1, 2. (a) Na a matu gara kumhpa gaw manu dan ai kun? (b) Gawng malai jahpu gaw hpa majaw Karai Kasang a kaja dik htum kumhpa rai a ta?

NANG lu ga ai kumhpa ni kaw nna, kaja htum kumhpa gaw hpa rai a ta? Nang manu shadan ai kumhpa gaw, manu dan n ra ai. Dai kumhpa gaw, nang gaja wa ra nga ai (sh) nang hpe kabu shangun ai nga yang, nang manu shadan na re.

2 Karai Kasang anhte hpe jaw da ai kumhpa ni kaw nna langai gaw, anhte a matu grai ra nga ai kumhpa re. Dai gaw masha ni a matu, Karai Kasang a kaja dik htum kumhpa re. Ndai daw hta, Yehowa gaw shi a Kasha Yesu Hkristu hpe shangun dat ai majaw, anhte htani htana asak lu wa ai lam hpe hkaja yu ga. (Mahte 20:28 hpe hti u.) Yesu hpe gawng malai jahpu hku nna mungkan de shangun dat ai hpe yu yang, Yehowa anhte hpe grai tsawra ai lam, sakse madun nga ai.

GAWNG MALAI JAHPU GAW HPA RAI A TA?

3. Masha ni hpa majaw si ra ai kun?

3 Gawng malai jahpu ngu ai gaw, masha ni yubak hte si ai kaw nna lawt lu na matu, Yehowa lajang ya ai lam re. (Ehpesu 1:7) Gawng malai jahpu hpa majaw ra ai hpe chye na na matu, Edin sun hta hpa byin wa ai lam anhte chye ra ai. Adam yan Ewa gaw mara galaw wa ai. Shanhte mara galaw ai majaw si ra ai. Anhte mung Adam yan Ewa kaw nna, yubak lu wa ai majaw si ra ai.—Jahtum Matsing 9 hpe yu u.

4. Adam gaw kadai rai nna shi hta hpa ni nga ai kun?

 4 Yehowa gaw Adam hpe hpan ai shaloi, grai manu dan hkum tsup ai asak jaw da ai. Shi hta hkum tsup ai myit masin hte, hkum tsup ai hkum hkrang nga ai. Shi gaw galoi mung n ding la, n machyi ai zawn, si mung n si ai. Yehowa gaw Adam hpe hpan da ai majaw shi a matu kawa zawn mung re ai. (Luka 3:38) Yehowa gaw shi hte ayan ga shaga nna myit dik lam lu ai bungli ni mung jaw da ai. Shi kaw nna hpa myit mada ai hpe mung asan sha tsun da ai.—Ningpawt 1:28-30; 2:16, 17.

5. “Karai Kasang gaw shi a hkrang sumla” hte maren Adam hpe hpan da ai ngu ai lachyum gaw hpa rai a ta?

5 “Karai Kasang gaw shi a hkrang sumla” hte maren, Adam hpe hpan da ai. (Ningpawt 1:27) Yehowa gaw shi a atsam ningja ni re ai tsawra myit, tara ai lam, hpung atsam hte nyan hpaji ni shalawm nna Adam hpe hpan da ai. Adam hpe wanglu wanglang lata lu ai ahkang jaw da ai. Adam gaw jak langai n re. Karai Kasang gaw shi hpe shut ai jaw ai hpe lata lu ai nyan bang ya ai. Karai Kasang a ga madat na matu Adam lata na nga yang, Hparadisu hta htani htana nga lu na re.

6. Adam gaw Karai Kasang a ga n madat ai shaloi hpa sum mat ai kun? Dai gaw anhte hpe gara hku hkra machyi shangun ai kun?

6 Adam gaw Karai Kasang a ga n madat ai majaw si ra ai. Adam gaw grai manu dan ai hpe jaw kau ra ai. Shi gaw Yehowa hte hku hkau lam, hkum tsup ai asak hte Hparadisu nta hpe sum mat ai. (Ningpawt 3:17-19) Adam yan Ewa gaw, Karai Kasang a ga n madat na matu lata wa ai majaw, shan yan myit mada shara n nga mat sai. Adam mara galaw wa ai majaw, “Yubak gaw mungkan ga e shang wa nna, yubak a majaw si hkrung si htan shang nang wa ai hte maren, yawng mayawng yubak kap nga ma ai majaw, masha n lang kaw e si hkrung si htan du bang wa sai.” (Roma 5:12) Adam yubak galaw ai majaw, shi hkum shi yubak hte si ai de “dut kau” ai zawn, anhte hpe mung dut kau ai. (Roma 7:14, JCLB) Anhte hta myit mada shara nga ai kun? Nga ai.

