Content de lai

Secondary menu hpe lai

Malawm Ni Hpe Lai U

Yehowa Sakse Ni

Kachin

Na A Dinghku Ngwi Pyaw Lu

 Daw 1

Dinghku Ngwi Pyaw Na Matu Karai Hpe Kam Hpa U

Dinghku Ngwi Pyaw Na Matu Karai Hpe Kam Hpa U

“Shawng nnan e hpan da ai wa gaw, lasha yan numsha hpe hpan da mu ai.”​—⁠Mahte 19:4

Yehowa * Karai Kasang gaw, dinghku hpe nnan de ya ai madu re. Numsha hpe hpan ngut jang, “masha wa kaw woi wa ya” ai ngu, Chyum Laika hta tsun da ai. Dai shaloi, Adam gaw, grai kabu nna “nye a nra hta na nra, nye a ashan hta na ashan rai nga ai” ngu tsun ai. (Ningpawt 2:22, 23) Yehowa gaw dinghku num, dinghku la ni hpe ngwi pyaw shangun mayu ai.

Dinghku de ai shaloi, yawng hkum tsup sai ngu nang sawn la na re. Tatut hta gaw, jet ai tsawra myit hte dinghku de ai ni pyi, manghkang ni hkrum nga ai. (1 Korinhtu 7:28) Ndai laika buk hta, dinghku ngwi pyaw shangun ai Chyum ga matsun ni hpe, mu lu na. Dai hpe hkan sa yang, na a dinghku hte nta masha ni ngwi pyaw lu na re.​—⁠Shakawn 19:8-11.

 1 YEHOWA JAW DA AI NA A LIT HPE HKAP LA U

CHYUM LAIKA TSUN AI LAM: Dinghku madu gaw la re ai.​—⁠Ehpesu 5:23.

Nang madu wa rai yang, madu jan hpe matsan dum ai hte lanu lahku na matu, Yehowa hpyi shawn da ai. (1 Petru 3:7) Shi hpe na a ningrum ningtau hku, Yehowa jaw da ai. Dai majaw, shi hpe shagrau nna, tsawra na matu, Karai ra sharawng ai. (Ningpawt 2:18) Tinang a akyu hta na, shi a akyu hpe ningshawng tawn nna, shi hpe grai tsawra ra ai.​—⁠Ehpesu 5:25-29.

Nang madu jan rai yang, madu wa hpe grai hkungga nna, shi a lit ni hpe gun hpai lu hkra karum ya na matu, Yehowa hpyi shawn da ai. (1 Korinhtu 11:3; Ehpesu 5:33) Dai majaw, madu wa daw dan ai hpe, myit hkrum let rau jawm galaw ra ai. (Kolose 3:18) Dai hku galaw yang, madu wa hte Yehowa a man hta, manu dan ai num byin wa na re.​—⁠1 Petru 3:1-6.

NANG GALAW MAI AI LAM:

  • Kaja ai madu jan, madu wa gara hku byin na ngu ai lam, tinang a ningrum ningtau hpe san yu u. Shi tsun ai hpe atsawm madat nna, dai hte maren shakut nna galaw u

  • Myit galu u. Nan lahkawng aten la nna, tinang a ningrum ningtau pyaw na matu, gara hku galaw ra na hpe chye hkra shakut u

2 NINGRUM NINGTAU A MYIT HPE TAU YA U

CHYUM LAIKA TSUN AI LAM: Nang, ningrum ningtau a lam ni hpe ahkyak shatai ya ra ai. (Hpilipi 2:3, 4) Tinang a ningrum ningtau hpe, manu shadan u. Yawng a man, sumnung ai wa byin ra ai ngu, Yehowa hpyi shawn da ai hpe dum u. (2 Timohti 2:24) “Nhtu hte galun ai zawn, . . . tsun ai wa mung nga ai; Hpaji rawng ai wa a shinglet chyawm gaw, ana pyi shamai ya lu ai.” Dai majaw, atsawm myit yu nna tsun u. (Ga Shagawp 12:18) Tsawra myit hte tsun shaga chye na matu, Yehowa a chyoi pra ai n-gun atsam gaw, nang hpe karum ya na re.​—⁠Galati 5:22, 23; Kolose 4:6.

NANG GALAW MAI AI LAM:

  • Ningrum ningtau hte ahkyak ai lam ni n jahta shi yang, myit simsa na hte myit galu na matu, akyu hpyi u

  • Hpa tsun na hte, gara hku tsun na hpe atsawm myit da u

 3 RAU JAWM GALAW NA MATU MYIT U

CHYUM LAIKA TSUN AI LAM: Nang dinghku shang ai hte, nan gaw “hkum shan langai sha” rai mat sai. (Mahte 19:5) Raitim, nan a mu mada lam gaw bung na n re. Dai majaw, nan sumru ai lam, hkam sha ai lam ni bung na matu, shakut ra ai. (Hpilipi 2:2) Nan lahkawng, kahkyin gumdin nga yang she, rau daw dan lu na. Bawng ban yang she, sumru ai ni awng dang na ngu, Chyum Laika hta tsun da ai. (Ga Shagawp 20:18) Chyum ga matsun ni hpe hkan nna, ahkyak ai lam ni hpe rau sha daw dan lu u ga.​—⁠Ga Shagawp 8:32, 33.

NANG GALAW MAI AI LAM:

  • Ningrum ningtau hpe, manghkang ni, sumru ai ni hpe sha hkum tsun. Tinang hkam sha ai lam hpe mung tsun dan u

  • Ningrum ningtau hte jahkrup nna daw dan u

^ စာပိုဒ်၊ 4 Karai Kasang a mying gaw, Yehowa re ai lam Chyum Laika hta tsun da ai.