Content de lai

Secondary menu hpe lai

Malawm Ni Hpe Lai U

Yehowa Sakse Ni

Kachin

Chyum Laika Anhte Hpe Hpa Sharin Ya Ai Kun?

 Daw Sanit

Si Mat Ai Masha Ni Bai Hkrung Rawt Wa Na

Si Mat Ai Masha Ni Bai Hkrung Rawt Wa Na

1-3. Anhte yawng gaw gara kaw bawng masha byin nga ai kun? Dai kaw nna lawt hkra Yehowa gara hku galaw ya na kun?

NDAI lam hpe myit yu ga: Nang n galaw ai mara a matu, htawng jahkrat hkrum nna, lawt na lam n nga sai. Nang galaw lu ai lam hpa mung n nga ai zawn, myit mada lam mung n nga sai. Raitim, dai aten hta nang hpe karum ya na matu ga sadi jaw nna, shalawt ya lu ai atsam mung nga ai marai langai ngai hpe nang mu dat ai. Dai shaloi, nang gara hku hkamsha na kun?

2 Anhte yawng gaw, si hkrung si htan a bawng masha ni re. Anhte hpa galaw tim, lawt na lam n nga ai. Raitim, anhte hpe si ai kaw nna shalawt ya lu ai atsam, Yehowa hta nga ai. “Hpang chyahtum na hpyen wa ngu ai, si hkrung si htan gaw, yeng kau ai hkrum na” ngu shi ga sadi jaw da ai.—1 Korinhtu 15:26.

3 Si hkrung si htan n nga mat sana mungkan hpe shingran yu u. Yehowa gaw si hkrung si htan hpe yeng seng kau ya na sha n-ga, si mat ai ni hpe mung asak bai hkrung hkra galaw ya na re. Dai hku byin wa yang nang grai kabu na re. Shi gaw, “si mat ai ni hpe” asak bai hkrung hkra galaw ya na ngu ga sadi jaw da ai.—Esaia 26:19.

TSAWRA AI MARAI LANGAI SI MAT AI SHALOI

4. (a) Anhte a nta masha (sh) manang langai si mat ai shaloi, gara gaw anhte hpe shalan shabran ya a ta? (b) Kadai ni gaw Yesu hte grai hkau ai kun?

4 Anhte a nta masha langai shing nrai grai hkau ai manang langai si mat ai shaloi, yawn hkyen ai hte nchyi  n mu hkam sha ai. Anhte hpe karum shing tau na masha kadai mung n nga ai ngu hkam sha chye ai. Shi hpe asak bai hkrung hkra, anhte hpa mung n lu galaw ya ai. Raitim, Chyum Laika gaw anhte hpe teng sha shalan shabran ya ai. (2 Korinhtu 1:3, 4 hpe hti u.) Yehowa hte Yesu gaw anhte tsawra ai ni hpe asak bai hkrung hkra galaw ya mayu ai lam chye na na matu ga shadawn langai hpe yu yu ga. Yesu mungkan ntsa nga wa ai shaloi, Lazaru hte shi a kana Mari yan Marhta hpang de chyahkring hkring sa chyai ai. Shanhte masum Yesu hte grai hkau ma ai. Chyum Laika hta, “Yesu chyawm gaw Marhta hpe mung, shi a kanau hte Lazaru hpe mung tsawra” ai ngu tsun da ai. Lani mi hta Lazaru si mat ai.—Yawhan 11:3-5.

5, 6. (a) Yesu gaw Lazaru a nta masha ni hte manang ni yawn hkyen nga ai hpe mu ai shaloi hpa galaw ya ai kun? (b) Si ai hte seng nna Yesu hkam sha ai hpe chye lu ai gaw hpa majaw shalan shabran lu ai kun?

5 Yesu gaw, Marhta yan Mari hpe shalan shabran ya na matu sa ai. Yesu sa wa ai lam Marhta na ai shaloi, shi gaw Yesu hte hkrum na matu, mare shing gan de sa ai. Yesu hpe mu ai shaloi shi grai kabu ai. Raitim, Yesu hpe “Madu e, nang nang e nga ndai rai taw gaw, ngai yung n si na re” ngu tsun ai. Yesu jau jau sa wa yang grai kaja na ngu Marhta shadu ai. Shi a kanau Mari hkrap nga ai hpe mung Yesu mu ai. Shanhte grai yawn nga ai hpe mu ai shaloi, shi mung yawn nna hkrap ai. (Yawhan 11:21, 33, 35) Anhte tsawra ai marai langai si yang mung, dai zawn sha Yesu hkam sha ai.

