Content de lai

Secondary menu hpe lai

Malawm Ni Hpe Lai U

Yehowa Sakse Ni

Kachin

Nye a Chyum Laika Maumwi

Maumwi 97: Yesu Hkawhkam Hku Nna Du Sa Ai

Maumwi 97: Yesu Hkawhkam Hku Nna Du Sa Ai

Myi nmu ai masha lahkawng hpe shamai ya ai hpang kade nna yang Yesu gaw Yerusalem makau na kahtawng kaji langai mi hta du sa wa ai. Dai shaloi shi a sape lahkawng hpe tsun ai. ‘Kahtawng de shang sa wa mu. Lawze kasha langai mi hpe mu na re. Sumri raw kau nna ngai kaw dun wa marit,’ nga nna htet dat ai.

Lawze kasha hpe shi hpang de dun wa ma ai shaloi, Yesu gaw Lawze ntsa e lung jawn dat ai. Dai hpang e tsawm ra tsan ai Yerusalem mare de jawn sa wa ai. Mare makau e du jang masha unawng hpung ni gaw shi hpe sa tau la ma ai. Shanhte hta na law law wa shanhte a hpun nba hpe raw nna, lam kaw e nep ya ma ai. Kaga nkau mi gaw Namhtan lakung lakying kran la nna lam e nep ya ma ai. Bai nna: ‘Yehowa a mying hte du sa ai hkawhkam wa Karai Kasang a shaman chyeju hkam la u ga law,’ nga nna jahtau tsun ma ai.

Yesu hpe masha ni hkap tau la ma ai

Moi shawng de na Israela hkawhkam ningnan ni Yerusalem mare de Lawze jawn sa nna masha ni a man e sa madun dan ma ai. Yesu mung dai zawn galaw ai. Dai masha ni mung Yesu hpe shanhte a hkawhkam tai na matu ra sharawng ai lam madun ma ai. Raitimung masha yawng gaw Yesu hpe nra ma ai. Nawku htingnu kaw e Yesu du ai shaloi, byin ai lam ni hpe yu nna chye lu ai.

Nawku htingnu kaw e Yesu gaw myi kyaw ai masha ni hte lagaw lata hten ai masha ni hpe shamai shatsai ya ai. Dai hpe ma kaji ni mu nna Yesu hpe shakawn ma ai. Dai lam hkinjawng ni na jang masin pawt nna Yesu hpe tsun ma ai: ‘Ma kaji ni hpa tsun nga ma ai lam nang na nni? nga nna tsun ma ai.

‘Ngai na nngai,’ ‘ma kaji ni a n-gup na shakawn kungdawn ai ga pru wa hkra Karai Kasang galaw shangun na ngu ai ga hpe Chyum Laika hta galoi mung nhti yu ma ni?’ nga nna Yesu bai tsun ai. Shing rai ma kaji ni gaw Karai Kasang a hkawhkam wa hpe matut nna shakawn nga ma ai.

Dai ma kaji ni zawn anhte tai mayu ga ai. Ntai mayu ma ni? Karai Kasang a mungdan lam hpe ntsun na matu masha nkau mi anhte hpe hkum shing dang na re. Raitimung Yesu galaw ya na ra ai mauhpa amu ni a lam hpe anhte matut nna tsun dan ra ai.

Ga ntsa hta Yesu naw nga nga ai shaloi, hkawhkam hku nna up hkang hpang na aten grai nre shi ai. Galoi e up hkang wa na kun? Yesu a sape ni chye mayu ma ai. Hpang na daw hta ndai lam hpe anhte hti lu na re.

Mahte 21:1-17; Yawhan 12:12-16.