7, 8. Gawng malai jahpu gaw hpa rai a ta?

 7 Gawng malai jahpu gaw hpa rai a ta? Gawng malai jahpu hta madung lam lahkawng lawm ai. Langai, gawng malai jahpu gaw, marai langai lawt lu na matu (sh) mari la na matu jaw ra ai jahpu re. Dai hpe majan hta rim hkrum ai, bawng masha langai lawt lu na matu, jaw ra ai manu hte shadawn mai ai. Lahkawng, gawng malai jahpu gaw lama ma hpe magap ya ai (sh) lama ma a matu jaw ra ai manu jahpu re. Hten za mat ai hpe bai kaja hkra galaw na matu wa ra ai manu jahpu hte bung ai.

8 Adam a majaw anhte hkrum nga ai yubak hte si hkrung si htan kaw nna, lawt lu hkra kadai mung n galaw ya lu ai. Raitim, Yehowa gaw anhte hpe yubak hte si ai kaw nna lawt lu na matu lajang ya ai. Dai gaw gawng malai jahpu re. Dai hpe shi gara hku galaw ya wa ai hte, dai kaw nna hpa akyu lu na lam hkaja yu ga.

GAWNG MALAI JAHPU HPE YEHOWA LAJANG YA

9. Gawng malai jahpu gara hku jaw lu na kun?

9 Adam sum mat ai asak gaw hkum tsup ai asak re. Dai hkum tsup ai asak a matu, gawng malai jahpu kadai mung n lu jaw ai. Hpa majaw nga yang, anhte yawng gaw Adam kaw nna yu hkrat wa ai majaw n hkum tsup ai. (Shakawn 49:7, 8) Gawng malai jahpu a matu, hkum tsup ai asak hpe jaw ra ai. Adam sum mat ai hkum tsup ai asak Yesu hta nga ai majaw “yawng mayawng a matu mara shi hkum nan hpe gawng malai hkungga” hku nna jaw wa ai re.—1 Timohti 2:6.

10. Yehowa gaw gawng malai jahpu hpe gara hku lajang ya ai kun?

10 Yehowa gaw gawng malai jahpu hpe gara hku lajang ya ai kun? Yehowa gaw shi a manu dan dik ai Kasha hpe, mungkan de shangun dat ai. Dai Kasha Yesu gaw shi shawng nnan hpan ai wa re. (1 Yawhan 4:9, 10) Yesu gaw shi a Kawa hte, sumsing lamu na nta hpe sharawng awng let kau da ai. (Hpilipi 2:7) Yehowa gaw Yesu hpe sumsing lamu kaw nna mungkan de htawt ya ai majaw, shi gaw hkum tsup ai masha langai hku shangai wa ai.—Luka 1:35.

Yehowa gaw shi a manu dan ai Kasha hpe anhte a matu, gawng malai jahpu hku nna jaw ya

11. Masha langai gaw masha yawng a matu gawng malai jahpu jaw lu na kun?

 11 Yehowa a ga Adam n madat ai majaw, masha yawng hkum tsup ai asak sum mat ai. Adam a kasha ni hkrum nga ai, si hkrung si htan hpe marai langai ngai yeng seng ya lu na kun? (Roma 5:19 hpe hti u.) Yubak galoi mung n galaw ai Yesu gaw hkum tsup ai asak hpe gawng malai jahpu hku nna jaw wa ai. (1 Korinhtu 15:45) Dai majaw, Yesu a hkum tsup ai asak hte Adam a kasha ni hkrum nga ai si hkrung si htan hpe yeng seng ya lu ai.—1 Korinhtu 15:21, 22.

