Content de lai

Secondary menu hpe lai

Malawm Ni Hpe Lai U

Yehowa Sakse Ni

Kachin

Sin Lanchyi (Hkaja Laika)  |  November 2017

Yehowa A Tara Rap Ra Ai Hte Matsan Dum Myit Hpe Kasi La U

Yehowa A Tara Rap Ra Ai Hte Matsan Dum Myit Hpe Kasi La U

“Malang ai hku tara dara mu; langai hte langai tinang a hpu nau wa hpe n-gaw nwai ai hte matsan dum ai myit madun mu.”​—⁠ZEHKARIA 7:9.

Mahkawn: 125, 88

1, 2. (a) Karai a tara hte seng nna Yesu gara hku hkamsha ai kun? (b) Laika ka sara ni hte Hparishe ni gaw tara hpe shut shai ai gara lam hku hkan sa nga ai kun?

YESU gaw Mawshe a tara hpe tsawra ai. Dai gaw mauhpa n re. Hpa majaw nga yang, dai tara gaw Yesu a prat hta ahkyak htum ai wa re ai shi Kawa Yehowa kaw nna sa ai majaw re. Shakawn 40:8 hta Yesu gaw Karai a tara ni hpe grai tsawra ai lam ndai hku tau hkrau tsun da ai: “Nye a Karai Kasang e, na a myit hkan nang na ngai ra nga nngai; Nye a kraw lawang hta na a tara rawng nga ai.” Karai a tara ni gaw hkum tsup ai, akyu nga ai hte teng sha hpring tsup wa na hpe Yesu gaw shi tsun shaga ai lam, galaw ai lam ni hku nna sakse madun wa ai.​—⁠Mahte 5:17-19.

2 Hpyi hpun ai laika ka sara ni hte Hparishe ni gaw Karai a tara hpe rap ra ai hku n mu hkra galaw ai, shut ai hku hkan sa nga ai hpe mu ai shaloi Yesu grai yawn ai. Shanhte hpe shi ndai hku tsun ai: “nanhte gaw shingtawn pan, pansoi; hpakkyi tum re ai ni hta na, htamshi hta htammi lahkawn la” ai. Shanhte gaw grai kaji ai tara ni hpe gaw atsawm hkan sa nga ai. Rai yang, hpa byin nga ai kun? Yesu ndai hku sang lang dan ai: “dai jep ai tara hta lawm ai grau akyu rawng ai, dinghpring ai, matsan dum chye ai hte kamsham ai lam hte hpe nanhte lai kau da myit dai.” (Mahte 23:23)  Hparishe ni gaw, Tara a lachyum hpe n chye na ai sha, shanhte gaw kaga masha ni hta grau kaja ai ngu shadu ma ai. Raitim, Yesu gaw tara ni a lachyum hte dai tara ni gaw Yehowa hte seng nna hpa hpe madun nga ai hpe chye ai.

3. Ndai sumhpa hta hpa lam hkaja na kun?

3 Hkristan ni gaw Mawshe a tara hpe n hkan sa ra sai. (Roma 7:6) Rai yang, Yehowa gaw Chyum Laika hta tara ni hpe hpa majaw bang da ya ai kun? Tara ni a shingdu hta nga ai npawt tara ni gaw, “grau akyu rawng ai” hpe chye nna, hkan sa shangun mayu ai majaw re. Ga shadawn, hprawng shingbyi na mare ni hpe lajang da ya ai kaw nna hpa npawt tara ni hpe chye lu na kun? Shawng na sumhpa hta, hprawng hkawm ai masha gaw hpa galaw ra ai lam hpe anhte hkaja nna chye wa sai. Ndai sumhpa hta gaw, Yehowa hte seng nna shingbyi na mare ni gaw anhte hpe hpa sharin ya ai, shi a atsam ningja ni hpe anhte gara hku hkan sa mai ai lam chye lu na re. Ga san masum a mahtai ni hpe chye lu na re: Shingbyi na mare ni gaw Yehowa a matsan dum myit hpe gara hku madun dan ai kun? Dai gaw asak hte seng nna Karai a ningmu hpe hpa sharin ya ai kun? Dai gaw shi a hkum tsup ai tara hpe gara hku madun dan ai kun? Dai lam ni kaw nna, sumsing lamu Kawa hpe anhte gara hku kasi la lu na lam chye hkra shakut u.​—⁠Ehpesu 5:1 hpe hti u.

