Content de lai

Secondary menu hpe lai

Malawm Ni Hpe Lai U

Yehowa Sakse Ni

Kachin

Chyum Laika Anhte Hpe Hpa Sharin Ya Ai Kun?

 Daw Mali

Yesu Hkristu Gaw Kadai Rai A Ta?

Yesu Hkristu Gaw Kadai Rai A Ta?

1, 2. (a) Gumhkawng ai masha langai a mying hpe chye ai hte sha, shi hpe chye chyang ai ngu lu tsun na kun? Sang lang dan u. (b) Yesu hpe masha ni gara hku chye da ai kun?

MUNGKAN ntsa mying gumhkawng ai masha law law nga ai. Dai masha ni kaw nna, marai langai ngai hpe nang chye yang chye na re. Shi a mying hpe chye ai hte sha, shi hpe atsawm chye ai ngu n lu tsun ai. Hpa majaw nga yang, shi gaw kaning re ai wa hte shi hte seng ai lam ni hpe, ahkri ahkrai n chye ai majaw re.

2 Lai wa sai shaning 2,000 daram hta, mungkan ntsa nga lai wa ai Yesu Hkristu hpe nang chye na re. Raitim, masha law malawng gaw, Yesu kaning re ai wa re ai hpe atsawm n chye ma ai. Nkau mi gaw shi hpe masha kaja langai, myihtoi langai, nkau mi gaw Karai Kasang ngu kam ma ai. Nang gara hku chye da ai kun?—Jahtum Matsing 12 hpe yu u.

3. Yehowa Karai Kasang hte Yesu Hkristu a lam hpe chye na matu hpa majaw ahkyak ai kun?

3 Yesu a teng man ai lam hpe chye na matu ahkyak ai. Hpa majaw kun? Chyum Laika hta “htani htana asak ngu ai chyawm gaw, langai sha rai nga ai hte teng man re ai nang Karai Kasang hpe mung, nang shangun dat ai wa Yesu Hkristu hpe mung, shanhte chye chyang lu ai hpe, ngu ai, rai nga ai” nga nna tsun da ai. (Yawhan 17:3) Yehowa hte Yesu a teng man ai lam hpe chye yang, mungkan hparadisu hta htani htana nga lu na re. (Yawhan 14:6) Yesu a asak hkrung lam hte kanawn mazum lam ni gaw anhte a matu kaja htum kasi re ai majaw shi a lam chye ai gaw, anhte a prat hkrun lam hpe mung akyu lu shangun ai. (Yawhan 13:34, 35) Daw 1 hta, Karai Kasang hte seng  nna teng man ai lam hpe hkaja wa sai. Ya, Yesu hte seng nna Chyum Laika sharin ya ai lam hpe hkaja yu ga.

ANHTE MESHIA HPE MU SAI!

4. “Meshia” hte “Hkristu” ngu ai lachyum gaw hpa rai a ta?

4 Chyum Laika hta, Yesu n shangai shi ai shaning law law kaw nna, Yehowa gaw, Hkristu (sh) Meshia hpe shangun dat na nga nna ga sadi jaw da ai. “Meshia” ngu ai gaw, Hebre ga rai nna, “Hkristu” ngu ai gaw Greek ga re. Ndai ga si lahkawng gaw, laksan ahkaw ahkang a matu Karai Kasang namman chya nna, aya tang da ai wa ngu lachyum nga ai. Karai a ga sadi ni yawng, hpring tsup hkra Meshia galaw ya na re. Ya aten hta mung, Yesu gaw nang hpe karum ya lu ai. Yesu n shangai shi yang, masha law law gaw ‘Meshia kadai rai na kun?’ nga nna chye mayu ma ai.

5. Yesu gaw Meshia re ai hpe sape ni kam ai kun?

5 Yesu a sape ni gaw, shi hpe ga sadi tawn da ai Meshia re ai lam, n tsen ai myit n nga ai. (Yawhan 1:41) Ga shadawn, Simun Petru gaw Yesu hpe “nang gaw Hkristu” re, nga nna tsun wa ai. (Mahte 16:16) Yesu gaw Meshia re ai lam anhte gara hku teng sha lu tsun na kun?

