Content de lai

Secondary menu hpe lai

Malawm Ni Hpe Lai U

Yehowa Sakse Ni

Kachin

Sin Lanchyi (Hkaja Laika)  |  December 2017

Ramma Ni​—⁠Hkye Hkrang La Hkrum Na Matu Matut Nna Shakut Nga U

Ramma Ni​—⁠Hkye Hkrang La Hkrum Na Matu Matut Nna Shakut Nga U

“Nanhte galoi mung madat mara myit dai hte maren, . . . hkye hkrang la hkrum na matu hkrit gari ai myit hte matut nna shakut nga u.” ​—⁠HPILIPI 2:12 NW.

Mahkawn: 133, 135

1. Hkalup hkam ai gaw hpa majaw ahkyak ai lam rai kun? (Ndai sumhpa shawng na sumla hpe yu u.)

SHANING shagu, sen hku law ai Chyum ga sharin ni gaw, hkalup hkam la ma ai. Dai ni kaw nna law law gaw, ramma ni, asak shi ning jan ni (sh) dai hta kaji ai ni pyi lawm ai. Shanhte gaw teng man ai lam hta rawt jat wa ma ai. Nang mung dai ni kaw nna langai rai kun? Re ai nga yang, grai kaja ai lam hpe nang galaw wa sai re. Hkristan yawng hkalup hkam ra ai. Hkye hkrang la hkrum nna htani htana asak lu na matu hkalup hkam la ra ai.​—⁠Mahte 28:19, 20; 1 Petru 3:21.

2. Yehowa hpe ap nawng na matu hpa majaw nang n hkrit tsang ra ai kun?

2 Nang hkalup hkam la ngut ai shaloi, Yehowa gaw nang hpe lam amyu myu hku nna shaman chyeju jaw wa ai. Raitim, nang hta mung lit nnan ni law law nga wa ai. Gara lam hku nna kun? Nang hkalup hkam ai nhtoi hta, hkalup mungga jaw ai hpunau ndai hku san wa ai: “Yesu Hkristu a hkungga ntsa madung tawn nna, na a mara ni hpe myit malai lu nna, Yehowa a magam gun  na matu, na hkum hpe ap nawng ngut sai kun?” Ap nawng ngut sai ngu nang htai wa ai. Yehowa hpe tsawra nna, shi hpe nawku dawjau ai gaw na a prat hta ahkyak htum ai lam re ai hpe nang ga sadi jaw wa ai. Dai zawn grai ahkyak ai ga sadi jaw wa ai majaw nang myit malai lu ging ai kun? N lu ging ai. Na a prat hta Yehowa a lam matsun hpe hkap la yang, galoi mung myit malai lu na n re. Satan up hkang ai npu hta nang gaw Yehowa a masha langai hku nna asak hkrung nga ai. Nat Satan gaw, nang hkye hkrang la hkrum na hpe myit n lawm ai. Nang gaw, Yehowa hpe nyet kau nna, shi a hpang hkan ai majaw, htani htana asak myit mada lam sum mat yang, shi pyaw ai.

3. Yehowa hpang ap nawng da ai majaw, shi nang hpe gara hku shaman chyeju jaw ai kun?

3 Yehowa hpang ap nawng nna hkalup hkam wa ai majaw, shi nang hpe gara hku shaman chyeju jaw wa ai hpe myit yu u. Yehowa hpe na a prat jaw kau sai majaw, kamhpa myit hte nang ndai hku lu tsun sai: “Yehowa ngai hte rau rai nga ai: ngai hpa mung n hkrit nga nngai: Masha wa ngai hpe hpa di lu na a ta?” (Shakawn 118:6) Karai Kasang a maga hta nang nga nna, shi nang hpe arawng la ai lam hpe chye lu ai hta grau nna sharawng awng hpa n nga sai.

Tinang Galaw Ra Na Lit

4, 5. (a) Ap nawng ai lam gaw tinang nan a lit langai re ai ngu hpa majaw lu tsun ai kun? (b) Asak kade daram raitim, Hkristan ni yawng hta hpa chyam dinglik ai lam ni nga ai kun?

