Content de lai

Secondary menu hpe lai

Malawm Ni Hpe Lai U

Yehowa Sakse Ni

Kachin

Chyum Laika Anhte Hpe Hpa Sharin Ya Ai Kun?

 Daw Shi

Nat Hte Lamu Kasa Ni A Lam

Nat Hte Lamu Kasa Ni A Lam

1. Lamu kasa ni a lam hpa majaw hkaja ra ai kun?

YEHOWA gaw shi a dinghku hte seng ai lam anhte hpe chye shangun mayu ai. Lamu kasa ni gaw Karai Kasang a nta masha ni re. Shanhte hpe “Karai Kasang a shadang sha ni” nga nna Chyum Laika hta tsun da ai. (Yoba 1:6) Lamu kasa ni hpa galaw ma ai kun? Lai wa sai aten hta, masha ni hpe gara hku karum ya wa sai kun? Ya mung anhte hpe naw karum ya lu ai kun?—Jahtum Matsing 8 hpe yu u.

2. Lamu kasa ni gara hku byin wa ai kun? Lamu kasa ni kade daram law ai kun?

2 Lamu kasa ni gara hku byin wa ai kun? Kolose 1:16 hta, Yehowa gaw, Yesu hpe hpan ngut ai hpang “sumsing lamu hte ginding aga hta yawng mayawng” hpe hpan ai ngu tsun da ai. Dai hta lamu kasa ni lawm ai. Lamu kasa ni kade daram law ai kun? Wan law law nga ai nga nna Chyum Laika hta tsun da ai.—Shakawn 103:20; Shingran 5:11.

3. Yoba 38:4-7 hta lamu kasa ni a lam hpa tsun da ai kun?

3 Mungkan hpe Yehowa n hpan shi yang, lamu kasa ni hpe shawng hpan ai ngu Chyum Laika hta tsun da ai. Mungkan hpe hpan ai shaloi, shanhte gara hku hkam sha ma ai kun? Shanhte grai kabu ai lam Yoba laika hta tsun da ai. Shanhte gaw kahkyin gumdin let Yehowa a amu hpe gun hpai nga ma ai.—Yoba 38:4-7.

LAMU KASA NI KARAI A MASHA NI HPE KARUM YA

4. Masha hpe lamu kasa ni myit lawm ai lam anhte gara hku chye lu ai kun?

4 Lamu kasa ni gaw shinggyim masha ni a lam, mungkan hte masha a matu Yehowa a yaw shada lam hpe chye mayu ma ai. (Ga Shagawp 8:30, 31; 1 Petru 1:11, 12) Adam yan Ewa gumlau mat ai shaloi, lamu kasa ni grai yawn ma  ai. Ya aten hta mung, masha law law Yehowa a ga n madat ai hpe mu yang shanhte grai yawn ma ai. Raitim, masha langai myit malai lu nna Yehowa hpang de bai wa jang gaw shanhte grai kabu ma ai. (Luka 15:10) Karai Kasang hpe nawku nga ai ni hpe lamu kasa ni grai myit lawm ai. Yehowa gaw shi a mayam ni hpe makawp maga nna  karum na matu, lamu kasa ni hpe shangun ai. (Hebre 1:14) Ga shadawn nkau mi hpe yu yu ga.

“Nye a Karai Kasang gaw, shi a lamu kasa shangun nna, hkanghkyi ni a n-gup pat kau ya ai.”—Daniela 6:22

5. Lai wa sai aten hta lamu kasa ni gaw Karai Kasang a mayam ni hpe gara hku karum wa ai kun?

5 Sodom hte Gomora mare hpe jahten ai shaloi, Lawt hte shi a nta masha ni hpe hkye la na matu, lamu kasa lahkawng hpe Yehowa shangun wa ai. (Ningpawt 19:15, 16) Tsa ban law law lai mat wa ai hpang, myihtoi Daniela prat hta mung, lamu kasa ni gaw Daniela hpe karum ya wa ai. Shi hkanghkyi nhkun de jahkrat hkrum ai shaloi, “Karai Kasang gaw, shi a lamu kasa shangun nna, hkanghkyi ni a n-gup pat kau ya ai.” (Daniela 6:22) Bai nna, kasa Petru htawng hkrat ai shaloi lawt na matu, Yehowa gaw lamu kasa langai hpe shangun dat ai. (Kasa 12:6-11) Yesu mungkan ntsa nga ai shaloi mung, lamu kasa ni karum ya ai. Ga shadawn, shi hkalup hkam ngut ai hpang, “lamu kasa ni shi hpe galaw daw mu ai.” (Marku 1:13) Yesu rim hkrum na mahka, lamu kasa langai “shi hpe sa shalan ya” ai.—Luka 22:43.

