Content de lai

Secondary menu hpe lai

Malawm Ni Hpe Lai U

Yehowa Sakse Ni

Kachin

Chyum Laika Anhte Hpe Hpa Sharin Ya Ai Kun?

 Daw Shi Masum

Karai Kasang Jaw Ai Asak Hpe Manu Shadan Ra

Karai Kasang Jaw Ai Asak Hpe Manu Shadan Ra

1. Anhte hpe asak kadai jaw da ai kun?

YEHOWA gaw “a hkrung nga ai Karai Kasang” re. (Yeremia 10:10) Shi gaw anhte a Hpan Madu rai nna, anhte hpe asak jaw da ai. Chyum Laika hta “nga yawng nga pra hte hpe nang hpan tawn da nna, dai hte gaw na a myit ra ai hku jaw e tai ma ai hte hpan tawn da hkrum ma ai” nga nna tsun da ai. (Shingran 4:11) Yehowa gaw anhte hpe asak hkrung shangun mayu ai. Asak gaw Yehowa jaw ai kumhpa re.—Shakawn 36:9 hpe hti u.

2. Anhte a prat hta awng dang na matu hpa galaw ra na kun?

2 Yehowa gaw anhte matut asak hkrung na matu lusha hte hka zawn re ai anhte ra kadawn nga ai ni yawng hpe jaw da ai. (Kasa 17:28) Dai hta n-ga, shi gaw anhte hpe ngwi pyaw shangun mayu ai. (Kasa 14:15-17) Anhte a prat hta awng dang lam lu na matu, Karai Kasang a tara ni hpe hkan sa ra ai.—Esaia 48:17, 18.

ASAK HTE SENG NNA KARAI KASANG A HKAM SHA LAM

3. Abela hpe Ka-in sat ai shaloi Yehowa hpa galaw wa ai kun?

3 Anhte yawng a asak gaw Yehowa a matu manu dan ai nga nna Chyum Laika hta tsun da ai. Ga shadawn, Adam yan Ewa a kasha Ka-in gaw, shi a kanau Abela hpe masin pawt ai shaloi, dai myit hpe hkang ra ai ngu Yehowa sadi jaw ai. Raitim, Ka-in n madat ai sha, grai pawt let “kanau wa Abela hpang de rawt nna, shi hpe sat kau wu ai.” (Ningpawt 4:3-8) Abela hpe sat kau ai majaw Yehowa shi hpe ari jaw ai. (Ningpawt 4:9-11) Masin pawt ai hte n ju n dawng ai gaw shoihpa grai nga ai. Dai gaw dawsa ai hte n hkru ai lam ni hpe byin shangun nga ai. Dai zawn re ai  masha gaw htani htana asak n lu ai. (1 Yawhan 3:15 hpe hti u.) Yehowa ra sharawng na matu masha yawng hpe tsawra ra ai.—1 Yawhan 3:11, 12.

4. Israela ni hpe Karai Kasang jaw da ai tara ni kaw nna langai gaw, asak kumhpa hte seng nna anhte hpe hpa sharin ya ai kun?

4 Shaning hkying hku na ai hpang, Yehowa gaw Mawshe hpe Tara Kanu Shi jaw ai shaloi, asak hpe shi manu shadan ai lam madun dan ai. Dai hta “masha hkum sat” nga nna tsun da ai. (Tara Jahprang 5:17) Marai langai gaw masha langai hpe dingsang sat yang, shi bai sat hkrum na re.

5. Ma shabrai ai hte seng nna Karai Kasang gara hku mu mada ai kun?

5 Ma shabrai ai hte seng nna Karai Kasang gara hku mu mada ai kun? N shangai shi ai ma a asak hpe pyi, Yehowa manu shadan ai. Israela ni hpe Yehowa jaw ai Tara hta marai langai gaw, ma hkum re ai num hpe hkra nna ma si mat yang, dai wa gaw sat hkrum na re. (Pru Mat 21:22, 23 hpe hti u; Shakawn 127:3.) Dai hpe yu yang, ma shabrai ai gaw shut ai hpe chye lu ai.—Jahtum Matsing 27 hpe yu u.

6, 7. Asak hpe manu shadan ai lam Yehowa hpe anhte gara hku madun na kun?