4 Na a kanu kawa ni gaw Yehowa hte kaja ai hku hkau lam nga ai majaw, hkalup hkam da ai Hkristan langai hku nna nang mung, Yehowa hte kaja ai hku hkau lam nga na ngu n mai tsun ai. Nang gaw kanu kawa ni hte arau nga ai rai yang pyi, Yehowa hte hku hkau lam nga na matu, nang nan galaw ra ai. Dai hpe dum na matu hpa majaw ahkyak ai kun? Htawm hpang hta, anhte a makam masham gara hku chyam dinglik hkrum na hpe, kadai mung hkrak n lu tsun ai. Ga shadawn, nang gaw asak naw kaji yang, hkalup hkam la wa ai mung mai byin ai. Ya nang gaw ramma rai wa nna, nang hta hkamsha lam nnan hte manghkang nnan ni nga na re. Ramma shayi sha langai ndai hku tsun ai: “Ma langai gaw, jawng hta shangai nhtoi muk hpe n lu sha ai majaw sha, Yehowa Sakse langai byin ai hpe yawn taw nga na n re. Raitim, aten ni na wa ai hte maren, hpye ai amu galaw na matu shadut hkrum ai shaloi, Yehowa a tara ni hpe hkan sa ai gaw kaja htum re ai hpe shi kam sham ra ai.”

5 Ramma ni sha, chyam dinglik hkrum ai n re. Asak kaba ai aten hta hkalup hkam ai ni pyi, shanhte n myit mada da ai chyam dinglik ai lam ni hkrum chye ai. Hkam kaja lam, bungli (sh) ningrum ningtau a majaw chyam dinglik ai lam ni hkrum chye ai. Anhte yawng gaw asak kade daram raitim, masa lam amyu myu hta, Yehowa hpe sadi dung na matu shakut ra ai.​—⁠Yaku 1:12-14.

6. (a) Apnawng ai lam hte seng nna nang hpa hpe dum ra ai kun? (b) Hpilipi 4:11-13 kaw nna hpa sharin la lu ai kun?

6 Na a manang ni hte kanu kawa ni Yehowa hpe n nawku sai rai yang pyi, hpa mi byin wa tim nang gaw Tsaw Htum ai Karai hpe nawku dawjau na ngu ga sadi jaw ai hpe dum nga yang, matut nna sadi dung lu na re. (Shakawn 27:10) Masa lam yawng hta, Yehowa hpe jaw da ai ga sadi dung lu hkra, shi kaw karum hpyi ra ai.​—⁠Hpilipi 4:11-13 hpe hti u. 

7. Hkye hkrang la hkrum na matu “hkrit gari ai myit hte matut nna shakut” u ngu ai gaw hpa lachyum rai kun?

7 Yehowa gaw nang hpe shi a jinghku byin shangun mayu ai. Raitim, nang hkye hkrang la hkrum na matu, shi hte hku hkau lam matut nga hkra shakut ra ai. Hpilipi 2:12 hta ndai hku tsun da ai: “Hkye hkrang la hkrum na matu hkrit gari ai myit hte matut nna shakut nga u.” Lachyum gaw, hpa mi byin wa tim, Yehowa hte ni htep na matu hte matut  nna shi hpe sadi dung na matu gara hku galaw mai ai hpe atsawm myit yu ra ai. Anhte dai hku galaw nga ai ngu nna ahpa atang n sawn la ging ai. Karai Kasang hpe shaning law law nawku dawjau wa ai ni kaw nna nkau mi pyi, matut nna sadi n dung ma ai hpe myit dum ra ai. Hkye hkrang la ai hkrum na matu hpa gaw nang hpe karum ya lu na kun?

Chyum Laika Hkaja Ai Gaw Ahkyak Ai

8. Tinang hkrai hkaja ai lam hta hpa lam lawm ai kun? Dai gaw hpa majaw ahkyak ai kun?

8 Yehowa a jinghku byin na matu, shi a ga madat ra nna shi hte ga shaga ra ai. Yehowa a ga madat lu ai madung lam gaw, Chyum Laika hkaja ai lam re. Dai hta, Chyum Laika hte Chyum Laika hta madung tawn ai laili laika ni hpe hti nna myit sumru ai lam ni lawm ai. Raitim, Chyum Laika hkaja ai gaw, jawng hta san poi htai na matu matsing sumhting lu hkra hti ai hte n bung ai. Akyu nga ai tam sawk sagawn ai lam gaw, Yehowa hte seng ai lam nnan ni hpe hkaja ai hte bung ai. Nang gaw, Karai Kasang hpang de sit sa yang, shi mung nang hpang de sit wa na re.​—⁠Yaku 4:8.

