Content de lai

Secondary menu hpe lai

Malawm Ni Hpe Lai U

Yehowa Sakse Ni

Kachin

Sin Lanchyi (Hkaja Laika)  |  July 2017

Laika Hti Ai Ni Hpang De Na Ga San

Laika Hti Ai Ni Hpang De Na Ga San

Hkristan langai gaw tinang hkum tinang makawp maga na matu sanat ni hpe zing da mai na kun?

Hkristan ni gaw tinang hkum tinang makawp maga ai hta Chyum Laika npawt tara ni hpe hkan sa ga ai. Dai tara ni hta, Hkristan ni gaw kaga masha ni sa gasat ai lam kaw nna, tinang hkum tinang makawp maga na matu sanat lang ai gaw shut ai hpe madun da ai. Lawu kaw na lam ni hpe myit yu ga:

Masha a asak gaw Yehowa a matu manu dan ai. Dawi ndai hku ka wa ai: “Nang hte rau asak hka hpawk rai nga ai.” (Shakawn 36:​9) Dai majaw, Hkristan langai gaw shi hkum shi (sh) shi a sutgan hpe makawp maga ai shaloi, kaga masha ni hpe sat hkrup nna sai hka kap ai baw n byin hkra koi ra ai.​​—⁠​Tara Jahprang 22:8; Shakawn 51:14.

Tinang hkum hpe makawp maga na matu gara arai hpe lang ai raitim, de a majaw sai hka kap ai baw byin chye ai. Raitim, sanat gaw n myit mada ai sha rai rai, dingsang rai rai masha a asak hpe sat na matu grau loi ai. * (Lawu matsing hpe yu u.) Sa gasat ai wa mung hkrit tsang ai myit loi mi nga na re ai majaw, lama na anhte a sanat hpe shi mu dat yang, masa gaw grau sawng wa nna langai ngai sat hkrum chye ai.

Yesu gaw shi n si shi ai shana hta shi a sape ni hpe nhtu la sa na matu tsun ai. Dai gaw shanhte hkum shanhte makawp maga na matu n re. (Luka 22:​36, 38) Yesu gaw shanhte hpe sharin ya mayu ai majaw re. Shi a sape ni gaw laknak lang da ai shawa hpawng hte hkrum tim, laja lana bai matai n htang na matu sharin ya mayu ai majaw re. (Luka 22:52) Petru gaw nhtu lang nna hkinjawng agyi a mayam hpe gasat ngut ai hpang, Yesu gaw Petru hpe ndai hku tsun ai: “Na a nhtu hpe de a shara e bang da u.” Dai hpang dai ni aten na Hkristan ni mung hkan sa ra ai npawt tara hpe lam matsun ya ai: “Nhtu hpe shaw ai ni yawng mayawng hte gaw, nhtu hte hten bya hkrum na mara ai.”​​—⁠​Mahte 26:​51, 52.

“Shanhte gaw tinang a nhtu ni hpe, na jawn, tinang a ri ni hpe, nhkyau, dup kau na ma ra ai” ngu Mihka 4:3 hta Karai a amyu sha ni a lam tau hkrau tsun da ai. Teng man ai Hkristan ni gaw simsa ai ni re nga nna masha ni chye da ma ai. Shanhte gaw kasa Pawlu hku nna Karai Kasang lam matsun ya ai “n kaja ai a majaw, n kaja ai hku kadai hpe mung hkum tai mu,” “masha nlang hte hte myit hkrum nna hkau chyap nga mu” ngu ai ga hpe hkan sa ma ai. (Roma 12:​17, 18) Pawlu gaw “damya hkrum ai tsin-yam” zawn grai yak ai masa ni hkrum wa ai shaloi dai tara hpe hkan sa ai. Tinang hkum tinang makawp maga na matu Chyum Laika tara hpe n tawt lai ai. (2 Korinhtu 11:26) Karai Kasang hpe sha kam hpa ai. Chyum Laika lam matsun ni gaw ‘ri nhtu hta grau kaja nga ai’ hpe shi chye ai.​​—⁠​Hpaji 9:​18.