6 Tinang hte kaga ni a asak hpe anhte manu shadan ai lam, Yehowa hpe gara hku madun na kun? Tinang hte kaga ni a asak hpe shoihpa jaw ai lam yawng hpe koi ai hku nna madun mai ai. Dai majaw asak sum shangun ai malut, hkayawm hte kani nanghpam ni hpe koi ra ai.

7 Karai Kasang gaw, anhte hpe hkum hkrang hte asak jaw da ai majaw, shi myit ra ai hku asak hkrung ra ai. Dai majaw, anhte a hkum hpe atsawm makawp maga ra ai. Dai hku n galaw yang, Karai Kasang a man hta n san seng ai ni byin mat na re. (Roma 6:19; 12:1; 2 Korinhtu 7:1) Asak hpe anhte manu n shadan chye yang, asak jaw ai Yehowa hpe nawku na gaw n mai byin ai. Asak hpe manu dan ai hku mu nna, n kaja ai akyang ni hpe tawn kau na matu yak  tim, shakut nna galai shai yang nang hpe Yehowa karum ya na re.

8. Anhte hte kaga ni a asak hpe shoihpa n nga hkra anhte gara hku galaw na kun?

8 Asak gaw manu dan ai kumhpa re ai lam anhte chye lu sai. Tinang hte kaga ni a asak hpe shoihpa jaw ai hpe koi na matu, anhte dang lu ai daram shakut na hpe Yehowa kam ai. Mawdaw, sengke zawn re ai ni hpe gau ai shaloi, shoihpa n nga hkra anhte sadi ai. Shoihpa nga ai (sh) laja lana re ai ginsup lam ni hpe mung anhte koi ai. (Shakawn 11:5) Anhte a nta hta mung shoihpa ni n byin hkra dang lu ai daram galaw da na re. Israela ni hpe, “Nta magaw na masha hkrat ai a majaw, na nta hta masha sat ai yubak n du lit ga, nang nta nnan galaw ai shaloi, nta magaw ntsa hpe makau grup hkum ban na rai ndai” nga nna Yehowa hkang da ai.—Tara Jahprang 22:8.

9. Dusat ni hpe gara hku akyu jashawn ging ai kun?

9 Dusat ni hpe anhte yu lajang ai lam pyi Yehowa a matu grai ahkyak ai. Dusat ni hpe sha na matu, buhpun na matu hte anhte hpe shoihpa jaw wa yang sat na matu sha shi ahkang jaw da ai. (Ningpawt 3:21; 9:3; Pru Mat 21:28) Raitim, dusat ni hpe zingri na matu (sh) ginsup na matu n mai sat ai.—Ga Shagawp 12:10.

ASAK A CHYOI PRA AI LAM HPE MANU SHADAN RA

10. Asak gaw sai hta grin ai lam anhte gara hku chye lu ai kun?

10 Asak gaw sai hta grin ai majaw, Yehowa a matu sai gaw chyoi pra ai. Abela hpe Ka-in sat kau ai hpang, Yehowa gaw Ka-in hpe “n nau wa a asai nsen gaw ga de nna ngai hpe jahtau nga ai” nga nna tsun ai. (Ningpawt 4:10) Abela a asai ngu Yehowa tsun ai shaloi, Abela a asak hpe tsun ai re. Abela a asai (sh) asak gaw tara rap ra na matu Yehowa hpe hpyi shawn taw ai hte bung ai. Abela hpe sat kau ai majaw Ka-in gaw ari jaw hkrum na re. Noa prat hta hka sha-u ing ngut ai hpang, asak gaw sai hta grin  ai lam Yehowa bai tsun ai. Yehowa gaw Noa hte shi a nta masha ni hpe, dusat ni a shan sha na matu ahkang jaw wa ai. “Nsoi nsa rawng nna shamu shamawt chye ai baw mahkra gaw nanhte a matu shahpa tai na rai nga ai: tsit lali ai nsi naisi hpe zawn, yawng mayawng ngai nanhte hpe jaw da” ai ngu shi tsun ai. Raitim, Yehowa hkang da ai lam langai gaw, “asak rawng ai asai hte nawng ashan n sha lu na rai myit dai” ngu ai re.—Ningpawt 1:29; 9:3, 4.

