Content de lai

Secondary menu hpe lai

Malawm Ni Hpe Lai U

Yehowa Sakse Ni

Kachin

Chyum Laika Anhte Hpe Hpa Sharin Ya Ai Kun?

 Daw Masum

Shinggyim Masha A Matu Karai Kasang A Yaw Shada Lam Gaw Hpa Rai A Ta?

Shinggyim Masha A Matu Karai Kasang A Yaw Shada Lam Gaw Hpa Rai A Ta?

1. Masha a matu Karai a yaw shada lam gaw hpa rai a ta?

KARAI Kasang hta, shinggyim masha ni a matu kaja ai yaw shada lam nga ai. Adam yan Ewa hpe tsawm htap ai sun hta nga na matu, shi hpan tawn da ai. Shanhte a matu yaw shada lam gaw, kashu kasha ni shaprat nna mungkan ting hparadisu byin hkra galaw na hte dusat ni hpe yu lajang na matu re.—Ningpawt 1:28; 2:8, 9, 15; Jahtum Matsing 6 hpe yu u. 

2. (a) Karai Kasang gaw shi a yaw shada lam hte maren, galaw na hpe anhte gara hku chye lu a ta? (b) Htani htana asak hte seng nna Chyum Laika hpa tsun da a ta?

2 Hparadisu hta anhte htani htana nga lu na kun? Yehowa gaw “ngai myit shatawng da nna, dai hpe galaw na” ngu tsun da ai. (Esaia 46:9-11; 55:11) Shi yaw shada da ai hte maren galaw nna hpa mung pat shingdang n lu ai. Yehowa gaw, mungkan hpe yaw shada lam nga ai majaw hpan da ai. Kaman lila hpan da ai n re. (Esaia 45:18) Mungkan ntsa hta masha ni nga na hpe shi ra sharawng ai. Karai Kasang gaw kadai ni hpe nga shangun mayu ai kun? Kade daram na hkra kun? “Ding hpring ai ni gaw dai mungdan hpe madu lu nna, dai hta e nan nawng e nga nga lu na ma ra ai” ngu Chyum Laika hta tsun da ai.—Shakawn 37:29; Shingran 21:3, 4.

3. Masha ni machyi ai, si nga ai hte seng nna, nang hta hpa ga san nga ai kun?

3 Raitim, ya aten hta machyi ai, si ai lam ni hpe masha ni hkrum nga ma ai. Shara law law hta, shada da gasat hkat, sat hkat nga ai. Dai gaw, Karai Kasang a yaw shada lam n re. Hpa majaw ndai hku byin wa ai kun? Chyum Laika sha tsun dan lu ai.

 KARAI KASANG A HPYEN

4, 5. (a) Edin sun hta Ewa hpe lapu kaw nna ga shaga ai wa gaw kadai rai a ta? (b) Ding man ai masha langai lagut gara hku byin chye ai kun?

4 Chyum Laika hta, Karai Kasang a hpyen gaw “Nat hte Satan” ngu ai wa re ngu tsun da ai. Satan gaw, Edin sun hta Ewa hpe ga shaga na matu, lapu langai hpe jailang ai. (Shingran 12:9; Ningpawt 3:1) Dai lapu ga shaga chye ai zawn Satan galaw wa ai.—Jahtum Matsing 7 hpe yu u.

5 Nat Satan hpe Karai Kasang hpan ai kun? N re. Adam yan Ewa a matu mungkan hpe Karai Kasang hpan ai aten hta lamu kaw nga nga ai lamu kasa langai gaw, hpang de htak mat nna nat byin mat ai. (Yoba 38:4, 7) Gara hku byin mat ai kun? Ga shadawn, myit ding man ai masha langai lagut byin wa ai hpe myit yu ga. Shi gaw, masha ni a arai hpe ra marin ai myit nga wa ai. Dai hpe sha, shi matut myit nga ai majaw, ra marin ai myit grau kaba wa ai. Dai hpang, shi ra marin nga ai arai hpe lagu dat nna shi hkum shi lagut byin hkra galaw dat ai. Shi kanu gaw, shi hpe lagut hku nna shangai dat ai n re.—Yaku 1:13-15 hpe hti u; Jahtum Matsing 8 hpe yu u.

6. Lamu kasa langai gaw, Karai Kasang a hpyen gara hku byin wa ai kun?

6 Dai lamu kasa hpa byin mat ai kun? Yehowa gaw, Adam yan Ewa hpe hpan ngut ai hpang, kashu kasha shaprat nna, “ga ting hpe jahpring” na matu tsun ai. (Ningpawt 1:27, 28) Dai lamu kasa gaw, ‘dai masha yawng Yehowa hpe nawku na malai ngai hpe nawku yang grai kaja na wa’ nga nna myit na re. Shi dai hpe grau myit magang, Yehowa sha madu ai hpe grau ra marin wa magang re. Dai lamu kasa gaw, shi hpe masha ni nawku na hpe ra sharawng wa ai. Dai majaw, shi Ewa hpe masu hkalem dat ai. (Ningpawt 3:1-5 hpe hti u.) Dai hku galaw nna, Karai Kasang a hpyen, Nat Satan byin wa ai.