Shingbyi Na Mare Ni A Shara Gaw Karai A Matsan Dum Myit Hpe Madun

4, 5. (a) Hprawng hkawm ai masha gaw hprawng shingbyi ai mare de aloi sha du lu na matu hpa ni galaw da ya ai kun? Hpa majaw kun? (b) Dai gaw Yehowa a lam hpa sharin ya ai kun?

4 Yehowa gaw hprawng shingbyi na mare kru hpe aloi sha mai sa ai shara hta lajang da ya ai. Shi gaw Israela ni hpe Yawdan hka a lahkawng maga hta masum hpra lata na matu tsun ai. Hpa majaw kun? Hprawng hkawm ai masha gaw dai mare de aloi sha sa lu nna lawan du lu na matu re. (Bu Hkawm 35:11-14) Dai shingbyi mare de sa na lam nmaw ni hpe mung kaja hkra galaw da ya ai. (Tara Jahprang 19:3) Yuda htung hku nna dai mare ni hpe atsawm mu lu hkra, lam ding yang kumla ni shakap da ya ai. Israela ni hta hprawng shingbyi na mare ni nga ai majaw, ndum shami masha sat hkrup ai Israela masha gaw, kaga hpara ni hpe nawku na matu gung lau hkrum chye ai kaga mungdan hta shingbyi shara n tam ra sai.

5 Ndai lam hpe myit yu u: Masha sat ai wa gaw si dam hkrum na ngu Yehowa hkang da ai. Raitim, ndum shami masha sat hkrup yang, dai wa hpe matsan dum myit hte makawp maga lam lu na matu mung shi lajang da ya ai. Chyum hpaji du langai tsun ai hku nga yang, hkawm sa na lam ni, hkan sa na lamang ni hpe lajang da ya ai majaw, dai hpe chye na loi nna hkan sa na matu mung loi ai. Yehowa gaw shi a mayam ni hpe ari jaw na matu yu nga ai n hkru  ai tara agyi n re. Shi gaw “nachying matsan dum chye ai” wa re.​—⁠Ehpesu 2:4.

6. Hparishe ni gaw Yehowa a matsan dum myit hpe kasi la ai kun? Sang lang dan u.

6 Hparishe ni gaw kaga ni hpe matsan dum myit sharawng awng let n madun mayu ai. Ga shadawn, marai langai ngai gaw dai mara hpe sha, masum lang hta grau nna tawt lai yang, Hparishe ni gaw dai wa hpe mara n kam raw ya ai ngu Yuda htung hta tsun da ai. Yesu gaw shanhte a myit masa kade daram shut nga ai hpe chye lu hkra, Hparishe langai hte kang hta ai wa a akyu hpyi ai ga shadawn hpe tsun dan wa ai. Hparishe wa gaw ndai hku tsun ai: “Karai Kasang e, ngai gaw hpya lu hpya sha ai, n ding n man ai, num shut num shaw re ai masha gale ni hte n bung nngai hta n-ga, ndai kang hta ai wa zawn pyi n rai nngai majaw, ngai nang hpe shakawn nngai.” Yesu hpa hpe tsun mayu ai kun? Hparishe ni gaw “masha kaga hpe hpa n nawn ai” sha n-ga, masha ni gaw matsan dum myit ra nga ai hpe mung n myit ya ma ai.​—⁠Luka 18:9-14.

Nye mara hpe raw ya rit ngu masha ni sa tsun gwi ai wa byin hkra galaw ai kun? Myit shagrit shanem ai hte atsawm shaga u (Laika pang 4-8 hpe yu u)

7, 8. (a) Yehowa a matsan dum myit hpe gara hku kasi la mai ai kun? (b) Kaga ni hpe mara raw ya na matu anhte hpa majaw myit shagrit shanem ra ai kun?