11. Israela amyu ni hpe sai hte seng nna Yehowa hpa tsun da ai kun?

11 Yehowa gaw Noa hpe sai n sha na matu tsun ngut nna shaning 800 daram na ai hpang Yehowa gaw shi a masha ni hpe ndai hku bai tsun ai: “Israela kashu kasha ni hta na rai ti mung, nanhte kaw sa shingbyi nga ai amyu kaga ni hta na rai ti mung, marai langai ngai jaugawng gawng nna, sha mai ai ashu ashan, a-u re ai lu yang, de a asai hpe hkaw kau nna aga hte kaput na rai mu ai.” Bai shi gaw, “asai mung sha lu na n rai” nga nna kahtap tsun ai. (Jaw Jau 17:13, 14) Yehowa gaw shi a masha ni sai hpe chyoi pra ai hku mu mada na matu ra sharawng nga ai. Shanhte gaw shan hpe sha mai tim, sai hpe gaw n sha mai ai. Shanhte gaw sha na matu, dusat langai hpe sat ai shaloi, sai hpe ga de ru kau ra ai.

12. Hkristan ni sai hpe gara hku mu mada ra ai kun?

12 Yesu si nna shining loi mi na ai hpang, Yerusalem kaw nna kasa ni hte salang ni gaw, Mawshe a Tara ni hta na gara tara hpe, Hkristan ni matut hkan sa ra na lam, dawdan wa ai. (Kasa 15:28, 29 hpe hti u; 21:25.) Yehowa gaw sai hpe galoi mung manu shadan ai. Dai majaw, sai hpe manu shadan ra ai ngu ai hpe chye na hkra, kasa ni hpe shi karum ya wa ai. Tsaban langai na Hkristan ni gaw, sai hpe lu ai, sha ai (sh) sai n jahkaw ai shan hpe sha ai baw n galaw ma ai. Shanhte sai sha na nga yang, hpye ai amu galaw ai (sh) gawkngu sumla nawku ai daram mara kaba ai. Dai aten kaw nna, teng man ai Hkristan ni gaw sai hpe lu ai, sha ai hpe koi gam ma ai. Dai ni aten hta gaw  gara hku kun? Yehowa gaw ya du hkra sai hpe chyoi pra ai hku anhte hpe mu shangun mayu ai.

13. Hkristan ni gaw sai bang ai hpe hpa majaw n hkap la ai kun?

13 Sai hpe n mai sha ai gaw, sai bang ai hpe mung koi ra na ngu ai lachyum kun? Re ai. Yehowa gaw, anhte hpe sai lu ai, sha ai hpe n galaw na matu hkang da ai. Sarawun gaw tsa chyaru n mai lu ai ngu tsun yang, na hkum de samyit hte htu bang na kun? Galaw na n re. Dai hte maren, sai hpe n lu n sha na matu tsun ai gaw, sai n mai bang ai lachyum re.—Jahtum Matsing 28 hpe yu u.

14, 15. Hkristan langai a matu Yehowa a ga madat nna asak hpe manu shadan na gaw kade daram ahkyak ai kun?

14 Lama na, sarawun gaw anhte hpe sai n bang yang si na ngu tsun wa yang, hpa galaw na kun? Sai hte seng ai Karai Kasang a tara hpe madat na n madat na gaw tinang nan dawdan ra ai. Karai Kasang jaw ai asak hpe Hkristan ni manu shadan ai majaw, asak hkrung na matu sai a malai tsi ai ladat ni hpe tam na re. Sai bang ai hpe gaw n hkap la ai.

15 Asak gaw Karai Kasang a matu manu dan ai majaw anhte hkamja hkra shakut nga ga ai. Raitim sai gaw n bang ga ai. Yehowa a ga n madat nna, anhte a asak galu hkra shakut ai hta, shi a ga madat na gaw grau ahkyak ai. “Tinang a asak hpe hkye la mayu ai wa kadai mung, dai sum mat na lu ai; nye a jaw e tinang a asak sum ai wa chyawm gaw, dai hpe mu lu na ru ai” nga nna Yesu tsun ai. (Mahte 16:25) Yehowa hpe tsawra ai majaw shi a ga hpe anhte madat mayu ai. Anhte a matu kaja htum lam hpe shi chye ai. Dai majaw, Yehowa mu mada ai hku anhte mung asak hpe, manu dan nna chyoi pra ai hku mu mada ai re.—Hebre 11:6.

