Content de lai

Secondary menu hpe lai

Malawm Ni Hpe Lai U

Yehowa Sakse Ni

Kachin

Sin Lanchyi (Hkaja Laika)  |  December 2017

“Karai Kasang Hta Myit Mada Nga Nngai”

“Karai Kasang Hta Myit Mada Nga Nngai”

“Hpang chyahtum na Adam, chyawm gaw, jahkrung ya ai wenyi rai nga ai.” ​—⁠1 KORINHTU 15:45.

Mahkawn: 151, 147

1-3. (a) Anhte a madung makam masham hta hpa lam mung lawm ra ai kun? (b) Bai hkrung rawt ai lam gaw hpa majaw ahkyak a ta? (Ndai sumhpa shawng na sumla hpe yu u.)

NA A makam masham hta, madung sharin achyin ya ai lam ni gaw hpa rai? nga nna marai langai ngai san wa yang, nang gara hku htai na kun? Yehowa gaw, Hpan Madu rai nna anhte hpe asak jaw da ai ngu, kamsham ai lam hpe nang tsun dan na re. Gawng malai hkungga jaw wa ai Yesu Hkristu hpe kam ai lam mung, nang tsun dan na re. Karai a masha ni htani htana asak hkrung lu na mungkan Hparadisu a lam hpe mung, nang teng sha tsun dan na re. Raitim, nang grai kamsham ai makam masham lam langai re ai, hkrung rawt ai lam hte seng nna gaw tsun dan ai kun?

2 Anhte gaw ginding aga hta htani htana asak hkrung na matu, ru tsang kaba hpe asak hkrung let tawt lai na nga nna myit mada nga yang pyi, anhte a madung makam masham hta bai hkrung rawt wa ai lam lawm ra ai. Hkrung rawt ai lam gaw, hpa majaw grai ahkyak ai lam kasa Pawlu tsun wa ai. Shi ndai hku tsun ai: “Si mat ai ni a bai hkrung rawt wa ai lam n nga  yang gaw, Hkristu mung bai hkrung rawt wa na n rai.” Yesu bai n hkrung rawt wa yang, sumsing lamu hta Hkawhkam hku nna uphkang lu na n re ai sha n ga, anhte a hkaw tsun bungli mung kaman lila rai mat na. (1 Korinhtu 15:12-19 hpe hti u.) Yesu bai hkrung rawt wa ai hpe anhte chye ai. Hkrung rawt ai lam hpe n kam ai Saduke ni hte n bung ai sha, hkrung rawt ai lam hpe anhte kam ai. Kaga masha ni anhte hpe jahpoi asawng yang pyi, Karai Kasang gaw si mat ai ni hpe bai jahkrung ya lu ai hte seng ai makam masham matut nna ngang kang nga na re.​—⁠Marku 12:18; Kasa 4:2, 3; 17:32; 23:6-8.

3 “Hkristu a shawng npawt na ga kanu” hta “si ai kaw na bai hkrung rawt ai lam” lawm ai ngu Pawlu tsun wa ai. (Hebre 6:1, 2) Shi kamsham ai lam hta, hkrung rawt ai lam lawm ai hpe ahkyak shatai tsun dan wa ai. (Kasa 24:10, 15, 24, 25) Ndai lam gaw, Karai mungga a madung lam re ai shawng npawt na ga kanu raitim, hkrung rawt ai lam hte seng nna anhte atsawm naw hkaja ra ai. (Hebre 5:12) Hpa majaw ta?

4. Bai hkrung rawt ai hte seng nna gara ga san ni san chye ai kun?

4 Chyum Laika hpe masha ni shawng nnan hkaja ai shaloi, Lazaru a bai hkrung rawt ai lam zawn re ai, lai wa sai aten na hkrung rawt ai lam ni hpe hti ma ai. Abraham, Yoba hte Daniela gaw, si mat ai ni htawm hpang hta asak bai hkrung wa na lam kam ai hpe mung shanhte sharin la lu ma ai. Raitim, tsa ban shaning law law kaw nna, bai hkrung rawt wa na ngu tsun da ai lam ni hpe, hpa majaw kam mai ai lam, Chyum Laika kaw nna sakse madun rit? Htawm hpang na bai hkrung rawt ai lam gaw, galoi aten hta byin na ngu Chyum Laika hta tsun da ai kun? nga nna marai langai ngai san wa yang, nang gara hku htai na kun? Ndai ga san ni a mahtai gaw anhte a makam masham hpe ngang kang shangun na re.

