw, shingbyi mare de sa ra ai. Hkinjawng agyi n si dingsa dai mare kaw nga ra ai. Dai gaw hprawng hkawm ai wa a matu sak jaw ra ai lam langai re. Shi a bungli hte nga pyaw ai nta hpe kau da ra ai. Kaga de wanglu wanglang mung n mai sa sai. * (Bu Hkawm 35:25) Raitim, dai gaw akyu nga ai. Lama na, shi gaw dai mare kaw nna pru mat yang, masha sat wa ai lam hpe hpa zawn n nawn ai lam madun ai rai nna, shi a asak mung shoihpa nga chye ai.

11. Myit malai lu ai Hkristan langai gaw Yehowa a matsan dum myit hpe chyeju dum ai lam gara hku madun mai ai kun?

11 Dai ni na aten hta mung myit malai lu ai wa gaw, Yehowa kaw na mara raw ya ai lam lu na matu lam nkau hpe galaw ra ai. Mara nga ai lailen hpe shi jahkring kau ra ai. Mara kaba byin shangun chye ai lam yawng hpe mung shi koi ra ai. Korinhtu hta nga ai myit malai lu ai Hkristan ni gara hku galaw wa ai hpe kasa Pawlu tsun dan ai. Shi ndai hku ka wa ai: “Karai Kasang ra sharawng ai hte maren re ai yawn hkyen lam a majaw, nanhte ni shakut shaja nga ai. Mara n kap hkra shakut ai. N kaja ai lam a majaw masin pawt ai. Karai Kasang hpe hkrit hkungga ai. Myit malai lu mayu ai myit rawng ai. Sharawng shara myit nga ai. Shut ai hpe galai shai ai.” (2 Korinhtu 7:10, 11, NW) Mara n galaw na matu anhte dang lu ai daram shakut yang, anhte a masa hpe grai tsang ai lam, Karai Kasang a tsawra myit hpe majoi lu nga ai ngu n shadu ai lam Yehowa hpe anhte madun nga ai re.

12. Yehowa a matsan dum ai lam lu la na matu, Hkristan langai gaw hpa ni hpe kau da ra na kun?

12 Yehowa a matsan dum ai lam lu la na matu, Hkristan langai gaw lama ma hpe kau da ra na nga yang gaw gara hku kun? Shi hpe mara galaw na matu shadut ai lam nga yang, dai hpe kau da na matu jin jin rai nga ra ai. (Mahte 18:8, 9) Ga shadawn, na a manang ni gaw Yehowa myit n pyaw na lam ni hpe galaw shangun wa yang, shanhte hte kanawn mazum ai lam hpe jahkring kau mai na kun? Tsa chyaru kade daram sha lu na ngu ai hpe hkang lu na matu yak nga yang, tsa chyaru law law lu shangun ai masa lam ni hpe koi lu na kun? Hpye ai amu galaw mayu ai myit hpe hkang lu na matu yak nga yang, sumla hkrung ni, website ni (sh) n kaja ai myit mang lam byin shangun ai hpa hpe mung koi kau lu na kun? Yehowa a tara ni hpe hkan sa lu hkra anhte sak jaw wa ai lam yawng gaw, gaja wa akyu nga ai hpe myit dum u. Yehowa anhte hpe kau da sai ngu ai hkamsha lam hta grau sawng ai gaw n nga sai. Yehowa a “prat dingsa n-gaw nwai” ai tsawra myit hpe hkamsha lu ai sha kaja htum lam re.​—⁠Esaia 54:7, 8.

Dai Ni Gaw Na Matu Hprawng Shingbyi Na Mare Tai Na Ra Ai

13. Hprawng hkawm ai wa gaw shingbyi ai mare hta shim lum ai hte ngwi pyaw lam nga ai hpe sanglang dan u.

13 Hprawng hkawm ai wa gaw, shingbyi  ai mare hta nga nga yang, shim lum na re. Dai mare ni hte seng nna Yehowa ndai hku tsun ai: “Dai ni gaw . . . lawt lu na matu hprawng shingbyi na mare tai na.” (Yawshu 20:2, 3) Hprawng hkawm ai wa hpe dai manghkang hte seng nna tara bai je yang na matu, Yehowa n hpyi shawn sai. Matai htang na wa mung, mare kata de shang nna shi hpe sat na matu ahkang n nga sai. Hprawng hkawm ai wa gaw mare kata hta nga nga yang, Yehowa makawp maga ya ai majaw shim lum na re. Htawng hkrat ai masha hte n bung ai. Bungli galaw mai ai, kaga ni hpe karum ya mai ai, simsa let Yehowa hpe nawku mai ai. Shi ngwi pyaw nna myit dik ai prat hpe lu nga ding yang re.