Yehowa hte matut mahkai lam nga ai gaw na a matu kade daram kaja ai kun? (Laika pang 8-11 hpe yu u)

9. Tinang hkrai hkaja ai lamang a matu gara hkingrai ni gaw nang hpe karum ya lu na kun?

9 Yehowa a uhpung gaw, hkaja ai lam galaw na matu, hkingrai law law hpe lajang da ya ai. Ga shadawn, jw.org a “Chyum Laika Hkaja Ai Lamang Ni” hta lawm ai “Ramma Ni” ngu ai daw gaw, nang hkaja ai Chyum Laika labau ni hpe tatut hkan sa lu hkra karum ya lu ai. JW.ORG hta, “Chyum Laika Anhte Hpe Hpa Sharin Ya Lu Ai Kun?” ngu ai hkaja na lam matsun ni hpe mung nang mu lu na re. Dai lam ni gaw, na a makam masham hpe shangang shakang ya na re. Nang kam sham ai lam hte seng nna mung kaga ni hpe sang lang dan lu hkra karum ya na re. 2009, April  shata hta dip shapraw ai Dum Hprang! (BU) hta, “Ramma Ni A Ga San . . . Chyum Laika Hti Ai Hpe Pyaw Hpa Lam Byin Hkra Gara Hku Galaw Na Kun?” ngu ai sumhpa hta tinang hkrai hkaja ai lam hte seng nna, kaga lam matsun ni hpe nang mu lu na re. Hkye hkrang la hkrum na matu hkaja ai hte myit sawn sumru ai lam gaw ahkyak ai.​—⁠Shakawn 119:105 hpe hti u. 

Akyu Hpyi Ai Lam Gaw Grai Ahkyak Ai

10. Hkalup hkam da ai Hkristan langai hpa majaw akyu hpyi ra ai kun?

Lam amyu myu a majaw, nang myit ru myit tsang hkrum ai shaloi, “na a lit Yehowa hta mara da u”

10 Anhte Chyum Laika hkaja ai shaloi, Yehowa a ga madat ai rai nna, akyu hpyi ai shaloi gaw, shi hpe ga shaga ai re. Akyu hpyi ai lam hpe ayan galaw nga ai akyang langai (sh) awng dang na matu tsun ai ga ngu nna mung n sawn la ging ai. Akyu hpyi ai lam gaw, anhte a Hpan Madu hte gaja wa matut mahkai ai lam re. Yehowa gaw nang tsun ai ga hpe teng sha madat mayu ai ngu myit yu u. (Hpilipi 4:6 hpe hti u.) Lam amyu myu a majaw, myit ru myit tsang hkrum ai shaloi, “na a lit Yehowa hta mara da u” ngu nna Chyum Laika hta tsun da ai hpe dum u. (Shakawn 55:22) Wan hku law ai hpunau nauna ni gaw, ndai hpaji jaw ga gaw shanhte hpe karum ya wa ai nga nna nang hpe lu tsun dan na re. Nang hpe mung karum ya lu na re.

11. Yehowa hpe nang hpa majaw ayan chyeju dum ging ai kun?

11 Yehowa kaw nna karum shingtau lam lu mayu ai majaw sha, anhte akyu n hpyi ging ai. Chyum Laika hta ndai hku sadi jaw da ai: “Chyeju adum nga mu.” (Kolose 3:15) Kalang lang, anhte a manghkang ni hpe sha, grai myit tsang ai majaw, anhte hta kaja ai lam ni nga ai hpe n sadi hkrup mat ai. Dai majaw ndai lam hpe galaw yu u: Shani shagu, chyeju dum ging ai yawm htum lam masum hpe myit yu nna de a matu Yehowa hpe chyeju dum u. Asak 12 ning hta hkalup hkam wa ai, ramma Abigail ndai hku tsun wa ai: “Ninggawn tawa hta nga ai kaga yawng hta na Yehowa hpe chyeju dum ging ai ngu ngai hkamsha ai. Anhte hpe jaw da ai kumhpa yawng a matu ahkaw ahkang lu shagu chyeju dum ging ai.” *

Manu Dan Ai Tinang A Mahkrum Madup

12, 13. Yehowa mai kaja ai lam hpe nang gara hku hkam sha ga ai kun? Yehowa nang hpe kade daram karum ya wa ai hpe myit na matu hpa majaw ahkyak ai kun?