12. Yesu hpa majaw grai hkam sharang wa ai kun?

12 Yesu n si shi yang, grai n ni n kri hkrum wa ai lam, Chyum Laika hta tsun da ai. Shi gaw kayat hkrum ai, hpun hta hpri hte adit hkrum nna, n ni n kri hkrum let si ai du hkra, hkam sharang wa ai. (Yawhan 19:1, 16-18, 30) Yesu hpa majaw, dai daram hkam sharang wa ai kun? Hpa majaw nga yang, chyam dinglik hkrum yang, kadai mung Karai Kasang hpe sadi dung na n re ngu, Satan tsun da ai majaw re. Hkum tsup ai wa gaw, grai n ni n kri hkrum tim, Karai Kasang hpe sadi dung lu ai lam, Yesu sakse madun wa ai. Yehowa gaw Yesu a majaw, grai arawng la nga na hpe myit yu u.—Ga Shagawp 27:11; Jahtum Matsing 15 hpe yu u.

13. Gawng malai jahpu gara hku sak jaw wa ai kun?

13 Gawng malai jahpu gara hku jaw wa ai kun? Yesu gaw Kawa hpang shi a asak manu hpe jaw wa ai. A.D. 33 Yuda shata hti laika, Nisan 14 ya hta, Yesu a hpyen ni Yesu hpe sat na ahkang, Yehowa jaw wa ai. (Hebre 10:10) Masum ya na ai hpang, Yehowa gaw Yesu hpe shinggyim hkum hte n re ai sha, wenyi hkum hte bai jahkrung ya ai. Dai hpang, Yesu gaw sumsing lamu hta nga ai shi Kawa Yehowa hpang bai wa ai shaloi, hkum tsup ai shi a asak manu hpe gawng malai jahpu hku nna, sak jaw wa ai. (Hebre 9:24) Gawng malai jahpu sak jaw ngut sai majaw, anhte yubak hte si ai kaw nna lawt lu na ahkang nga wa sai.—Roma 3:23, 24 hpe hti u.

 GAWNG MALAI JAHPU KAW NNA NANG AKYU LU MAI

14, 15. Anhte mara raw dat hkrum na matu hpa galaw ra na kun?

14 Karai Kasang a kaja htum kumhpa kaw nna anhte akyu lu wa sai. Anhte ya aten hte htawm hpang hta, gara hku akyu lu na hpe yu yu ga.

15 Anhte mara raw dat hkrum ai. Aten shagu, teng man ai hpe galaw na matu n loi ai. Anhte kalang lang mara galaw ai, tsun shaga ai hta shut chye ai. (Kolose 1:13, 14) Anhte gara hku mara raw dat hkrum na kun? Anhte a shut hpyit ai lam ni hpe, teng sha myit malai lu nna mara raw ya na matu, Yehowa hpang shagrit shanem let hpyi shawn ra ai. Shaloi, anhte teng sha mara raw dat hkrum na re.—1 Yawhan 1:8, 9.

16. Anhte a myit asan sha nga lu na matu hpa galaw ra na kun?

16 Anhte a myit asan sha nga lu na. Anhte lama ma galaw shut yang, anhte a myit gaw, anhte mara nga ai, myit mada lam n nga sai, manu n dan sai ngu nna pyi, hkam sha shangun na re. Raitim asum hkum jaw. Anhte a mara raw ya na matu, Yehowa hpe hpyi shawn na nga yang, shi madat ya nna mara raw ya na hpe kam mai ai. (Hebre 9:13, 14) Yehowa gaw anhte a gawng kya lam ni hte manghkang ni, shi hpe tsun dan shangun mayu ai. (Hebre 4:14-16) Dai hku galaw yang, Karai Kasang hte grau hku hkau wa nna ngwi pyaw simsa lam mung lu wa na re.

17. Yesu si hkam ai majaw, anhte hpa shaman chyeju ni lu wa na kun?

17 Anhte htani htana asak hkrung na matu myit mada lam nga ai. “Yubak a shabrai gaw si mat ai rai nga ai; Karai Kasang a chyeju kumhpa chyawm gaw, anhte a Madu Hkristu Yesu hta e, htani htana asak rai nga ai.” (Roma 6:23) Hpa majaw nga yang, Yesu gaw anhte a matu si hkam ya ai majaw, anhte hkum tsup ai hkamja lam nga nna htani htana asak hkrung lu na re. (Shingran 21:3, 4) Raitim, dai shaman chyeju lu na matu anhte hpa galaw ra na kun?

 GAWNG MALAI JAHPU HPE NANG HKAP LA NA KUN?

