Content de lai

Secondary menu hpe lai

Malawm Ni Hpe Lai U

Yehowa Sakse Ni

Kachin

Sin Lanchyi (Hkaja Laika)  |  August 2017

Laika Hti Ai Ni Hpang De Na Ga San

Laika Hti Ai Ni Hpang De Na Ga San

Yesu asak kaji ai aten na lam gaw, Mahte hte Luka labau hta hpa majaw shai nga a ta?

Yesu shangai ai lam hte asak naw kaji ai aten na aprat labau lam, Mahte hte Luka ka ai n-bung ai gaw, shanhte ahkyak shatai ka ai lam n bung ai majaw re.

Mahte gaw Yosep lawm ai mabyin ni hpe ahkyak shatai nna ka ai. Yosep gaw Mari na-um nasin rai sai lam chye ai shaloi, gara hku bai htang ai lam, yup mang hta lamu kasa langai masa lam ni hpe sang lang dan ai lam hte lamu kasa a lam matsun ni hpe hkan sa ai lam ni ka da ai. (Mahte 1:​19-25) Lamu kasa langai gaw yup mang hku nna Yosep hpe Egutu de hprawng na matu sadi jaw ai lam hte shi gara hku madat mara wa ai lam ni mung lawm ai. Bai nna, Yosep gaw yup mang langai bai mu nna lamu kasa gaw Israela mungdan de bai wa na matu tsun ai lam hte Yosep mung bai wa nna Nazaret mare hta nta masha ni hte arau shanu nga ai lam ni mung ka wa ai. (Mahte 2:​13, 14, 19-23) Mahte gaw shawng na daw kaba lahkawng hta pyi, Yosep a amying matsat lang ka wa tim, Mari a amying hpe gaw mali lang sha ka wa ai.

Raitim, Luka gaw Mari hpe ahkyak shatai nna ka ai. Mari hpang de lamu kasa sa kawan ai lam, Mari gaw Elisabet hpang sa chyai ai lam hte Yehowa hpe shakawn ai lam ni Luka ka wa ai. (Luka 1:​26-56) Htawm hpang e Yesu hkrum na tsin yam ni a lam Simun tsun ai hpe mung Luka ka wa ai. Madu Yesu asak 12 ning hta, nawku htingnu de nta masha yawng hte arau sa chyai ai lam ka wa ai. Dai mabyin hta Yosep n re ai sha Mari tsun ai ga hpe lakap da nna Mari gaw kraw hta matsing da ai lam hpe mung Luka ka da ai. (Luka 2:​19, 34, 35, 48, 51) Shawng na daw kaba lahkawng hta sha, Luka gaw Mari a amying hpe 12 lang ka wa nna, Yosep a amying hpe gaw 3 lang sha ka ai. Mahte gaw Yosep a myit mang ai lam hte shi galaw ai lam ni hpe grau tsun ai. Luka chyawm gaw Mari a myit mang ai lam hte mabyin ni hpe myit maju jung ai.

Yesu shangai wa ai amyu lukung jahpan mung Mahte hte Luka Laika hta shai nga ai. Mahte gaw Yosep a amyu lakung jahpan hpe madun nna, Yosep bau la ai kasha Yesu hpe Dawi a hkawhkam aya hpe tara shang ahkang lu ai wa hku nna madun da ai. Hpa majaw nga yang, Yosep gaw Hkawhkam Dawi a kasha Shawlumon kaw nna yu hkrat wa ai majaw re. (Mahte 1:​6, 16) Luka gaw Mari a amyu lakung hpe madun nna, Yesu gaw “masha labau hku gawn yang” ru sai hku nna Dawi a hkawhkam aya hpe lu la ai wa re ai lam madun da ai. (Roma 1:​4) Hpa majaw nga yang, Mari gaw Hkawhkam Dawi a kasha Nahtam kaw nna yu hkrat wa ai majaw re. (Luka 3:31) Raitim, Mari hpe Heli a kasha hku nna Luka hpa majaw n ka wa ai kun? Hpa majaw nga yang, tara shang jahpan hta, kun dinghku a la amying hpe sha ka shalawm ai htung nga ai majaw re. Dai majaw, Luka gaw Yosep hpe Heli a kasha hku nna ka da tim, Heli a kahkri re ai hpe masha ni chye na ma ai.​​—⁠​Luka 3:​23.

Mahte hte Luka ka wa ai amyu lakung jahpan hpe yu yang, Yesu gaw Karai Kasang ga sadi tawn da ai Meshia re ai hpe sakse madun nga ai. Yesu gaw Hkawhkam Dawi kaw nna yu hkrat wa ai hpe masha law law chye nna, Hparishe ni hte Saduke ni pyi dai lam hpe ningdang ai lam n nga ma ai. Mahte hte Luka ka wa ai Yesu a amyu lakung jahpan gaw anhte a makam masham hpe ngang kang shangun nna, Karai Kasang a ga sadi ni hpring tsup wa na hpe grau nna kam wa shangun ai.