6. Meshia kadai re ai hpe ginhka lu na matu, myit ding man ai ni hpe Yehowa gara hku karum ya ai kun?

6 Yesu n shangai shi ai shaning law law kaw nna, Karai Kasang a myihtoi ni gaw, Meshia kadai re ai hpe chye na matu, shi a lam ni hpe tau hkrau tsun da ai. Dai gaw gara hku karum ya ai kun? Ga shadawn, kalang mung n mu ga ai marai langai hpe, masha law ai wanleng daru hta, sa tau ai ngu myit yu ga. Marai langai ngai gaw, shi hte seng ai lam nang hpe atsawm tsun dan yang, nang tam loi na re. Dai hte maren, Yehowa gaw shi a myihtoi ni kaw nna, Meshia hpa galaw na, hpa hkrum na lam ni hpe tau hkrau tsun da ai. Hpring tsup wa ai myihtoi ga ni yawng hpe yu yang Yesu gaw Meshia re ai lam, myit ding man ai ni chye lu ai.

7. Yesu gaw Meshia re ai hpe sakse madun ai myihtoi ga lahkawng gaw hpa rai a ta?

 7 Myihtoi ga ni hta na lahkawng hpe myit yu ga. Langai, Yesu n shangai shi ai shaning 700 jan hta, Mihka gaw Betlehem mare kaji hta Meshia shangai wa na lam, tau hkrau tsun da ai. (Mihka 5:2) Yesu dai mare hta teng sha shangai wa ai. (Mahte 2:1, 3-9) Lahkawng, A.D. 29 hta Meshia paw pru wa na lam, Daniela tau hkrau tsun da ai. (Daniela 9:25) Yesu gaw Meshia re ai lam sakse madun ai myihtoi ga law law hta na, ndai gaw lahkawng sha naw re.—Jahtum Matsing 13 hpe yu u.

Hkalup hkam ai aten hta Yesu gaw Meshia (sh) Hkristu byin wa

8, 9. Yesu hkalup hkam ai shaloi shi Meshia re ai hpe sakse madun ai hpa lam byin wa ai kun?

8 Yesu gaw Meshia re ai lam dan dan leng leng chye na matu, Yehowa galaw wa ai. Yehowa gaw Hkalup Sara Yawhan hpe, Meshia hpe chye na matu lamik kumla madun na ngu ga sadi jaw ai. Yesu gaw A.D. 29 hta, Yawhan hpang de sa nna Yawdan hka kaw hkalup hkam ai shaloi, Yawhan dai kumla hpe mu wa ai. Dai hpe Chyum Laika hta ndai hku tsun ai: “Ya Yesu gaw baptisma hkam la ngut jang, dai hka hta na byawn hprang rai lung wa nna, yu u, lamu gaw hpaw malang wa nhtawm, Karai Kasang a Wenyi gaw hkrudu zawn yu hkrat wa nna, shi a ntsa e dung nga ai hpe shi mu lu ai: Dai hta n-ga, Ndai wa gaw ngai sharawng awng nga ai, ngai tsaw ra ai Kasha rai nga li ai, nga nna lamu de na nsen ngoi pru wa ai.” (Mahte 3:16, 17) Dai kumla hpe Yawhan mu ai shaloi, Yesu gaw, Meshia re ai hpe chye dat ai. (Yawhan 1:32-34) Yehowa gaw dai shani hta, Yesu a ntsa chyoi pra ai wenyi jaw ai  shaloi, Yesu gaw Meshia byin wa ai. Shi gaw Hkawhkam hte Ningbaw tai na matu, Karai Kasang lata da ai wa re.—Esaia 55:4.

9 Yesu hkalup hkam ai aten hta Yehowa tsun ai ga, shi jaw ai kumla hte Chyum Laika myihtoi ga ni gaw, Yesu gaw Meshia re ai lam sakse madun nga ai. Yesu gara kaw na sa ai, kaning re ai wa re ai lam, Chyum Laika tsun ai hpe hkaja yu ga.

 YESU GARA KAW NNA SA AI KUN?