Hkristan ni a matu asak gaw sutgan ni hta grau manu dan ai. ‘Sutgan law htam wa ai hta, masha asak n rawng ai’ hpe anhte chye ai. (Luka 12:15) Sanat lang da ai damya langai hpe si mani ai hku ga shaga tim, shi n hkraw yang, “n hkru ai wa hpe hpa mung hkum tai mu” ngu ai Yesu tsun ai hpaji ga hpe hkan sa ging ai. De a lachyum gaw shi ra ai hpe la shangun ai re. (Mahte 5:​39, 40; Luka 6:29) * (Lawu matsing hpe yu u.) Masha ni sa gasat mayu ai masha n byin hkra  koi ging ai lam ni hpe koi ai gaw kaja htum re. “Arung arai ni a lam shakawng” ai hpe koi u ngu ai Chyum Laika lam matsun hpe hkan sa yang, shoi hpa byin na lam yawm chye ai. (1 Yawhan 2:​16, NW) Anhte hpe simsa ai Yehowa Sakse Ni hku nna nta htingbu ni chye da yang, dai mung makawp maga lam re.​​—⁠​Ga Shagawp 18:​10.

Hkristan ni gaw kaga ni a myit nsam hpe hkungga ai. (Roma 14:21) Kaga masha ni a hpyen kaw nna tinang hkum tinang makawp maga na matu hpunau langai sanat nga ai hpe kaga hpunau nauna ni chye mat ai shaloi kajawng ma ai, ahtu kataw pyi byin ma ai. Sanat lang na matu anhte hta tara shang ahkang nga yang pyi, hpunau nauna ni hpe tsawra ai majaw, shanhte hpe ahtu kataw n byin shangun mayu ai.​​—⁠​1 Korinhtu 10:​32, 33; 13:​4, 5.

Hkristan ni gaw masha ni hpe kasi ningli kaja madun mayu ai. (2 Korinhtu 4:2; 1 Petru 5:​2, 3) Lama na, Hkristan langai gaw kaga masha ni a hpyen kaw nna makawp maga na matu sanat nga ai nga yang, myitsu salang ni gaw shi hpe Chyum Laika hku nna sharin shaga na re. Sanat hpe matut lang na matu dawdan yang, shi gaw kasi kaja ai wa n re. Dai majaw, shi gaw hpung hta hpa lit mung lu na n re. Sanat lang ra ai kanbau bungli ni hpe galaw ai shaloi mung dai zawn sha re. Dai hku rai yang, kaga bungli hpe tam ai gaw kaja htum re. *​​—⁠​Lawu matsing hpe yu u.

Hkristan langai gaw shi a dinghku, shi a sutgan hte shi hkum nan hpe gara hku makawp maga na lam, gara kaw bungli galaw na lam shi nan daw dan ra ai. Raitim, dai dawdan lam gaw Chyum Laika npawt tara hta madung tawn ging ai. Hpaji rawng ai Karai Kasang gaw anhte hpe tsawra ai majaw dai tara ni hpe jaw da ai. Yehowa hte hku hkau ai lam kaja ai Hkristan langai gaw kaga masha a hpyen kaw nna tinang hkum tinang makawp maga na matu sanat hpe zing da na n re. Karai Kasang hpe kam hpa nna shi a tara ni hpe hkan sa yang, htani htana shim lum ai prat hpe lu la na re.​​—⁠​Shakawn 97:10; Ga Shagawp  1:33; 2:​6, 7.

Ru tsang kaba hta Hkristan ni gaw tinang hkum tinang makawp maga na matu shakut na malai Yehowa hpe sha kamhpa na

^ စာပိုဒ်၊ 3 Hkristan langai gaw jaugawng hku nna dusat ni hpe gasat na matu (sh) matse labye dusat ni a hpyen kaw nna tinang hkum tinang makawp maga na matu, sanat lang yang lang na re. Sanat hpe n lang ai aten hta, shi gaw sanat pala hpe shaw da ging ai. Sanat hpe hkraw nna shim lum ai shara hta zaw hkat zing da ging ai. Sanat lang ai gaw tara nshang ai (sh) sanat lang ai hte seng nna tara masat da ai shara hta nga ai nga yang, Hkristan ni gaw tara upadi hpe hkan sa ra ai.​​—⁠​Roma 13:​1.

^ စာပိုဒ်၊ 6 Hkum shan roi rip hkrum yang, gara hku makawp maga na hte seng nna Dum Hprang! (BU) March 8, 1993 “Hkum Shan Roi Rip Ai Hpe Gara Hku Makawp Maga Na” hpe hti u.

^ စာပိုဒ်၊ 2 Sanat lang ra ai bungli hte seng ai lam hpe grau chye mayu yang, Sin Langchyi (BU) November 1, 2005, laika man 31 hte Sin Langchyi (E) July 15, 1983, laika man 25-26 hta yu u.