7. (a) Adam yan Ewa hpa majaw si ra ai kun? (b) Anhte mung hpa majaw asak kung wa nna si ra ai kun?

 7 Adam yan Ewa gaw Karai Kasang a ga n madat nna namsi hpe sha kau ai. (Ningpawt 2:17; 3:6) Shanhte Yehowa hpe ninghkap nna yubak galaw ai majaw, Yehowa tsun da ai hte maren, shanhte si ra ai. (Ningpawt 3:17-19) Adam yan Ewa a kasha ni mung, yubak masha ni sha re ai majaw si ra ai. (Roma 5:12 hpe hti u.) Adam yan Ewa a kasha ni, hpa majaw yubak lu ai hpe chye na na matu, lagyawk ai di hta muk kabaw ai lam hpe myit yu ga. Dai muk shagu hta lagyawk ai hkang lawm nga na re. Karai Kasang a ga Adam n madat ai majaw, yubak lu wa ai. Anhte mung, Adam a kasha ni re ai majaw, shi hta nga ai yubak anhte hta nga wa ai. Yubak kap ai ni re ai majaw, anhte yawng asak kung wa nna si ra ai.—Roma 3:23; Jahtum Matsing 9 hpe yu u.

8, 9. (a) Satan gaw Adam yan Ewa hpe hpa kam shangun mayu ai kun? (b) Yehowa gaw, ninghkap ai ni hpe hpa majaw kalang ta n sat kau ai kun?

8 Satan gaw, Adam yan Ewa hpe Karai Kasang a ga n madat na matu, lau la ai aten kaw nna, Yehowa hpe ninghkap ai wa byin wa ai. Yehowa gaw masu ai wa, n kaja ai uphkang madu, kaja ai hpe n kam jaw ai wa hku nna, Adam yan Ewa hpe shi kam shangun mayu ai. Masha ni hpe hpa galaw ra ai ngu, Karai Kasang n tsun ra ai; Jaw ai shut ai hpe tinang nan daw dan ging ai ngu ai baw lachyum nga ai ga, Adam yan Ewa hpe Satan tsun ai. Dai majaw, Yehowa hpa galaw na kun? Ninghkap ai ni hpe sat kau nna ninghkap ai lam hpe jahkring kau mai ai. Raitim, dai hku galaw ai gaw Satan hpe masu ai wa re ai lam sakse madun lu na kun? N madun lu ai.

9 Dai majaw, Yehowa gaw ninghkap ai ni hpe kalang ta n sat kau ai. De a malai, masha shada da uphkang na matu ahkang jaw da ai. Rai yang she, Satan gaw masu ai wa rai nna, masha a lam Yehowa sha grau chye ai hpe a san sha mu lu na. Dai lam hpe Daw 11 hta grau nna chye lu na re. Adam yan Ewa a daw dan lam hpe, nang gara hku shadu ai kun?  Shan gaw Satan hpe kam nna, Karai Kasang a ga n madat ai gaw jaw ai kun? Adam hte Ewa hta nga ai yawng mayawng gaw Yehowa jaw da ai re. Dai hta hkum tsup ai asak, tsawm htap ai nga shara hte bungli ni lawm ai. Raitim, Satan gaw shan a matu hpa mung n galaw ya ai. Adam a shara hta nang rai yang gara hku galaw na kun?

10. Anhte hta hpa lata na ahkang nga ai kun?

 10 Ya aten hta mung, Adam zawn lata na ahkang anhte hta nga ai. Anhte a asak gaw, anhte lata ai lam hta madung nga ai. Yehowa shing nrai Satan hpe anhte a uphkang madu hku nna lata mai ai. Yehowa hpe uphkang madu hku nna lata yang, Satan hpe masu ai wa ngu sakse madun lu na re. (Shakawn 73:28; Ga Shagawp 27:11 hpe hti u.) Raitim, masha kachyi mi daram sha Karai Kasang hpe uphkang madu hku nna lata ma ai. Gaja nga yang, ya aten hta Karai Kasang gaw mungkan hpe uphkang nga ai n re. Karai Kasang n rai yang kadai rai a ta?

MUNGKAN HPE KADAI UPHKANG NGA AI KUN?

Ndai mungkan hpe Satan n madu yang, Yesu hpe jaw lu na kun?

11, 12. (a) Yesu hpe Satan tsun ai ga kaw nna anhte hpa chye lu a ta? (b) Gara Chyum daw ni gaw, mungkan hpe Satan uphkang ai lam madun ai kun?

