Yesu gaw si nna masum ya nhtoi hta bai hkrung rawt wa ai. Dai shani hta shi a sape ni a man e, aten shai nna manga lang ahkum shadan dan ai. Matut nna nhtoi 40 ya ahkum shadan dan ai. Dai hpang sape ni yu nga yang sumsing lamu de lung mat wa ai. Nhtoi shi ya na ai hpang Yerusalem mare e la nga ai Yesu a hpang hkan ai masha ni ntsa e Karai Kasang a chyoi pra ai wenyi ru jaw dat ai.

Dai hpang e Karai Kasang a hpyen ni gaw kasa ni hpe htawng sharawng da ma ai. Raitimung lamu kasa gaw shanhte hpe hkye la ai. Sape Stehpan hpe ningdang gasat ai masha ni nlung tawng hte kabai sat kau ma ai. Raitimung ningdang gasat ai masha ni kaw na masha langai mi hpe Yesu gaw shi a lak san mayam hku nna lata la ai. Dai wa gaw kasa Pawlu tai wa ai. Bai nna Yesu si ai hpang masum ning chyen na jang Karai Kasang gaw Petru hpe shangun dat nna Yuda amyu nre ai Koneli hte shi a dum nta masha ni hpe sa hkaw tsun shangun ai.

13 ning na ai hpang e Pawlu gaw langai ngu na kabu gara shiga hkaw ai hkrun lam hpe hpang ai. Lahkawng lang ngu na hta Timohti mung hkan nang sa ai. Pawlu hte shi a hkawm sa manang ni Karai Kasang hpe nawku ai hta kade daram myit kahpra na zawn re ai lam hkrum kadup ma ai lam hpe mu lu na re. Hpang jahtum e kasa Pawlu gaw Roma mung hta htawng hkrat mat wa ai. Dai hpang lahkawng ning hta shi bai lawt wa ai. Raitimung dai hpang e kalang mi bai htawng jahkrat kau ai hkrum nna shi hpe sat kau ma ai. DAW 7 hta lawm ai byin masa ni gaw shaning 32 ning a lapran e byin ai lam ni re.

Nhtoi langai mi a majaw Shawlu myi kyaw mat ai