6 Si ai hte seng nna, anhte hkam sha ai zawn Yesu mung hkam sha ai hpe chye lu ai majaw, anhte myit shalan lu ai. Yesu gaw, shi Kawa hte bung ai. (Yawhan 14:9) Yehowa hta si ai hpe prat dingsa n nga mat hkra galaw ya lu ai atsam nga nna, kade n na yang galaw ya sana re.

“LAZARU E, PRU WA RIT!”

7, 8. Lazaru a lup na nlung hpe hpa majaw Marhta n sit shangun mayu ai kun? Raitim, Yesu gara hku galaw wa ai kun?

7 Yesu gaw Lazaru hpe lup ai shara de du yang, lup sung hku hpe nlung kaba hte pat tawn da ai hpe mu ai. Dai majaw, Yesu gaw “nlung dai hpe galau kau mu” nga nna tsun ai. Raitim, Marhta gaw n galaw shangun mayu ai. Hpa majaw nga yang, Lazaru hpe lup da ai mali ya na sai. (Yawhan 11:39) Shi a kanau hpe Yesu bai jahkrung ya lu ai hpe shi n chye ai.

Lazaru hkrung rawt wa ai shaloi shi a nta masha hte manang ni grai pyaw nga ai hpe shingran yu u.—Yawhan 11:38-44

8 Yesu gaw Lazaru hpe “pru wa rit!” nga nna tsun ai. Dai hpang, Mari yan Marhta gaw mauhpa amu hpe mu dat ai. “Si mat ai wa gaw, shi a lagaw lata hta sumpan yan ahkyen nna . . . pru wa ai.” (Yawhan 11:43, 44) Lazaru asak bai hkrung wa sai. Shi a nta masha, manang ni hte bai hkrum zup lu sai. Shanhte shi hpe jum mai, hkra mai nna ga shaga mai ai. Grai mauhpa re. Yesu gaw Lazaru hpe asak bai hkrung hkra galaw ya wa ai.

“MA E, RAWT U!”

9, 10. (a) Masha ni hpe jahkrung ya lu ai atsam Yesu hpe kadai jaw a ta? (b) Hkrung rawt wa ai lam ni gaw anhte a matu hpa majaw manu dan ai kun?

9 Yesu masha ni hpe jahkrung ya ai gaw, shi a atsam hte kun? N re. Yesu gaw, Lazaru hpe n jahkrung ya shi yang, Yehowa hpang akyu hpyi ai. Yehowa gaw, Lazaru hpe jahkrung ya lu ai atsam Yesu hpe jaw ai. (Yawhan 11:41, 42 hpe hti u.) Chyum Laika hta kaga hkrung rawt wa ai ni a lam mung tsun da ai. Ga shadawn, asak 12 ning ma grai machyi taw ai shaloi shi kawa Ya-iru gaw, grai myit kahtet let ma hpe shamai ya na matu, Yesu hpe hpyi shawn ai. Dai ma gaw, shi a kasha shingtai re. Shi gaw, Yesu hte ga shaga nga ai shaloi, masha ni gaw sa nna, “na a shayi sha si mat sai; dai sara hpe hpa rai naw shatsang nga n ta?” nga nna tsun ai. Raitim, Yesu gaw Ya-iru hpe  “hkum hkrit et; kam sham ai myit sha rawng u, shaloi shi mai na ra ai” nga nna tsun ai. Dai hpang Yesu gaw, Ya-iru hte rau shi nta de sa ai. Shanhte nta shawng de du jang, masha ni hkrap nga ai hpe Yesu mu ai. Yesu gaw, shanhte hpe “hkum hkrap myit, shi si ai n rai, yup pyaw nga ai” ngu tsun ai. Shi a kanu yan kawa gaw, Yesu tsun ai ga hpe mau nga ai. Yesu gaw, masha yawng hpe pru shangun nna, dai ma a kanu yan kawa hte dai ma taw nga ai gawk de shang mat ai. Yesu gaw, dai ma a lata hpe yat sha jum nna, “ma e, rawt u!” ngu tsun ai. Dai ma kalang ta rawt hkawm ai hpe mu ai kanu yan kawa gaw kade daram kabu na hpe shingran yu u. Yesu gaw shan a shayi sha hpe bai jahkrung ya ai. (Marku 5:22-24, 35-42; Luka 8:49-56) Dai shani kaw nna, shanhte a shayi sha hpe mu shagu, Yesu kaw nna Yehowa galaw ya ai lam hpe shanhte dum nga na re. *