7 Hparishe ni hpe n re ai sha Yehowa hpe kasi la u. Matsan dum myit hte n-gaw nwai myit hpe madun u. (Kolose 3:13 hpe hti u.) Nye mara hpe raw ya rit ngu masha ni sa tsun gwi ai wa byin hkra galaw u. (Luka 17:3, 4) Tinang hkrai ndai hku san u: ‘Masha ni ngai hpe chyahkring hkring shut hpyit yang pyi, mara hpe alawan hte aloi sha raw ya ai kun? Ngai hpe shut hpyit ai (sh) hkra machyi hkra galaw ai wa hte simsa hkra galaw na matu ngai ra sharawng ai kun?’

8 Mara raw ya na matu anhte hta shagrit shanem ai myit nga ra ai. Hparishe ni gaw kaga ni hta grau ai ngu shanhte hkum shanhte shadu ai majaw, mara raw ya na matu n ra sharawng ai. Raitim, anhte Hkristan ni gaw shagrit shanem let “tinang a hkum hta manang wa hpe shagrau sha-a” nna, mara raw ya ai. (Hpilipi 2:3) Anhte hkum anhte ndai hku mai san ai: ‘Ngai gaw Yehowa hpe kasi la nna myit shagrit shanem ai lam madun nga ai kun?’ Anhte myit shagrit shanem yang, kaga ni gaw mara raw ya na matu tsun gwi wa nna anhte mung shanhte hpe mara raw ya na matu loi na re. Matsan dum myit madun na matu lawan u. Pawt sindawng ai hta lanyan u.​—⁠Hpaji 7:8, 9.

Asak Hpe Manu Shadan Ga, “Masha Sat Ai Yubak Na A Ntsa E N Du Lit Ga”

9. Yehowa gaw asak a manu dan ai lam hpe Israela ni chye hkra gara hku karum ya wa ai kun?

9 Hprawng shingbyi na mare ni tawn da ai madung lam langai gaw, mara n kap ai wa hpe sat hkrup nna masha sat ai yubak n du hkra, Israela ni hpe makawp maga na matu re. (Tara Jahprang 19:10) Yehowa gaw asak hpe manu shadan nna masha sat ai hpe n ju n dawng ai. (Ga Shagawp 6:16, 17) Tara rap ra ai hte chyoi pra ai Karai Kasang gaw ndum shami masha sat hkrup ai lam hpe mung ahkyak shatai ai. Marai langai gaw n myit mada ai sha masha sat hkrup yang, shi gaw matsan dum myit lu ging ai. Raitim, shi a masa hpe myitsu salang ni hpe shawng sa tsun dan ra ai. Myitsu salang ni gaw, ndum shami sat hkrup ai ngu tara jeyang yang, hprawng hkawm ai masha gaw shingbyi  ai mare hta hkinjawng agyi n si dingsa nga ra ai. Hprawng hkawm ai wa gaw, dai mare hta shi a prat ting ngu na daram nga ra na lachyum re. Dai lamang gaw asak a manu dan ai lam hpe Israela ni chye na matu re. Asak madu hpe hkungga ai hku nna, shanhte gaw kaga ni a asak hpe shoihpa byin shangun na lam yawng hpe dang lu ai daram koi ra ai.

10. Laika ka sara ni hte Hparishe ni gaw kaga ni a asak hpe manu n shadan ai lam Yesu gara hku madun dan wa ai kun?

10 Yehowa hte n bung ai sha, laika ka sara ni hte Hparishe ni gaw masha ni a asak hpe manu n shadan ma ai. Yesu shanhte hpe ndai hku tsun ai: “Hpaji sumsaw gaw nanhte kyem da myit htawm, tinang dai mung n shang, shang mayu ai ni hpe mung, nanhte hkum shadang da myit dai.” (Luka 11:52) Yesu hpa hpe tsun mayu ai kun? Laika ka sara ni hte Hparishe ni gaw masha ni hpe Karai a mungga sharin ya ra nna, htani htana asak lu hkra karum ya ra ai. Raitim, dai hku galaw na malai, “Asak Madu” re ai Yesu hpang de masha ni hkan ai hpe pat shingdang ma ai. (Kasa 3:15) Dai lam hku nna, shanhte gaw masha hpe hten byak ai lam de woi sa nga ai. Laika ka sara ni hte Hparishe ni gaw gumrawng nna tingkyeng myit nga ai majaw, masha ni a asak hpe manu n shadan ai. Grai n hkru nna tsawra myit mung n rawng ma ai.

