Content de lai

Secondary menu hpe lai

Malawm Ni Hpe Lai U

Yehowa Sakse Ni

Kachin

Chyum Laika Anhte Hpe Hpa Sharin Ya Ai Kun?

 Daw Kru

Anhte Si Ai Shaloi Gara De Du Mat Ai Kun?

Anhte Si Ai Shaloi Gara De Du Mat Ai Kun?

1-3. Si ai hte seng nna masha ni gara ga san ni san ma a ta? Nawku htung nkau mi gaw gara hku mahtai jaw a ta?

LANI mi na aten hta, “si hkrung si htan n nga” sana nga nna, Chyum Laika hta ga sadi jaw da ai. (Shingran 21:4) Daw 5 hta, gawng malai jahpu gaw anhte hpe htani htana asak hkrung na matu galaw ya ai lam, anhte hkaja wa sai. Raitim, masha ni naw si nga ai. (Hpaji Ningli 9:5) Dai majaw, anhte si ai shaloi hpa byin mat ai kun? ngu ai ahkyak ai ga san pru wa ai.

2 Anhte tsawra ai marai langai si mat ai shaloi, dai ga san a mahtai hpe grau chye mayu wa ai. ‘Shi gara de du mat sai kun? Shi anhte hpe yu lanu lahku nga ai kun? Shi anhte hpe karum lu ai kun? Anhte shi hpe bai mu lu na kun?’ nga nna anhte san mayu ga ai.

3 Nawku htung ni gaw dai ga san ni hpe mahtai amyu myu jaw ma ai. Nang masha kaja langai rai yang, sumsing lamu de du na, n hkru ai masha rai yang, ngarai hta zingri hkrum na ngu, nawku htung nkau mi sharin ya ai. Nkau mi gaw nang si mat yang wenyi byin mat nna, si mat sai nta masha ni hte rau nga lu na ngu tsun ai. Kaga ni chyawm gaw nang si mat ai hpang jeyang hkrum na, kaga marai langai (sh) dusat langai ngai hta bai shangai wa na ngu tsun ma ai.

4. Si ai hte seng nna nawku htung ni sharin ya ai madung lam gaw hpa rai a ta?

4 Nawku htung ni sharin ya ai lam ni gaw n bung taw ai zawn raitim, lam langai hta sha madung tawn ai. Dai gaw, masha si mat yang, shi hta nga ai lama ma gaw, matut nna asak hkrung taw ai ngu ai re. Dai gaw teng ai kun?

 ANHTE SI AI SHALOI GARA DE DU MAT AI KUN?

5, 6. Anhte si mat ai shaloi hpa byin mat ai kun?

5 Anhte si ai shaloi, hpa byin mat ai hpe Yehowa chye ai. Masha langai si ai shaloi, shi a prat htum mat sai nga nna Yehowa tsun ai. Si ai hte hkrung ai gaw n htan shai ai. Dai majaw, marai langai ngai si yang, shi a hkam sha lam hte matsing sumhting ai nyan ni gaw, gara kaw mung n hkrung nga sai. * Mu lu ai, na lu ai hte sumru ai lam ni gaw anhte si mat ai shaloi n nga mat sai.

6 Hkawhkam Shawlumon gaw, “si mat ai ni chyawm gaw hpa n chye ma ai” nga nna tsun wa ai. Si mat ai ni hta tsawra ai, nju ndawng ai lam n nga sai. Bai nna, “katsan ga hta e, amu bungli, maw mawn ai, chye chyang ai hte hpaji hparat hpa mung n nga ai.” (Hpaji Ningli 9:5, 6, 10 hpe hti u.) Shakawn Kungdawn 146:4 hta, marai langai ngai si mat ai shaloi, “shi maw ai” lam yawng hten mat ai ngu tsun da ai.