Tsa Ban Shaning Law Law Kaw Nna Tsun Da Ai Bai Hkrung Rawt Wa Ai Lam

5. Anhte hpa hpe shawng bawng ban na kun?

5 Marai langai si mat nna, kade nna yang, bai hkrung wa ai hpe shingran yu na gaw, anhte a matu loi na re. (Yawhan 11:11; Kasa 20:9, 10) Raitim, marai langai ngai gaw shaning tsa hku, hkying hku na ai hpang she, bai hkrung rawt wa na nga yang, dai hpe kam mai na kun? Ndai laman si mat ai ni raitim, moi aten hta si mat ai ni raitim, bai hkrung rawt wa na hte seng nna anhte kam mai na kun? Tsaban law law kaw nna tau hkrau ga sadi jaw da ai hte maren, hpring tsup wa ai hkrung rawt ai lam langai hpe nang kam ngut chyalu re. Kade a hkrung rawt ai lam kun? Htawm hpang hta bai hkrung rawt wa na ngu ai na a myit mada lam hte dai lam gaw, gara hku matut mahkai ai kun?

6. Shakawn Kungdawn 118 dik wa ai lam hta Yesu gara hku lawm ai kun?

6 Dawi ka wa na re ai Shakawn Kungdawn 118 kaw nna, tsa ban law law tau hkrau tsun da ai bai hkrung rawt wa ai lam hpe bawng ban yu ga. Dai Shakawn Kungdawn hta ndai ga ni lawm ai: “Yehowa e, ya hkye hkrang la mi law,” “Yehowa a amying hte du sa ai wa gaw, a nga u ga.” Yesu si na nhtoi ni wa ai aten re ai Nisan 9 ya shani hta, Yerusalem de shi shang wa ai shaloi, masha ni gaw Meshia hte seng ai dai myihtoi ga hpe lakap nna tsun wa ai. (Shakawn 118:25, 26; Mahte 21:7-9) Shakawn Kungdawn 118 gaw aten grai na yang she, byin wa na hkrung rawt ai lam hte seng nna gara hku tsun da ai kun? Ndai Chyum daw hta kaga hpa lam naw tsun  da ai hpe sadi yu u: “Wahpang gaw ai ni nyet kau ai nlung gaw, Ningjut jahtum na nlung tai wa sai.”​—⁠Shakawn 118:22, NW.

“Wahpang gaw ai ni” Meshia hpe nyet kau (Laika pang 7 hpe yu u)

7. Yuda masha ni gaw Yesu hpe gara hku nyet kau ai kun?

7 “Wahpang gaw ai ni” re ai Yuda ningbaw ni gaw Meshia hpe nyet kau ai. Yesu hpe Hkristu hku nna hkap la na matu nyet kau ai hta n-ga, grau nna galaw wa ma ai. Yesu hpe sat kau na matu, Pilat hpe atik anang hpyi shawn ai hku nna Yesu hpe nyet kau ma ai. (Luka 23:18-23) Yesu si mat ai gaw shanhte a majaw mung re.