10. Yesu Mungkan de n sa shi ai aten na lam Chyum Laika hpa tsun da ai kun?

10 Yesu mungkan de n sa shi yang, sumsing lamu hta grai na hkra nga wa ai ngu, Chyum Laika hta tsun da ai. Meshia gaw, “moi chyaloi nhkoi kaw nna” nga wa ai ngu Mihka tsun ai. (Mihka 5:2) Shinggyim masha hku n shangai shi yang, sumsing lamu hta nga wa ai lam, Yesu nan chyahkring hkring tsun wa ai. (Yawhan 3:13; 6:38, 62; 17:4, 5 ni hpe hti u.) Yesu mungkan de n sa shi yang, Yehowa hte grai hku hkau wa ai.

11. Yehowa a matu Yesu hpa majaw grai manu dan ai kun?

11 Yesu gaw Yehowa a matu, grai manu dan ai wa re. Hpa majaw nga yang, Karai Kasang hpa mung n hpan shi yang, shi hpe shawng hpan ai majaw re. Dai majaw, Yesu hpe “hpan da ai arai yawng mayawng hta alat” nga nna shamying ai. * (Kolose 1:15) Yehowa nan Yesu hpe ding tawk hpan ai majaw mung, Yehowa a matu manu dan ai re. Dai majaw, Yesu hpe “Kasha shingtai” ngu shaga ai. (Yawhan 3:16) Yehowa gaw, kaga yawng hpe hpan na matu, Yesu hpe shangun ai. (Kolose 1:16) Yesu hpe “Mungga” nga nna mung shaga ai. Hpa majaw nga yang, Yesu gaw Yehowa tsun shangun mayu ai shiga ni, matsun ga ni hpe masha hte lamu kasa ni hpe tsun ya ai majaw re.—Yawhan 1:14.

12. Karai Kasang hte Yesu gaw langai sha n re ai hpe anhte gara hku chye lu ai kun?

12 Karai Kasang hte Yesu gaw langai sha re nga nna masha nkau mi kam ai. Raitim, Chyum Laika hta dai hku n tsun da ai. Chyum Laika hta, Yesu gaw hpan da hkrum ai nga nna tsun ai majaw, Yesu hta npawt nga ai. Raitim,  hpan madu Yehowa hta gaw npawt nhpang n nga ai. (Shakawn 90:2) Karai a Kasha Yesu gaw, Karai Kasang zawn byin na matu, galoi mung n shakut ai. Chyum Laika hta Kawa gaw Kasha hta grau kaba ai ngu tsun da ai. (Yawhan 14:28 hpe hti u; 1 Korinhtu 11:3.) Yehowa sha “Chyahtum chyalai n-gun rawng ai Karai Kasang” re. (Ningpawt 17:1) Shi gaw, ninggawn tawa hta tsaw htum ai hte hpung atsam kaba htum ai wa re.—Jahtum Matsing 14 hpe yu u.

13. Chyum Laika hta Yesu hpe, “myi e n mu lu ai Karai Kasang a hkrang bung sumla” re nga nna hpa majaw tsun da ai kun?

13 Yehowa hte shi a Kasha Yesu gaw, mungkan ga hte sumsing lamu hpe n hpan shi ai kaw nna, shaning wan law law bungli rau galaw wa ai. Langai hte langai grai tsawra ai. (Yawhan 3:35; 14:31) Yesu gaw, shi kawa a atsam ningja ni hpe kasi la ai majaw, Chyum Laika hta “myi e n mu lu ai Karai Kasang a hkrang bung sumla” re nga nna tsun da ai.—Kolose 1:15.

14. Yehowa a manu dan ai Kasha gaw, shinggyim masha langai zawn gara hku shangai wa ai kun?

14 Yehowa a manu dan ai Kasha gaw, sumsing lamu hpe kau da let, mungkan de shinggyim masha hku nna shangai wa na matu, sharawng awng let hkap la wa ai. Gara hku byin mai na kun? Yehowa gaw, shi Kasha a asak hpe sumsing lamu kaw nna, Mari ngu ai hkawn sek a hkritung de, mauhpa atsam hte htawt bang ya ai. Dai majaw, Yesu hta shinggyim kawa n nga ai. Mari gaw hkum tsup ai ma shangai wa nna, Yesu ngu shamying ya ai.—Luka 1:30-35.