10 Yesu jahkrung ya ai ni gaw, hpang de bai si mat ai. Raitim, dai lam ni hpe hti ai gaw akyu nga ai. Hpa majaw nga yang, anhte hpe teng man ai myit mada lam ni jaw ai majaw re. Yehowa gaw masha ni hpe bai jahkrung ya mayu nna galaw mung galaw ya na re.

HKRUNG RAWT WA AI LAM NI KAW NNA ANHTE SHARIN LA LU AI LAM

Kasa Petru gaw Hkristan num Dorka hpe jahkrung ya ai.—Kasa 9:36-42

Elia gaw gaida jan a kasha hpe jahkrung ya ai.—1 Hkawhkam 17:17-24

11. Lazaru hte seng nna Hpaji Ningli 9:5 gaw anhte hpe hpa sharin ya a ta?

11 “Si mat ai ni chyawm gaw hpa n chye ma ai” nga nna Chyum Laika hta asan sha tsun da ai. Dai gaw Lazaru hta teng nga ai. (Hpaji Ningli 9:5) Yesu tsun ai hte maren, Lazaru gaw yup pyaw nga ai zawn rai nga ai. (Yawhan 11:11) Lazaru lup hta nga ai shaloi shi “hpa n chye” ai.

12. Lazaru hkrung rawt ai lam, teng sha byin wa ai hpe anhte gara hku chye lu a ta?

 12 Lazaru hpe Yesu jahkrung ya ai shaloi masha law law mu ai. Dai mauhpa amu hpe Yesu galaw ai lam shi a hpyen ni pyi chye ai. Lazaru asak hkrung nga ai gaw hkrung rawt ai lam teng sha byin wa ai hpe sakse madun ai. (Yawhan 11:47) Masha law law Lazaru hpang sa chyai ai shaloi, Yesu gaw Karai Kasang shangun dat ai wa re ai hpe kamsham wa ma ai. Dai hpe Yesu a hpyen ni n ra ai majaw, Yesu hte Lazaru lahkawng yan hpe sat na matu hkyen ma ai.—Yawhan 11:53; 12:9-11.

13. Yehowa gaw si mat ai ni hpe jahkrung ya na lam anhte gara hku kam mai ai kun?

13 “Lup ni hta rawng nga ai ni nlang hte gaw” bai hkrung rawt wa na nga nna Yesu tsun ai. (Yawhan 5:28) Yehowa a matsing nyan hta nga ai ni yawng hkrung rawt wa na re. Yehowa gaw masha langai hpe jahkrung ya na matu, dai masha hte seng ai lam yawng hpe matsing ra ai. Shi dai hku matsing lu na kun? Ning gawn tawa hta shagan ni wan hkying hku nga ai. Dai shagan langai hpra a amying hpe Yehowa chye lu ai nga nna Chyum Laika hta tsun da ai. (Esaia 40:26 hpe hti u.) Shagan langai hpra a amying hpe pyi shi lu matsing ai rai yang, bai hkrung rawt wa na ni yawng hte seng ai lam hpe shi aloi sha lu matsing ai. Grau nna, Yehowa gaw yawng mayawng hpe hpan ai wa re majaw, masha ni hpe bai jahkrung ya lu ai atsam, shi hta nga ai hpe chye lu ai.

14, 15. Hkrung rawt ai hte seng nna Yoba a ga ni gaw anhte hpe hpa sharin ya ai kun?

14 Sadi dung ai Yoba gaw, hkrung rawt ai lam hpe kam ai. “Masha gaw si wa yang, bai hkrung rawt lu na kun?” nga nna shi san ai. Bai nna, shi gaw Yehowa hpe “nang shaga nna, ngai nang hpe htan na n ngai; na lata e galaw ai wa hpe, nang nja nhpra nga ndai” ngu tsun ai. Yehowa gaw si mat ai ni hpe shi nan bai jahkrung ya na aten hpe la nga ai lam, Yoba chye ai.—Yoba 14:13-15.