“Ningjut jahtum na nlung” tai wa na matu, Karai Kasang gaw Yesu hpe jahkrung ya (Laika pang 8, 9 hpe yu u)

8. Yesu gaw “ningjut jahtum na nlung” gara hku byin wa ai kun?

8 Yesu gaw nyet kau hkrum nna sat kau hkrum sai. Rai yang, “ningjut jahtum na nlung” gara hku tai wa na kun? Shi bai hkrung rawt yang she dai lam byin wa na re. Sun madu gaw sun galaw ya ai ni hpang de, mayam shangun dat ai hte seng ai ga shadawn hpe tsun dan ai shaloi, Yesu ndai lam hpe asan sha chye na hkra tsun dan wa ai. Sun galaw ai ni gaw mayam ni hpe zingri ai. Hpang jahtum hta, shi kasha hpe shangun yang gaw, shanhte madat na re ngu myit mada ai. Raitim, sun madu a kasha hpe sat kau ai. Ndai maumwi tsun dan ngut ai hpang, Yesu gaw Shakawn Kungdawn 118:22 hta lawm ai myihtoi ga hpe tsun dan wa ai. (Luka 20:9-17) Kasa Petru mung, Yuda “du agyi ni, salang ni hte laika ka ai sara ni, Yerusalem mare hta hpawng nga” ai shaloi, dai Chyum daw hpe sha jailang wa ai. Hpun shadaw hta “jen da sat kau nna, Karai Kasang chyasi ni kaw na jahkrung sharawt la ai, Nazaret wa Yesu Hkristu” a lam shi tsun dan wa ai. Matut nna ndai hku tsun ai: “nanhte nta gaw ai ni lata kau ai nlung rai nga ti mung, ningjut jahtum na nlung bai rai wa sai.”​—⁠Kasa 3:15; 4:5-11; 1 Petru 2:5-7.

9. Shakawn Kungdawn 118:22 hta hpa laklai ai mabyin, byin wa na ngu tau hkrau tsun da ai kun?

9 Shakawn Kungdawn 118:22 hta tsun da ai myihtoi ga gaw, tsa ban shaning law law na ai hpang gaja wa dik wa ai. Meshia gaw nyet kau hkrum nna sat kau hkrum na. Raitim, shi bai hkrung rawt wa nna ningjut jahtum na nlung tai wa na re. Bai hkrung rawt sai majaw, Yesu gaw, ‘anhte hkye hkrang la ai kaw du lu na matu, shinggyim masha ni hta jaw ya ai amying ningsang’ byin wa sai.​—⁠Kasa 4:12; Ehpesu 1:20.

10. (a) Shakawn Kungdawn 16:10 hta hpa hpe tau hkrau tsun da ai kun? (b) Dai Chyum daw gaw Dawi hpe tsun mayu ai n re hpe gara hku chye lu a ta?

10 Hkrung rawt ai lam hte seng nna, tsun da ai kaga daw kaji hpe mung myit yu ga. Shaning hkying mi jan na ai hpang dai ga gaw dik wa ai. Hkrung rawt na ngu ga sadi jaw da ai (sh) tau hkrau tsun da ai lam ni gaw aten grai na tim, byin wa lu ai lam, ndai  mabyin gaw anhte hpe kamhpa shangun ai. Shakawn Kungdawn 16 hta, Dawi ndai hku ka wa ai: “Nang nye a myit masin hpe katsan ga de kau da ya na ndai n rai. Na a chyoi pra ai wa hten byak hkrum na, nang hkraw nga ndai n rai.” (Shakawn 16:10) Dawi gaw shi galoi mung n si sai (sh) katsan ga de n du sai ngu tsun nga ai n re. Karai a Mungga hta Dawi gaw asak kaba nna si mat ai lam hpe ndai hku tsun da ai: “Kaji kawa ni hte rau yup pyaw nna, Dawi a mare hta e makoi mayang di kau mu ai.” (1 Hkawhkam 2:1, 10) Rai yang, Shakawn Kungdawn 16:10 gaw kadai hpe tsun mayu ai kun?