YESU GAW KANING RE AI WA RAI KUN?

15. Yehowa a lam nang gara hku grau chye lu na kun?

15 Mahte, Marku, Luka, Yawhan Laika ni kaw nna, Yesu a atsam ningja ni hte shi a lam ni nang chye lu na. Yesu gaw shi Kawa hte bung ai majaw, shi a lam hti yang, Yehowa a lam grau chye lu na. Dai majaw, Yesu gaw “ngai  hpe mu yu ai wa gaw, Wa hpe mu yu nu ai” nga nna tsun wa ai.—Yawhan 14:9.

16. Yesu hpa sharin ya a ta? Yesu sharin ya ai lam ni gaw gara kaw nna sa ai kun?

16 Masha law law gaw, Yesu hpe “Sara” ngu shaga ai. (Yawhan 1:38; 13:13) “Mungdan a kabu gara shiga” gaw ahkyak ai lam re ai ngu shi sharin ya ai. Dai Mungdan gaw hpa rai a ta? Sumsing lamu kaw nna mungkan ting hpe uphkang na Karai Kasang a asuya re. Dai hta, Karai a ga madat ai ni shaman chyeju lu na re. (Mahte 4:23) Yesu sharin ya ai lam yawng gaw, Yehowa kaw nna re. “Ngai sharin shaga ai ga gaw nye a ga n rai, ngai hpe shangun dat ai wa a ga” re nga nna Yesu tsun ai. (Yawhan 7:16) Mungkan ting hpe Karai a Mungdan uphkang na ngu ai kabu gara shiga hpe, masha ni chye na matu Yehowa ra sharawng ai hpe Yesu chye ai.

17. Yesu gara shara ni hta hkaw tsun wa ai kun? Masha ni hpe sharin na matu shi hpa majaw grai shakut ai kun?

17 Yesu gara shara ni hta hkaw tsun wa a ta? Masha ni hpe mu mai ai shara shagu hta re. Mare ni, kahtawng ni, gat ni, nawku ai shara ni hte nta ni hkan shi sharin ya ai. Shi hpang de sa na matu n myit mada ai sha, shi nan shanhte hpang de sa ai. (Marku 6:56; Luka 19:5, 6) Yesu gaw masha ni hpe sharin ai lam hta n-gun atsam hte aten law law jaw nna shakut shaja galaw wa ai. Hpa majaw kun? Dai hku galaw ai hpe Karai Kasang ra sharawng ai lam shi chye nna, shi Kawa a ga hpe galoi mung madat mayu ai majaw re. (Yawhan 8:28, 29) Yesu gaw masha ni hpe matsan dum ai majaw mung hkaw tsun ai. (Mahte 9:35, 36 hpe hti u.) Makam masham ningbaw ni gaw, Karai Kasang hte seng ai teng man ai lam hte Karai a Mungdan lam, n sharin ya ai hpe Yesu mu ai. Dai majaw, kabu gara shiga hpe masha ni chye na matu, mai byin ai daram hkaw tsun wa ai.

18. Yesu a gara atsam ningja ni hpe nang ra ai kun?

 18 Yesu gaw masha ni hpe tsawra nna, shanhte hpe lanu lahku ai. Matsan dum chye ai hte hku hkau loi ai. Ma ni pyi shi hpe tsawra ai. (Marku 10:13-16) Yesu gaw galoi mung tara rap ra ai. Akyang hten ai hte n tara ai lam hpe shi n ju n dawng ai. (Mahte 21:12, 13) Yesu a prat hta, numsha ni hpe hkungga ai lam n nga ai sha n-ga ahkaw ahkang mung n jaw ma ai. Raitim, Yesu gaw numsha ni hpe hkungga let, tsun shaga wa ai. (Yawhan 4:9, 27) Yesu gaw grai shagrit shanem ai. Ga shadawn, mayam ni sha galaw ai lagaw kashin ai bungli hpe shi nan sape ni hpe galaw ya wa ai.—Yawhan 13:2-5, 12-17.

