Content de lai

Secondary menu hpe lai

Malawm Ni Hpe Lai U

Yehowa Sakse Ni

Kachin

Sin Lanchyi (Hkaja Laika)  |  July 2017

“Yehowa Hpe Shakawn Kungdawn Mu”​​—⁠Hpa Majaw Kun?

“Yehowa Hpe Shakawn Kungdawn Mu”​​—⁠Hpa Majaw Kun?

“Yehowa hpe shakawn kungdawn mu: . . . Dai gaw ngwi pyaw ai lam rai nga ai, Shakawn kungdawn ai lam sut nga ai.”​​—⁠​SHAKAWN 147:​1.

Mahkawn: 59, 3

1-3. (a) Shakawn Kungdawn 147 hpe galoi aten hta ka wa ai byin mai ai kun? (b) Shakawn Kungdawn 147 kaw nna hpa ni sharin la lu ai kun?

MARAI langai ngai galaw ai (sh) tsun shaga ai lam hpe anhte grai sharawng ai shaloi, anhte shi hpe chyahkring hkring shakawn ga ai. Karai Kasang hpe rai yang grau nna shakawn ging ai n re i? Hpan da ai lam ni kaw na shi a hpung atsam hpe mu ai shaloi, shi a Kasha hpe gawng malai jahpu jaw nna anhte hpe tsawra ai lam madun ai shaloi anhte shi hpe shakawn ga ai.

2 Shakawn Kungdawn 147 hpe hti ai shaloi, dai hpe ka da ai wa gaw, Yehowa hpe grai shakawn mayu ai myit nga ai hpe mu lu ai. Shi hte rau Karai Kasang hpe shakawn na matu mung, kaga ni hpe n-gun jaw da ai.​​—⁠​Shakawn 147:​1, 7, 12 hpe hti u.

3 Shakawn Kungdawn 147 hpe kadai ka ai gaw anhte n chye ai. Raitim, Israela masha ni hpe Babelon kaw na Yehowa shalawt dat ai hpang, Yerusalem mare de bai wa ai aten hta asak hkrung wa ai masha byin mai ai. (Shakawn 147:​2) Israela masha ni gaw, shanhte a lamu ga hta Karai Kasang hpe kalang bai nawku lu ai majaw, shakawn kungdawn sara gaw Yehowa hpe shakawn ai re.  Shakawn kungdawn sara gaw, dai hta grau shakawn mayu ai lam ni mung naw nga ai. Dai ni gaw hpa ni kun? Haleluya (sh) “Yehowa hpe shakawn kungdawn mu” nga nna shakawn ging ai gara lam ni nang hta nga ai kun?​​—⁠​Shakawn 147:​1.

Myit Maku Daw Ai Ni Hpe Yehowa Shamai Ya

4. Hkawhkam Kuru gaw Israela masha ni hpe shalawt dat ai shaloi shanhte gara hku hkamsha ai kun? Hpa majaw kun?

4 Babelon hta Israela ni bawng dung hkrum nga ai aten, shanhte gara hku hkamsha wa na hpe shingran yu ga. Babelon masha ni gaw shanhte hpe shaga nna mani hpa shatai let ndai hku tsun ai: “Ziun a mahkawn ga, anhte hpe mahkawn mangoi dan mi.” Yuda masha ni gaw, dai zawn mahkawn hpe n hkawn mayu ga ai. Shanhte a madung kabu hpa re ai Yerusalem gaw jahten hkrum mat sai. (Shakawn 137:​1-3, 6) Shanhte a myit masin gaw myit maku daw nga nna, shalan shabran ra nga ai. Raitim, Yehowa gaw tau hkrau tsun da ai hte maren, shi a amyu masha ni hpe karum ya wa ai. Gara hku nna kun? Hkawhkam Kuru gaw Babelon hpe awng dang wa nna, Yehowa hte seng nna ndai hku tsun wa ai: “Yuda mung na Yerusalem mare hta e, shi a matu nta langai mi galaw na, shi ngai hpe hkang da ni ai.” Kuru gaw, Israela masha ni hpe ndai hku tsun ai: “Ya shi hte seng ai amyu masha ni kadai hte mung, shi a Karai Kasang Yehowa shi hte rau nga nga nna, shi lung wa u ga.” (2 Hkawhkam Labau 36:23) Dai ga ni gaw, Babelon kaw nga ai Israela masha ni hpe shalan shabran ya lu na re.