12 Yehowa gaw, Hkawhkam Dawi hpe yakhkak ai masa law law hpe hkam jan lu na matu, karum ya wa ai. Dai majaw, Dawi gaw shi a mahkrum madup kaw nna ndai hku lu tsun ai: “Yehowa mai kaja nga ai gaw, chyim yu nna chye mu; Shi hta shingbyi ai wa gaw, a nga ai.” (Shakawn 34:8) Yehowa a mai kaja ai lam hpe anhte nan chyim yu ra ai lam ndai Chyum daw gaw madun dan ai. Chyum Laika hte anhte a laili laika ni hpe hti ai shaloi, zuphpawng lung ai shaloi, matut sadi dung na matu kaga ni hpe Karai Kasang kade daram karum ya sai lam nang hkaja lu ai. Raitim, Yehowa hte na a hku hkau lam ngang kang wa ai hte maren, Yehowa nang hpe kade daram karum ya nga ai hpe mu na matu shakut ra ai. Yehowa mai kaja ai lam hpe nang nan gara hku hkamsha lu na kun?

Uhpung hta nang hpe Yehowa jaw da ai shara gaw, galoi mung manu dan ai

 13 Hkristan shagu gaw, Yehowa a mai kaja ai lam hpe lam langai ngai hte gaw hkamsha ga na re. Shi hte shi a Kasha hpang sit sa na matu anhte yawng hpe saw shaga nga ai. Yesu ndai hku tsun ai: “Ngai hpe shangun dat ai nye Wa e lau la ai wa n rai yang gaw, kadai mung ngai hpang de du sa lu na n rai.” (Yawhan 6:44) Yehowa gaw shi hpang sit sa na matu nang hpe lau la ai ngu hkamsha ai kun? Shing nrai, nang ndai hku myit ai kun? ‘Yehowa gaw shi hpang sit sa na matu nye nu yan wa hpe lau la ai majaw sha, ngai mung lawm mat wa ai kun?’ Nang gaw Yehowa hpang, na hkum nang ap nawng nna hkalup hkam da ai majaw, shi hte na a lapran laksan hku hkau lam nga ai hpe dum ra ai. Chyum Laika hta ndai hku tsun da ai: “Langai ngai gaw, Karai Kasang hpe tsawra a yang gaw, Karai Kasang gaw shi hpe chye da wu ai.” (1 Korinhtu 8:3) Uhpung hta nang hpe Yehowa jaw da ai shara gaw, galoi mung manu dan ai.

14, 15. Na a makam masham grau nna ngang kang na matu hkaw tsun magam gaw gara hku karum ya ai kun?

14 Hkaw tsun magam hta (sh) jawng hta kaga ni hpe na a makam masham hte seng ai lam hpe tsun dan na matu Yehowa n-gun atsam jaw ai shaloi, shi a mai kaja ai lam hpe nang hkamsha ga na re. Na a jawng manang ni hpe hkaw tsun na matu gaw yak chye ai. Shanhte gara hku bai htang wa na hpe nang myit tsang ai mung mai byin ai. Laksan hku nna masha hpawng man hta, na a makam masham hte seng ai lam tsun dan na matu hkrit tsang chye ai. Nang hpe hpa gaw karum ya lu na kun?

15 Nang hpa majaw kam ai, nang hpa hpe kam ai lam myit yu u. JW.ORG hta, hkaja na lam matsun ni hpe na a amyu ga hte lu mai ai nga yang, dai hpe akyu jashawn u. Dai ni gaw, nang hpa hpe kam ai, hpa majaw dai hpe kam ai lam myit na matu hte kaga ni hpe na a makam masham lam tsun dan lu na matu nang hpe karum ya lu na re. Nang teng sha kam sham nna atsawm hkyen lajang da yang, Yehowa a lam hpe tsun dan mayu wa na re.​—⁠Yeremia 20:8, 9.

16. Na a makam masham lam hpe tsun dan na matu nang hpe hpa gaw n-gun jaw lu ai kun?

16 Nang atsawm hkyen lajang da tim pyi, na a makam masham hpe tsun dan na matu hkrit tsang nga chye ai. Asak 13 ning hta hkalup hkam wa ai, ya asak 18 ning rai sai nauna langai ndai hku tsun ai: “Ngai hpa hpe kam ai lam chye tim, kalang lang nye a myit mang ai lam hpe ga si hku nna tsun dan na matu yak ai.” Dai majaw, teng man ai lam hpe myit tsang lam n nga ai sha manu ai hku atsawm lu tsun na matu shi shakut ai. Shi ndai hku tsun ai: “Nye a jawng manang ni gaw shanhte galaw wa ai lam ni hpe wanglu wanglang tsun dan ma ai. Ngai mung dai hku tsun ging ai ngu hkamsha ai. Dai majaw, ‘lai wa sai nhtoi ni hta kaga ni hpe ngai Chyum Laika sharin ya ai shaloi . . . ’ ngu ai zawn re ai lam ni hpe ngai tsun dan ai. Dai hpang ngai tsun mayu ai madung lam hpe matut nna tsun dan ai. Chyum Laika hte seng ai lam hpe kalang ta n tsun tim pyi, shanhte gaw Chyum Laika sharin ai shaloi ngai hpa galaw ai hpe chye mayu ma ai. Kalang lang, shanhte gaw dai hte seng nna ga san ni san ma ai. Ndai lam hpe akyu jashawn ai gaw, hkaw tsun na matu grau loi mat ai. Dai hpang, ngai grai myit pyaw ai ngu hkamsha ai.”