SI AI HTE SENG NNA YESU TSUN WA AI LAM

Yehowa gaw masha ni hpe mungkan ntsa, htani htana asak hkrung na matu hpan da

7. Si ai hte seng nna Yesu hpa tsun wa ai kun?

7 Yesu a jinghku Lazaru si ai shaloi, shi a sape ni hpe “anhte a jinghku wa Lazaru yup nga ai” nga nna tsun ai. Raitim, Yesu gaw Lazaru yup pyaw nga ai hpe tsun mayu ai n re. “Lazaru si sai” ngu Yesu matut tsun ai. (Yawhan 11:11-14) Dai majaw, Yesu gaw si ai hpe yup nga ai hte shadawn wa ai. Lazaru gaw si mat ai hpang sumsing lamu de du ai (sh) si mat sai shi a nta masha ni hte rau nga wa ai ngu Yesu n tsun ai. Bai nna Lazaru gaw ngarai hta zingri hkrum ai (sh) kaga masha hku, dusat hku bai shangai wa ai ngu n tsun wa ai. Lazaru gaw grai yup pyaw nga ai zawn byin wa ai. Kaga Chyum daw ni hta, si ai hpe grai yup pyaw nga ai hte shingdaw da ai. Chyum Laika hta Stehpan sat hkrum ai shaloi, “shi yup mat wa ai” ngu tsun da ai. (Kasa 7:60) Kasa Pawlu mung si mat  ai Hkristan nkau mi hpe “yup pyaw mat masai” ngu tsun wa ai.—1 Korinhtu 15:6.

8. Karai Kasang gaw masha ni hpe si na matu n hpan da ai lam gara hku chye lu ai kun?

8 Adam yan Ewa hpe si na matu Karai Kasang hpan da ai kun? N re. Yehowa gaw shanhte hpe hkum tsup ai hkam ja lam hte, htani htana asak hkrung na matu hpan da ai she re. Masha hpe Yehowa hpan ai shaloi, htani htana asak hkrung mayu ai myit bang da ya ai. (Hpaji Ningli 3:11) Kanu kawa ni gaw kasha ni asak kung wa nna si na hpe n byin shangun mayu ai zawn, Yehowa mung dai hku sha hkam sha ai. Karai Kasang gaw anhte hpe htani htana asak hkrung na matu hpan da ai raitim, anhte hpa majaw si ra ai kun?

 ANHTE HPA MAJAW SI RA AI KUN?

9. Adam yan Ewa hpe Yehowa jaw ai hkang da ai tara gaw hpa majaw tara rap ra ai kun?

9 Edin sun hta Yehowa gaw Adam hpe “dai sun hta tu ai hpun yawng mayawng hta na gaja wa nang sha lu na ndai: rai ti mung kaja ai hte n kaja ai hpe chye ginhka shangun ai hpun hta na chyawm gaw, nang n sha lu na ndai: kaning rai nme law, dai hpun hta na sha ai nhtoi hta, nang teng teng si lu na ndai” nga nna tsun wa ai. (Ningpawt 2:9, 16, 17) Dai hkang da ai ga hpe madat na matu n yak ai. Yehowa gaw Adam yan Ewa hpe gara gaw kaja ai, gara gaw n kaja ai hpe tsun na ahkang nga ai. Shan gaw Yehowa a ahkaw ahkang hpe hkungga ai hku nna shi a ga hpe madat ging ai. Shan hpe jaw da ai yawng mayawng a matu mung, Yehowa hpe chyeju dum ai lam madun ging ai.

10, 11. (a) Satan gaw Adam yan Ewa hpe gara hku hkalem wa ai kun? (b) Adam yan Ewa gaw, shan galaw wa ai lam a matu hpa majaw lawt ga tsun na lam n nga ai kun?

10 Yehowa a ga n madat na matu Adam yan Ewa lata wa ai gaw yawn hpa re. Satan gaw Ewa hpe “ndai sun hta tu ai hpun mahkra hta na, nan n sha lu na rai myit dai, nga nna Karai Kasang gaja wa tsun a ni?” ngu san ai. Ewa gaw “ndai sun hta tu ai hpun ni a asi hta na, an sha lu ga ai; rai ti mung, ndai sun a kaang e tu ai hpun a asi hpe chyawm gaw, nan si ai n hkrum myit ga, dai hta na nan n sha lu na myit dai, dai hpe mung hkum hkra myit, nga nna Karai Kasang tsun ai” ngu nna htan ai.—Ningpawt 3:1-3.