11. (a) Kasa Pawlu gaw asak hpe Yehowa mu mada ai hku mu mada ai lam gara hku madun wa ai kun? (b) Hkaw tsun bungli hta Pawlu zawn sharawng awng let galaw na matu anhte hpe hpa gaw karum ya ai kun?

11 Laika ka sara ni, Hparishe ni hte nbung ai sha, Yehowa hpe anhte gara hku kasi la mai na kun? Asak hpe hkungga let manu shadan ai hku nna kasi la mai ai. Kasa Pawlu gaw Mungdan kabu gara shiga hpe masha law law hpe dang lu ai daram hkaw tsun ai hku nna galaw wa ai. Dai majaw shi ndai hku lu tsun ai: “Masha yawng a asai hte ngai lawt ni ai.” (Kasa 20:26, 27 hpe hti u.) Mara nga ai ngu n hkamsha mayu ai majaw (sh) Yehowa galaw shangun ai majaw sha, Pawlu hkaw tsun wa ai kun? N re. Pawlu gaw masha ni hpe tsawra ai majaw re. Shanhte a asak hpe manu dan ai hku shi mu mada nna shanhte hpe htani htana asak lu shangun mayu ai majaw re. (1 Korinhtu 9:19-23) Anhte mung asak hpe Yehowa mu mada ai hku mu mada ra ai. Shi gaw masha yawng myit malai lu nna asak lu shangun mayu ai. (2 Petru 3:9) Yehowa hpe kasi la na matu anhte gaw masha ni hpe tsawra ra ai. Matsan dum ai myit gaw, hkaw tsun bungli hta sharawng awng let galaw na matu shadut ya nna, dai hku galaw ai gaw anhte hpe ngwi pyaw shangun ai.

12. Karai a masha ni hta shim lum lam gaw hpa majaw ahkyak ai kun?

12 Asak hpe Yehowa mu mada ai hku mu na matu, anhte hta shim lum ai hte seng nna jaw ai myit jasat mung nga ra ai. Anhte gaw mawdaw gau ai, sengke gau ai, nta gap ai, gram lajang ai, bungli galaw ai lam hte nawku share de sa ai lam hta shim lum hkra galaw ra ai. Masha nkau mi gaw, amu galaw ai shaloi lawan ngut na (sh) gumhpraw nau n ma na matu galaw ma ai. Raitim, dai hku galaw ai gaw n myit mada da ai lam ni byin wa shangun ai. Shim lum lam, hkam kaja lam gaw gumhpraw hte aten hta grau nna ahkyak ai. Anhte a Karai gaw galoi mung teng man ai hpe galaw ai. Anhte mung shi hte bung mayu ai. Myitsu salang ni gaw tinang hte kaga ni a shim lum lam hte seng nna grau myit ra ai. (Ga Shagawp 22:3) Myitsu salang ni gaw, shim lum lam hte seng ai tara ni, tsang madang ni jaw wa yang madat ra ai. (Galati 6:1) Asak hpe Yehowa mu mada ai hku mu mada yang “masha sat ai yubak na a ntsa” du na n re.

“Ndai Tara Lam Hkan” Nna Tara Jeyang U

13, 14. Yehowa a tara rap ra ai lam hpe Israela myitsu salang ni gara hku kasi la mai na kun?

13 Yehowa gaw Israela myitsu salang ni hpe shi a tara rap ra ai lam hpe kasi la na matu  hkang da ai. Shawng nnan, myitsu salang ni gaw masa lam yawng hpe chye da ra ai. Dai hpang, shanhte gaw masha sat ai wa a myit jasat hte shawng e shi galaw wa ai lam ni hpe atsawm dinglik nna matsan dum myit madun na matu daw dan ra ai. Hprawng hkawm ai wa gaw, n ju n dawng ai majaw masha sat wa ai kun? Yaw shada lam hte sat kau ai kun? ngu ai hpe myitsu salang ni gaw tam sawk sagawn nna mahtai tam ra ai. (Bu Hkawm 35:20-24 hpe hti u.) Masha sat ai hpe yawm htum marai lahkawng sakse lu madun yang, sat ai wa gaw tara jeyang hkrum na re.​—⁠Bu Hkawm 35:30.

