Content de lai

Secondary menu hpe lai

Malawm Ni Hpe Lai U

Yehowa Sakse Ni

Kachin

Chyum Laika Anhte Hpe Hpa Sharin Ya Ai Kun?

 Daw Langai

Karai Kasang Gaw Kadai Rai Kun?

Karai Kasang Gaw Kadai Rai Kun?

1, 2. Masha ni gara ga san ni san chye ai kun?

MA ni ga san grai san chye ai. Shanhte hpe tsun dan tim, ‘hpa majaw rai?’ nga nna bai san ma ai. Nang shakut nna mahtai bai jaw tim, ‘hpa majaw kun?’ nga nna sha bai matut san ma ai.

2 Asak kade daram raitim, anhte yawng hta ga san ni nga ai. Ga shadawn, lam dam ai shaloi gara hku sa na, machyi ai shaloi gara hku tsi na ngu ai ni hpe anhte san chye ga ai. Prat hte seng ai, htawm hpang hte seng ai, ahkyak ai ga san ni mung nga ai. Raitim, dai ga san ni a matu myit dik ai mahtai hpe n lu ai majaw, matut nna n tam ma ai.

3. Masha law law gaw, ahkyak ai ga san ni a mahtai hpe hpa majaw n tam ma ai kun?

3 Anhte san mayu ai ahkyak ai ga san ni a mahtai, Chyum Laika hta nga ai kun? Masha nkau mi gaw, Chyum Laika hta lawm ai mahtai ni hpe, grai chye na yak ai ngu tsun ma ai. Dai mahtai ni gaw, hpung sara ni hte sha seng ai ngu nkau mi tsun ma ai. Nkau mi chyawm gaw, shanhte n chye ai nga nna tsun na hpe kaya ma ai. Nang gaw gara hku kun?

4, 5. Nang gara ga san ni hpe san mayu ai kun? Mahtai hpe matut nna hpa majaw tam ra ai kun?

4 Anhte hpa a matu asak hkrung nga ai kun? Anhte si mat ai hpang hpa byin mat na kun? Karai Kasang gaw kaning re ai Karai rai kun? ngu ai ga san ni a mahtai ni hpe nang chye mayu na re. Madu Yesu gaw, “Hpyi mu, shaloi nanhte lu la na myit dai; tam mu, shaloi nanhte mu lu na myit dai; akawk mu, shaloi nanhte a matu hpaw na ra ai” nga nna tsun wa ai. (Mahte 7:7) Myit dik ai mahtai, nang nlu dingsa matut tam nga u. 

 5 Matut “tam” na nga yang, Chyum Laika kaw nna mahtai ni lu na re. (Ga Shagawp 2:1-5) Mahtai ni gaw chye na na matu n yak ai. Dai mahtai ni gaw, ya aten hta grau ngwi pyaw ai prat hkrun lam lu shangun nna, htawm hpang a matu mung myit mada lam jaw ai. Masha law law myit shuk nga ai ga san langai hpe yu yu ga.

KARAI KASANG GAW ANHTE HPE YU LANU LAHKU AI KUN? (SH) MATSAN DUM N CHYE AI KUN?

6. Masha nkau mi gaw, shanhte jamjau hkrum ai shaloi, Karai Kasang lanu lahku lam n nga ai ngu hpa majaw shadu ai kun?

6 Masha law law gaw, Karai Kasang anhte hpe lanu lahku lam n nga ai ngu sawn la ma ai. Karai Kasang teng sha lanu lahku yang, mungkan gaw ya na zawn byin nga na n re ngu tsun ai. Shara shagu hta majan, masha shada nju ai hte yawn hkyen ai lam ni byin nga ai. Masha ni gaw machyi makaw, jamjau hkrum let si nga ai. ‘Karai Kasang lanu lahku ai rai yang, yakhkak jamjau ai lam ni hpe hpa majaw byin shangun ai kun?’ nga nna san ma ai.

7. (a) Karai Kasang gaw matsan dum n chye ai ngu masha ni sawn la hkra makam masham ningbaw nkau mi gara hku tsun wa a ta? (b) N hkru ai lam ni a matu Karai Kasang hpe hpa majaw mara shagun n mai ai kun?

