Content de lai

Secondary menu hpe lai

Malawm Ni Hpe Lai U

Yehowa Sakse Ni

Kachin

Ma Ni Hpe Sharin Achyin Ya U

 DAW 5

Teng Man Ai Hpe Sha Galaw Ai Samuela

Teng Man Ai Hpe Sha Galaw Ai Samuela

Samuela gaw kaji ai aten kaw na, Karai Kasang a sum hta bungli galaw ai. Dai sum gaw Karai Kasang hpe masha ni nawku ai nta re. Samuela gaw Karai Kasang a sum hta gara hku du wa ai kun? Samuela a kanu Hana a lam hpe shawng hti yu ga.

Hana gaw ma grai lu mayu ai, raitim, ma n lu ai. Dai majaw, shi gaw Yehowa hpe karum hpyi ai. Ma la sha langai lu wa yang, Karai Kasang a sum hta, bungli galaw shangun na nga nna ga sadi jaw ai. Yehowa shi a akyu hpyi ga hpe madat ya ai majaw ma la sha langai lu wa ai. Dai ma hpe Samuela nga nna shamying ya ai. Hana gaw, shi a ga sadi hte maren, Samuela asak masum, mali ning rai wa yang, Karai Kasang a sum hta amu gun na matu sa sa ai.

Dai aten hta Eli gaw hkinjawng agyi wa re. Hkinjawng agyi ngu ai gaw, Karai Kasang a sum e amu gun ai masha ni hta kaba htum re. Shi kasha lahkawng mung kawa hte rau bungli galaw ma ai. Karai Kasang a sum gaw, Karai Kasang hpe nawku ai shara re ai majaw dai kaw nga ai ni gaw kaja ai amu sha galaw ra ai. Raitim, shi kasha ni gaw nkaja ai amu galaw ma ai. Samuela gaw shanhte galaw ai lam ni hpe mu ai. Samuela mung Eli a kasha ni zawn nkaja ai amu ni galaw ai kun?— N galaw ai. Shi gaw Kanu yan Kawa sharin ya ai teng man ai lam hpe sha galaw ai.

Eli gaw shi a kasha lahkawng hpe gara hku galaw ra na ngu shadu ai i?— Dam jaw ra ai. Shanhte hpe Karai Kasang a sum hta, matut nna bungli n mai galaw shangun ai. Raitim Eli gaw matut nna galaw shangun ai. Dai majaw, Eli hte shi a kasha lahkawng hpe, Yehowa pawt nna ari jaw na matu daw dan kau ai.

Samuela gaw Yehowa a shiga Eli hpe tsun

Lana mi hta Samuela yup nga ai shaloi, ‘Samuela!’ nga nna shaga ai hpe na ai. Shi Eli hpang de kagat sa wa ai. Eli gaw ‘ngai nang hpe n shaga ai’ ngu tsun ai. Ndai zawn lahkawng lang bai byin ai. Masum lang byin ngut ai hpang Eli gaw Samuela hpe, hpang kalang ndai hku bai na yang, ‘Wa Yehowa ngai madat nga ai’ ngu nna htan na matu tsun ai. Dai  hte maren Samuela tsun ai. Samuela hpe Yehowa tsun ai gaw, ‘Eli hpe ndai hku tsun u, nang hte nta masha ni nhkru n kaja ai amu galaw ai majaw, ngai ari jaw sana.’ Samuela gaw Eli hpe dai shiga tsun na matu loi na ngu nang shadu ai i?— Loi na nre. Samuela gaw, hkrit tim Yehowa tsun da ai hte maren galaw ai. Yehowa tsun ai hte maren byin wa ai. Eli a kasha lahkawng sat hkrum nna Eli mung si mat ai.

Samuela gaw anhte a matu kasi kaja re. Kaga masha ni nkaja ai amu galaw ai hpe mu tim, shi gaw teng man ai hpe sha galaw ai. Ma ni e, nanhte mung Samuela zawn, teng man ai hpe sha galaw na kun? Dai hku galaw yang, Yehowa hte Nu yan Wa mung grai myit pyaw na re.

Chyum Laika Hta Hti Yu U

  • 1 Samuela 2:22-26; 3:1-21