14 Byin wa ai masa hpe atsawm mahtai tam ngut yang, myitsu salang ni gaw, tawt lai wa ai lam hpe sha n-ga, shi a myit jasat hpe mung atsawm myit yu ra ai. Myitsu salang ni gaw byin mat wa ai masa hpe ntsa lam n yu ai sha, masa hpe sung sung myit yu ra ai. Masa gaw hpa a majaw byin wa ai hpe mu hkra yu ra ai. Shanhte gaw, Yehowa a matsan dum myit, sawn maram chye ai atsam hte tara rap ra ai lam hpe kasi la lu hkra, chyoi pra ai wenyi hpyi shawn na matu gaw ahkyak htum re.​—⁠Pru Mat 34:6, 7.

15. Yubak masha ni hpe Yesu mu mada ai lam hte Hparishe ni mu mada ai lam gaw gara hku shai nga ai kun?

15 Hparishe ni gaw matsan dum myit hte tara daw dan ai lam n nga ai. Shanhte gaw mara lu ai wa a myit jasat hpe n re ai sha, shi galaw wa ai mara hpe sha myit maju jung ma ai. Mahte a nta hta Yesu shat sha nga ai hpe Hparishe nkau mu ai shaloi, “kang hta ai ni hte yubak kap ai ni hte rau, hpa rai nanhte a sara gaw shat pawng sha a ta?” nga nna sape ni hpe san ai. Yesu ndai hku bai tsun ai: “N-gun ja ai ni tsi sara n ra ma ai; machyi ai ni sha ra ma ai. Dai rai nna, Hkungga jaw ai lam n rai, matsan dum ai lam she ngai tsaw nga nngai, nga ai ga hpe chye lu mu ga, sa sharin la mu: Kaning rai nme law, dinghpring ai ni hpe shaga na n rai, yubak kap ai ni hpe shaga na she ngai sa du nngai.” (Mahte 9:9-13) Yesu gaw mara galaw ai ni a matu, mara lawt ga tsun ya nga ai kun? N re. Shi gaw shanhte hpe myit malai lu shangun mayu ai. Dai gaw shi hkaw tsun ai shiga a ahkyak ai daw re. (Mahte 4:17) “Kang hta ai ni hte yubak kap ai masha” ni kaw nna nkau mi gaw galai shai mayu ai hpe Yesu chye ai. Mahte a nta hta shanhte du nga ai gaw, shat sha na matu sha n re. Shanhte dai kaw du nga ai gaw Yesu hpang hkan ai majaw re. (Marku 2:15) Hparishe law malawng gaw, masha ni hpe Yesu mu ai zawn n mu ma ai gaw yawn hpa re. Shanhte gaw, dai masha ni galai shai wa na hpe n kam nna, myit mada lam n nga ai yubak masha ni hku nna sha mu mada ma ai. Tara rap ra nna, matsan dum chye ai Yehowa hte shanhte gaw, grai shai nga ai.

16. Tara komiti gaw hpa hpe shakut nna ginhka chye ra ai kun?

16 Tara rap ra ai hpe tsawra ai Yehowa hpe dai ni aten na myitsu salang ni kasi la ra ai. (Shakawn 37:28) Shawng nnan, shanhte gaw marai langai mara galaw wa ai kun? N galaw ai kun? ngu ai hpe atsawm chye hkra “azin ayang san gawn” ra ai. Rai yang she, shanhte gaw Chyum Laika lam matsun hte maren daw dan lu na re. (Tara Jahprang 13:12-15) Tara komiti hta lawm ai myitsu salang ni gaw, mara kaba galaw da ai wa myit malai lu ai, n lu ai hpe atsawm dawdan ra ai. Dai hku galaw na matu ayan gaw n loi ai. Myit malai lu ai lam hta, mara galaw ai wa gaw shi galaw wa ai lam hpe gara hku mu mada ai hte shi a salum hta hpa nga ai lam mung lawm ai. (Shingran 3:3) Mara galaw ai wa gaw matsan dum myit lu na matu myit malai la ra ai. *

17, 18. Marai langai gaw jet ai myit malai lu ai hpe myitsu salang ni gara hku chye lu na kun? (Ndai sumhpa shawng na sumla hpe yu u.)

