Content de lai

Secondary menu hpe lai

Malawm Ni Hpe Lai U

Yehowa Sakse Ni

Kachin

Karai Kasang Kaw Na Kabu Gara Shiga

 Daw 4

Yesu Hkristu Gaw Kadai Rai Ta?

Yesu Hkristu Gaw Kadai Rai Ta?

Yesu a gara atsam ningja ni a majaw masha yawng hte hku hkau loi ai rai?MAHTE 11:29; MARKU 10:13-16.

1. Yesu gaw gara kaw na sa wa a ni?

Yesu gaw kaga masha ni hte n bung ai. Mungkan ga de nsa shi yang, sumsing lamu hta wenyi hkum hte, asak hkrung lai wa ai. (Yawhan 8:23) Shi hpe Karai Kasang shawng nnan hpan nna, kaga yawng hpe hpan ai shaloi, shi karum ya ai. Yehowa shi nan tatut hpan da ai gaw, Yesu langai sha nga ai. Dai majaw, Karai Kasang a “Kasha shingtai” ngu shaga ai gaw, htap htuk nga ai. (Yawhan 1:14) Yesu gaw, Karai Kasang a malai ga shaga ai wa hku nna, amu gun ai majaw, shi hpe “Mungga” nga nna mung shaga ai.Ga Shagawp 8:22, 23, 30; Kolose 1:15, 16 ni hpe hti u.

2. Yesu mungkan ga de hpa majaw sa wa ai kun?

Karai Kasang gaw, shi a Kasha a asak hpe, Yuda shayi sha hkawnsek Mari a hkritung kata de htawt bang ya nna, mungkan ga de sa dat ai. Dai majaw Yesu kaw shinggyim masha kawa n nga ai. (Luka 1:30-35) Yesu mungkan ga de sa ai gaw (1) Karai Kasang hte seng ai teng man ai lam sharin ya na matu (2) yakhkak ai aten hta pyi, Karai Kasang ra sharawng ai hpe, gara hku galaw lu ai lam, kasi madun na matu hte (3) shi a hkum tsup ai asak hpe “gawng malai jahpu” hku nna jaw na matu re.Mahte 20:28 hpe hti u.

3. Hpa majaw anhte gawng malai jahpu ra a ta?

Gawng malai jahpu ngu ai gaw, masha langai mi si ai kaw na lawt lu na matu, jaw ra ai jahpu re. (Pru mat 21:29, 30) Si hkrung si htan gaw, shinggyim masha ni a matu, Karai Kasang a yaw shada ai lam nre. Dai hpe anhte gara hku chye lu na kun? Chyum Laika hta tsun da ai “yubak” ngu ai hpe, galaw yang, si ra na nga nna, Adam hpe Karai Kasang tsun ai. Dai majaw, Adam yubak n galaw yang, galoi mung si na nre. (Ningpawt 2:16, 17; 5:5) Si hkrung si htan ngu ai gaw, Adam a majaw masha ni yawng hpang de, shang wa ai nga nna, Chyum Laika hta tsun ai. Adam gaw yubak hte de a shabrai re ai, si hkrung si htan hpe, shi a kashu kasha ni yawng hpang de, shalai ya ai. Anhte gaw Adam kaw na lu da ai, yubak a shabrai re ai, si hkrung  si htan kaw na lawt lu na matu, gawng malai jahpu ra ai.Roma 5:12; 6:23 hpe hti u.

Anhte si hkrung si htan kaw na lawt lu na matu, gawng malai jahpu hpe, kadai jaw lu na ta? Anhte si ai shaloi, anhte na yubak a shabrai hpe sha, jaw ai re. Nhkum tsup ai masha kadai mung, kaga masha ni na yubak a matu, shabrai n lu jaw ai.Shakawn Kungdawn 49:6-9 hpe hti u.

4. Yesu hpa majaw si hkam a ta?

Anhte hte n bung ai sha, Yesu gaw hkum tsup ai. Yesu gaw mara n galaw ai majaw, shi mara a matu n si ra ai. Raitim, Yesu gaw masha ni a mara a matu, si hkam ya ai. Karai Kasang gaw, shi a Kasha hpe, si hkam na matu, jaw ya nna, masha ni a ntsa kaba la ai tsawra myit hpe madun dan ai. Yesu mung, shi Kawa a ga madat nna, anhte na yubak a matu, shi a asak hpe jaw ya ai hte, tsawra myit hpe madun dan ai.Yawhan 3:16; Roma 5:18, 19 ni hpe hti u.

5. Ya Yesu hpa galaw nga ai kun?

Yesu mungkan ga ntsa hta nga ai shaloi, machyi makaw ai ni hpe shamai ya ai, si ai ni hpe bai jahkrung ya ai, tsinyam tsindam hkrum ai masha ni hpe, hkye la ai. Dai gaw, madat mara ai masha ni a ntsa, htawm hpang prat hta galaw ya na hpe, madun dan ai. (Mahte 15:30, 31; Yawhan 5:28) Yesu si mat ai hpang, Karai Kasang gaw shi hpe wenyi hkum hte bai jahkrung ya ai. (1 Petru 3:18) Dai hpang, Yesu gaw Karai Kasang a hkra maga de dung nga nna, shi hpe Hkawhkam aya jaw na aten hpe, la nga ai. (Hebre 10:12, 13) Ya aten hta, Yesu gaw Hkawhkam hku nna, sumsing lamu hta uphkang nga sai. Dai gaw kabu gara shiga re. Dai shiga hpe shi a sape ni gaw mungkan ting hta hkaw tsun nga ai.Daniela 7:13, 14; Mahte 24:14 ni hpe hti u.

Kade n na yang, yakhkak jamjau ai lam yawng hte, dai hpe byin shangun ai ni yawng hpe, yeng seng kau na matu, Yesu gaw Hkawhkam langai hku nna, shi a hpung atsam hpe jailang na re. Yesu hpe kam sham ai lam, madat mara let madun dan ai ni gaw, mungkan hparadisu hta, ngwi pyaw ai hte asak hkrung lu na re.—Shakawn Kungdawn 37:9-11 hpe hti u.