7 Kalang lang, Karai Kasang gaw matsan dum n chye ai ngu shadu hkra, makam masham ningbaw ni galaw ma ai. Anhte hta yawn hkyen ai lam ni byin ai shaloi, Karai Kasang a myit sha re ngu shanhte tsun ai. Dai hku tsun ai gaw, Karai Kasang hpe mara shagun ai hte bung ai. Karai Kasang gaw n hkru ai lam a npawt n re ai hpe Chyum Laika hku nna chye lu ai. “Karai Wa gaw tara tawt lai nga ai, n rai” nga nna Yoba 34:12 kaw tsun da ai. Tsun mayu ai gaw, Karai Kasang gaw n kaja ai lam ni byin nga ai hpe chye tim, dai lam ni hpe shabyin ai wa n re. Dai majaw, n kaja ai lam ni galaw na matu anhte hpe shi galoi mung n gung lau ai.—Yaku 1:13 hpe hti u.

8, 9. Anhte a manghkang ni a matu Karai Kasang hpe mara shagun ai gaw hpa majaw n tara ai kun? Ga shadawn langai tsun dan u.

 8 Ga shadawn, asak hpring sai la sha langai gaw kanu yan kawa hte rau nga nga ai ngu myit yu ga. Kawa gaw shi hpe grai tsawra nna, kaja ai hku daw dan chye hkra sharin ya ai. Raitim, kasha gaw myit n su ai majaw, nta kaw na pru mat wa ai. Dai hpe kawa gaw n pat shing dang ai. Dai hpang kasha gaw n hkru ai lam ni galaw nna, manghkang ni byin wa ai. Dai hku manghkang ni byin wa ai majaw, kawa hpe mara shagun mai na kun? (Luka 15:11-13) Dai kawa zawn, Karai Kasang mung masha ni shi hpe ninghkap nna, n hkru ai lam ni galaw ai hpe n pat shing dang ai. Shinggyim masha ni tinang ra ai hku galaw nna byin wa ai manghkang ni a matu, Karai hpe mara shagun ai gaw n tara ai re.

9 Shinggyim masha ni n hkru ai lam galaw ai hpe, Karai Kasang hpa majaw n pat shing dang shi ai hpe, ndai laika buk a Daw 11 hta atsawm sang lang da ai. Karai Kasang anhte hpe tsawra nna, anhte a manghkang ni gaw, shi a majaw byin ai n re ai hpe nang kam mai ai. Gaja wa nga yang, manghkang ni yawng hpe hparan ya lu ai gaw, Karai Kasang langai sha nga ai.—Esaia 33:2.

10. N hkru ai ni a majaw byin ai lam ni hpe Karai Kasang yeng seng ya na ngu hpa majaw kam mai a ta?

10 Karai Kasang gaw chyoi pra ai. (Esaia 6:3) Shi galaw ai amu yawng gaw, mara n kap ai, san seng ai, kaja ai. Dai majaw anhte shi hpe kam mai ai. Shinggyim masha ni gaw dai zawn n re. Kalang lang shut chye ai. Kaja htum uphkang madu ni pyi, n hkru ai ni a majaw hten za mat ai hpe yawng bai kaja hkra n lu galaw ya ai. Karai Kasang zawn kadai mung atsam n nga ai. N hkru ai ni a majaw hten za mat ai hpe yawng bai kaja hkra galaw ya lu ai atsam gaw Karai Kasang hta sha nga nna, galaw mung galaw ya na. N hkru ai lam ni yawng hpe mung shi yeng seng kau ya na re.—Shakawn 37:9-11 hpe hti u.

 MASHA NI JAMJAU HKRUM AI SHALOI KARAI KASANG GARA HKU HKAMSHA AI KUN?