 15 Bai hkrung rawt na hte seng nna, nang gara hku hkam sha ai kun? ‘Si mat sai nye a nta masha hte manang ni mung, bai hkrung rawt wa na kun?’ ngu nang myit yang myit na re. Yehowa gaw si mat ai ni hpe teng sha bai jahkrung ya mayu ai lam chye lu ai gaw, anhte hpe shalan shabran ya ai. Kadai ni hkrung rawt wa na, shanhte gara kaw nga na hte seng nna, Chyum Laika tsun ai hpe hti yu ga.

SHANHTE “SHI A NSEN NA NNA, PRU LU NA”

16. Mungkan ntsa bai hkrung rawt wa ai ni gaw, kaning re ai prat hte nga lu na kun?

16 Moi na bai hkrung rawt wa ai ni gaw mungkan ga hta nga ai shanhte a nta masha ni, manang ni hte bai hkrum lu ai. Htawm hpang hta mung dai zawn byin wa na re. Raitim, dai hta grau kaja na re. Hpa majaw kun? Bai hkrung rawt wa ai ni gaw mungkan ntsa htani htana asak hkrung lu ai ahkang nga nna, galoi mung bai si sana n re. Grau nna, ya na mungkan hte shai ai mungkan hta nga lu na re. Dai shara hta majan, tara tawt lai ai hte machyi ai lam ni nga sana n re.

17. Kadai ni hkrung rawt wa na kun?

17 Kadai ni hkrung rawt wa na kun? “Lup ni hta rawng nga ai ni nlang hte gaw shi a nsen na nna, pru lu na” ngu Yesu tsun ai. (Yawhan 5:28, 29) Shingran Laika 20:13 hta “nammukdara gaw tinang hta rawng ai, masha chyasi ni hpe bai ya wu ai; si hkrung si htan hte katsan ga mung, tinang ni hta rawng ai chyasi ni hpe bai ya mu ai” ngu tsun da ai. Wan hkying hku law ai masha ni gaw, asak bai hkrung wa na re. Kasa Pawlu mung, “ding man ai ni hte n ding n man ai ni” bai hkrung rawt wa na nga nna tsun ai. (Kasa 24:15 hpe hti u.) De a lachyum gaw hpa rai a ta?

Hparadisu hta si mat ai masha ni bai hkrung rawt wa nna shanhte tsawra ai ni hte bai hkrum zup lu na

18. Bai hkrung rawt wa na “ding man ai ni” gaw kadai ni rai a ta?

18 “Ding man ai ni” hta, Yesu mungkan ga de n sa shi yang, Yehowa hpe sadi dung wa ai mayam ni lawm ai.  Noa, Abraham, Sara, Mawshe, Ruhta, Eshta ni zawn re ai ni gaw, mungkan ntsa bai hkrung rawt wa na re. Dai kaw nna nkau mi a lam hpe Hebre daw kaba  11 hta nang hti mai ai. Anhte a prat hta si mat ai Yehowa a sadi dung ai mayam ni gaw gara hku ta? Shanhte mung “ding man ai ni” re majaw, bai hkrung rawt wa na re.

19. “N ding n man ai ni” gaw kadai ni rai a ta? Yehowa gaw shanhte hpe hpa ahkang jaw na kun?

 19 “N ding n man ai ni” hta, Yehowa a lam chye na ahkang n lu mat ai, wan hkying hku law ai masha ni lawm ai. Shanhte si mat tim, Yehowa shanhte hpe n malap ai majaw asak bai hkrung hkra galaw ya na re. Shi a lam sharin na hte nawku na ahkang shanhte lu na re.

20. Masha yawng hpa majaw bai n hkrung rawt ai kun?

20 Dai lachyum gaw, si mat ai ni yawng bai hkrung rawt wa na ngu tsun mayu ai kun? N re. Masha nkau mi gaw asak bai hkrung na n re ngu Yesu tsun ai. Gehenna kaw nga ai ni gaw bai hkrung rawt na n re nga nna Yesu tsun ai. Jinghpaw Chyum Laika hta Gehenna hpe “ngarai” nga nna ga gale da ai. (Luke 12:5) Masha langai bai hkrung rawt na, n rawt na hpe kadai dawdan ai kun? Yehowa gaw Tara Agyi daju raitim Yesu hpe “hkrung ai ni hte si sai ni a tara agyi tai na” ahkang jaw da ai. (Kasa 10:42) N hkru ai ni hte n kam galai shai ai ni hku nna tara jeyang hkrum yang bai hkrung rawt sana n re.—Jahtum Matsing 18 hpe yu u.