11. Petru gaw Shakawn Kungdawn 16:10 hpe galoi aten hta sang lang dan wa ai kun?

11 Shakawn Kungdawn 16:10 hpe Dawi ka wa nna shaning hkying mi jan na ai hpang, dai Chyum daw gaw kadai hpe tsun nga ai lam Petru sang lang dan wa ai. Yesu si nna bai hkrung rawt wa ai bat loi mi na ai hpang, hkying hku law ai Yuda masha ni hte hpung shang wa ai ni hpe Petru tsun dan wa ai. (Kasa 2:29-32 hpe hti u.) Dawi si mat nna, makoi mayang kau sai lam shanhte dum hkra shi tsun wa ai. Dawi gaw, Meshia “bai hkrung rawt wa na lam shi chye tau tawn ai” ngu Petru tsun ai shaloi, shanhte gaw myit n hkrum wa ai ngu Chyum Laika hta n tsun da ai.

12. Shakawn Kungdawn 16:10 gaw gara hku dik wa ai kun? Bai hkrung rawt na ngu ai ga sadi hpe kam hkra dai Chyum daw gaw gara hku karum ya ai kun?

12 Shakawn Kungdawn 110:1 hta lawm ai Dawi a ga ni hpe lakap nna, Petru gaw shi tsun mayu ai lam hpe ahkyak shatai tsun wa ai. (Kasa 2:33-36 hpe hti u.) Yesu gaw “Madu hte Hkristu” re ai hpe shawa hpawng kam wa hkra, Petru gaw Chyum daw ni hte atsawm sang lang dan wa ai. Shakawn Kungdawn 16:10 gaw, Yesu bai hkrung rawt ai shaloi, dik wa sai hpe shanhte ni chye na wa ai. Dai hpang kasa Pawlu mung, Pesidi mung na Antioki mare hta nga ai Yuda masha ni hpe hkaw tsun ai shaloi, dai lam hpe sha bai tsun wa ai. Dai lam hpe shanhte grai ra sharawng mat nna, grau nna madat mayu wa ma ai. (Kasa 13:32-37, 42 hpe hti u.) Tsa ban shaning law law lai mat yang pyi, bai hkrung rawt wa na ngu ai Chyum Laika myihtoi ga dik wa na hpe, ndai lam gaw anhte hpe mung kam shangun ai.

Hkrung Rawt Ai Lam Gaw Galoi Aten Hta Byin Wa Na Kun?

13. Bai hkrung rawt na hte seng nna gara ga san ni san chye ai kun?

13 Ga sadi jaw nna tsa ban shaning law law na ai hpang hkrung rawt wa na hpe chye lu ai gaw, n-gun lu hpa re. Nkau mi gaw ndai hku san chye ai: ‘Ngai tsawra ai wa hpe bai mu na matu grai na hkra la ra na ngu ai lachyum kun? Bai hkrung rawt ai lam gaw galoi aten hta byin wa na kun?’ Yesu gaw shi sape ni hpe shanhte n chye na ai lam ni nga na re ngu tsun wa ai. Dai gaw, Wa a “hpung dagu hte, hkang tawn ai aten hte ahkying ladaw” hte seng ai ahkri ahkrai lam ni re. (Kasa 1:6, 7; Yawhan 16:12) Raitim, galoi aten hta hkrung rawt na hte seng nna hpa mung n chye lu ai gaw n re.

14. Yesu bai hkrung rawt ai gaw kaga ni a bai hkrung rawt ai hte gara hku shai a ta?

14 Chyum Laika hta lawm ai hkrung rawt wa ai lam ni hta Yesu a hkrung rawt ai lam gaw, ahkyak htum re. Yesu bai n hkrung rawt wa yang, anhte tsawra ai si mat ai ni hpe bai mu lu na ngu ai, myit mada lam mung nga sana n re. Elia hte Elisha jahkrung ya ai masha ni gaw, htani htana asak n hkrung wa ai. Shanhte kalang bai si nna lup wa hta ga nhpu bai tai mat ai. Raitim, Yesu gaw “galoi mung bai n si lu na hte, si  hkrung si htan gaw galoi mung shi hpe n madu lu na” hku nna, “si mat ai ni kaw na hkrung sharawt la hkrum ai.” Shi gaw Sumsing lamu hta, “htani htana prat dingsa” nga nga na re.​—⁠Roma 6:8; Shingran 1:5, 18; Kolose 1:18; 1 Petru 3:18.