16. Karai Kasang a mayam ni gaw shi a ga hpe hpa majaw madat ai kun?

16 Karai Kasang a mayam ni gaw, sai hte seng ai tara hpe hkan sa na matu daw dan da ai. Shanhte gaw sai hpe n lu,  n sha ai zawn tsi tsi na matu mung sai hpe n bang ai. * Raitim, asak hpe hkye na matu kaga tsi tsi ai ladat ni hpe gaw shanhte hkap la ma ai. Asak hte sai a Hpan Madu gaw, masha a matu kaja htum hpe chye ai lam shanhte kam ai. Na matu kaja htum hpe Karai Kasang chye ai lam nang kam ai kun?

LAM LANGAI HTA SHA SAI HPE LANG NA MATU YEHOWA AHKANG JAW

17. Israela ni sai hpe lang na matu Yehowa ahkang jaw ai lam langai gaw hpa rai kun?

17 Mawshe hpe jaw ai Karai Kasang a Tara hta, Yehowa gaw Israela masha ni hpe, “hkum shan a asak gaw asai hta rawng nga ai: nanhte a myit masin matu htingrai htingrat ya na, dai asai hpe tawn hkungri ntsa e ngai nanhte hpe jaw da se ai; . . . asai gaw htingrai htingrat ya lu ai” nga nna tsun ai. (Jaw Jau 17:11) Israela masha ni mara galaw ai shaloi, hkinjawng agyi gaw dusat hpe hkungga nawng nna, hkungri ntsa sai ru bun na nga yang Yehowa mara raw ya ai. Sai hpe dai lam langai hta sha akyu jashawn na matu, Israela ni hpe Yehowa ahkang jaw ai.

18. Yesu a gawng malai jahpu kaw nna anhte hpa akyu lu ai kun?

18 Mungkan de Yesu sa ai gaw, anhte a mara raw dat hkrum na matu, shi a asak (sh) asai hpe gawng malai jahpu hku nna sa jaw ai re. Dai gaw, dusat hte hkungga nawng ai tara a malai re. (Mahte 20:28; Hebre 10:1) Yesu hpe, Yehowa sumsing lamu de bai jahkrung ya ai hpang, Yehowa hpe gawng malai jahpu shi ap nawng ya wa sai. Dai shaloi, shinggyim masha ni htani htana asak lu na lam hpaw wa ai. Dai majaw, Yesu a asak gaw grai manu dan ai.—Yawhan 3:16; Hebre 9:11, 12; 1 Petru 1:18, 19.

Asak hte sai hpe manu shadan ai lam nang gara hku madun lu na kun?

19. “Masha yawng a asai hte” lawt lu hkra anhte hpa galaw ra ai kun?

 19 Manu dan ai asak kumhpa hpe jaw ai majaw, Yehowa hpe anhte chyeju dum ai. Yesu hpe kam sham yang, htani htana asak lu na lam masha ni hpe anhte tsun dan mayu ai. Masha ni hpe anhte tsawra ai majaw, asak gara hku lu mai ai lam, dang lu ai daram tsun dan ai. (Ezekela 3:17-21) Rai yang, kasa Pawlu zawn, anhte ndai hku lu tsun na re: “Masha yawng a asai hte ngai lawt ni ai . . . Karai Kasang a ra ai hku hte tup, nanhte hpe hkaw dan na, ngai ginhtim yu nngai n rai.” (Kasa 20:26, 27) Yehowa a lam hte shi gaw asak hpe grai manu shadan ai lam masha ni hpe anhte tsun dan nna, sai hte asak hpe grai hkungga ai lam madun ai.

^ စာပိုဒ်၊ 16 Sai bang ai lam hte seng nna grau chye mayu yang, Yehowa Sakse Ni dip shapraw ai “Karai Kasang A N-Gaw Nwai Ai Myit Hta A Nga Nga Mu” [lv-BU] ngu ai laika buk a laika man 77-79 hpe yu u.