Content de lai

Malawm Ni Hpe Lai U

 Daw 3

Kabu Gara Shiga Gaw Teng Sha Karai Kasang Kaw Na Kun?

Kabu Gara Shiga Gaw Teng Sha Karai Kasang Kaw Na Kun?

1. Chyum Laika a Madu gaw kadai rai?

Shinggyim masha ni, mungkan ga ntsa hta, htani htana asak hkrung lu na ngu ai kabu gara shiga, Chyum Laika hta ka da ai. (Shakawn 37:29) Chyum Laika hta, laika buk kaji 66 lawm ai. Chyum Laika hpe ka na matu, sadi dung ai la 40 daram hpe Karai Kasang jailang ai. Chyum Laika a shawng na laika manga hpe, lai wa sai shaning 3,500 daram hta, Mawshe ka ai. Hpang jahtum na laika hpe, lai wa sai shaning 1,900 jan hta, kasa Yawhan ka ai. Chyum Laika ka ai ni gaw, kadai na myit mang ai lam ni hpe, ka ma ai rai? Karai Kasang gaw chyoi pra ai wenyi hte, Chyum Laika ka ai masha ni hpe, matut mahkai ai. (2 Samuela 23:2) Chyum Laika ka ai ni gaw, shanhte a myit mang ai lam ni hpe nre ai sha, Karai Kasang a myit mang ai lam ni hpe ka ai. Dai majaw, Chyum Laika a Madu gaw Yehowa re.2 Timohti 3:17; 2 Petru 1:20, 21 ni hpe hti u.

2. Chyum Laika gaw Karai Kasang kaw na re ai hpe gara hku kam mai na ta?

Chyum Laika gaw, Karai Kasang kaw na re ai hpe kam mai ai. Hpa majaw nga yang, htawm hpang prat hta byin na lam ni hpe, kaji kajaw kaw na hkawt ka da ai. Masha kadai mung dai hku n lu galaw ai. (Yawshu 23:14) Chyahtum Chyalai n-gun rawng ai Karai Kasang langai sha, shinggyim masha ni a htawm hpang prat hpe, tau hkrau mu lu ai atsam nga ai.Esaia 42:9; 46:10 hpe hti u.

Karai Kasang kaw na sa ai laika buk gaw, laklai na re nga nna, anhte kam ai. Kaja wa mung laklai nga ai. Chyum Laika hpe, ga amyu baw hkying lam hte, buk wan law law dip shapraw ngut sai re. Chyum Laika gaw moi prat na raitim, hpung tang hpaji hte mung, hkrak rai nga ai. Dai hta n ga, Chyum Laika ka ai masha marai 40 raitim, langai hte langai, nhtan shai ai lam n nga ai. Chyum Laika gaw, Karai Kasang a tsawra myit hpe, danleng hkra madun dan ai. Ya aten du hkra, masha ni a asak aprat hpe, grau kaja hkra galai shai ya lu ai atsam nga ai. Dai lam ni a majaw, masha wan law law gaw, Chyum Laika hpe, Karai a Mungga re nga nna kam ma ai.1 Htesaloni 2:13 hpe hti u. 

 3. Chyum Laika hta gara lam ni lawm ai rai?

Shinggyim masha labau nnan hpang ai shaloi, mungkan hparadisu hta masha ni asak hkrung lu na ahkang gara hku sum mat ai hpe, Chyum Laika hta ka da ai. Raitim ndai mungkan ga hta, hparadisu gara hku bai byin wa na hpe mung ka tawn da ai. Dai gaw shinggyim masha ni a matu Karai Kasang yaw shada da ai kabu gara shiga re.Shingran 21:4, 5 hpe hti u.

Karai a Mungga hta, ga shaka, hkan sa tara hte, hpaji jaw ga ni lawm ai. Karai Kasang gaw, masha ni hte, gara hku kanawn mazum ai labau ni, Chyum Laika hta lawm ai. Dai labau ni kaw na, Karai Kasang a lam sharin la mai ai. Nang, Karai Kasang hpe chye chyang hkra, Chyum Laika gaw karum ya lu ai. Karai Kasang a jinghku gara hku byin mai ai lam hpe mung, Chyum Laika hta sanglang da ai.Shakawn Kungdawn 19:7, 11; Yaku 2:23; 4:8 ni hpe hti u.

4. Chyum Laika hpe chye na hkra gara hku galaw na kun?

Ndai laika buk gaw, Chyum Laika hpe nang chye na na matu, karum ya na re. Hpa majaw nga yang, ndai laika hta, Yesu a sharin achyin ai lam hpe kasi la da ai. Yesu gaw chyum daw langai hpe, lakap nna tsun ngut ai hpang “Chyum Laika ga ni hpe chye na lu na matu” sanglang dan ai.Luka 24:27, 45 hpe hti u. 

Karai Kasang kaw na kabu gara shiga gaw, kaga shiga ni hta grau kaja ai. Raitim, dai kabu gara shiga hpe, masha nkau gaw, myit n lawm ma ai. Nkau mi gaw, masin pawt ai du hkra, byin ma ai. Shanhte a majaw myit hkum daw. Na a, htani htana asak myit mada lam gaw, Karai Kasang a lam nang kade daram chye ai hta, madung nga ai.Yawhan 17:3 hpe hti u.