15. Hpa majaw Yesu hpe “shawng si ai asi” ngu shaga ai kun?

15 Sumsing lamu de wenyi hkum hkrang hku nna Yesu hkrung rawt wa ai lam gaw shawng nnan rai nna, hkrung rawt ai lam ni kaw nna ahkyak htum ai lam re. (Kasa 26:23) Raitim, shi langai sha sumsing lamu de bai hkrung rawt na n re. Sadi dung ai kasa ni gaw shi hte arau up hkang na re ngu, Yesu ga sadi jaw wa ai. (Luka 22:28-30) Raitim, ndai shagrau kumhpa hpe gaw, si mat ai hpang she shanhte lu la na re. Dai hpang, Yesu zawn shanhte mung wenyi hkum hkrang rai mat na re. Pawlu ndai hku ka wa ai: Hkristu gaw, “si mat ai ni kaw na bai hkrung rawt wa sai rai nna, yup pyaw mat ai ni hta shawng si ai asi tai wa sai.” Kaga ni mung hkrung rawt nna sumsing lamu de lung na ngu Pawlu ka wa ai: “Langai hte langai tinang ang ai hku hte maren rai wa na ra ai: Hkristu gaw shawng si ai asi rai nga ai; dai hpang, Hkristu bai du ai ladaw e shi hte seng ai ni hkrung wa na ma ra ai.”​—⁠1 Korinhtu 15:20, 23.

16. Sumsing lamu de bai hkrung rawt ai lam nga na hpe gara hku nna chye lu a ta?

16 Sumsing lamu de bai hkrung rawt ai lam ni byin na hpe, Pawlu a ga kaw nna chye lu ai. Dai gaw Hkristu bai du ai ladaw hta byin wa na re. Lai wa sai shaning law law kaw nna, Hkristu “bai du ai ladaw” gaw 1914 hta hpang ai ngu Yehowa Sakse ni gaw Chyum Laika hku nna sakse madun nga ai. Anhte ni gaw, dai “bai du ai ladaw” hta asak hkrung nga ai rai nna, n hkru ai lam ni htum mat na aten gaw grai ni taw sai.

17, 18. Hkristu bai du ai ladaw hta namman chya hkrum ai nkau mi hpa byin mat na kun?

17 Sumsing lamu de bai hkrung rawt na hte seng nna, Chyum Laika hta ndai hku sang lang da ai: “Yup pyaw nga ai ni a lam nanhte n chye ai nga na, anhte n ra ga ai. Kaning rai nme law, Yesu gaw si mat nna bai rawt wa ai hpe anhte kam nga ga yang gaw, . . . yup pyaw ai ni hpe mung, Karai Kasang gaw shi hte rau woi wa na maru ai. . . . Dai Madu bai du sa ai shaloi e, hkrung nga ai hte naw hti ngam nga ai ni anhte gaw, yup pyaw ai ni a numshawn de loi mi pyi shawng magang lu na ga ai n rai. Dai Madu nan jahtau garu ai hte, . . . sumsing lamu de na yu wa nna, Hkristu hta e si mat ai ni gaw shawng numshawn e rawt wa lu na ma ra ai; Dai hpang, dai Madu hpe Kaang ganghkau e hkrum na matu, hkrung nga ai hte naw hti ngam nga ai ni anhte gaw, shanhte hte rau sumwi ntsa de shalun la ai hkrum na ra ga ai rai nna, anhte gaw dai Madu hte rau tut nawng e a nga nga na ra ga ai.”​—⁠1 Htesaloni 4:13-17.

18 Shawng nnan na hkrung rawt ai lam hpang na aten gaw, Hkristu bai du ngut ai hpang, aten langai ngai hta re. Ru tsang kaba aten hta, asak hkrung ai namman chya hkrum ai ni gaw, “sumwi ntsa de shalun la hkrum na” re. (Mahte 24:31) Dai gaw hpa lachyum rai kun? “Shalun la hkrum” ai ni gaw, si ai kaw “yup pyaw mat na” n re. Tsun mayu ai gaw, na na si nga na n re. De a malai, shanhte si yang, ‘hpang chyahtum na pahtau ngoi wu ai shaloi e, akajawng sha, myi grip mi hta e, shanhte yawng hte gaw galai mat na’ re.​—⁠1 Korinhtu 15:51, 52.