11 Mungkan hpe kadai uphkang nga ai lam Yesu chye ai. Satan gaw, Yesu hpe “Mungkan ga na mungdan nlang hte hte dai ni a arawng sadang” hpe madun ai. Dai hpang, Yesu hpe “nang dingnyawm nna ngai hpe nawku n yang gaw, ndai yawng mayawng hte hpe ngai nang hpe jaw na de ai” nga nna Satan ga sadi jaw ai. (Mahte 4:8, 9; Luka 4:5, 6) Tinang hkrai ndai hku san yu u: ‘Dai mungdan ni hpe Satan n madu yang, Yesu hpe jaw lu na kun?’ N jaw lu ai. Mungkan ting hpe Satan madu ai.

12 Nang ndai hku myit na re. ‘Satan gaw mungkan a uphkang madu gara hku byin mai na kun? Chyahtum chyalai n-gun rawng ai Karai Kasang Yehowa gaw, ninggawn tawa hpe hpan da ai n re ni?’ (Shingran 4:11) Re, raitim Yesu gaw Satan hpe “ndai mungkan Du wa” nga nna shaga da ai. (Yawhan 12:31; 14:30; 16:11) Kasa Pawlu gaw, Nat Satan hpe “ndai mungkan ga na Hpara” nga nna tsun da ai. (2 Korinhtu 4:3, 4) Kasa Yawhan mung, “mungkan ting gaw dai n hkru ai wa hta e lup mat wa ai” nga nna ka da ai.—1 Yawhan 5:19.

SATAN A MUNGKAN GARA HKU HTEN ZA MAT NA KUN?

13. Anhte hpa majaw mungkan nnan ra ai kun?

13 Ndai mungkan gaw, lani hte lani shoi hpa ni law wa ai. Anhte a makau grupyin hta majan ni, akyang hten ai ni, hpyi hpun ai ni hte n hkru ai ni hpe mu nga ai. Masha ni kade shakut tim, dai manghkang ni hpe n yeng seng kau lu ai. Raitim, Karai Kasang gaw kade nna yang, Hara Magedon hta n hkru ai ndai mungkan hpe jahten kau nna, ding hpring ai mungkan nnan hpe gaw de ya na re.—Shingran 16:14-16; Jahtum Matsing 10 hpe yu u.

14. Karai Kasang gaw kadai hpe Shi A Mungdan Hkawhkam hku nna lata da sai kun? Chyum Laika hta Yesu a lam hpe gara hku tau hkrau tsun da ai kun?

14 Yehowa gaw, Yesu Hkristu hpe sumsing lamu Mungdan asuya a Hkawhkam hku nna lata da sai. Chyum Laika hta, Yesu hpe “Ngwi Pyaw Madu” hku uphkang nna, shi a asuya gaw prat dingsa grin nga na ngu, tau hkrau tsun da ai. (Esaia 9:5, 6) Madu Yesu gaw, dai asuya a matu akyu hpyi ya na lam tsun ai shaloi, “Na a mungdan du wa ru ga; lamu tang hta, na a myit dik nga ai hte maren, ga ntsa e mung, dik lit ga law” nga nna sharin ya ai. (Mahte 6:10) Daw 8 hta, mungkan asuya a shara hta Karai Kasang a Mungdan gara hku malai shang wa na hpe anhte chye lu na re. (Daniela 2:44 hpe hti u.) Karai Kasang a Mungdan gaw, mungkan ga hpe tsawm htap ai hparadisu byin hkra galaw ya na re ai.—Jahtum Matsing 11 hpe yu u.

MUNGKAN NNAN NI SAI!

15. “Ginding aga nnan” gaw hpa rai a ta?

15 Chyum Laika hta “Shi a ga ndat majaw, ding hpring rawng ai sumsing lamu nnan hte ginding aga nnan hpe, anhte myit mada nga ga ai.” (2 Petru 3:13; Esaia 65:17) Kalang lang, Chyum Laika hta “ga” ngu tsun ai shaloi, mungkan hta nga ai masha ni hpe tsun ai re. (Ningpawt 11:1) Dai majaw, ding hpring ai “ginding aga nnan” ngu ai  gaw, Karai Kasang a ga madat nna, shaman chyeju lu na masha ni hpe tsun mayu ai re.

16. Karai Kasang a mungkan nnan hta nga ai ni hpe hpa kumhpa jaw na kun? Dai kumhpa lu mayu yang anhte hpa galaw ra na kun?

16 Karai Kasang a mungkan nnan hta nga ai ni hpe “n htum n wai asak” jaw na nga nna Yesu ga sadi jaw da ai. (Marku 10:30) Ndai kumhpa lu na matu, anhte hpa galaw ra na kun? Chyeju hte Yawhan 3:16 hte 17:3 hpe hti nna mahtai tam yu u. Mungkan Hparadisu hta kaning re ai prat lu na lam, Chyum Laika tsun ai hpe hti yu ga.