11 Bai nna Satan gaw “nan gaja wa n si na myit dai: kaning rai n me law, dai hta na sha ai nhtoi hta e nan a myi hpaw nna, kaja ai hte n kaja ai hpe chye ginhka na ra ai majaw, Karai Kasang hte maren nan tai na ma rin dai gaw, Karai Kasang chye nga ai” ngu tsun ai. (Ningpawt 3:4-6) Kaja ai hte n kaja ai hpe tinang hkrai daw dan lu ai ngu Ewa hpe Satan shadu shangun mayu ai. Yehowa a ga n madat yang byin wa na lam hte seng nna Ewa hpe Satan masu wa ai. Satan gaw Ewa hpe si na n re ngu tsun ai majaw, Ewa gaw  namsi hpe sha kau nna shi a madu wa hpe mung jaw sha ai. Adam yan Ewa gaw shan hpe namsi n sha na matu, Yehowa tsun da ai hpe chye ai. Shanhte dai hpe sha ai gaw, dan leng nna tara rap ra ai Yehowa a hkang da ai ga hpe n madat na matu lata dat ai re. Shan dai namsi hpe sha kau nna Yehowa Karai Kasang hpe, n hkungga ai lam madun wa ai. Ndai hku dingsang galaw ai majaw, shan mara lawt ga tsun na lam n-nga ai.

12. Yehowa a ga Adam yan Ewa n madat ai gaw hpa majaw yawn hpa rai a ta?

12 Tinang a Hpan Madu hpe Adam yan Ewa hkungga ai lam n madun ai gaw grai yawn hpa re. Nang bau maka wa ai kasha gaw, nang hpe ninghkap nna htet da ai hte n htan shai ai hpe galaw yang, nang gara hku hkam sha na kun? Nang grai yawn na re.

Adam gaw ga yun kaw na sa nna, ga yun de bai n htang wa ai

13. Nang “ga yun bai tai na” ngu Yehowa tsun ai lachyum gaw hpa rai a ta?

13 Adam yan Ewa ga n madat ai majaw, htani htana asak hkrung na lam sum mat ai. Yehowa gaw Adam hpe “nang ga yun rai nga ndai rai nna, ga yun bai tai na rin dai” ngu tsun ai. (Ningpawt 3:19 hpe hti u.) Dai lachyum gaw Adam hpe n hpan shi ai aten na zawn, ga yun bai tai na ngu tsun mayu ai re. (Ningpawt 2:7) Adam mara galaw nna si mat ai hpang, shi gara kaw mung n nga sai.

14. Anhte hpa majaw si ra ai kun?

 14 Adam yan Ewa gaw, Karai Kasang a ga madat na nga yang, shan ya aten du hkra asak hkrung nga na re. Raitim, shan Karai Kasang a ga n madat nna yubak mara galaw ai majaw si ra ai. Yubak gaw hkrit hpa ana zinli hte bung nna anhte dai hpe Adam yan Ewa kaw nna lu la wa ai. Anhte yawng gaw yubak masha hku nna shangai wa ai majaw si ra ai. (Roma 5:12) Raitim, dai gaw masha a matu Karai a yaw shada lam n re. Karai Kasang gaw masha ni si ai hpe n ra sharawng ai. Chyum Laika hta si ai hpe “hpyen” ngu tsun da ai.—1 Korinhtu 15:26.

TENG MAN AI LAM GAW ANHTE HPE SHALAWT YA AI

15. Si ai hte seng nna teng man ai lam gaw anhte hpe gara hku shalawt ya lu a ta?

15 Si ai hte seng nna teng man ai lam hpe chye da ai gaw, shut shai ai lam ni hpe n kam hkra karum ya ai. Si mat ai masha gaw yawn hkyen ai, machyi ai lam ni n nga sai ngu Chyum Laika hta tsun da ai. Anhte gaw shanhte hpe ga n lu shaga ai zawn, shanhte mung anhte hpe n lu shaga ai. Si mat ai ni hpe anhte n lu karum ya ai zawn shanhte mung anhte hpe n lu karum ya ai. Anhte hpe dingbai dingna n lu jaw ai majaw, shanhte hpe hkrit n ra ai. Nawku htung law law gaw, si mat ai masha ni shara ra hta asak hkrung nga ai ngu tsun ai. Hpunggyi ni (sh) chyoi pra ai ngu shanhte shadu ai ni hpe gumhpraw jaw yang, si ai ni hpe karum ya lu ai ngu tsun ma ai. Raitim, si ai hte seng nna teng man ai hpe anhte chye da yang, dai zawn masu ai lam ni kaw nna anhte lawt lu na re.