5. Anhte hpe shamai ya lu ai Yehowa a atsam hte seng nna shakawn kungdawn sara gara hku tsun da ai kun?

5 Yehowa gaw Israela amyu ting hpe sha n-ga, Israela masha langai hpra hpe mung shalan shabran ya ai. Yehowa gaw dai ni du hkra dai zawn sha re. Dai hpe shakawn kungdawn sara ndai hku ka da ai: “Myit maku daw ai ni hpe shi shamai ya nna, Shanhte a nma hpe ahkang kayawp ya mu ai.” (Shakawn 147:​3) Anhte machyi makaw hkrum ai shaloi, myit daw hten ai shaloi, Yehowa lanu lahku ya na hpe kam mai ai. Yehowa gaw anhte hpe shalan shabran ya na matu, anhte hkamsha nga ai ni hpe shamai ya na matu jin jin rai nga ai. (Shakawn 34:18; Esaia 57:15) Shi gaw anhte ra nga ai hpaji hte n-gun atsam hpe jaw ya ai majaw, anhte hpa manghkang mi hkrum wa tim, awng dang lu na re.​​—⁠​Yaku 1:​5.

Yehowa gaw anhte hpe shalan shabran ya na matu, anhte hkamsha nga ai ni hpe shamai ya na matu jin jin rai nga ai

6. Shakawn Kungdawn 147:4 hta lawm ai ga ni kaw nna anhte gara hku akyu hkamsha lu na kun? (Ndai sumhpa shawng na sumla hpe yu u.)

6 Shakawn kungdawn sara gaw, lamu hpe mada yu nna ndai hku tsun ai. Yehowa gaw “shagan ni hpe nambat jaw nu ai rai nna, Langai hte langai hpe amying shamying ya mu ai.” (Shakawn 147:​4) Shakawn kungdawn sara gaw, shagan ni hpe mu lu tim, kade daram law ai hpe gaw shi n chye ai. Shagan majaw langai hta, shagan wan hkying hku law ai nga nna hpungtang hpaji du ni tsun ai. Ninggawn tawa hta, dai zawn shagan majaw ni wan hkying hku nga ai. Masha gaw shagan ni hpe n dang hti lu tim, Hpan Madu gaw hti lu ai. Dai sha n-ga, shagan langai hpra a lam atsawm chye nna shanhte hpe mung amying jaw da ai. (1 Korinhtu 15:41) Karai Kasang gaw shagan langai hpra hpe chye ai zawn, nang hpe mung chye ai. Nang gara kaw nga ai, gara hku hkamsha ai hte hpa ni ra kadawn ai hpe shi galoi mung tup hkrak chye nga ai.

7, 8. (a) Anhte hte seng nna Yehowa kade daram chye na ya ai kun? (b) Matsan dum ai myit hpe Yehowa madun ai ga shadawn langai hpe tsun dan u.

7 Yehowa gaw nang gara hku hkamsha nga ai hpe chye na ya nna, na a manghkang ni hpe karum ya na matu atsam nga ai. (Shakawn 147:5 hpe hti u.) Na a masa gaw grai yak nga nna, dai hpe nang n lu hparan ai ngu nang hkamsha yang hkamsha na re. Anhte gaw “ga nhpu” sha rai nga ai majaw, shadawn sharam sha re ai hpe Karai Kasang chye ai. (Shakawn 103:14) Anhte n hkum tsup ai majaw, mara nkau mi hpe bai kahtap htap galaw hkrup ma ai. Dai majaw myit daw chye ai. Tsun shaga shut ai, n kaja ai ni myit wa ai, manawn masham ai myit ni nga wa ai majaw anhte grai yawn na re. Yehowa gaw gawngkya ai lam kachyi mi mung n nga tim, anhte gara hku hkamsha ai hpe tsep kawp chye na ya ai.​​—⁠​Esaia 40:​28.

