Rebeka gaw Yehowa hpe tsawra ai numsha re ai. Shi a madu wa na mying gaw Isak re. Shi mung Yehowa hpe tsawra ai. Rebeka hte Isak gara hku hkrum ai kun? Yehowa myit pyaw hkra Rebeka gara hku galaw ai rai? Rebeka a madu wa Isak a lam hpe shawng hti yu ga.

Isak a kanu yan kawa gaw Abraham hte Sara re. Shanhte gaw Hkanan mung hta nga ai. Dai Hkanan mung hta nga ai masha ni gaw, Yehowa hpe n nawku ma ai. Abraham gaw Yehowa hpe nawku ai numsha hte sha, shi a kasha hpe hkungran shangun mayu ai. Dai majaw Isak na matu, num tam na matu shi a jinghku ni nga ai Haran mung de, mayam langai hpe dat dat ai. Dai mayam gaw Eliaza rai na re.

Gawla-u ni lu na matu, hka ja ai amu gaw ba ai raitim, Rebeka apyaw sha galaw ya

Eliaza gaw kaga mayam ni hte rau, grai tsan ai shara de sa mat ai. Shanhte gaw lusha ni, kumhpa ni hpe, gawla-u 10 a ntsa mara nna la sa wa ai. Eliaza gaw Isak a matu num gara hku tam ya na ta? Shanhte gaw Haran mung de du ai shaloi, hka htung langai a makau hta, hkring sa ma ai. Hpa majaw i? Kade n na yang, numsha ni hka sa ja na hpe, Eliaza chye ai majaw re. Isak hte hkungran na numsha hpe chye na matu Eliaza ndai hku akyu hpyi ai: ‘Numsha langai hpe, hka hpyi lu ai shaloi, nye a matu hte gawla-u ni a matu hka ja ya ai numsha gaw, Karai Kasang nang lata ya ai wa re, nga nna ngai hkamla na.’

 Dai shaloi Rebeka gaw hka htung de sa wa ai. Shi gaw grai tsawm ai nga nna, Chyum Laika hta tsun da ai. Eliaza gaw, lu na hka jaw rit ngu hpyi ai shaloi, Rebeka gaw: ‘She mai law, lu ga le, gawla-u ni lu na matu mung ja ya na yaw’ nga nna tsun ai. Ndai lam hpe myit yu u. Gawla-u ni gaw, hka grai lu ma ai. Dai majaw Rebeka gaw, grai ba na re. Ndai sumla hta Rebeka kade daram bungli shakut ai hpe mu ai i?— Akyu hpyi ai hte maren, Yehowa mahtai jaw ya ai majaw, Eliaza grai mau mat ai.

Eliaza gaw Rebeka hpe kumhpa ni grai law hkra jaw ai. Rebeka gaw Eliaza hte kaga mayam ni hpe, nta de hkan wa na matu shaga ai. Nta de du ai shaloi Eliaza gaw, Abraham shi hpe dat dat ai lam, Yehowa gaw shi a akyu hpyi ga hpe, gara hku mahtai jaw ai lam hpe, tsun dan ai. Rebeka hpe Isak hte hkungran na matu, shi nta masha ni myit hkrum ma ai.

Rebeka gaw Eliaza hte Hkanan mung de hkan nang nna Isak hte hkungran

Rebeka gaw Isak hte hkungran mayu na ngu shadu ai i?— Eliaza hpe Yehowa dat dat ai lam Rebeka chye ai. Dai majaw Hkanan mung de hkan nna, Isak hte hkungran mayu ai i? ngu nta masha ni san ai shaloi, shi gaw ‘ngai hkan na’ ngu tsun ai. Shi gaw Eliaza hte kalang ta hkan nang mat ai. Hkanan mung de du ai shaloi, Isak hte hkungran ai.

Rebeka gaw, Yehowa byin shangun mayu ai hku galaw ai. Dai majaw shaman chyeju hkamsha lu ai. Shaning law law na ai hpang, shi a amyu kaw na, Yesu shangai wa ai. Ma ni mung Rebeka zawn Yehowa myit pyaw hkra galaw yang, shaman chyeju hkamsha lu na.

Chyum Laika Hta Hti Yu U

  • Ningpawt Ninghpang 12:4, 5; 24:1-58, 67