11. Nang yakhkak hkrum nga ai hpe Karai Kasang mu ai shaloi gara hku hkamsha ai kun?

11 Karai Kasang gaw mungkan hta byin ai lam ni hte, nang tsin-yam hkrum ai hpe shi mu ai shaloi gara hku hkamsha ai kun? Chyum Laika hta Karai Kasang gaw “tara ding ai hpe tsaw ra” ai nga nna tsun da ai. (Shakawn 37:28) Shi gaw ding man ai hpe ra sharawng ai. Masha ni jamjau hkrum ai hpe shi n ra sharawng ai. Moi mungkan ntsa hta, n hkru ai lam ni hpring nga ai hpe mu ai shaloi, “shi a kraw lawang e yawn nga ai” nga nna Chyum Laika hta tsun da ai. (Ningpawt 6:5, 6) Karai Kasang gaw n galai shai ai. (Malahki 3:6) Nang hpe shi lanu lahku ai lam, Chyum Laika hta tsun da ai.—1 Petru 5:7 hpe hti u.

Chyum Laika hta Yehowa gaw ninggawn tawa Hpan Madu re nga nna tsun da ai

12, 13. (a) Anhte masha ni hpe tsawra ai gaw hpa majaw kun? Yakhkak jamjau ai hpe mu ai shaloi anhte gara hku hkamsha ai kun? (b) N tara ai lam hte jamjau ai lam ni yawng hpe Karai Kasang yeng seng kau ya na ngu anhte hpa majaw kam mai ai kun?

12 Karai Kasang gaw, anhte hpe shi a hkrang sumla hte maren hpan da ai lam Chyum Laika hta tsun da ai. (Ningpawt 1:26) De a lachyum gaw, anhte hpe hpan ai shaloi shi a atsam ningja ni nga hkra, bang ya ai hpe tsun mayu ai re. Masha kaja ni jamjau hkrum nga ai hpe nang mu ai shaloi myit n pyaw ai nga yang, Karai Kasang gaw grau nna pyi myit n pyaw na re. Anhte dai hpe gara hku chye lu na ta?

13 Chyum Laika hta “Karai Kasang gaw tsaw ra ai myit rai nga ai” nga nna tsun da ai. (1 Yawhan 4:8) Karai Kasang galaw ai amu yawng gaw, tsawra myit a majaw re. Karai Kasang tsawra ai majaw anhte mung tsawra chye ai. Ndai lam hpe myit yu ga: Nang hta atsam nga yang, mungkan hta byin nga ai n tara ai lam hte, yakhkak jamjau lam ni yawng hpe yeng seng kau mayu ai n re i? Hpa majaw nga yang, masha ni hpe nang tsawra ai majaw re. Karai Kasang gaw, atsam nga nna anhte hpe tsawra ai. Dai majaw, n tara ai lam hte yakhkak ai lam yawng hpe shi yeng seng kau ya na re. Ndai laika buk a shawng na laika man hta tsun da ai  Karai Kasang a ga sadi ni yawng hpring tsup wa na hpe nang kam mai ai. Raitim, dai ga sadi ni hpe kam mai na matu, Karai Kasang a lam grau chye ra ai.

KARAI KASANG GAW SHI A LAM CHYE SHANGUN MAYU

Marai langai ngai hpe nang hkau mayu yang na a mying tsun dan na re. Chyum Laika hta Karai Kasang gaw anhte hpe shi a amying tsun dan ai

14. Karai Kasang a amying gaw hpa rai a ta? Shi a amying hpe hpa majaw shaga ra ai kun?

14 Marai langai ngai hpe nang hkau mayu yang, shawng nnan shi hpe hpa tsun na kun? Na a mying tsun dan na re. Karai Kasang hta amying nga ai kun? Nawku htung law law gaw shi a amying hpe Karai Kasang (sh) Madu ngu nna tsun ai. Raitim, dai ni gaw, “hkawhkam” (sh) “gumsan magam” zawn arawng sadang ni sha re. Amying n re. Karai Kasang gaw shi a amying shingteng Yehowa re ngu anhte hpe tsun dan ai. Shakawn Kungdawn 83:17 hta “Yehowa e, nang hte na a amying chyu sha, ga ting hta e Tsaw Htum nga ai, shanhte chye mu ga” ngu tsun da ai. Chyum Laika hta Karai Kasang a amying hpe hkying lam hku ka da ai. Yehowa gaw shi a amying hpe chye shangun mayu nna, shaga shangun mayu ai. Shi a amying anhte hpe tsun dan ai majaw, shi hte anhte jinghku byin mai ai.

