Content de lai

Secondary menu hpe lai

Malawm Ni Hpe Lai U

Yehowa Sakse Ni

Kachin

Nye a Chyum Laika Maumwi

Maumwi 109: Koneli Kaw Petru Sa Ai

Maumwi 109: Koneli Kaw Petru Sa Ai

Ndai kaw tsap nga ai wa gaw kasa Petru re. Shi a hpang na masha ni gaw shi a manang ni rai ma ai. Raitimung ndai wa gaw Petru hpe hpa majaw dingnyawm nawku nga a ni? Shi ndai zawn galaw mai a ni? Dai wa gaw kadai wa re ai hpe chye a ni?

Koneli hte Petru hkrum ai

Ndai wa gaw Koneli re. Shi gaw Roma hpyen dap up du langai mi re. Koneli gaw Petru hpe nchye ai. Raitimung shi hpe nta kaw shaga na matu, marai langai ngai htet tawn ai. Ndai lam kaning rai byin ai kun? Yu yu ga.

Yesu a shawng ningnan na hpang hkan ai masha ni gaw Yuda masha ni rai ma ai. Koneli gaw Yuda masha langai mi nre. Raitumung Karai Kasang hpe shi tsaw ra ai. Karai Kasang kaw shi akyu hpyi ai. Masha ni hpe akyu law law galaw ai. Lana de mi hta e lamu kasa langai mi shi kaw dan pru wa nna: ‘Karai Kasang nang hpe ra sharawng ai. Na a akyu hpyi ai ga hpe mung, madat ya na re. Masha nkau mi hpe shangun dat nna Petru ngu ai masha langai mi hpe sa shaga wa shangun u. Shi gaw Yopa mare panglai makau na Simun ngu ai wa a nta hta nga ai,’ nga nna tsun ai.

Koneli mung alawansha masha nkau mi shangun dat nna Petru hpe sa tam shangun ai. Hpang shani e dai masha ni gaw Yopa mare makau de du sa wa ma ai shaloi, Petru gaw Simun a wa hpang nta numgaw pa hta du nga ai. Dai shaloi Karai Kasang gaw sumsing lamu kaw nna sumpan kaba langai mi yu hkrat wa ai zawn Petru myit la hkra galaw dat ai. Dai sumpan kaba kata e dusat amyu baw shagu lawm ai. Karai Kasang a tara hta dai dusat ni gaw nsan seng ai. Nmai sha ai. Raitimung nsen langai mi gaw: ‘Petru e, sat sha u,’ nga nna tsun ai.

‘Petru gaw nrai law madu e, nsan seng ai arai hpe ngai galoi mung nsha yu nngai,’ nga nna bai htan ai. Raitimung dai nsen gaw Petru hpe tsun ai: ‘Karai Kasang san seng ai ngu ai arai hpe n san seng ai ngu nna hkum tsun u,’ nga ai. Ndai zawn masum lang byin ai. Petru gaw ndai lam hpa rai ni? nga nna myit sumru nga yang Koneli shangun dat ai masha ni shi shingbyi nga ai nta kaw du wa nna, Petru hpe san ma ai.

Petru gaw lawu htap de yu nna: ‘nanhte tam ai wa gaw ngai rai nga nngai; kaning ngu nna sa wa ma ni? nga nna san ai. Dai masha ni gaw Petru hpe nta de sa na matu shaga mu nga nna, lamu kasa langai mi Koneli hpe tsun ai majaw sa wa ga ai re, nga nna shaleng dan ma ai. Petru gaw shanhte kaw hkan na myit hkrum ai. Hpang shani e Petru hte shi a manang ni gaw Kesare mare kaw nga ai Koneli hpang de sa wa ma ai.

Koneli gaw shi makyin jinghku ni hte hkau chyap ai manang ni hpe shaga jahpawng tawn ai. Petru du sa wa ai shaloi, shi hpe hkap tau la ai. Dai shaloi ndai sumla hta mu ai hte maren, Petru a lagaw nhpang e dingnyawm nawku ai. Raitimung Petru gaw: ‘rawt u, ngai masha she rai nngai’ nga nna tsun ai. Teng ai. Masha langai mi hpe nmai dingnyawm nawku ai nga nna Chyum Laika hta tsun tawn ai. Yehowa hpe chyu sha nawku ra ai.

Dai rai nna, Petru gaw dai hpawng de nga ai masha ni hpe hkaw tsun dan ai. ‘Karai Kasang gaw shi hpe nawku mayu ai masha ni yawng hpe hkap la ai,’ nga nna hkaw dan ai. Shi hkaw tsun nga yang Karai Kasang gaw shi a Chyoi pra ai wenyi shangun dat nna dai masha ni gaw aga amyu baw shagu tsun shaga wa ma ai. Petru hte hkan nang ai Yuda sape ni dai hpe mu nna, mau mat ma ai. Shanhte gaw Yuda masha ni hpe chyu sha Karai Kasang ra sharawng ai zawn myin nawn ma ai. Dai majaw Karai Kasang gaw masha amyu langai mi hpe kaga amyu ni hta grau kaja ai nga nna nmyit la na matu shanhte hpe sharin ya ai. Anhte mung ndai lam hpe matsing tawn yang nmai a ni?

Kasa 10:1-48; 11:1-18; Shingran 19:10.