Content de lai

Secondary menu hpe lai

Malawm Ni Hpe Lai U

Yehowa Sakse Ni

Kachin

Nye a Chyum Laika Maumwi

Maumwi 103: Zaw La Ai Gawk De Shang Ai

Maumwi 103: Zaw La Ai Gawk De Shang Ai

Yesu a moi mang nga ai lup kaw na Petru hte Yawhan pru wa ai hpang, Mari langai hkrai sha hti ngam nga ai. Dai shaloi shi hkrap ai. Gum nna lup sung hku kata de mada yu dat ai. Dai shaloi e shawng na sumla kaw anhte mu ai hte maren, lamu kasa lahkawng hpe mu dat ai. Shan gaw ‘hpa rai hkrap nga a ta?’ nga nna shi hpe san ma ai.

Mari gaw, ‘Nye a madu hpe shanhte la mat wa nna kanang e tawn da kau ma ai mung ngai nchye nngai,’ nga nna bai htan ai. Dai hpang Mari gaw kayin nna yu dat yang masha langai mi hpe mu dat ai. Dai wa gaw: Kadai hpe tam nga n ni? nga nna shi hpe san ai.

Mari gaw dai wa hpe sun sin ai wa rai na zawn nawn nna, Yesu a moi mang hpe la mat ai mung shi nan rai na re, nga nna myit ai. Dai majaw: ‘Nye a madu hpe nang hpai la kau ai rai yang gaw, kanang e tawn da ai hpe tsun dan rit law,’ nga nna tsun ai. Raitimung dai wa gaw Yesu nan rai nga ai. Mari nmatsing lu ai hkum hpe dagraw tawn ai. Mari amying gang nna shaga ai shaloi dai wa gaw Yesu re ai hpe Mari chye ai. Shi gaw sape ni a hpang de kagat wa nhtawm, ‘madu hpe ngai mu lu se ai,’ nga wa tsun dan ai.

Dai hpang dai shani hta nan sape lahkawng Ema-u kahtawng de sa wa nga ma yang masha langai mi gaw shan lahkawng hte rau sa wa ai. Sape lahkawng yan gaw Yesu sat kau hkrum ai majaw grai yawn nga ma ai. Raitimung dai wa gaw lam hkawm let Chyum Laika kaw na amyu myu tsun dan jang myit simsa ai lam lu la ma ai. Hpang jahtum e shan lahkawng lam lapran e shat sha na hkyen ai shaloi, dai wa gaw Yesu re ai hpe chye kau ma ai. Dai hpang Yesu mat mat ai. Dai sape lahkawng yan mung Yerusalem mare de alawansha bai nhtang wa nhtawm kasa ni hpe Yesu a lam wa tsun dan ma ai.

Dai ahkying hta nan Yesu gaw Petru hpe hkum shadan dan ai. Ndai lam hpe ngam ai masha ni na jang myit katu shajang wa ma ai. Shawng na sape lahkawng mung Yerusalem mare de bai du wa nna kasa ni hpe hkrum ma ai. Shan lahkawng hpe mung lam e Yesu hkum shadan dan ai lam tsun dan ma ai. Ndai lam ni tsun kajai hkat nga ai shaloi, mauhpa lam langai mi byin wa ai. Chye a ni?

Sumla kaw e yu dat u. Chyinghka hta zaw la tawn ai raitimung Yesu gaw gawk kata de shang wa nna hkum shadan dan ai. Dai shaloi sape ni grai kabu ma ai. Myit katu kahpra nga ai, shani nrai a ni? Dai aten du hkra Yesu gaw sape ni a man e kade lang hkum shadan dan sai kun? Manga lang rai sai n re a ni?

Yesu sape ni hpe hkum shadan dan ai

Yesu hkum shadan dan ai shaloi Htoma nnga ai. Dai majaw kaga kasa ni gaw: ‘Anhte madu hpe mu lu saga ai,’ nga nna tsun ma ai. Raitimung Htoma gaw, ngai hkum nan mu lu jang she kam na nga ai. Matsat ya na ai hpang e sape ni gaw zaw la ai gawk kata kaw e, hpawng de nga ma ai. Htoma mung lawm ai. Dai shaloi e Yesu gaw akajawng sha gawk kata kaw dan pru wa ai. Ya gaw Htoma kam sai.

Yawhan 20:11-29; Luka 24:13-43.