6. (a) Ya aten hta mung lamu kasa ni gaw Karai Kasang a mayam ni hpe karum ya nga ai kun? (b) Ya anhte gara ga san ni a mahtai hpe chye lu na kun?

6 Ya aten hta, lamu kasa ni gaw masha ni a man dan pru ai lam n nga sai. Raitim, Karai Kasang gaw shi a mayam ni hpe karum na matu, lamu kasa ni hpe matut nna shangun nga ai. “Yehowa hpe hkrit kamyin ai ni a grup yin e, Shi a Lamu kasa dap jung nga nna, shanhte hpe mawai la mu ai” nga nna Chyum Laika hta tsun da ai. (Shakawn 34:7) Anhte hpe makawp maga ya na matu hpa majaw ra ai kun? Anhte hpe shoihpa jaw mayu ai atsam kaba ai hpyen ni nga ai majaw re. Shanhte gaw kadai ni rai a ta? Shanhte gara kaw nna sa wa ai kun? Shanhte shoihpa gara hku jaw lu ai kun? Dai ga san ni a mahtai lu na matu, Adam yan Ewa hpe hpan ngut ai hpang, byin wa ai lam ni hpe yu yu ga.

 ANHTE N MU LU AI HPYEN NI

7. Satan hkalem ai majaw masha ni hpa galaw wa ma ai kun?

7 Lamu kasa langai mi gaw Karai Kasang hpe gumlau nna, kaga ni hpe uphkang mayu ai lam Daw 3 hta anhte hkaja wa sai. Shi hpe Nat Satan ngu Chyum Laika hta tsun da ai. (Shingran 12:9) Ewa hpe shi hkalem lu wa ai aten kaw nna, masha law law hpe mung hkalem wa ai. Dai majaw masha ni Karai Kasang hpe gumlau wa ma ai. Raitim, Abela, Enuk hte Noa zawn re ai nkau mi gaw Yehowa hpe sha sadi dung ma ai.—Hebre 11:4, 5, 7.

8. (a) Lamu kasa nkau mi n hkru ai nat gara hku byin wa ai kun? (b) N hkru ai nat ni hka sha-u ing ai kaw nna, asak lawt na matu hpa galaw ai kun?

8 Noa prat hta lamu kasa nkau mi gumlau nna, sumsing lamu hpe kau da let mungkan hta masha zawn nga wa ai. Hpa majaw kun? Shanhte gaw shinggyim num sha ni hte nga mayu ai majaw re ngu Chyum Laika hta tsun da ai. (Ningpawt 6:2 hpe hti u.) Raitim, lamu kasa ni dai zawn galaw ai gaw shut ai. (Yuda 6) Dai n hkru ai lamu kasa ni zawn dai aten hta masha law law mung, grai n hkru nna akyang hten za wa ai. Dai majaw, mungkan ting hpe hka sha-u ing nna, n hkru ai masha ni hpe jahten kau na matu, Yehowa dawdan wa ai. Raitim, sadi dung ai shi a masha ni hpe gaw hkye la wa ai. (Ningpawt 7:17, 23) N hkru ai lamu kasa ni gaw asak lawt na matu, lamu de bai lung mat wa ma ai. Dai n hkru ai lamu kasa ni hpe Chyum Laika hta nat ngu tsun da ai. Shanhte gaw, Satan a gumlau ai lam hta lawm na matu lata la ma ai majaw, Satan gaw shanhte a uphkang ai madu byin wa ai.—Mahte 9:34.

9. (a) Sumsing lamu de nhkru ai nat ni bai wa ai shaloi hpa byin ai kun? (b) Matut nna anhte hpa lam hkaja lu na kun?

9 Yehowa gaw dai gumlau ai nat ni hpe shi a nta masha hku nna, n hkap la sai. (2 Petru 2:4) Shanhte gaw masha hkum hpe n dagraw lu mat tim, “mungkan ga ting hpe hkalem” nga ding yang re. (Shingran 12:9; 1 Yawhan 5: 19) Shanhte gara hku hkalem nga ma ai hpe hkaja yu ga.—2 Korinhtu 2:11 hpe hti u.

MASHA HPE NAT NI HKALEM AI LAM

10. Masha hpe nat ni gara hku hkalem ai kun?

10 N hkru ai nat ni gaw masha hpe amyu myu hkalem nga ai. N hkru ai nat ni hte dingtawk (sh) nat sara zawn re ai ni kaw nna masha ni matut mahkai ma ai. Dai hku nat ni hte matut mahkai ai gaw nat hpe kam sham ai re. Raitim, Chyum Laika hta nat hte seng ai lam hpe koi ra ai ngu tsun da ai. (Galati 5:19-21) Hpa majaw kun? Jau gawng gaw dusat ni hpe rim na matu mahkam hkam ai zawn, nat ni gaw masha hpe rim na matu, hkalem ai ladat hpe lang ai.—Jahtum Matsing 25 hpe yu u.