8 Yehowa gaw shi a lata hte nang hpe gara hku karum ya wa ai lam, nang hkrum ga na re. (Esaia 41:​10, 13) Ningshawng Kyoko mung, dai hku hkrum wa ai. Shi lit ang ai shara nnan de htawt ai shaloi, shi grai myit daw wa ai. Shi a manghkang ni hpe Yehowa chye na ya ai lam shi gara hku chye wa ai kun? Shi a nawku hpung nnan kaw na masha law law gaw, shi hkamsha ai lam ni hpe chye na ya ai. Yehowa ndai zawn tsun ai ngu shi hkamsha ai: “Nang hpe ngai grai tsawra ai. Ningshawng galaw ai majaw sha n re. Nang gaw nye a kasha rai nna, ngai hpe apnawng da ai majaw re. Nye a Sakse langai hku nna na a prat hpe ngwi pyaw shangun mayu ai.” Karai Kasang a chye na ya ai lam hpe nang gara hku hkamsha ga sai kun?

Anhte Ra Ai Hpe Yehowa Madi Shadaw Ya

9, 10. Yehowa gaw gara ahkyak ai lam hpe madi shadaw ya na kun? Ga shadawn jaw u.

9 Anhte yawng gaw lu na, sha na, bu hpun na hte nga shara ra kadawn ga ai. Sha na matu n nga na hpe nang myit tsang yang tsang na re. Raitim, anhte yawng a matu shahpa shapraw lu hkra mungkan ga hpe Yehowa hpan da ya ai. Anhte hpe sha n-ga, ‘jawp nga ai u hka hkalung ni hpe mung, shahpa jaw mu ai.’ (Shakawn 147:​8, 9 hpe hti u.) Yehowa gaw u hka ni hpe pyi jaw sha ai nga yang, anhte ra kadawn nga ai arai ni hpe shi madi shadaw ya na lam anhte kam mai ai.​​—⁠​Shakawn 37:​25.

10 Ahkyak htum re ai anhte a makam masham matut ngang kang na matu shi madi shadaw ya nna, “chye chyang ai nyan yawng hta grau lai ai Karai Kasang a ngwi pyaw” lam hpe mung jaw na re. (Hpilipi 4:​6, 7) Hpunau Mutsuo hte shi a madu jan gaw, shanhte hpe Yehowa karum ya ai lam mu wa ai. 2011 hta, Japan hta tsunami byin ai shaloi, shanhte a nta magaw hta lung nga ai majaw, si ai kaw nna gaw lawt wa ai. Dai shani shanhte lu malu mahkra ngu na daram sum mat ai. Htap lahkawng hta nga ai grai kasi ai gawk hta shana tup nsin kaw sha nga lai wa ai. Jahpawt hta, wenyi n-gun lu na matu, lama ma hpe hkan tam ma ai. 2006 Yehowa Sakse Ni a Shaning Ginchyum Laika Buk hpe sha tam mu ma ai. Mutsuo gaw laika buk hpe hpaw dat ai shaloi, “Si Ai Lam Law Dik Htum Tsunami” ngu ai gabaw hpe mu dat ai. 2004 hta, Sumatra zunlawng kaw byin wa ai nnang nawn a majaw, grai hten za mat ai tsunami a lam ka da ai. Mutsuo hte shi a madu jan gaw dai shara kaw nga ai hpunau nauna ni a mahkrum madup ni hpe hti nna hkrap ma ai. Shanhte tup hkrak ra nga ai n-gun jaw ga hpe Yehowa jaw ai ngu hkamsha dat ai. Yehowa gaw, kaga lam ni hte mung shanhte hpe yu lanu lahku ai. Japan mungdan a kaga shara ni kaw nga ai hpunau nauna ni gaw, shanhte a matu shahpa hte bu hpun palawng shagun ya ma ai. Karai Kasang a uhpung kaw na sa dat ai hpunau ni sa kawan katsan ai majaw mung, makam masham grau ngang kang wa ai. Mutsuo ndai hku tsun ai: “Yehowa gaw anhte langai hpra a makau hta  nga nga nna, anhte hpe yu lanu lahku ya nga ai ngu hkamsha ai. Grai myit shalan lu ai.” Karai Kasang gaw anhte a makam masham matut ngang kang hkra shawng galaw ya nna, kaga ra ai arai ni hpe madi shadaw ya ai.

