Content de lai

Secondary menu hpe lai

Malawm Ni Hpe Lai U

Yehowa Sakse Ni

Kachin

Nye a Chyum Laika Maumwi

Maumwi 112: Zunlawng Langai Mi Hta Sanghpaw Li Hten Ai

Maumwi 112: Zunlawng Langai Mi Hta Sanghpaw Li Hten Ai

Yu dat mu. Sanghpaw li hten mat sai. Adaw achyen rai nga sai. Hka hta gumhtawn bang ai masha ni hpe mu a ni? Masha nkau mi hkingau de pyi lung wa nga masai. Htaw ra kaw na masha wa gaw Pawlu nrai a ni? Shi gara hku byin ai hpe yu yu ga.

Sanghpaw li hten ai kaw na lawt wa ai ni

Kesare mare kaw e Pawlu lahkawng ning htawng rawng ai hpe naw matsing a ni? Dai hpang shi hte kaga bawng masha ni Sanghpaw li hta bang hkrum ai. Bai nna Roma mare de sa wa ma ai. Kreti zunlawng makau e du jang nbung laru kaba hkrum ma ai. Nbung laru nau ja ai majaw Sanghpaw li hpe nlu hkang hkra rai mat ai. Shani e ajan hpe nmu lu ma ai. Shana e shagan ni hpe nmu lu ma ai. Hpang jahtum e shani law law na ai hpang Sanghpaw li ntsa na masha ni asak lawt na lam myit mada shara nnga sai, nga myit ma ai.

Dai shaloi Pawlu rawt tsap nna shanhte hpe tsun ai: ‘Nanhte langai mi mung nsi na re; Sanghpaw li sha hten na re; hpa majaw nga yang mana e, Karai Kasang a lamu kasa langai mi ngai kaw dan pru nna ‘“Pawlu e hkum hkrit u! Roma hkawhkam Kehta a man e nang tsap lu na ndai; nang hte rau ndai Sanghpaw li hta jawn ai masha nlang hte hpe Karai Kasang hkye la na ra ai” nga nna tsun ai,’ nga ai.

Nbung laru kaba wa ai aten kaw na 14 ya ngu na shana yup tung hta Sanghpaw li ma ni gaw ahka yat yat yawm wa nga ai hpe dum ma ai. Sanghpaw li gaw nlung hta wa ahtu hkra jang hten mat na tsang ai majaw hpri chyinghkyi jahkrat ma ai. Hpang jahpawt e, hpung wai langai mi mu ma ai. Dai rai nna hkingau de shani la na matu shakut ma ai.

Hka kau de du jang Sanghpaw li zaibru hta mara mat ai. Li mai de hka leng Gayat hkra ai majaw Sanghpaw li ayai daw mat sai. Hpyen du wa gaw: ‘Hka hpung yawt chye ai ni yawng hka de yu nna hkarang de rap sa mu. Ngam ai ni mung hka kaw yu nna Sanghpaw li adaw achyen ni hta jum da mu,’ nga nna hkang da ai. Hkang da ai hte maren shanhte galaw ma ai. Dai rai nna lamu kasa ga sadi jaw ai hte maren, Sanghpaw li ntsa na masha 276 nsi ai sha hka kau de du lu ma ai.

Dai zunlawng a mying gaw Melite re. Dai zunlawng masha ni gaw grai matsan dum chye ma ai. Sanghpaw li na masha ni hpe yu lajang ma ai. Lamu marang masa kaja wa jang Pawlu hpe kaga Sanghpaw li hta shajawn nna Roma mare de shaga sa wa ma ai.

Kasa 27:1-44; 28:1-14.