Content de lai

Secondary menu hpe lai

Yehowa Sakse Ni

Kachin

Htawm Hpang Prat Hpe Nang Gara Hku Mu Mada Ai Rai?

Htawm Hpang Prat Hpe Nang Gara Hku Mu Mada Ai Rai?

Mungkan a mabyin masa ni gaw

  • Ndai zawn sha byin nga na kun?

  • Ndai hta grau sawng wa na kun?

  • Ndai hta grau kaja wa na kun?

 Chyum Laika Hta Tsun Da Ai Lam

“Karai Kasang . . . gaw shanhte a myi hta na myi prawi pru ma pru katsut kau ya na ra ai: htawm hpang e si hkrung si htan n nga lu na sai; sharung shayawt ai, hkrap ngu hkrap ngoi ai, hki si ba si ai mung, n nga lu na sai: shawng na lam nga manga hte gaw lai mat wa sai.” —Shingran 21:3, 4.

Chyum Laika Hta Na Nang Lu La Mai Ai Akyu Ni

Lachyum nga nna myit shadik ya ai magam bungli lu na.—Esaia 65:21-23.

Machyi makaw hte yakhkak jamjau ai lam yawng n nga mat na.—Esaia 25:8; 33:24.

Kun dinghku, jinghku ni hte htani htana a ngwi a pyaw nga lu na.—Shakawn Kungdawn 37:11, 29.

 Chyum Laika Hta Tsun Da Ai Lam Ni Hpe Kam Mai A Ni?

Kam mai ai lam ni nga ai. Nkau mi gaw:

  • Karai Kasang gaw ga sadi hte maren dangdi lu ai atsam rawng ai. Yehowa Karai Kasang hta, nhtum nwai n-gun rawng ai majaw, shi hpe sha “Chyahtum chyalai n-gun rawng ai Madu” nga nna Chyum Laika hta tsun da ai. (Shingran 15:3) Dai majaw, mungkan hpe grau kaja wa hkra galaw ya na ngu ai ga sadi hte maren shi galaw ya lu ai. “Karai Kasang mahtang gaw, yawng mayawng dang di lu ai” nga nna Chyum Laika hta tsun da ai.—Mahte 19:26.

  • Karai Kasang gaw ga sadi jaw da ai hte maren galaw ya mayu ai. Ga shadawn, Karai Kasang gaw, si mat ai ni hpe asak bai hkrung shangun mayu ai.—Yoba 14:14, 15.

Karai Kasang a Kasha Yesu mung, machyi makaw ai ni hpe shamai ya ai nga nna Chyum Laika hta tsun da ai. Hpa majaw kun? Machyi makaw ai ni hpe mai tsai shangun mayu ai majaw re. (Marku 1:40, 41) Yesu gaw, shi a Kawa zawn, shinggyim masha ni hpe karum ya mayu ai myit rawng ai.—Yawhan 14:9.

Dai majaw Yehowa hte Yesu gaw, anhte hpe ngwi pyaw ai htawm hpang prat lu shangun mayu ai hpe kam mai ai.—Shakawn Kungdawn 72:12-14; 145:16; 2 Petru 3:9.

 Sumru Yu Ga

Mungkan ga hpe grau kaja wa hkra Karai Kasang gara hku galaw ya na kun?

Ndai ga san a matu Chyum Laika mahtai hpe MAHTE 6:9, 10 hte DANIELA 2:44 hta mu lu ai.