17 Yehowa hte Yesu gaw myit masin hpe  chye lu ai majaw, masha langai a myit mang ai lam, hkamsha ai lam ni hpe tup hkrak chye lu ai. Raitim, myitsu salang ni gaw myit masin hpe n chye lu ai. Nang gaw myitsu salang rai yang, marai langai ngai gaw teng sha myit malai lu ai, n lu ai hpe gara hku chye lu na kun? Langai, nyan hpaji hte ginhka chye lu ai atsam nga na matu akyu hpyi u. (1 Hkawhkam 3:9) Lahkawng, sadi dung ai mayam kaw nna sa ai laili laika ni hte Chyum Laika hpe akyu jashawn u. Dai gaw, “mungkan ga a yawn hkyen ai” lam kun? Jet ai myit malai lu ai lam re ai “Karai Kasang ra ai yawn hkyen ai” lam kun? ngu ai hpe chye lu hkra karum ya lu ai. (2 Korinhtu 7:10, 11) Shanhte gara hku hkamsha ai, myit ai hte galaw hkawm sa ai hpe atsawm maram yu u. Chyum Laika hta myit malai lu ai wa hte n lu ai wa a lam hpe gara hku tsun da ai hpe yu u.

18 Masum, shi galaw wa ai lam hpe sha n-ga, shi a myit jasat hpe mung myit yu ra ai. Mara galaw ai wa a shingdu labau, shi a yaw shada lam hte mayak mahkak ni hpe myit ya ra ai. Hkristan nawku hpung a ningbaw re ai Yesu hte seng nna Chyum Laika hta ndai hku tau hkrau tsun da ai: “shi mu hkrup ai hte maren n daw dan ai hte, na hkrup ai hte maren n jeyang na ra ai: shi gaw, ding hpring ai hku hkan let, matsan mayan ni hpe tara dara nna, myit malang ai hku hkan let, ga ntsa na myit gyip ai ni a hpang maga de daw dan na ra ai.” (Esaia 11:3, 4) Yesu gaw shi a hpung hpe yu lanu lahku na matu myitsu salang ni hpe lit jaw da ai. Shi gaw matsan dum myit hte tara rap ra ai hku daw dan lu na matu nang hpe karum ya na re. (Mahte 18:18-20) Anhte hpe lanu lahku ya ai myitsu salang ni anhte hta nga ai gaw kabu hpa re. Shanhte gaw, anhte shada da tara rap ra ai hte matsan dum chye na matu mung karum ya na re.

19. Shingbyi ai mare ni kaw nna tatut hkan sa na matu hpa sharin la lu ai kun?

19 Mawshe a tara hta “chye chyang ai hte teng man ai” lam ni lawm ai. Dai gaw Yehowa hte shi a npawt tara ni hte seng nna anhte hpe chye shangun ai. (Roma 2:20) Mawshe a Tara hta lawm ai shingbyi mare ni gaw, myitsu salang ni “malang ai hku tara dara” na hte anhte shada da “n-gaw nwai ai hte matsan dum ai myit” madun na matu sharin ya ai. (Zehkaria 7:9) Mawshe a tara hpe anhte n hkan sa ra sai raitim, Yehowa gaw n galai shai ai. Tara rap ra ai hte matsan dum ai lam gaw shi a matu grai ahkyak nga ding yang re. Dai zawn re ai Karai Kasang hpe nawku lu ai gaw laksan ahkaw ahkang re. Yehowa a kaja ai atsam ningja ni hpe kasi la nga ga. Yehowa a makawp maga lam hte shim lum lam lu la hkra shi kaw shingbyi nga ga.

^ စာပိုဒ်၊ 16 Sin Langchyi (BU) September 15, 2006, laika man 30 hta na “Laika Hti Ai Ni Hpang De Na Ga San” hpe yu u.