Content de lai

Secondary menu hpe lai

Malawm Ni Hpe Lai U

Yehowa Sakse Ni

Kachin

Nye a Chyum Laika Maumwi

Maumwi 98: Tsanlun Bum Ntsa Kaw Du Nga Ai

Maumwi 98: Tsanlun Bum Ntsa Kaw Du Nga Ai

Ndai gaw Yesu tsanlun bum ntsa kaw e du nga ai. Shi a makau na masha mali gaw shi a kasa ni rai ma ai. Petru hte Andre hkan nau yan hte, Yaku hte Yawhan hkan nau rai ma ai. Tsan tsan kaw mu mada ai htingnu gaw Yerusalem kaw na Karai Kasang a nawku htingnu re.

Lawze kasha jawn nhtawm Yerusalem mare de Yesu shang sa wa ai aten kaw nna lahkawng ya na sai. Bat hpang lahkawng ya shani re. Jahpawt daw e Yesu gaw nawku htingnu kaw e nga nga ai. Dai kaw e hkinjawng agyi ni gaw Yesu hpe rim la nhtawm sat kau na matu shakut nga ma ai. Raitimung shanhte nwam rim la ma ai. Masha ni gaw Yesu hpe ra sharawng nga ma ai majaw re.

Yesu hte shi a kasa ni

Dai makam masham ningbaw ni hpe Yesu gaw ning nga nna tsun ai. ‘Pu htum ni, pu htum amyu ni,’ nga nna tsun ai. Nshawp nkap ai amu galaw ma ai majaw Karai Kasang shanhte hpe ari jaw na re, nga nna mung tsun ai. Dai hpang Yesu gaw tsanlun bum de lung mat wa ai. Dai shaloi ndai kasa mali ni gaw Yesu hpe ga san amyu myu san ma ai. Yesu hpe shanhte hpa ga san ni san ai hpe chye a ni?

Kasa ni gaw du na ra ai aten hte seng nna san ma ai. Mungkan ga ntsa na nshawp nkap ai lam mahkra hpe Yesu jahtum shamyit kau na re, ngu ai hpe shanhte chye ma ai. Raitimung galoi e me byin wa na ra ai hpe shanhte chye mayu ma ai. Yesu hkawhkam hku nna galoi bai du sa na kun?

Kalang bai du sa ai shaloi, sape ni gaw shi hpe nmu lu na ma ai hpe Yesu chye ai. Hpa majaw nga yang Yesu gaw sumsing lamu kaw e nga na rai nga ai. Dai shara hta sape ni shi hpe nmu lu sai. Dai majaw shi sumsing lamu hta e hkawhkam hku nna uphkang nga ai shaloi, ga ntsa e byin wa na ra ai kumla nkau mi a lam kasa ni hpe tsun dan ai. Dai kumla ni gaw hpa kumla ni rai ta?

Majan kaba ni byin wa na ra ai. Masha law law machyi makaw hkrum na ra ai. Hku hku ai hte nnang nawn kaba wa nna, ru hka amu ni law wa na ra ai, nga nna Yesu tsun ai. Bai nna mungkan ting chyam hkra Karai Kasang mungdan a shiga hkaw tsun dan lu na ma ai, nga nna mung tsun ai. Anhte a aten hta ndai lam ni hkum tsup nga ai hpe mu lu a ni? Mu lu sai. Dai majaw Yesu gaw sumsing lamu e uphkang nga sai, lam teng sha chye lu ai. Kade nna yang mungkan ga ntsa na nhkru nkaja ai amu mahkra hpe jahtum kau na sai.

Mahte 21:46; 23:1-39; Mahte 24:1-14; Marku 13:3-10.