11. Nat hpaji gaw hpa rai kun? Anhte hpa majaw koi ra ai kun?

11 Shanhte hkalem ai lam ni kaw nna langai gaw nat hpaji re. Dai gaw shingra tara hta jan ai atsam hpe jailang nna htawm hpang hte seng ai (sh) n chye lu ai hpe chye na matu shakut ai re. Masha nkau mi gaw shagan ni hpe yu ai, lamik kumla tam ai, lata maka yu ai baw ni galaw ma ai. Masha law law gaw dai lam ni galaw ai hpe shoihpa n nga ai ngu shadu ma ai. Raitim, shoihpa grai nga ai. Ga shadawn, gumhpan hpan ai ni hpe nat ni karum ya ai lam Chyum Laika hta tsun da ai. Kasa 16:16-18 hta numsha langai “gumhpan hpan” lu na matu, “nat” karum ya ai lam hpe mu lu ai. Nat hpe kasa Pawlu gawt kau ai majaw, numsha a gumhpan hpan lu ai atsam mung mat mat ai.

12. (a) Si mat ai ni hte matut mahkai ai gaw hpa majaw shoihpa nga ai kun? (b) Karai a mayam ni gaw nat hte seng ai htung ni hta hpa majaw n lawm ai kun?

12 Nat ni gaw masha hpe hkalem na matu, kaga ladat hpe mung jailang ma ai. Si mat ai ni shara ra kaw asak naw hkrung nga nna shanhte hte shaga mai ai, matut mahkai mai ai, shanhte gaw shoihpa jaw lu ai ngu anhte kam hkra shakut nga ai. Ga shadawn, masha langai gaw si mat  ai masha hte matut mahkai na matu, si mat ai wa hte ga shaga lu ai nat shung ai wa zawn re ai ni hpang de sa ma ai. Dai wa gaw si mat ai masha a lam ni tsun dan nna si ai wa a nsen pyi shapraw dan na re. (1 Samuela 28:3-19) Makoi mayang htung law law mung si mat ai ni shara ra hta asak naw hkrung ai ngu ai makam masham hta sha madung da ma ai. Dai hta makoi mayang poi ni, myit dum poi ni, si ai ni a matu hkungga nawng ai zawn re ai ni lawm ai. Ndai zawn htung ni hta Hkristan ni n lawm ai majaw jinghku ni (sh) hting bu ni gaw shatan ai, mara shagun ai, n kam kanawn ai baw ni galaw chye ai. Si mat ai ni gaw shara ra hta asak n hkrung ai hpe Hkristan ni chye ai. Shanhte gaw anhte hpe n mai matut mahkai ai zawn, shoihpa mung n lu jaw ai. (Shakawn 115:17) Grai sadi ra ai. Nat ni (sh) si mat ai ni hte matut mahkai ai, nat hte seng ai htung ni hta shang lawm ai hpe galoi mung n galaw ga.—Tara Jahprang 18:10, 11 hpe hti u; Esaia 8:19.

13. Nat hpe hkrit wa ai ni hpa galaw lu wa ai kun?

13 Nat ni gaw masha ni hpe hkalem ai sha n ga, jahkrit mung jahkrit chye ai. Ya aten hta Satan hte shi a nat ni gaw, mungkan kaw nna Karai Kasang shanhte hpe yeng seng na matu, “nhtoi loi mi sha ngam sai” hpe chye ai majaw, daw sa ai lam hte n hkru ai lam ni hpe moi na hta grau galaw nga ai. (Shingran 12:12, 17) Raitim, masha law law gaw, nat ni hpe hkrit ai kaw nna lawt lu wa ma sai. Nat ni hpe hkrit ai kaw nna, shanhte gara hku lawt lu ai kun?

NAT NI HPE NINGHKAP LU AI LAM

14. Tsa ban langai na Hkristan ni zawn, nat ni kaw na lawt lu na matu anhte hpa galaw ra na kun?

14 Nat ni hpe gara hku ninghkap lu na hte koi lu na lam, Chyum Laika hta tsun da ai. Ga shadawn, Ehpesu masha nkau mi teng man ai lam n chye shi yang, nat ni hte matut mahkai ma ai. Dai kaw nna shanhte gara hku lawt lu wa ai kun? “Lakle mandan bau sha ga ai ni law law mung,  shanhte a laika ni la sa nna, masha yawng a man e nat kau mu ai” nga nna Chyum Laika hta tsun da ai. (Kasa 19:19) Shanhte gaw Hkristan byin mayu ai majaw, mandan lakle hte seng ai laika buk yawng hpe jahten kau ma ai. Ya aten hta mung dai zawn galaw ra ai. Yehowa hpe nawku mayu ai ni gaw nat hte seng ai lam yawng hpe koi kau ra ai. Dai hta shoihpa n nga ai zawn masha ni shadu ai nat hpaji hpe n-gun jaw ai laika buk ni, magazin ni, pungding maka ni, ginsup ai lam ni, sumla hkrung ni hte mahkawn ni lawm ai. Nat a hpyen kaw nna, makawp maga na matu lang ai lakhpoi ni mung lawm ai.—1 Korinhtu 10:21.