Yesu gaw masha ni hpe mu mai ai shara shagu hta hkaw tsun wa

19. Yesu gaw, masha ni teng sha ra kadawn ai hpe chye nna, shanhte hpe karum mayu ai lam anhte gara hku chye lu ai kun?

19 Yesu gaw, masha ni teng sha ra kadawn ai hpe chye nna, shanhte hpe karum ya mayu ai. Karai Kasang a atsam hpe jailang nna, masha ni hpe shi shamai ya ai mauhpa amu hpe yu yang, asan sha chye lu ai. (Mahte 14:14) Ga shadawn, manggang kap ai masha langai Yesu hpang sa nna, “Nang hkraw n yang gaw, ngai hpe shapra ya” rit nga nna tsun ai. Yesu gaw, dai masha a machyi ai lam hte hkamsha ai lam hpe, matsan dum nna karum ya mayu ai. Dai majaw, Yesu lata ladawn let shi hpe ahtawk nna, “ngai hkraw nga n ngai san pra wa nu” nga nna tsun dat ai. Machyi ai masha gaw mai mat ai. (Marku 1:40-42) Shi grai pyaw mat na re.

SHI KAWA HPE GALOI MUNG SADI DUNG AI

20, 21. Yesu gaw Karai Kasang a ga madat ai hta gara hku kasi kaja madun wa ai kun?

20 Yesu gaw Karai Kasang a ga madat ai hta kasi kaja madun wa ai. Shi hpe hpyen ni gara hku galaw tim, hpa mi hkrum wa tim, Kawa a ntsa sadi dung ai. Ga shadawn, Yesu hpe Satan hkalem na matu shakut tim, shi mara n galaw ai. (Mahte 4:1-11) Yesu a nta masha nkau mi gaw,  shi Meshia re ai hpe n kam ai; “myit n gring nga ai” nga nna pyi tsun ai. Raitim, shi gaw Karai a amu hpe matut galaw wa ai. (Marku 3:21) Yesu hpe hpyen ni zingri ai shaloi mung, Karai Kasang hpe matut nna sadi dung ai. Shi galoi mung hpyen ni hpe matai nhtang wa ai.—1 Petru 2:21-23.

21 Yesu gaw, n ni n kri hkrum let si ra ai aten hta pyi, Yehowa hpe matut nna sadi dung wa ai. (Hpilipi 2:8) Shi si ai shani kade daram hkamsha na hpe myit yu ga. Shi rim hkrum ai, Karai Kasang hpe jahpoi ai wa nga nna n teng n man tsun hkrum ai. N tara ai tara agyi ni mara shagun ai, masha hpawng a jahpoi asawng hkrum ai, hpyen la ni zingri nna hpun hta hpri hte adit ai. Shi si na  mahka hta “ngut ma sali ai” ngu tsun wa ai. (Yawhan 19:30) Yesu si ai masum ya na jang, Yehowa gaw shi hpe wenyi hkum hte hkrung rawt ya ai. (1 Petru 3:18) Bat loi mi na ai hpang, Yesu gaw sumsing lamu de lung nna, “Karai Kasang a hkra maga de dung nga” let Karai Kasang shi hpe Hkawhkam aya jaw na aten hpe la nga ai.—Hebre 10:12, 13.

22. Yesu shi Kawa hpe sadi dung ai majaw anhte hpa akyu lu wa a ta?

22 Yesu shi Kawa hpe sadi dung wa ai majaw, Yehowa a yaw shada lam re ai mungkan hparadisu hta htani htana nga lu na ahkang anhte lu wa ai. Yesu si hkam ai gaw, anhte htani htana asak lu na matu gara hku lam hpaw ya ai hpe, hpang na daw hta hkaja na re.

^ စာပိုဒ်၊ 11 Yehowa gaw Hpan Madu re ai majaw, shi hpe Wa ngu shaga ai. (Esaia 64:8) Yesu hpe Karai Kasang a Kasha ngu shaga ai gaw, shi hpe Yehowa hpan da ai majaw re. Lamu kasa ni hte Adam hpe mung, Karai Kasang a kasha ni ngu shaga ai.—Yoba 1:6; Luka 3:38.