15. Yehowa ngu ai amying a lachyum gaw hpa rai a ta?

15 Yehowa ngu ai Karai Kasang a amying gaw lachyum grai rawng ai. Shi jaw da ai ga sadi ni hpring tsup hkra, yaw shada ai  lam yawng hpe awng dang hkra, galaw lu ai ngu ai lachyum nga ai. Kadai mung shi hpe pat shing dang n lu ai. Yehowa langai sha ndai amying shingteng hpe lu ging ai. *

16, 17. (a) “Chyahtum chyalai n-gun rawng ai Madu” (b) “Ju majat prat janat na Hkawhkam” (c) “Hpan Madu” ngu ai ni a lachyum gaw hpa rai ta?

16 Anhte hti wa sai Shakawn Kungdawn 83:17 hta Yehowa hpe “nang . . . chyu sha, ga ting hta e Tsaw Htum nga ai” nga nna tsun da ai. Shingran 15:3 hta mung,  “Chyahtum Chyalai n-gun rawng ai madu Karai Kasang e, na a magam bungli gaw kaba htum ai hte mau hpa rai nga ai: Ju majat prat janat na Hkawhkam wa e, na a magam lam ni gaw ding hpring ai hte teng man ai hkrai rai nga ai” nga nna tsun da ai. “Chyahtum chyalai n-gun rawng ai Madu” ngu ai lachyum gaw hpa rai a ta? Dai gaw, ninggawn tawa hta nga ai kaga yawng hta, Yehowa gaw grau atsam nga ai lachyum re. “Ju majat prat janat na Hkawhkam” ngu ai lachyum gaw galoi mung agrin nga ai ngu ai lachyum re. Shakawn Kungdawn 90:2 hta sang lang da ai hte maren, shi gaw chyi nma hpri nhpra kaw nna re. Dai gaw mauhpa n re ni?

17 Yehowa langai sha Hpan Madu re. Shingran laika 4:11 hta “Anhte a Madu Karai Kasang e, nga yawng nga pra hte hpe nang hpan tawn da nna, dai hte gaw na a myit ra ai hku jaw e tai ma ai hte hpan tawn da hkrum ma ai majaw, nang gaw hpung shingkang, arawng sadang hte hpung dagu lu la na ging dan nga ndai law” nga nna tsun da ai. Sumsing lamu hta nga ai lamu kasa ni, shagan ni, namsi  namsaw ni, panglai nga ni hte nang myit yu mai ai ni yawng hpe Yehowa hpan tawn da ai.

NANG YEHOWA HTE JINGHKU MAI BYIN AI KUN?

18. Karai a jinghku n mai byin ai ngu masha nkau mi hpa majaw myit ai kun? Dai hte seng nna Chyum Laika hta hpa tsun da a ta?

18 Masha nkau mi Yehowa a mauhpa atsam ningja ni hpe chye ai shaloi hkrit tsang nna, ‘Karai Kasang gaw hpung atsam grai kaba ai majaw shi hte nihtep na matu n loi ai, shi ngai hpe lanu lahku na n re’ ngu sawn la ma ai. Raitim, Karai Kasang gaw anhte hpe dai zawn hkamsha shangun mayu ai kun? N re ai. Yehowa gaw anhte hte nihtep mayu ai. Chyum Laika hta, Karai Kasang gaw “anhte kadai hte mung tsan nga ai n rai” nga nna tsun da ai. (Kasa 17:27) Karai Kasang gaw shi hpang de sit sa shangun mayu ai. “Shi nanhte hpang de sit sa wa na” nga nna ga sadi jaw da ai.—Yaku 4:8.

19. (a) Nang Karai a jinghku gara hku byin mai na kun? (b) Yehowa a atsam ningja ni kaw nna nang gara hpe grau ra ai kun?