17, 18. Mungkan ntsa hta, ngwi pyaw simsa nna shim lum ai lam lu na hpe anhte gara hku chye lu a ta?

17 N hkru ai lam, majan, upadi tawt lai ai lam hte dawsa ai lam ni nga sana n re. Mungkan ntsa hta n hkru ai masha ni nga sana n re. (Shakawn 37:10, 11) Karai Kasang gaw, “ga ting hta na hpyen majan shi jasim kau” na re. (Shakawn 46:9; Esaia 2:4) Mungkan ga gaw, Karai Kasang hpe tsawra ai ni, shi a ga madat ai ni hte hpring nga na. Dai shara hta htani htana ngwi pyaw simsa nga na re.—Shakawn 72:7.

18 Yehowa a masha ni gaw shim lum ai lam lu na re. Chyum Laika prat hta, Israela masha ni Karai Kasang a ga madat ai shaloi, shi makawp maga ya ai majaw, shim lum ma ai. (Jaw Jau 25:18, 19) Hparadisu hta, anhte hpa hpe mung n hkrit ra sai. Anhte galoi mung shim lum na re.—Esaia 32:18; Mihka 4:4 ni hpe hti u.

19. Karai Kasang a mungkan nnan hta lu sha law htam wa na hpe anhte hpa majaw kam mai ai kun?

19 Lu sha law htam wa na. “Mungdan na bum ni a pungding du hkra, nai mam paw wa” na re. (Shakawn 72:16) “Anhte a Karai Kasang, anhte hpe shaman ya” nna “aga gaw shi a nsi naisi dik hkra shapraw ya” na re ai.—Shakawn 67:6.

20. Mungkan ga gaw, hparadisu byin wa na lam anhte gara hku chye lu a ta?

20 Mungkan ting hparadisu byin wa na. Masha ni hta tsawm htap ai nta ni hte sun ni nga na re. (Esaia 65:21-24; Shingran 11:18 ni hpe hti u.) Mungkan ting gaw, Edin sun  zawn tsawm htap wa na. Anhte ra kadawn ai yawng hpe Yehowa galoi mung jaw na re. “Na a lata hpe nang hpaw nna, hkrung mahkrung ni hpe kaja ai hte shakat da mu ai” nga nna Chyum Laika hta tsun da ai.—Shakawn 145:16.

21. Masha hte dusat a lapran simsa lam lu na hpe anhte gara hku chye a ta?

21 Masha hte dusat a lapran simsa lam lu wa na. Dusat ni gaw, masha ni hpe dingbai dingna jaw sana n re. Dai ni anhte hpe dingbai dingna jaw nga ai dusat ni a makau hta, ma kaji ni nga tim n hkrit ra sai.—Esaia 11:6-9; 65:25 ni hpe hti u.

22. Machyi ai ni a matu Yesu hpa galaw ya na kun?

22 Kadai mung machyi sana n re. Yesu mungkan ntsa nga ai shaloi, masha law law hpe shamai ya wa ai. (Mahte 9:35; Marku 1:40-42; Yawhan 5:5-9) Yesu gaw, Karai Mungdan a Hkawhkam hku nna yawng hpe shamai ya na re. Kadai mung “ngai machyi nga nngai” ngu tsun sana n re.—Esaia 33:24; 35:5, 6

23. Karai Kasang gaw si mat ai ni hpe hpa galaw ya na kun?

23 Si ai ni bai hkrung rawt wa na. Karai Kasang gaw, wan hkying hku law ai masha ni hpe bai jahkrung ya na nga nna ga sadi jaw da ai. “Ding man ai ni hte n ding n man ai ni a matu, bai hkrung rawt wa na lam nga ai.”—Yawhan 5:28, 29 hpe hti u; Kasa 24:15.

24. Hparadisu hta nga lu na hte seng nna nang gara hku hkam sha ai kun?

24 Anhte yawng hta lata na ahkang nga ai. Anhte Yehowa a lam sharin la nna shi hpe nawku na matu (sh) anhte ra sharawng ai hpe galaw na matu lata mai ai. Yehowa hpe nawku na matu lata na nga yang, ngwi pyaw ai htawm hpang prat lu la na re. Damya langai gaw shi si mat ai hpang, shi hpe myit dum na matu tsun ai shaloi, Yesu gaw “ngai hte rau Hparadisu e nga na rai nga ai” nga nna ga sadi jaw ai. (Luka 23:43) Karai Kasang a ga sadi ni hpring tsup hkra Yesu gara hku galaw na hte Yesu Hkristu a lam hkaja yu ga.