LAMU DE HKRUNG RAWT AI LAM

21, 22. (a) Sumsing lamu de hkrung rawt ai gaw hpa lachyum rai a ta? (b) Shawng ning nan sumsing lamu de hkrung rawt wa ai gaw kadai rai a ta?

21 Masha nkau mi lamu de hkrung rawt na lam mung, Chyum Laika hta tsun da ai. Masha langai gaw lamu de hkrung rawt yang, shinggyim hkum hkrang, shinggyim asak hte hkrung rawt na n re. Shi gaw wenyi hkum hte hkrung rawt na re.

22 Yesu gaw lamu de shawng ning nan hkrung rawt ai wa re. (Yawhan 3:13) Yesu sat hkrum nna masum ya na ai hpang, Yehowa shi hpe jahkrung ya ai. (Shakawn 16:10; Kasa 13:34, 35) Yesu gaw shinggyim hkum hkrang hte bai hkrung rawt ai n re. Yesu gaw, “hkum tsawp nan si mat ti mung, dai wenyi hta a hkrung nga ai” ngu, kasa Petru  sang lang dan ai. (1 Petru 3:18) Hpung atsam nga ai wenyi hkum hte Yesu hkrung rawt wa ai. (1 Korinhtu 15:3-6) Chyum Laika hta dai zawn hkrung rawt wa na masha ni naw nga na lam tsun da ai.

23, 24. Yesu tsun ai “sagu hpung kaji” gaw kadai ni rai nna dai hta marai kade lawm ai kun?

23 Yesu n si shi yang shi a sadi dung ai sape ni hpe “nanhte a matu nga shara lajang na she, ngai wa na” nga nna tsun da ai. (Yawhan 14:2) Dai gaw Yesu hpe kamsham ai ni kaw nna nkau mi gaw, shi hte rau sumsing lamu hta nga na matu, hkrung rawt wa na ngu ai lachyum re. Marai kade rai kun? “Sagu hpung kaji” nga nna Yesu tsun da ai majaw, masha n law na re. (Luka 12:32) Kasa Yawhan gaw Yesu hpe mu ai shaloi, “Ziun bum ntsa [sumsing lamu] e . . . sen mi mun mali e hkying mali mung, shi hte rau tsap nga” ai ngu tup hkrak tsun da ai.—Shingran 14:1.

24 Galoi aten hta Hkristan 144,000 gaw hkrung rawt na kun? Sumsing lamu hta Hkristu uphkang ai hpang she byin na lam Chyum Laika hta tsun da ai. (1 Korinhtu 15:23) Ya, anhte asak hkrung nga ai aten gaw Yesu uphkang ai aten rai nna 144,000 kaw nna law malawng gaw, lamu de hkrung rawt mat sai. Dai hta na nkau mi gaw mungkan ntsa hta naw nga nna, ya aten hta si mat yang kalang ta lamu de hkrung rawt mat na re. Raitim, htawm hpang hta masha law malawng gaw, mungkan Hparadisu hta asak hkrung na matu hkrung rawt wa na re.

25. Hpang na daw hta anhte hpa lam hkaja lu na kun?

25 Kade nna yang Yehowa gaw masha ni hpe si ai kaw nna shalawt ya na. Si hkrung si htan mung n nga na sai. (Esaia 25:8 hpe hti u.) Lamu de lung ai ni gaw dai hta hpa galaw na kun? Shanhte gaw Yesu hte rau Mungdan asuya hku nna uphkang na ngu Chyum Laika hta tsun da ai. Hpang na daw hta dai asuya hte seng ai lam grau chye lu na re.

^ စာပိုဒ်၊ 9 Chyum Laika hta maigan masha, Israela masha, num, la, asak kaji, kaba hpe jahkrung ya ai lam lawm ai. Dai lam ni hpe 1 Hkawhkam 17:17-24; 2 Hkawhkam 4:32-37; 13:20, 21; Mahte 28:5-7; Luka 7:11-17; 8:40-56; Kasa 9:36-42; 20:7-12 ni hta hti mai ai.