Content de lai

Secondary menu hpe lai

Malawm Ni Hpe Lai U

Yehowa Sakse Ni

Kachin

Nye a Chyum Laika Maumwi

Maumwi 106: Htawng Kaw Na Pru Wa Ma AI

Maumwi 106: Htawng Kaw Na Pru Wa Ma AI

Hpaw nga ai htawng chyinghka hpe jum nga ai lamu kasa hpe yu dat mu. Shi shalawt dat ai masha ni gaw Yesu a kasa ni rai ma ai. Shanhte hpa majaw htawng hkrat ma ai kun? Yu yu ga.

Kasa ni hpe lamu kasa shalawt ya ai

Yesu a sape ni a ntsa e, Chyoi pra ai wenyi ru jaw ai aten kaw nna grai nna ai. Ndai zawn byin wa ai: Lana de mi hta Petru hte Yawhan gaw Yerusalem mare de sa wa ma ai. Nawku htingnu chyinghka lam e, hkritung na lagaw hten ai masha langai mi nga ai. Masha ni gaw shi hpe dai shara hta shani shagu hpai sa nna tawn da ma ai.Nawku htingnu kaw sa ai masha ni kaw na gumhpraw hpyi sha na matu re. Dai wa gaw Petru hte Yawhan hpe mu jang arai langai ngai jaw rit, nga nna hpyi ai. Kasa yan gaw kaning rai galaw na rai kun?

Shan hkring nna matsan mayam wa hpe mada yu ma ai. ‘Petru gaw ngai gumhpraw nlu ai. Raitimung ngai hta lu ai hpe jaw na, Yesu a mying hte rawt hkawm wa u,’ nga nna tsun dat ai. Bai nna shi a hkra lata hpe jum nhtawm dun sharawt dat ai. Dai wa gaw alawan rawt gumhtawn nna lam hkawm sa wa ai. Dai lam hpe masha ni mu nna grai mau ma ai. Ndai mauhpa lamik kumla a majaw kabu mat wa ma ai.

‘Yesu hpe si ai kaw na jahkrung sharawt dat ai Karai Kasang a atsam hte ning re ai mauhpa amu hpe anhte galaw dat ga ai,’ nga nna Petru tsun ai. Petru yan Yawhan aga tsun nga ma ai shaloi makam masham ningbaw nkau mi du sa wa ma ai. Shanhte grai masin pawt ma ai. Hpa majaw nga yang Petru yan Yawhan gaw Yesu bai hkrung rawt ai lam hkaw tsun nga ma ai. Dai rai nna shan hpe rim la nhtawm htawng jahkrat ma ai.

Hpang shani e makam masham ningbaw ni zuphpawng kaba galaw ma ai. Petru yan Yawhan hte, shan shamai ya ai masha hpe mung shaga tawn ma ai. Makam masham ningbaw ni gaw: ‘kade atsam hte nan ndai mauhpa amu galaw lu ma ni? tsun yu mu,’ nga nna san ma ai.

Yesu hpe si ai kaw na jahkrung sharawt dat ai Karai Kasang a atsam hte galaw ga ai, nga nna Petru tsun ai. Hkinjawng ni kaning rai galaw na hpe mung achye mat ma ai. Hpa majaw nga yang dai mauhpa amu teng teng byin ai hpe nmai ndang kau ai majaw re. Dai majaw Yesu a lam hte seng nna matut hkum hkaw jat masa, nga sadi jaw dat nhtawm shan hpe dat dat ma ai.

Nhtoi law law na mat wa ai hte maren, kasa ni gaw Yesu a lam hpe matut nna hkaw nga ma ai. Machyi ai masha ni hpe matut nna shamai ya ma ai. Ndai mauhpa amu ni galaw dan ai shiga ni gaw chyam mat wa ai. Dai rai nna Yerusalem grup yin na kahtawng ni gaw machyi makaw hkrum ai masha ni hpe shaga sa wa nhtawm, kasa ni hpe shamai shangun ma ai. Dai hpe makam masham ningbaw ni manawn ma ai. Dai majaw kasa ni hpe rim la nhtawm htawng jahkrat ma ai. Raitimung kasa ni gaw htawng kata kaw e na hkra nnga ma ai.

Shana ahkying hta Karai Kasang a lamu kasa gaw htawng chyinghka hpe hpaw dat ai. Ndai sumla hta rawng ai hte maren sha re. Lamu kasa gaw: ‘Sa mu, nawku htingnu kaw tsap nhtawm masha ni hpe matut nna tsun dan mu,’ nga nna tsun ai. Hpang jahpawt e makam masham ningbaw ni gaw masha hpe shangun dat nhtawm kasa ni hpe shapraw wa shangun ai shaloi, kasa ni dai kaw nnga sai. Hpang e kasa ni gaw nawku htingnu hta masha ni hpe hkaw tsun dan nga ma ai hpe dai masha ni mu nna shanhte hpe Sanhe-drin ngu ai thingnu de shaga wa ma ai.

‘Makam masham ningbaw ni gaw: ‘Yesu a lam matut hkum hkaw mu, ngu nna anhte aja awa pat hkum da saga ai. Raitimung Yerusalem mare ting nanhte a sharin shaga tara hte hpring di manit dai,’ nga nna tsun ma ai. Kasa ni gaw: ‘Anhte gaw masha a ga hta grau nna Karai Kasang a ga hpe madat na ga ai,’ nga nna bai htan ma ai. Shing rai “kabu gara shi ga” hpe matut nna hkaw tsun dan nga ma ai. Anhte a matu grai kaja ai kasi ningli n rai ni?

Kasa daw kaba 3 kaw na 5.