16. Si ai hte seng nna nawku htung nkau gaw gara hku sharin ya a ta?

16 Satan gaw anhte hpe masu na matu, shut shai ai nawku htung hpe jailang nna, si mat ai masha ni naw hkrung nga ai ngu, shadu hkra galaw nga ai. Ga shadawn, anhte si yang anhte hta nga ai lama ma gaw, kaga shara ra hta naw hkrung ai ngu, nawku htung nkau mi sharin ya ai. Na a nawku hpung hta mung dai zawn sharin ya ai kun? Shing nrai si ai hte seng nna, Chyum Laika tsun ai hte maren sharin ya ai kun? Satan gaw, masha ni Yehowa hte tsan mat hkra masu nga ai.

17. Masha ni ngarai hta zingri hkrum na ngu tsun ai gaw, Yehowa hpe sari jahpoi ai hte hpa majaw bung ai kun?

 17 N hkru ai masha ni gaw ngarai hta htani htana zingri hkrum na ngu, nawku htung nkau mi hta sharin ya ma ai. Dai gaw Yehowa hpe sari jahpoi ai hte bung ai. Yehowa gaw masha ni dai zawn zingri hkrum na matu galoi mung ahkang jaw na n re. (1 Yawhan 4:8 hpe hti u.) Masha langai gaw shi kasha a lata hpe wan nat nna dam jaw ai nga yang, nang gara hku hkam sha na kun? Shi hpe grai n hkru ai wa ngu nang shadu na re. Shi hpe mung nang hku hkau mayu na n re. Satan gaw Yehowa hte seng nna anhte hpe dai zawn hkam sha shangun mayu ai.

18. Si mat ai ni hpe anhte hpa majaw hkrit n ra ai kun?

18 Nawku htung nkau mi gaw masha ni si jang, wenyi byin mat ai ngu sharin ya ai. Dai wenyi ni gaw atsam kaba ai manang (sh) hkrit hpa hpyen ni byin chye ai majaw, shanhte hpe hkrit hkungga ra ai ngu, dai nawku htung ni sharin ya ma ai. Masha law law dai masu ga hpe kam ma ai. Si mat ai ni hpe hkrit ai majaw, Yehowa hpe nawku na malai, masha chyasi ni hpe shanhte nawku ma ai. Si mat sai ni gaw hpa hpe mung n lu hkam sha sai majaw, shanhte hpe hkrit n ra ai. Yehowa gaw teng man ai Karai Kasang hte Hpan Madu re ai majaw, shi hpe sha nawku ging ai.—Shingran 4:11.

19. Si ai hte seng nna teng man ai hpe chye ai gaw, anhte hpe gara hku karum ya a ta?

19 Si ai hte seng nna teng man ai hpe chye lu ai majaw, nawku htung ni a masu ai kaw nna anhte lawt lu ai. Dai teng man ai lam gaw anhte a matu htawm hpang hta Yehowa galaw ya na ga sadi ni hpe, chye na na matu karum ya ai.

20. Hpang na daw hta anhte gara lam chye lu na kun?

20 “Masha gaw si wa sa yang, bai hkrung rawt lu na kun?” nga nna Karai Kasang a mayam Yoba san wa ai. (Yoba 14:14) Si mat ai ni bai hkrung rawt wa na gaw, teng sha byin mai na kun? Chyum Laika hta Karai Kasang anhte hpe mahtai jaw da ai gaw grai myit kahpra hpa re. Hpang na daw hta dai lam chye lu na re.

^ စာပိုဒ်၊ 5 Marai langai ngai si mat ai hpang, shi a wenyi gaw asak naw hkrung nga ai ngu, masha nkau mi kam ma ai. Grau nna chye mayu yang chyeju hte Jahtum Matsing 17 hpe yu u.