15. Satan hte nat ni hpe anhte ninghkap lu na matu hpa naw galaw ra ai kun?

15 Ehpesu masha ni gaw, mandan lakle hte seng ai laika buk ni hpe jahten kau ngut nna shaning loi mi na ai hpang pyi, “n hkru n hkra ai nat” ni hpe naw “gasat” ra ai lam kasa Pawlu tsun wa ai. (Ehpesu 6:12) Shanhte a laika buk ni hpe wan nat kau ngut tim pyi, nat ni gaw shanhte hpe shoihpa jaw na matu, naw shakut nga ma ai. Dai majaw shanhte hpa galaw na matu naw ra ai kun? “N hkru n hkra ai wa a wan pala nlang hte hpe sat dang kau lu na, makam masham ngu ai n-gang hpe lang kahtap nga mu” ngu Pawlu tsun wa ai. (Ehpesu 6:16) Majan hta n-gang gaw hpyen la langai hpe makawp maga ya ai zawn, makam masham gaw anhte hpe makawp maga ya ai. Yehowa anhte hpe makawp maga lu ai lam, anhte tsep kawp kam sham yang, Satan hte nat ni hpe ninghkap lu na re.—Mahte 17:20.

16. Yehowa hpe kam sham ai lam grau ngang kang wa hkra gara hku galaw lu na kun?

16 Yehowa hpe kam sham ai lam, grau ngang kang wa hkra anhte hpa galaw ra ai kun? Chyum Laika hpe shani shagu hti ra ai. Anhte hpe makawp maga ya na matu, shi hpe kamhpa ra ai. Yehowa hpe kamhpa ai lam ngang kang  yang, Satan hte nat ni anhte hpe shoihpa jaw lu sana n re.—1 Yawhan 5:5.

17. Nat a shoihpa kaw nna makawp maga hkrum na matu hpa naw galaw ra ai kun?

17 Ehpesu na Hkristan ni hpa naw galaw ra ai kun? Shanhte gaw nat kam sham ai ni hte hpring ai mare hta nga ma ai. Dai majaw, “ahkying ladaw shagu hte hta e akyu hpyi” na matu Pawlu tsun wa ai. (Ehpesu 6:18) Shanhte hpe Yehowa aten shagu makawp maga ya na matu akyu hpyi ra ai. Anhte mung gara hku kun? Nat kam sham ai ni hte hpring nga ai mungkan ga hta anhte asak hkrung nga ai majaw, Yehowa makawp maga ya na matu akyu hpyi ra ai. Hpyi ai shaloi shi a amying gang nna hpyi ra ai. (Ga Shagawp 18:10 hpe hti u.) Yehowa hpe matut nna akyu hpyi yang, Satan a shoihpa kaw nna anhte lawt lu hkra shi karum ya na re.—Shakawn 145:19; Mahte 6:13.

18, 19. (a) Satan hte nat ni hpe anhte gara hku awng dang lu na kun? (b) Hpang na daw hta gara ga san a mahtai hpe chye lu na kun?

18 Nat hte seng ai lam yawng hpe yeng seng kau nna, anhte hpe makawp maga ya na matu Yehowa hpe kamhpa yang, Satan hte nat ni hpe ninghkap lu na re. Shanhte hpe anhte n hkrit ra ai. (Yaku 4:7, 8 hpe hti u.) Yehowa gaw nat ni hta grau nna atsam kaba ai wa re. Shi gaw Noa prat hta shanhte hpe ari jaw wa ai. Htawm hpang hta gaw yawng hpe jahten kau sana re. (Yuda 6) Anhte langai hkrai sha gasat nga ai n re ai hpe dum u. Yehowa gaw anhte hpe makawp maga ya na matu shi a lamu kasa ni hpe shangun ai. (2 Hkawhkam 6:15-17) Satan hte nat ni hpe Yehowa a karum shingtau lam hte anhte awng dang lu na gaw teng sha re.—1 Petru 5:6, 7; 2 Petru 2:9.

19 Satan hte nat ni a majaw yakhkak ai lam ni byin nga ai. Raitim, ya du hkra Karai Kasang shanhte hpe hpa majaw n yeng seng shi ai kun? Ndai ga san a mahtai hpe hpang na daw hta chye lu na re.