17. Kaga ni hpe ga shaga na matu nang hpe hpa gaw karum ya lu na kun?

 17 Kaga masha ni hpe nang teng sha hkungga nna lanu lahku ya ai lam shanhte hkamsha yang, nang hte na a makam masham hpe shanhte hkungga na matu grau loi wa na re. Asak grai kaji ai shaloi hkalup hkam wa nna, ya asak 17 ning rai sai nauna Olivia ndai hku tsun ai: “Ga shaga ai shaloi Chyum Laika lam hpe tsun yang, ngai hpe shajan shalai kam sham ai wa ngu nna mu na hpe hkrit ai.” Raitim, masa lam hpe kaga lam hku mu na matu shi shakut wa ai. Shi a hkrit tsang ai lam hpe sha myit na malai, shi ndai hku myit wa ai: “Ramma law law gaw Yehowa Sakse ni hte seng ai lam hpe n chye ma ai. Anhte gaw Sakse Hkam ni re ai lam shanhte chye hkra galaw ra ai. Dai majaw, anhte a hkawm sa tsun shaga ai lam gaw, shanhte gara hku bai htang wa na hpe dawdan lu ai. Anhte gaw makam masham lam tsun na matu yak taw na, htingnut taw na, kaya taw na kun? Shing nrai, anhte tsun ai shaloi hkrit tsang taw na kun? Anhte kadai ni re ai hpe anhte pyi arawng n la ai nga yang, shanhte anhte hpe yu kaji chye ai. Anhte hkum anhte kam ai myit yawm taw ai majaw, n hkungga ai hku bai htang wa ai lam pyi hkrum chye ai. Raitim, anhte a kam sham ai lam hpe kamhpa myit hte myit simsa let, ayan ga shaga ai zawn sha tsun na nga yang, shanhte mung anhte hpe hkungga wa na matu grau loi wa na re.”

Hkye Hkrang La Hkrum Lu Hkra Matut Shakut Nga U

18. Hkye hkrang la hkrum na matu nang hpa galaw ra ai kun?

18 Anhte hkaja wa sai hte maren, hkye hkrang la hkrum na matu shakut ai gaw, grai ahkyak ai lit langai re ai hpe chye lu ai. Dai zawn hkye hkrang la hkrum na matu, Chyum Laika hti nna sumru ra ai, Yehowa hpang akyu hpyi ra ai, nang hpe karum ya wa ai lam yawng hpe atsawm myit yu ra ai. Yehowa gaw na a jinghku re ai hpe grau nna kamhpa wa hkra, dai lam ni gaw nang hpe karum ya na re. Na a makam masham lam kaga ni hpe tsun dan mayu wa hkra mung, nang hpe karum ya na re.​—⁠Shakawn 73:28 hpe hti u.

19. Hkye hkrang la hkrum lu na lam shagu hpe galaw ai gaw hpa majaw ging dan ai kun?

19 Yesu ndai hku tsun wa ai: “Ngai hpang de sa wa mayu ai wa kadai rai ti mung, tinang a hkum hpe nyet kau lu na rai nna, shi a wudang hpai let, ngai kaw hkan nang ru ga.” (Mahte 16:24) Yesu hpang hkan nang lu na matu, Hkristan langai hpra gaw Yehowa hpang tinang hkum tinang ap nawng ra nna hkalup hkam ra ai. Raitim, dai gaw ya aten hta kaja ai prat lu na matu nnan hpang ai rai nna, dai gaw Karai Kasang a mungkan nnan hta, htani htana asak hkrung lu na matu lam madun mat wa na re. Dai majaw, hkye hkrang la hkrum na matu, nang galaw lu ai lam yawng hpe matut nna galaw u.

^ စာပိုဒ်၊ 11 Grau nna chye mayu yang, jw.org “Ramma Ni A Ga San​—⁠Hpa Majaw Akyu Hpyi Ra Ai Kun?” (BU) hte dai hte seng ai shaman laika hpe yu u.