Content de lai

Secondary menu hpe lai

Malawm Ni Hpe Lai U

Yehowa Sakse Ni

Kachin

Karai Kasang Kaw Na Kabu Gara Shiga

 Daw 13

Nawku Htung Ni Kade Nna Yang Hpa Byin Mat Na Kun?

Nawku Htung Ni Kade Nna Yang Hpa Byin Mat Na Kun?

1. Nawku htung ni yawng teng man ai kun?

Nawku htung shagu hta, myit ding man ai masha ni nga ai. Shanhte hpe Karai Kasang mu nna, yu lanu lahku nga ai gaw, kabu gara shiga re. Raitim, masha nkau mi gaw, nawku htung hpe amying hkam la nna, n hkru ai amu galaw ma ai. (2 Korinhtu 4:3, 4; 11:13-15) Nawku htung nkau mi gaw, nhkru ai, amyu sat shamyit ai, hpyen majan hte ma ni hpe roi rip ai lam ni hta lawm ma ai. Karai Kasang hpe kaja wa kam sham ai ni gaw, dai ni hpe yu nna yawn hkyen nga ai.Mahte 24:3-5, 11, 12 hpe hti u.

Teng man ai nawku htung gaw, Karai Kasang hpe shagrau ai. Shut shai ai nawku htung ni gaw, Karai Kasang a sari hpe jahpoi ma ai. Shanhte gaw Karai Kasang a lam, si ai lam ni hte seng nna, Chyum Laika hta n lawm ai, shut shai ai lam ni hpe sharin ya ai. Raitim, Yehowa gaw masha ni hpe shi a teng man ai lam chye shangun mayu ai.Hpaji Ningli 9:5,10; 1 Timohti 2:3-5 ni hpe hti u.

2. Nawku htung ni kade nna yang hpa byin mat na rai?

Karai Kasang hpe tsawra ai nga nna tsun tim, Satan a mungkan kaw shang lawm taw ai nawku htung ni nga ai, dai ni hpe Karai Kasang chye ai. (Yaku 4:4) Chyum Laika hta, shut shai ai nawku htung yawng hpe “kaba ai Babelon” nga nna tsun da ai. Babelon gaw, Noa prat Hka Sha U-ing ngut ai hpang, shut shai ai nawku htung ni paw pru wa ai mare re. Kade n na yang, masha ni hpe hkalem nna adip arip di ai nawku htung ni hpe, Karai Kasang yeng seng kau sana re.Shingran 17:1, 2, 5, 16, 17; 18:8 hpe hti u.

Raitim, kabu gara shiga naw nga ai. Mungkan ting na shut shai ai nawku htung ni hta nga ai, myit ding man ai masha ni hpe, Yehowa n malap da ai. Shi gaw, shanhte hpe teng man ai lam sharin ya nna, kahkyin gumdin ya nga ai.Mihka 4:2, 5 hpe hti u.

Teng man ai nawku htung gaw, masha ni hpe kahkyin gumdin ya ai

 3. Myit ding man ai masha ni hpa galaw ra na kun?

Teng man ai hte kaja ai hpe tsawra ai ni a ntsa Yehowa lanu lahku nga ai. Shi gaw shut shai ai nawku htung kaw na pru na matu, shanhte hpe shadut ya nga ai. Karai Kasang hpe tsawra ai ni gaw, shanhte a prat hkrun lam hpe galai shai mayu nga ai.Shingran 18:4 hpe hti u. 

Tsa ban langai hta nga ai, myit ding man ai masha ni gaw, kasa ni kaw na kabu gara shiga hpe na ai shaloi, kabu gara hte hkap la ma ai. Shanhte gaw, yaw shada lam hte myit mada lam nga ai, ngwi pyaw ai asak hkrung lam n nan hpe, Yehowa kaw na sharin la ma ai. Shanhte a prat hta, Yehowa hpe nambat langai shara tawn nna, kabu gara shiga hpe hkap la ai majaw, anhte a matu kasi kaja rai nga ai.1 Htesaloni 1:8, 9; 2:13 hpe hti u. 

Yehowa gaw, shut shai ai nawku htung kaw na pru wa ai ni hpe, shi a nawku hpung hta shang na matu, hkap tau la nga ai. Yehowa a, tsawra myit hte saw shaga nga ai hpe hkap la yang, shi a jinghku tai lu na, tsawra myit hte shinggrup da ai, shi a nawku hpung masha byin lu na ahkang hte, htani htana asak hpe lu la na re.Marku 10:29, 30; 2 Korinhtu 6:17, 18 ni hpe hti u.

4. Mungkan ting hta ngwi pyaw hkra Karai Kasang gara hku galaw ya na kun?

Kabu gara shiga gaw, shut shai ai nawku htung ni hpe tara jeyang sana ngu ai re. Masha ni gaw, adip arip di hkrum ai kaw na lawt lu sana re. Shut shai ai nawku htung gaw, masha ni hpe hkalem nna hka bra hkra nlu galaw sai. Masha yawng gaw, teng man ai Karai Kasang hpe sha, myit hkrum mang rum let nawku na re.Shingran 18:20, 21; 21:3, 4 hpe hti u.