Karai Kasang A Karum Shingtau Ai Lam

11. Karai Kasang a karum shingtau lam kaw nna akyu lu na matu anhte hpa galaw ra ai kun?

11 Yehowa gaw “matsan mayan ni hpe sharawt” ya ai. Shi anhte hpe tsawra nna galoi mung karum na matu jin jin rai nga ai. (Shakawn 147:6a) Shi a karum shingtau ai lam kaw nna anhte gara hku akyu lu la mai na kun? Anhte gaw shi hte ngang kang ai hku hkau lam nga ra ai. Dai hku nga na matu anhte hta shagrit shanem ai myit nga ra ai. (Zehpani 2:​3, NW) Shagrit shanem ai wa gaw, n tara ai lam ni hpe sharai na matu, yakhkak jamjau ai lam ni htum mat na matu Yehowa hpe sha kamhpa ai. Dai zawn galaw ai ni hpe Yehowa ra sharawng ai.

12, 13. (a) Karai Kasang a karum shingtau ai kaw nna akyu lu na matu anhte hpa ni hpe koi ra na kun? (b) Kadai ni hpe Yehowa ra sharawng ai kun?

 12 Karai Kasang gaw “tara n lang ai ni hpe ga de jahkrat kau mu ai.” (Shakawn 147:6b) Anhte dai zawn n hkrum mayu ai. Karai Kasang a sadi dung ai tsawra myit madun ai hpe sha anhte ra ga ai. Dai majaw, shi n ju n dawng ai hpe anhte n ju n dawng ra ai. (Shakawn 97:10) Ga shadawn, hpye ai amu galaw ai hpe anhte n ju n dawng ra ai. De a lachyum gaw, dai hku byin na matu lam woi ya ai nse nsa sumla hte hpawn yawng hpe koi gam ra ai. (Shakawn 119:37; Mahte 5:28) Dai hpe gasat na matu n loi na re. Raitim, galaw yang shaman chyeju lu na re ai majaw, shakut na matu ging dan ai.

13 Dai hpe tinang a atsam hte n lu gasat ai. Yehowa hpe anhte kamhpa ra ai. Anhte gaw masha ni kamhpa chye ai lam ni hpe kamhpa na nga yang, shi ra sharawng na kun? Ra sharawng na n re. Yehowa gaw, ‘n-gun ja ai gumra ni hpe n ra sharawng’ ai. Anhte a atsam hte kaga masha ni hpe kamhpa ging ai kun? Yehowa gaw, “share shagan ai hpyenla ni hpe shi yu kabu nga ai” n rai. (Shakawn 147:​10, JCLB) Dai hku galaw na malai, anhte a gawngkya ai lam kaw na hkye la na matu, Yehowa hpe matut nna karum hpyi ra ai. Dai zawn hpyi shawn ai ga ni madat na matu, shi galoi mung jin jin rai nga ai. “Yehowa gaw shi hpe hkrit kamyin ai ni hte, Shi a chyeju hpe myit mada ai ni hta, awng nga ai.” (Shakawn 147:11) Shi gaw sadi dung nna anhte hpe tsawra ai majaw, anhte a n kaja ai myit jasat ni hpe awng dang lu hkra karum ya na hpe kam mai ai.

14. Shakawn kungdawn sara hpa hpe kam ai kun?

14 Anhte hta manghkang ni nga wa yang, Yehowa karum ya na hpe kam mai ai. Israela ni Yerusalem de bai wa ai shaloi, Yehowa shanhte hpe gara hku karum ya wa ai lam shakawn kungdawn sara bai myit yu ai. Shi ndai hku tsun ai: “Na a mare chyinghka htinggrang ni hpe shi shangang da nna, Na a htingwang na nshu nsha ni hpe shaman ya nit dai. Na a lamu ga jarit hpe shi shangwi ya” ai. (Shakawn 147:​13, 14) Mare chyinghka ni hpe ngang hkra galaw ya ai majaw shakawn kungdawn sara gaw, shim lum ai ngu hkamsha ai. Dai gaw shi a masha ni hpe Yehowa makawp maga ya ai lam shakawn kungdawn sara hpe kam shangun ai.