19. Gara gaw “grau reng htum ai hkrung sharawt” ai lam rai na kun?

19 Dai ni na aten hta, sadi dung ai Hkristan law malawng gaw namman chya hkrum nna, Hkristu hte sumsing lamu hta up  hkang na matu lata hkrum ai ni n re. Shanhte gaw, n hkru ai ndai mungkan hpe jahtum kau ya na “Yehowa a nhtoi” hpe la nga ai. Jahtum galoi du na hpe kadai mung tup hkrak n chye lu tim, ni nga sai gaw sakse mu lu nga ai. (1 Htesaloni 5:1-3, NW) Mungkan nnan du wa ai shaloi, kaga hkrung rawt ai lam langai naw nga na re. Dai aten hta, masha ni gaw, mungkan ntsa asak hkrung na matu bai hkrung rawt wa na re. Shanhte gaw, hkum tsup ai ni byin wa na matu myit mada lam nga nna, galoi mung bai si sana n re. Dai gaw, moi aten hta bai hkrung rawt wa nna kade nna yang bai si mat ai hkrung rawt ai lam hte n bung ai sha, “grau reng htum ai hkrung sharawt” ai lam rai na re.​—⁠Hebre 11:35.

20. Hkrung rawt wa ai lam gaw kashuk kashak n rai na hpe anhte hpa majaw kam mai a ta?

20 Sumsing lamu de hkrung rawt ai ni hte seng nna Chyum Laika hta ndai hku tsun da ai: “Langai hte langai tinang ang ai hku hte maren rai wa na ra ai.” (1 Korinhtu 15:23) Dai majaw, mungkan ntsa hta hkrung rawt wa na ni hte seng nna mung, kashuk kashak n rai na hpe chye lu ai. Anhte ndai hku san chye na re: Kade nna shi ai aten hta si mat ai ni gaw, Hkristu Up Hkang Na Shaning Hkying Mi ladaw a shawng nnan aten hta hkrung rawt wa nna, shanhte hpe chye ai ni a hkap tau la ai lam hpe lu la na kun? Mungkan nnan hta Karai a masha ni hpe woi awn na matu, moi aten hta atsam marai rawng nna sadi dung ai ningbaw ni shawng rawt wa na kun? Yehowa hpe n nawku wa ai masha ni gaw gara hku rai na kun? Shanhte gaw galoi aten hte gara shara hta bai hkrung rawt wa na kun? San mayu ai ga san ni anhte hta grai law na re. Raitim, ya aten hta dai lam ni hte seng nna anhte n tsang ra ai. Hpa byin wa na hpe chye na matu, la nga ai gaw kaja htum re. Yehowa gara hku galaw ya na hpe mu na matu, anhte grai myit kahpra nga na gaw teng sha re.

21. Na a myit mada lam gaw hpa rai a ta?

21 Ya aten hta gaw, Yehowa hpe matut nna sadi dung na matu shakut ra ai. Shi a matsing nyan hta rawng ai si mat ai ni yawng gaw, bai hkrung rawt wa na ngu Yesu hku nna ga sadi jaw da ai. (Yawhan 5:28, 29; 11:23) Abraham, Isak hte Yaku “yawng mayawng hte gaw, shi [Yehowa] a man e hkrung nga ma ai” ngu Yesu tsun wa ai lam gaw, si mat ai ni hpe Yehowa bai jahkrung ya na lam kahtap nna sakse madun nga ai. (Luka 20:37, 38) “Bai hkrung rawt wa na lam nga ai, ngu nna Karai Kasang hta myit mada nngai” ngu kasa Pawlu tsun wa ai zawn, anhte hta mung tsun na lam ni grai law hkra nga ai.​—⁠Kasa 24:15.