Yehowa nang hpe mara raw kau ya sai hpe nang kam mai ai (Laika pang 14-16 hpe yu u)

14. Myit malai lu ai Hkristan langai gaw hpa hpe kam mai ai kun?

14 Karai a mayam nkau gaw, mara kaba galaw hkrup nna myit malai la ngut ai hpang hta pyi, mara naw nga ai ngu hkamsha nga ai. Nkau mi gaw, shanhte galaw wa ai lam hpe Yehowa galoi mung n malap na re ngu hkamsha chye ai. Nang dai zawn hkamsha nga yang, chyeju hte Yehowa nang hpe mara tsep kawp raw kau ya sai hpe kam u. Mara naw nga ai ngu n hkamsha ra sai. Lahta de tsun wa ai Daniel mung dai zawn hkamsha wa ai. San seng ai myit nsam bai lu hkra, myitsu salang ni shading sharai ya nna karum ya ngut ai hpang, shi grai myit simsa mat ai. Shi ndai hku tsun ai: “Ngai mara naw nga ai ngu n hkamsha sai. Mara n nga mat sai nga yang, n nga mat sai rai nga ai. Na a lit ni hpe ngai la nna nang hte tsan ai de tawn kau na. Nang galoi mung dai hpe bai n mu lu sai ngu Yehowa tsun ai zawn re.” Hprawng hkawm ai wa gaw shingbyi ai mare kata hta nga nga yang, matai htang ai wa gaw shi hpe hkan sat na hpe n hkrit ra sai.  Dai zawn sha, anhte a mara hpe Yehowa raw kau ya sai nga yang, dai hte seng nna n hkrit ra sai, ari jaw hkrum na hpe mung n tsang ra sai.​—⁠Shakawn 103:8-12 hpe hti u.

15, 16. Yehowa a matsan dum myit hpe hpa majaw kam mai ai kun?

15 Anhte ni gaw Yehowa a matsan dum myit hpe, Israela ni hta grau nna pyi kam na lam nga ai. Yehowa hpe hkum tsup hkra madat lu ai atsam n nga ai majaw, “Chyum sha hkrum ai” ngu Pawlu tsun ngut ai hpang, ndai hku tsun wa ai: “Anhte a Madu Yesu a marang e mawai la ai Karai Kasang a chyeju hpe ngai shagrau sha-a nngai!” (Roma 7:25 JCLB) Shi hpa hpe tsun mayu ai kun? Pawlu gaw mara kaba ni galaw wa nna, mara galaw mayu ai myit hpe matut nna gasat nga ra ai. Raitim, shi myit malai lu wa ai hpe yu yang, Madu Yesu hku nna Yehowa mara raw ya sai hpe shi kam ai lam chye lu ai. Yesu gaw gawng malai jahpu hpe jaw wa sai majaw, anhte gaw san seng ai myit nsam hte myit kata hta simsa lam lu mai sai. (Hebre 9:13, 14) Anhte a Hkinjawng Agyi, Yesu gaw “shinggyim masha ni a matu mara tawng ban ya nga na, tutnawng e ahkrung nga ai majaw, shi a marang e Karai Kasang kaw sit shang wa ai ni hpe hkum tsup wa hkra, mawai la lu na atsam, shi lu nga ai.” (Hebre 7:24, 25) Moi na aten hta mung, Israela ni a mara hpe Yehowa gaja wa raw ya ai hpe chye na matu hkinjawng agyi ni gaw karum ya ai. Anhte a Hkinjawng Agyi Yesu gaw grau nna pyi, “matsan dum ai lam hkam la lu na hte, ra kadawn ai aten hta nan anhte hpe karum ai chyeju lu la na” matu galaw ya na re.​—⁠Hebre 4:15, 16 JCLB.

16 Yehowa kaw shingbyi na matu, Yesu a shagu hkungga hpe kamsham ra ai. Dai shagu hkungga gaw masha a matu akyu nga ai ngu nna sha hkum myit. Gawng malai jahpu kaw nna nang mung akyu lu na hpe kam u. (Galati 2:20, 21) Gawng malai jahpu a majaw, na a mara ni hpe Yehowa raw kau ya sai lam kam u. Gawng malai jahpu gaw nang hpe htani htana asak myit mada lam jaw ai hpe kam u. Yesu a shagu hkungga gaw nang hpe Yehowa jaw ai kumhpa re.

17. Nang hpa majaw Yehowa kaw shingbyi mayu ai kun?

17 Shingbyi na mare ni gaw Yehowa a matsan dum myit hpe chye na shangun ai. Karai Kasang lajang ya ai ndai lamang gaw asak a manu dan ai lam anhte hpe chye shangun ai. Myitsu salang ni anhte hpe gara hku karum ya ai, teng sha myit malai lu ai ngu ai gaw hpa hpe tsun mayu ai hte Yehowa anhte hpe mara raw ya ai lam hpa majaw tsep kawp kam mai ai hpe mung, chye shangun ai. Nang Yehowa kaw shingbyi na kun? Dai hta grau nna shim lum ai shara n nga sai. (Shakawn 91:1, 2) Matsan dum ai hte tara rap ra ai hta kaja htum kasi re ai Yehowa hpe kasi la lu na matu, hprawng shingbyi ai mare gaw gara hku karum ya na hpe hpang na sumhpa hta mu lu na re.

^ စာပိုဒ်၊ 10 Hprawng hkawm ai wa a nta masha ni gaw shingbyi ai mare hta shi hte arau sa nga mai ai nga nna Yuda hpaji ninghkrin ni tsun ai.