18. Yehowa anhte hpe tsawra ai lam gara hku chye lu ai kun?

18 Marai langai gaw nang hpe kumhpa jaw yang, nang kade daram kabu ai hpe myit yu u. Gawng malai jahpu gaw yawng hta na grau manu dan ai kumhpa re ai majaw, de a matu Yehowa hpe grai chyeju dum ra ai. Yawhan 3:16 hta, “Karai Kasang gaw shi a Kasha shingtai hpe jaw kau ai kaw du hkra, mungkan ga hpe tsaw ra wu ai” nga nna tsun da ai. Yehowa anhte hpe grai tsawra ai majaw shi a manu dan ai Kasha Yesu hpe jaw ai. Yesu gaw anhte a matu sharawng awng let si hkam wa ai majaw, shi mung anhte hpe tsawra ai lam chye lu ai. (Yawhan 15:13) Gawng malai jahpu jaw ai hpe yu yang Yehowa hte Yesu gaw nang hpe gaja wa tsawra ai lam kam mai ai.—Galati 2:20.

Yehowa a lam hkaja yang, anhte shi a jinghku byin wa na, shi hpe grau tsawra wa na

19, 20. (a) Nang Yehowa a jinghku gara hku byin mai na kun? (b) Yesu a gawng malai jahpu hpe kamsham ai lam, nang gara hku madun lu na kun?

19 Karai Kasang a tsawra myit hte seng ai lam ni hpe ya hkaja ngut sai. Rai yang, shi a jinghku nang gara hku byin lu na kun? Tinang n chye ai wa hte jinghku byin na gaw n loi ai. Yawhan 17:3 hta, Yehowa hpe chye chyang mai na lam tsun da ai. Dai majaw, Yehowa hpe anhte chye chyang wa ai shaloi, shi hpe grau tsawra wa na, shi hpe myit pyaw shangun mayu wa na, shi a jinghku byin wa na. Dai majaw, Chyum Laika hkaja nna Yehowa a lam matut sharin nga ga.—1 Yawhan 5:3.

20 Yesu a gawng malai jahpu hpe kamsham ai lam madun u. “Kasha wa hpe kam sham ai wa gaw, htani htana asak lu” na ngu Chyum Laika hta tsun da ai. (Yawhan 3:36) Yesu hpe kam sham ai lam gara hku madun na kun? Dai makam masham hpe n-gup ga hte sha n mai tsun ai. ‘Makam masham hta, magam bungli n lawm yang gaw, chyasi rai nga ai’ ngu Yaku 2:26 hta tsun da ai. Jet ai makam masham hpe “bungli” hte madun ra ai. Yesu hpe kasi  la let, shi hkang da ai tara ni hpe hkan sa nna gawng malai jahpu hpe kamsham ai lam madun mai ai.—Yawhan 13:15.

21, 22. (a) Shaning shagu galaw ai Hkristu a Myit Dum Poi hpe hpa majaw lung ra ai kun? (b) Daw 6 hte 7 hta gara lam hkaja na kun?

21 Hkristu A Myit Dum Poi hpe lung u. Yesu n si shi ai shana hta, shi a myit dum poi galaw na matu, anhte hpe htet da ai. Anhte dai poi hpe shaning shagu galaw nna, Myit Dum Poi (sh) “Madu A Shana Shat Sha” poi nga nna shaga ai. (1 Korinhtu 11:20; Mahte 26:26-28) Yesu gaw shi a hkum tsup ai asak hpe, gawng malai jahpu hku nna jaw wa ai lam, anhte hpe myit dum shangun mayu ai. “Ngai hpe adum nga na matu, ndai galaw mu” nga nna tsun da ai. (Luka 22:19 hpe hti u.) Nang ndai Poi lung ai gaw, Yehowa hte Yesu a tsawra myit hte gawng malai jahpu hpe manu shadan ai lam madun ai re.—Jahtum Matsing 16 hpe yu u.

22 Gawng malai jahpu gaw anhte yawng a matu kaja htum kumhpa re. (2 Korinhtu 9:14, 15) Ndai manu dan ai kumhpa a majaw, si mat ai masha wan law law pyi akyu lu na re. Daw 6 hte 7 hta, ndai lam gara hku byin mai na hpe hkaja yu ga.