Anhte ni manghkang hkrum nna grai myit ru myit tsang ai shaloi Karai a Mungga gaw gara hku karum ya ai kun? (Laika pang 15-17 hpe yu u)

15-17. (a) Anhte a manghkang ni hte seng nna gara hku hkamsha chye ai kun? Raitim, Yehowa gaw Chyum Laika hku nna gara hku karum ya ai kun? (b) Karai a mungga gaw anhte hpe gara hku “alawan gat pru” nna karum ya ai lam ga shadawn jaw u.

 15 Na a manghkang ni a majaw, nang myit tsang nga na re. Raitim, dai ni hpe hparan lu na matu, Yehowa nang hpe hpaji byeng-ya jaw na re. Shakawn kungdawn sara ndai hku tsun ai: Karai Kasang gaw “ga de shi a ga matsun hpe dat dat nna, Shi a mungga alawan gat pru nga ai.” Bai shi gaw hkyen hte sin ni a lam tsun nna ndai hku tsun ai: “Shi a kashung ai hpe kadai sharang lu na rai nga a ta?” “Shi a mungga hpe shi dat dat nna, dai ni hpe shabyawng dat nu ai.” (Shakawn 147:​15-18) Anhte a Karai Kasang gaw yawng hpe chye na nna, yawng hpe galaw lu ai. Hkyen hte sin hpe hkang lu ai zawn, nang hkrum nga ai gara manghkang hpe mung awng dang hkra shi karum ya lu ai.

Na a prat hta Yehowa alawan lam matsun ya ai hpe hkrum ga ai kun?

16 Dai ni aten hta Yehowa gaw, Chyum Laika hku nna anhte hpe lam matsun ya nga ai. Shakawn kungdawn sara tsun ai zawn, shi a ga gaw anhte hpe karum na matu, “alawan gat pru” nga ai. Ra ang ai aten hta htap htuk ai hku Karai Kasang lam matsun ya ai. Chyum Laika, sadi dung ai mayam lajang ya ai laili laika ni, JW TV lamang, jw.org, myitsu salang ni hte hpunau nauna ni hku nna anhte kade daram akyu hkamsha wa ai lam ni hpe myit yu u. (Mahte 24:45) Na a prat hta Yehowa alawan lam matsun ya ai hpe hkrum ga ai kun?

17 Nauna Simoni gaw Karai Kasang a mungga shi hpe karum ya wa ai lam hkrum ga ai. Shi gaw manu n dan nna, Yehowa shi hpe n ra sharawng ai ngu hkamsha ai. Raitim, shi myit daw ai shaloi, shi hpe karum na matu Yehowa hpang matut nna akyu hpyi ai. Chyum Laika mung matut nna hkaja ai. Shi ndai hku tsun ai: “Yehowa n-gun n jaw ai, lam matsun n jaw ai aten galoi mung n nga wa ai.” Dai majaw, shi gaw kaja ai hku mu mada chye ai myit nga wa ai.

18. Yehowa nang hte ani sha nga yang gara hku hkamsha ai kun? “Yehowa hpe shakawn kungdawn mu” ngu tsun ging ai gara lam ni nga ai kun?

18 Yehowa gaw mungkan ting hta nga ai amyu sha ni kaw nna, moi na Israela masha ni hpe shi a amyu sha hku nna lata da ai hpe shakawn kungdawn sara chye ai. Dai amyu langai sha, Karai Kasang a “mungga” hte “ga matsun” ni lu la wa ai. (Shakawn 147:​19, 20 hpe hti u.) Dai ni aten hta mung, Karai Kasang a amying hpe anhte hkam la lu ai majaw grai arawng la ga ai. Shi a mungga hku nna anhte hpe lam matsun ya ai, shi hpe chye lu ai, hku hkau lu ai majaw anhte grai chyeju dum ga ai. Shakawn kungdawn 147 hpe ka ai sara zawn nang hta mung, “Yehowa hpe shakawn kungdawn” ging ai lam ni law law nga nna kaga ni hpe mung dai zawn galaw na matu n-gun jaw mayu na re.