Content de lai

Malawm Ni Hpe Lai U

Maumwi 113: Pawlu Roma Kaw Nga Ai Shaloi

Maumwi 113: Pawlu Roma Kaw Nga Ai Shaloi

Pawlu lata na hpri sin-yu hpe yu mu. Roma hpyen la shi hpe sin nga ai hpe yu mu. Pawlu gaw Roma kaw e bawng dung nga ai. Kehta hkawhkam shi hpe kaning di jeyang na mahtai n chye ding sa la nga ai. Shi bawng dung nga ai aten hta masha ni shi kaw sa hkawm chyai lu ai ahkang nga ai.

Pawlu Roma du ai masum ya rai jang Yuda ningbaw ni shi hpang de sa wa na matu, aga htet dat ai. Dai rai nna Roma mare na Yuda masha ni law law shi kaw sa ma ai. Pawlu gaw shanhte hpe Yesu hte Karai Kasang a mungdan lam hpe hkaw tsun dan ai. Nkau mi kam sham wa nna Hkristan ni tai wa ma ai. Raitimung masha nkau mi nkam ma ai.

Htawng kata na Pawlu

Shi hpe sin nga ai hpyen la ni hpe mung shi hkaw tsun dan ai. Dai kaw e lahkawng ning htawng rawng ai aten hta, masha shagu hpe dang lu ai made hkaw dan ai. Dai majaw Kehta a dum nta masha ni pyi, mungdan a kabu gara shi ga hpe na la nna nkau mi Hkristan tai wa ma ai.

Raitimung ndai shaku hta laika ka nga ai wa gaw kadai wa rai kun? Tak yu mu. Teng ai. Timohti re. Timohti mung Karai Kasang a mungdan kabu gara shiga hkaw tsun dan ai majaw htawng hkrat nga ai. Raitimung shi lawt sai. Shi gaw Pawlu kaw sa nna karum nga ai. Timohti hpa ka nga ai hpe chye a ni? Yu yu ga.

Maumwi 110 hta lawm ai Hpilipyi hte Ehpesu mare a lam hpe matsin a ni? Dai mare ni hta Pawlu Hkristan hpung de ai hta karum ai. Ya Pawlu bawng dung nga yang dai kaw nga ai Hkristan ni hpe laika ka ai. Dai laika ni gaw Chyum Laika kaw lawm ai. Ehpesu hte Hpilipyi laika ngu ai re. Ya Pawlu gaw Hpilipyi mare na Hkristan manaw manang ni hpang de laika ka shangun ai.

Hpilipyi masha ni Pawlu a ntsa e myit kaja tawn ma ai . Shi bawng dung nga ai shaloi kumhpa ni shakun ya ma ai. Dai majaw Pawlu gaw shanhte hpe chyeju dum laika ka ai. Kumhpa ni hpe Epahprodi ngu ai wa la sa ya ai. Raitimung dai wa gaw si na daram machyi kaba hkrum ai. Ya gaw shi hkam kaja wa sai. Shi a nta de bai nhtang wa na sai. Dai wa gaw Pawlu hte Timohti kaw na dai laika ni hpe la nna Hpilipyi mare de bai nhtang wa na sai.

Pawlu bawng dung nga ai ten hta kaga laika lahkawng hpe ka ai. Chyum Laika hta lawm ai. Langai mi gaw Kolose mare na Hkristan ni hpang de ka dat ai. Dai hpe kaning nga ma ni? Kolose laika nga ma ai. Kaga laika langai mi gaw Kolose mare kaw e nga ai shi a jinghku wa Hpilemon hpang de ka dat ai. Dai laika hta Hpilemon a shangun ma Onisimo a lam ka da ai.

Onisimo gaw Hpilemon kaw na rawt hprawng nna Roma mare de du sa wa ai. Lam amyu myu hku nna Onesimon gaw Pawlu dai mare hta htawng hkrat nga ai lam chye kau ai. Dai rai nna shi hpe sa jahkrum ai. Pawlu gaw Onesimo hpe tara hkaw dan nna kade nna yang Onesimo Hkristan langai mi tai wa ai. Ya Onesimo gaw shi rawt hprawng ai hpe myit npyaw rai wa ai. Dai majaw Pawlu gaw Hpilemon kaw laika ka ai shaloi, kaning re ai lam ka ai hpe chye a ni?

‘Onesimo hpe mara raw ya u,’ nga nna Pawlu gaw Hpilemon hpe ka dat ai. ‘Nang hpang de ngai shi hpe bai shangun dat ai. Ya gaw shi na a mayam chyu sha nrai sai. Kaja ai Hkristan hpu nau langai mi mung tai wa sai,’ nga nna ka dat ai. Onesimo gaw Kolose mare de bai nhtang wa ai shaloi, ndai laika lahkawng la wa na re. Langai mi gaw Kolose Hkristan ni a matu rai nna, kaga langai mi gaw Hpilemon a matu re. Shi a mayam wa Hkristan tai wa sai hpe Hpilemon chye jang grai kabu na re.

Pawlu gaw Hpilipyi Hkristan ni hte, Hpilemon hpang de laika ka ai shaloi, grai kabu hpa shi ga ni hpe ka dat ai. ‘Timohti hpe nanhte hpang de shangun dat na nngai. Ngai mung kade nna yang du wa na re,’ nga nna shana dat ai. Hpilemon hpe gaw: ‘nye a matu nga shara langai mi lajang da u,’ nga nna htet dat ai.

Pawlu bawng dung ai kaw na lawt wa ai shaloi, shara law law kaw nga ai shi a Hkristan hpu nau nau na ni hpang de sa hkawm ai. Raitimung Pawlu gaw Roma mare kaw e, kalang bai bawng dung hkrum ai. Ndai lang gaw shi hpe sat kau na lam shi chye ai. Dai majaw Timohti hpe alawan sa wa rit, nga nna laika ka dat ai. ‘Ngai gaw Karai Kasang hta sadi dung ni ai. Karai Kasang mung ngai hpe sali wunli ngu ai shabrai hpe shagrau ya na ra ai,’ nga nna Timohti hpe tsun ai. Shaning tsawm ra na ai hpang Pawlu sat kau hkrum sai. Yerusalem mare mung kalang mi bai jahten kau ai hkrum sai. Ndai lang Roma ni a lata hte hten mat ai.

Raitimung Chyum Laika kaw kaga laika law law naw nga ai. Yehowa Karai Kasang gaw shingran laika bang shalawm let, Chyum Laika hte hpang jahtum na laika ni hpe ka na matu, kasa Yawhan hpe lang ai. Shingran laika gaw htawm hpang prat e du wa na hpe tsun dan ai. Htawm hpang na lam hte seng nna yu yu ga.

Kasa 28:16-31; Hpilipyi 1:13; 2:19-30; 4:18-23; Hebre 13:23; Hpilemon 1-25; Kolose 4:7-9; 2 Timohti 4:7-9.