19 Nang Karai Kasang a jinghku gara hku byin mai na kun? Yesu ndai hku tsun ai: “Htani htana asak ngu ai chyawm gaw, langai sha rai nga ai hte teng man re ai nang Karai Kasang hpe mung, nang shangun dat ai wa Yesu Hkristu hpe mung, shanhte chye chyang lu ai hpe, ngu ai, rai nga ai.” (Yawhan 17:3) Dai majaw, Yehowa hte Yesu a lam grau nna chye chyang wa hkra, Chyum Laika hpe matut nna hkaja ra ai. Rai yang, nang htani htana asak lu mai ai. Anhte hkaja wa ai hte maren “Karai Kasang gaw tsaw ra ai myit rai nga ai.” (1 Yawhan 4:16) Shi hta kaga atsam ningja ni law law naw nga ai. Chyum Laika hta Yehowa gaw “sumnung ai myit hte chyeju hpring ai, myit galu ai hte n-gaw nwai re ai, matsan a dum ai hte sadi sahka hpring ai” nga nna tsun da ai. (Pru Mat 34:6; 2 Petru 3:9) Shi gaw mai kaja ai, mara raw chye ai, ding hpring ai. (Shakawn 86:5; Shingran 15:4) Nang Chyum Laika hpe grau hkaja yang, shi a kaga atsam ningja ni hpe mung chye wa na re.

20-22. (a) Karai Kasang hpe n mu lu ai majaw shi hte gara hku nihtep lu na kun? (b) Nang Chyum Laika sharin nga ai hpe, kaga masha ni pat shing dang mayu yang nang hpa galaw na kun?

 20 Karai Kasang hpe n mu lu ai majaw shi hte gara hku nihtep lu na kun? (Yawhan 1:18; 4:24; 1 Timohti 1:17) Chyum Laika hti ai shaloi, Yehowa a lam grau chye wa na. (Shakawn 27:4; Roma 1:20) Dai hku chye wa magang, shi hpe grau tsawra wa nna grau mung nihtep wa na re.

Kawa gaw shi a kasha ni hpe tsawra ai, raitim sumsing lamu na Wa gaw anhte hpe grau tsawra ai

21 Yehowa gaw anhte a Kawa re ai hpe nang chye wa na. (Mahte 6:9) Shi anhte hpe asak jaw da nna, kaja htum asak aprat lu la shangun mayu ai. Tsawra myit nga ai kawa gaw, kasha ni hpe dai zawn byin shangun mayu ai. (Shakawn 36:9) Nang, Yehowa a jinghku byin mai ai ngu Chyum Laika hta tsun da ai. (Yaku 2:23) Ninggawn tawa Hpan Madu Yehowa gaw, nang hte jinghku byin mayu ai hpe shingran yu u.

22 Masha nkau mi gaw, nang Chyum Laika sharin ai hpe pat shing dang mayu na re. Nang hpung galai mat na hpe shanhte tsang ai mung rai na re. Yehowa a jinghku byin ai kaw nna, kade a majaw mung hkum jahkring kau u. Shi gaw na a matu kaja htum jinghku re.

23, 24. (a) Nang ga san ni hpe hpa majaw matut san ra a ta? (b) Hpang na daw hta anhte hpa lam hkaja na kun?

23 Nang Chyum Laika hkaja ai shaloi, n chye ai lam ni mung nga na re. Ga san san na hte karum hpyi na matu hkum kaya. Ma ni ga san grai san ma ai. Anhte gaw ma ni zawn shagrit shanem ra ai ngu Yesu tsun ai. (Mahte 18:2-4) Karai Kasang gaw mahtai tam mu shangun mayu ai. Dai majaw, nang chye wa ai lam ni gaw teng ai n teng ai hpe tup hkrak chye hkra, Chyum Laika hpe atsawm hkaja u.—Kasa 17:11 hpe hti u. 

24 Yehowa a lam chye na matu kaja htum lam gaw Chyum Laika hkaja ai re. Chyum Laika gaw kaga laika buk ni hte hpa majaw shai ai lam, hpang na daw hta nang chye lu na re.

^ စာပိုဒ်၊ 15 Na a Chyum Laika hta Yehowa ngu ai amying n lawm yang (sh) de a lachyum hte Karai Kasang a amying hpe gara hku shaga ai hpe chye mayu yang Jahtum Matsing 1 hpe yu u.